Amukulemeke Kukwatana Akuti Ncipego Cizwa Kuli Leza
Amukulemeke Kukwatana Akuti Ncipego Cizwa Kuli Leza
“Nkaambo kako mwaalumi uleelede kusia wisi abanyina akukakatila kumwanakazi wakwe, babe nyama yomwe buyo.”—MATL. 2:24.
1. Ino nkaambo nzi ncotweelede kumulemeka Jehova?
JEHOVA LEZA, nguwakatalisya lukwatano aboobo weelede kulemekwa. Mbwali mulengi wesu, Mwami wabubumbo boonse alimwi a Taateesu wakujulu, waambwa kuti ngu Sikupa “zipego zibotu zyoonse azyoolwe zyoonse zilondokede.” (Jak. 1:17; Ciy. 4:11) Eeci ncitondezyo cipati caluyando. (1 Jo. 4:8) Zyoonse nzyaatuyiisya, nzyatwaambila kucita alimwi anzyaatupa zigwasya ndiswe.—Is. 48:17.
2. Ino malailile nzi Jehova ngaakabapa bazyali bakutaanguna?
2 Bbaibbele lyaamba kuti kukwatana kuli akati kazipego “zibotu” zizwa kuli Leza. (Rut. 1:9; 2:12) Jehova naakabakwatanya ba Adamu a Eva, wakabapa malailile aakuti abagwasye mubuumi bwabo. (Amubale Matayo 19:4-6.) Nobakaatobela malailile a Leza, nibakazumanana kukkomana. Pele tiibakaatobela malailile, aboobo bakatalika kupenga kapati.—Matl. 3:6-13, 16-19, 23.
3, 4. (a) Ino mbuti bantu banji mazuba aano mbobatamulemeki Jehova Leza abaabo mbobakwetene limwi? (b) Ino nzikozyanyo nzi nzyotutiilange-lange mucibalo eeci?
3 Mbubwenya mbuli banabukwetene bakusaanguna, bantu banji mazuba aano tabatobeli malailile ngabapa Jehova. Bamwi balakaka kukwatana akaambo kakuti bajisi basimbi naa basankwa banji mbobeenda limwi, pele bamwi bayanda kucita zintu mbuli mbobayanda eeci cilakonzya kubikkilizya kukwatana amuntu ngobeelene limwi zizo. (Lom. 1:24-32; 2 Ti. 3:1-5) Balaluba kuti kukwatana ncipego cizwa kuli Leza alimwi kutacilemeka cipego eeci caamba kuti tabamulemeki Jehova Leza.
4 Zimwi ziindi, nobaba bantu ba Leza balaaunduluzya malailile aa Jehova aambuli mbwakubona kukwatana. Banabukwetene bamwi Banakristo basala kwaandaana naa kulekana kakunyina Magwalo aabazumizya kucita oobo. Ino eeci inga calekwa buti? Ino malailile aa Leza aali kubbuku lya Matalikilo 2:24 inga abagwasya buti Banakristo bakwetene? Alimwi ino aabo bayanda kukwata naa kukwatwa inga balibambila buti? Atubone zitondezyo zyotatwe zyabanabukwetene ibakali kucita kabotu ibakatondezya mbociyandika kutobela malailile aa Jehova.
Tweelede Kusyomeka
5, 6. Ino ndisunko nzi ndyobakajisi ba Zakariya a Elizabeta, alimwi ino bakalongezegwa buti akaambo kakusyomeka kwabo?
5 Zakariya a Elizabeta bakali kucita kabotu. Boonse bobilo bakali kuyanda kubelekela Jehova. Zakariya wakabeleka mulimo wakwe wabupaizi alimwi boonse bobilo bakali kuutobela Mulawo wa Leza. Zinji nzyaakabacitila Leza nzyobakali kumulumba. Pele nokuba boobo nimwakabaswaya kuŋanda yabo ku Juda nimwakabona kuti kuli cimwi catakaliko. Tiibakajisi bana. Elizabeta tanaakali kuzyala alimwi boonse bobilo bakalicembeede.—Lk. 1:5-7.
