Amubone Zyina mu Kkuti

ST. MORITZ. Sena muliliyeeyede zyina eeli? Ndiza inga mwalizyiba akaambo kakuti ndizyina lidumide munyika, oobu mbusena bwakulyookezezya buli ku Kkuti lya Engadine iili ku Switzerland. Pele ku St. Moritz mbusena bumwi buyo akati kamasena ngobayanda kapati kuswaya bantu, oobu busena buli atala amulundu wa Alps kumusanza lwaajwe ku Switzerland kufwaafwi a munyinza wa Italy. Alimwi nkokujanika Swiss National Park kwalo kuli zisamu zinji zyamisyobo-misyomo abanyama baindene-indene, ibakonzya kupa kuti Jehova Wakalenga zyintu eezyi zyoonse atembaulwe. (Int. 148:7-10) Alimwi azilengwa zimwi zyakali kucitwa kuzwa mumwaanda wamyaka wa 17.

Mumaanda manji ngomuya kubona kukkuti ooku ayakumupa kulangisya. Umwi ulakonzya kujana zyina lya Leza kalilembedwe amulyango  ngobabelesya. Mumyaanda yamyaka minji yainda cakali cilengwa buya kuzekaula anze aŋanda, kupenta a kulemba abbwe. Awa mulakonzya kubona cifwanikiso cijisi ŋanda iili mumunzi wa Bever. Ibupanduluzi ibuliko mbwakuti: “Iŋanda eeyi yakayakwa mu1715. Jehova ngamatalikilo alimwi Jehova ngamamanino. Zyoonse zyintu inga zyazwidilila kwiinda muli Leza.” Masimpe, citondezyo eeci cakaindi citondezya zyina lya Leza akaambo kakwiinduluka.

Mu Madulain mulakonzya kubona minzi mboyakali kulembwa kaindi. Eeci citondezyo caamba kuti: “Intembauzyo 127. Naatali Jehova uuyaka iŋanda, milimo yabayaki njabuyo. Lucius Rumedius. Mumwaka wa 1654.”

Ino nkaambo nzi zyina lya Leza ncolilembedwe koonse mukkuti eeli? Kaindi nikwakali kucincwa zikombelo, Ibbaibbele lyakalembwa mucina Roma mumwaambo waci Latin cakali kubelesyegwa ku Engadine. Eeli ndilyakali bbuku lyakusaanguna lyakasandululwa mumwaambo ooyu. Akaambo kakuti bakazyikkomanina nzyobakabala mujwi lya Leza ibanji tiibakali kulemba buyo mazyina aabo abwaanda pele bakali kulemba amajwi azwa mu Bbaibbele kubikilizya azyina lya Leza.

Masimpe, aaya mabala alamutembaula Jehova kuzwa ciindi naakalembwa amaanda. Beenzu abanyinzi bakkala kukkuti eeli batambwa kuti baiye zinji kujatikizya Leza Jehova kwiinda mukuswaya iŋanda ilembedwe zyina lyakwe, Iŋanda ya Bwami ya Bakamboni ba Jehova iili mu Bever.

[Nkotwakajana cifwanikiso icili apeeji 7]

© Stähli Rolf A/age fotostock