Kuyeeya Zyintu Nzyaamutucitila Jehova

NAAKABUKA buyo Jesu, basikwiiya bakwe bobile bakali kweenda kuzwa ku Jerusalem kuya ku Emmaus. Imakani Mabotu aamulumbe wa Luka akaamba kuti, “Nobakali kubandika, Jesu lwakwe kumugama wakasika akutalika kweenda ambabo, pele nokuba kuti bakalimubwene, tiibakamuzyiba pe.” Amane Jesu wakababuzya kuti: “Ino makani nzi aaya ngomwaambaula nomuyaabweenda? Mpoonya bakaima kabauside.” Ino ncinzi cakabapa kuusa? Basikwiiya bakwe bakali kuyeeya kuti Jesu eeco ciindi wakeelede kufwutula bana Israyeli kuti baleke kudyaamininwa a Bamasi, pele eeci tiicakacitika pe. Muciindi caboobo, Jesu wakajaigwa. Eeci ncicakabapa kuusa.—Lk. 24:15-21; Mil. 1:6.

Jesu wakatalika kubandika abasikwiiya bakwe. “Eelyo kutalikila kuli Musa alimwi a Basinsimi boonse, wakabapandulwida zyintu zyaamba nguwe mu Magwalo oonse.” Masimpe, zyintu zinji izikonzya kutuyumya kumuuya zyakacitika Jesu naakali kubeleka mulimo wakwe. Basikwiiya bakwe nobakali kumuswiilila Jesu naakali kupandulula bakakkomana muciindi cakuusa. Amane buzuba oobo mangolezya bakaamba kuti: “Sena myoyo yesu tiiyali kupya ciindi naali kwaambaula andiswe munzila, anaali kutupandulwida Magwalo?” (Lk. 24:27, 32) Ino ncinzi ncotwaiya kweelana mbobakacita basikwiiya ba Jesu?

Ino Mbuti Mbocimujatikizya Cintu Catazuzikizigwa?

Basikwiiya bobile bakali kuya ku Emmaus bakausa akaambo kakuti cintu ncobakali kulangila tiicakacitika. Bakalimvwa mbuli mbolwaamba lugwalo lwa Tusimpi 13:12 kuti: “Bulangizi butafwambi kuzuzikizigwa bulacisya moyo.” Mbubwenya buyo andiswe, notwali kubelekela Jehova kwa myaka minji ndiza tuyeeya kuti “mapenzi mapati” naakacitika alimwi notwakaluba kale. (Mt. 24:21; Ciy. 7:14) Cileelela kuyeeya kuti icintu ncimwali kulangila catacitika cilakonzya kumupa kuusa.

Kamuyeeya kuti basikwiiya aaba bobile bakakkomana Jesu naakabagwasya kubona kuti businsimi bumwi bwakazuzikizigwa kale alimwi ibumwi bwakazuzikizigwa  nobakacili kupona. Andiswe tulakonzya kucita mbubwenya oobo kuti naa kuli cakatutyompya. Michael Munakristo imwaalu wakaamba kuti: “Mutani kuzibikkili maanu zyintu nzyatanacita Jehova. Muciindi cakucita boobo, kamubikkila maano kuzyintu nzyaakacita kale.” Aaya malailile mabotu.

Ncaacita Jehova

Amubone zyintu zipati-pati Jehova nzyaazuzikizya kale. Jesu wakati: “Ooyo uundisyoma awalo uyoocita milimo njondicita; alimwi uyoocita milimo mipati kwiinda yeeyi.” (Joh. 14:12) Aano mazuba babelesi ba Leza balaizuzikizya milimo mipati-pati yeelede kucitwa a Banakristo. Bantu bainda kumamiliyoni aali ciloba bayakufwutuka ciindi camapenzi mapati. Kamuyeeya kuti taku nibakavwulide boobu babelesi ba Jehova munyika. Jehova wapa kuti businsimi bwamajwi aa Jesu aakuti “milimo mipati kwiinda yeeyi” buzuzikizigwe.

Ino ncinzi cimwi ncaatucitila Jehova? Wapa kuti bantu babombe myoyo bazwe munyika eeyi mbyaabi kubelesya maambilambali akunjila mu paradaiso yakumuuya njaakabamba. (2 Ko. 12:1-4) Amujane ciindi cakuyeeya zyintu zimwi izili mu paradaiso eeyi nzyotukonzya kubona. Mucikozyanyo, kamulanga aawo mpomubikka mabbuku eenu kuŋanda naa ku Ŋanda ya Bwami. Amulange Watch Tower Publications Index naa amulange-lange mu Watchtower Library. Amuswiilile cisobano camu Bbaibbele cakalekoodwa. Kamuyeeya zyakali kwaambwa azyakali kucitika mucisobano kumuswaangano wakainda ino-ino. Kuyungizya waawo, kamuyeeya buyo mbotwakakkomana kuswaangana abakwesu abacizi Banakristo. Eelo kaka Jehova mwaabi ulatupa cakulya cakumuuya cinji abakwesu—eeyi niparadaiso yakumuuya ncobeni.

Sintembauzyo Davida wakaamba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe.” (Int. 40:5) Masimpe, ikubona zyintu zibotu nzyaatucitila Jehova akuyeeya zyintu nzyaya kutucitila kumbele ciya kutupa kuzumanana kubeleka amoyo wesu woonse mumulimo wa Taateesu wakujulu Jehova.—Mt. 24:13.

[Cifwanikiso icili apeeji 31]

Jesu wakabagwasya basikwiiya bakwe kuti babikkile maano kuzyintu nzyaakabacitila kale Jehova

[Zifwanikiso izili apeeji 32]

Kamuyeeya zyakali kwaambwa azyakali kucitika mucisobano kumuswaangano wakainda ino-ino