6 Mu Israyeli kaindi, kuba abana kwakali kuyandika kapati alimwi mikwasyi yakali mipati. (1 Sam. 1:2, 6, 10; Int. 128:3, 4) Muna Israyeli musankwa ikaindi wakali kukonzya kumuleka mukaintu wakwe kuti naa tanaamuzyalila bana. Zakariya wakazumanana kukkala a Elizabeta. Taku naakasola kuyandaula nzila yakuti amuleke mukaintu wakwe awalo mukaintu tanaakamusiya musankwa. Nokuba kuti kubula bana kwakali kubapa kuusa, bakazumanana kubelekela Jehova cakusyomeka. Camaleele Jehova wakabaleleka amwana musankwa mubucembele bwabo.—Lk. 1:8-14.
7. Ino muunzila nzi Elizabeta mwaakatondezya kuti ulasyomeka kumulumi wakwe?
7 Elizabeta wakali kusyomeka amunzila iimwi. Naakazyalwa Johane mwanaakwe, Zakariya wakacileka kwaambaula akaambo kakudooneka mungelo wa Leza. Nokuba boobo, Zakariya wakamwaambila mukaintu wakwe munzila iimwi kweelana ambwaakamwaambila mungelo wa Jehova kuti mwana musankwa weelede kuulikwa kuti “Johane.” Basimukobonyina abamukowa bakali kuyanda kuti mwana aulikwe zyina lya bausyi. Pele Elizabeta watobela ncaakamwaambila mulumi wakwe. Wakaamba kuti: “Peepe! Ulaulikwa lyakuti Johane.”—Lk. 1:59-63.
8, 9. (a) Ino kusyomeka inga kwabagwasya buti banabukwetene? (b) Ino muunzila nzi mulumi a mukaintu mubakonzya kutondezya kuti balasyomeka?
8 Mbuli ba Zakariya a Elizabeta, banabukwetene aano mazuba balatyompwa alimwi balijisi mapenzi aamwi. Banabukwetene batasyomeki tabakonzyi kukkala antoomwe. Kusobanya basimbi naa basankwa, kweebelela naa kubala zyintu zileta muzeezo wakoonana, bumambe azimwi zyintu, zilakonzya kupa kuti banabukwetene kabatasyomani. Kuti naa banabukwetene baleka kusyomana balaleka akumvwana. Munzila imwi kusyomeka kupa kuti mukwasyi uzumanane kubelekela antoomwe, pele kuti naa kuli cabakatazya mukwasyi ulanyongana. Aboobo, kuti mulumi amukaintu kabasyomeka balakonzya kukkala muluumuno alimwi balakonzya kwaambilana twaambo tuli kumoyo. Inzya kusyomeka kulayandika.
9 Jehova wakaambila Adamu kuti: “Mwaalumi uleelede kusia wisi abanyina akukakatila kumwanakazi wakwe.” (Matl. 2:24) Ino eeci caamba nzi? Muntu akwata naa kukwatwa tababikkili kapati maano beenzyinyina naa bamukowa cakuti waluba ngobakwetene limwi; naa kuzumizya bazyali babo kuti kabababambila twaambo lyoonse ntobayanda kucita naa tubatamvwana. Banabukwetene beelede kubelekela antoomwe. Oobo mbwayanda Leza.
10. Ino ncinzi ciyakubagwasya banabukwetene kuti kabasyomeka?
10 Nomuba muŋanda muli bantu baandeene zikombelo kusyomeka kulagwasya. Mucizyi uukwetwe kumuntu uutasyomi wakaamba kuti: “Ndilamulumba Jehova akaambo kakundiyiisya mbondikonzya kulemeka balumi bangu. Kusyomeka kwapa kuti katumvwana alimwi katulemekana kwamyaka iili 47.” (1 Ko. 7:10, 11; 1 Pe. 3:1, 2) Mweelede kubeleka canguzu kutegwa ngomukwetene limwi kalimvwa kuti ulikwabilidwe. Kwiinda mukwaambaula amumicito mweelede kujana nzila yakumutondezya kuti nguuyandika kapati munyika yoonse. Munzila iili yoonse tamweelede kuzumizya muntu naa cintu cili coonse kuti cimwaandaanye. (Amubale Tusimpi 5:15-20.) Ba Ron aba Jeannette bali kwetene myaka iili 35 yainda baamba kuti, “Akaambo kakuti tulaatobela malailile ngatwaambila Leza tulikkomene muŋanda yesu.”
Kukamantana Kulakonzya Kubagwasya Banabukwetene
11, 12. Ino mbuti ba Akula a Priskila mbobakali kubelekela antoomwe (a) kuŋanda (b) kumulimo wakumubili alimwi (c) amumulimo wakukambauka?
11 Mwaapostolo Paulo naakali kwaamba beenzyinyina ba Akula a Priskila, wakali kubaamba boonse bobilo. Aba banabukwetene ncikozyanyo cibotu ca ncaakali kwaamba Leza naakaamba kuti mwaalumi amukaintu wakwe beelede kuba “nyama yomwe buyo.” (Matl. 2:24) Lyoonse bakali kubelekela antoomwe kuŋanda, kumulimo wakumubili amumulimo wakukambauka. Mucikozyanyo, Paulo naakasika mu Korinto ciindi cakutaanguna, Akula a Priskila bakamutambula muŋanda yabo mwalo mwaakakkede kwaciindi cili mbocibede. Nibakali mu Efeso, ŋanda yabo njiyakali kubelesyegwa kucitila miswaangano alimwi bakali kubelekela antoomwe kugwasya bapya mbuli Apolo kutegwa bakomene kumuuya. (Mil. 18:2, 18-26) Bamane banabukwetene aaba basungu bakalongela ku Roma ooko ŋanda yabo nkoyakali kubelesyegwa kucitila miswaangano. Nikwakainda ciindi, bakapilukila ku Efeso kwaakuyumya-yumya bakwesu.—Lom. 16:3-5.
12 Kwaciindi cili mbocibede, Akula a Priskila bakabeleka a Paulo mulimo wakubamba matente. Alimwi twabona kuti banabukwetene aaba bakali kubelekela antoomwe. (Mil. 18:3) Cakabagwasya kapati banabukwetene aaba nkubelekela antoomwe mumulimo wakumuuya. Mu Korinto, mu Efeso amu Roma, banabukwetene aaba bakazyibidwe kuti ‘mbasimilimonyina muli Kristo Jesu.’ (Lom. 16:3) Kuli koonse nkubakakkala bakali kubelekela antoomwe kuti mulimo wa Bwami uyaambele.
13, 14. (a) Mbukkale nzi bukonzya kulesya banabukwetene kubelekela antoomwe? (b) Ino zyintu nzi zimwi zikonzya kubagwasya banabukwetene kuti babe “nyama yomwe”?
13 Masimpe ikubelekela antoomwe muzyintu kulakonzya kubayumya banabukwetene. (Muk. 4:9, 10) Mukubula coolwe banabukwetene banji tabajisi ciindi cinji cakuba angobakwetene limwi. Balabeleka ciindi cilamfwu mumilimo yabo. Bamwi milimo yabo ibapa kweendeenda kapati naa ikuunka kunze acisi balikke kutegwa kabatuma mali kuŋanda. Nokuba kuŋanda, bamwi banabukwetene balakkala balikke akaambo kakuti ciindi cinji beebelela cipeku-peku, bacita zyintu nzyobayandisya, balalikondelezya, balacita zisobano zyaamavidiyo naa a Intaneti. Sena eeci cilacitika muŋanda yenu? Kuti kacili boobo, inga mwatalika kubelekela antoomwe. Mulakonzya kugwasyanya muzyintu mbuli kujika, kusanzya mbale naa kucita milimo imwi. Sena mulakonzya kubelekela antoomwe kulanganya bana naa kugwasya bazyali benu bacembeede?
14 Iciyandika kapati nkubelekela antoomwe lyoonse muzyintu nzyomucita mubukombi bwa Jehova. Kubandika lugwalo lwabuzuba antoomwe akukomba mumukwasyi kulakonzya kupa kuti mukwasyi kauyeeya akucita azyintu cakukamantana. Alimwi mulakonzya kubelekela antoomwe mumulimo wamumuunda. Kuti kacikonzyeka mulakonzya kubeleka bupainiya kweelana abukkale bwenu, mulakonzya kucita oobo mwezi omwe naa mwaka. (Amubale 1 Bakolinto 15:58.) Mucizyi umwi wakabeleka bupainiya amuluumi wakwe wakaamba kuti: “Mulimo wamumuunda yakali nzila imwi njotwakali kuba antoomwe akubandika. Akaambo kakuti toonse twakajisi makanze aakugwasya bamwi kumuuya, eeci cakatugwasya kapati. Eeci cakatupa kuti katumvwana kapati abalumi bangu.” Nomubelekela antoomwe muzyintu nzyomukkomanina, nzyomukanzide kucita alimwi azyintu zimwi munakweendelana angomukwetene limwi mbubwenya mbuli ba Akula a Priskila alimwi munakuyeeya akucita zyintu mbuli “nyama yomwe.”
Leza Ulakonzya Kumusololela
15. Ino ncintu nzi cikonzya kubagwasya banabukwetene? Amupandulule.
15 Jesu wakalizyi mbociyandika kubikka Leza kumbele mulukwatano. Wakamubona Jehova naakali kukwatanya bantu bakusaanguna. Wakababona ba Adamu a Eva mbobakali kukkomana nibakacili kutobela malailile aa Leza alimwi wakababona mbobakapenga nibakacileka. Aboobo, Jesu naakali kuyiisya bamwi wakali kwaamba malailile aabausyi aali kubbuku lya Matalikilo 2:24. Alimwi wakati: “Eeco Leza ncaakaswaanganya kutabi muntu uucaandaanya.” (Mt. 19:6) Aboobo kulemeka Jehova ncecintu cipati cikonzya kubapa kuti bakkSomane banabukwetene. Akaambo kaceeci, bazyali ba Jesu ba Josefa a Mariya bakali cikozyanyo cibotu.
16. Ino mbuti ba Josefa a Mariya mbobakali kwiitobela milawo ya Leza mumukwasyi wabo?
16 Josefa wakali alubomba alimwi wakali kumulemeka Mariya. Naakazyiba kuti musimbi wakwe ulimitide, wakazumanana kumuyanda nokuba kuti mungelo wa Leza tanaakaninga mwaambila cakamucitikila Mariya. (Mt. 1:18-20) Banamukwasyi aaba bakautobela Mulawo wa Kaisara awa Musa. (Lk. 2:1-5, 21, 22) Nokuba kuti kumapobwe akali kucitikila ku Jerusalemu kwakali kuyandika buyo basankwa balikke, balo ba Josefa a Mariya antoomwe abamukwasyi wabo bakali kuunka amwaka. (Dt. 16:16; Lk. 2:41) Munzila eeyi anzila zimbi, aaba banabukwetene bakali kuyandisya kumubelekela Jehova akuzyibikkila maano zyintu zyakumuuya. Nkakaambo kaako Jehova ncaakabasalila kuti bakomezye Jesu imwanaakwe naakazyalwa anyika.
17, 18. (a) Ino muunzila nzi banabukwetene mobakonzya kusololelwa amalailile aa Leza? (b) Ino eeci inga cabagwasya buti?
17 Sena andinywe mumukwasyi wenu mulasololelwa amalailile aa Leza? Mucikozyanyo, nomuyanda kusala zyintu ziyandika kapati, sena mulaakutaanguna kulanga njiisyo zyamu Bbaibbele ncozyaamba naa mulaakukapailila kaambo aako akulomba kugwasyigwa ku Banakristo basimide? Naa sena mulaakwaamana mapenzi kweelana ambomulimvwa naa mbobalimvwa banamukwasyi abeenzyinyoko? Sena mulasoleka kubelesya malailile ngapa muzike musyomesi kujatikizya banabukwetene abamukwasyi? Naa sena mulaakutobela buyo zilengwa zicitika ooko nkomukkala naa mabbuku aakunyika? Sena mulapaila akubalila antoomwe akubikka mbaakani yazyintu nzyomuyanda kucita kumuuya akubandika zyintu ziyandika kapati mumukwasyi?
18 Ba Ray bakaamba kuti mumyaka iili 50 yainda kabakwetene, “Taku penzi lyakatwaalila kumana akaambo kakuti lyoonse tulamubikkilizya Jehova kuti abe mbuli ‘Kakole kaindulwidwe katafwambaani kudunsuka.’” (Amubale Mukambausi 4:12.) Ba Danny aba Trina balazuminizya kabaamba kuti, “Akaambo kakuti tulamubelekela Leza antoomwe, tulikkomene kapati muŋanda yesu.” Balaamyaka iili 34 kabakwetene. Kuti lyoonse Jehova kali kumbele akati kenu, uyakumugwasya alimwi uyakumulongezya kapati.—Int. 127:1.
Kamuzumanana Kulumba Cipego Cizwa Kuli Leza
19. Ino nkaambo nzi Leza ncaakapeda cipego cakukwatana?
19 Bantu banji aano mazuba babikkila buyo maano kuzyintu zibakkomanisya. Pele mubelesi wa Jehova tabusyi mbwazyibona zyintu oobo pe. Ulizyi kuti Leza wakabikka bubambe bwakukwatana kutegwa makanze aakwe azuzikizigwe. (Matl. 1:26-28) Kuti ba Adamu a Eva nibakacikkomanina cipego ncibakapegwa, nyika yoonse niyali paradaiso alimwi niyalizwide bantu ba Leza bakkomene alimwi baluleme.
20, 21. (a) Ino nkaambo nzi ncotweelede kubona lukwatano kuti mbubambe bwa Leza buyandika kapati? (b) Ino ncipego nzi ncotuya kwiiya nsondo iiboola?
20 Kwiinda zyoonse, babelesi ba Leza bakubona kuti kukwatana kupa kuti batembaule Jehova. (Amubale 1 Bakolinto 10:31.) Mbweena mbotwalibonena kale, kusyomeka, kukamantana akucita zyintu munzila ya Leza kulakonzya kumukkomanisya Jehova akubakamantanya banabukwetene. Aboobo, nokuba kuti tulibambila kukwata naa kukwatwa naa kuzumanana angomukwetene limwi, tuyandika kubona kukwatana ncocaamba kuti oobu: mbubambe bwa Leza buyandika kapati. Kuciyeeya eeci kulakonzya kupa kuti zyintu nzyobasala banabukwetene kazyaambwa kweelana ancolyaamba Jwi lya Leza. Munzila eeyi tutondezya kulumba kucipego cakukwatana alimwi akuli yooyo Wakatupa cipego eeci Jehova Leza.
21 Lukwatano tacili ncecipego celikke Jehova ncaatupa; alimwi taili nenzila ilikke iileta lukkomano mubuumi. Mucibalo citobela tulalanga-langa cipego acimwi cizwa kuli Leza—cipego cakutakwata naa kutakwatwa.
Ino Inga Mwaingula Buti?
• Ino kusyomeka inga kwabagwasya buti banabukwetene Banakristo?
• Ino nkaambo nzi kubelekela antoomwe ncokunga kwabagwasya banabukwetene?
• Ino ninzila nzi zimwi banabukwetene nzyobakonzya kusololelwa amalailile aa Leza?
• Ino mbuti mbotukonzya kumulumba Jehova Sikutalisya lukwatano?
[Mibuzyo yaciiyo]
[Zifwanikiso izili apeeji 15]
Kubelekela antoomwe cigwasya banabukwetene kukamantana
