Mbotugwasyigwa Kuliyumya Mumapenzi Aindene-indene
Mbotugwasyigwa Kuliyumya Mumapenzi Aindene-indene
“Muzyintu zyoonse ndilijisi nguzu kwiinda muli yooyo uundipa nguzu.”—FLP. 4:13.
1. Ino nkaambo nzi bantu ba Jehova ncobasikilwa mapenzi?
BANTU ba Jehova balasikilwa mapenzi aindene- indene. Mapenzi aamwi alaboola akaambo kakutalondoka naa akaambo kabweende bwazyintu oobu bubyaabi. Aamwi alaboola akaambo kakutamvwana kuliko akati kabaabo babelekela Leza abatamubelekeli. (Matl. 3:15) Kuzwa kaindi, Leza wakali kubagwasya babelesi bakwe basyomeka nobakali kupenzyegwa akaambo kabukombi bwabo, nobakali kuyungwa anobakali kusikilwa mapenzi aindene-indene. Muuya wakwe uusalala ulakonzya kutugwasya andiswe.
Mbotugwasyigwa Notupenzyegwa Akaambo Kabukombi
2. Ino kupenzyegwa akaambo kabukombi kujisi makanze nzi alimwi ino kuboola munzila zili buti?
2 Kupenzyegwa akaambo kabukombi nkupenzya bantu akaambo kalusyomo lwabo. Ncobacitila boobo bayanda kuti bantu baleke kuzisyoma njiisyo eezyo nzyobasyoma akubalesya kukambauka. Kupenzyegwa kulaboola munzila ziindene-indene, bamwi balakonzya kumugama buya abantu kabalangilila naa balakonzya kucita oobo cakusisikizya. Ibbaibbele likozyanisya Saatani mbuli mbobalwana basyuumbwa ambozilwana nzoka.—Amubale Intembauzyo 91:13.
3. Ino ncinzi cipa kuti kube kupenzyegwa mbuli mbwacita syuumbwa alimwi anzoka?
3 Mbubonya mbuli syuumbwa, Saatani ulacita oobo kwiinda mukubapenzya bantu, kubabikka muntolongo naa kulesya mulimo wesu. (Int. 94:20) Malipooti aali mu Yearbook atondezya milimo njobacita Bakamboni ba Jehova mazuba aano ambobapenzyegwa. Basilunya zimwi ziindi basololelwa abasololi bazikombelo naa basitwaambo twacisi, bali kubapenzya bantu ba Leza mumasena manji. Aabo bacita mbuli bucita syuumbwa bapa kuti ibamwi batyompwe. Mbuli muzoka, Diabolosi ulakonzya kubayunga bantu kali mubusena busisikide akubanyonganya mizeezo kutegwa bacite ncayanda. Nacita boobo uyanda kuti tuleke kusyomeka. Kwiinda mukugwasyigwa amuuya uusalala wa Leza, tulakozya kuyuma notupenzyegwa munzila zyoonse.
4, 5. Ikuti katuyeeya kuti tuyakupenzyegwa, ino ncinzi ncotweelede kucita alimwi nkaambo nzi? Amupe cikozyanyo.
4 Kuyeeya mbotuya kupenzyegwa, taili nenzila mbotu yakulibambila. Masimpe ngakuti tatukonzyi kwaazyiba mapenzi aayakutucikila kumbele, aboobo tatweelede kulibilika azyintu ambweni zitakonzyi kucitika. Nokuba boobo, kuli cintu cimwi ncotukonzya kucita. Ibanji ibaliyumya mumapenzi balacikonzya nkaambo bayeeya mbobakaliyumya babelesi ba Jehova balembedwe mu Magwalo alimwi akutobela nzyobaiya acikozyanyo ca Jesu. Eeci cabapa kuti kabamuyanda kapati Jehova. Alimwi eeci cakabagwasya kuliyumya kumapenzi oonse.
5 Amubone cikozyanyo cabacizyi bobilo baku Malawi. Nobakali kubasinikizya kuula makkaadi aatwaambo twacisi, inkamu yabantu aaba basilunya bakauma bacizyi aaba, bakabasamununa zisani alimwi akubakonga kuti balabajata akoona ambabo. Aaba bantu bakacenga bacizyi aaba kuti balo bamukwasyi wa Beteli baula kale. Ino bacizyi aaba bakaingula buti? Bakaamba kuti: “Tubelekela buyo Jehova Leza alikke. Nokuba kuti bakwesu kumutabi bakaula makkaadi, swebo tatuko kucita oobo pe. Tatukonzyi kucinca nokuba kuti mwatujaya.” Nobakamanizya kuvwiila boobo bakabaleka.
6, 7. Ino Jehova ubapa buti nguzu babelesi bakwe kutegwa baliyumye nobapenzyegwa?
6 Mwaapostolo Paulo wakabona kuti Banakristo baku Tesalonika bakakatambula kasimpe kwiinda mukugwasyigwa ‘amuuya uusalala nokuba kuti bakajisi mapenzi manji kapati.’ (1 Te. 1:6) Banakristo banji bakaindi aba mazuba aano ibakali kupenzyegwa alimwi bakaliyumya, baamba kuti, ciindi nobakapengede kapati bakaliliibide mumizeezo, bakali aluumuno, lwalo luli akati kamicelo yamuuya uusalala wa Leza. (Gal. 5:22) Luumuno oolu lwakabagwasya kuyuma. Masimpe, Jehova ubelesya muuya wakwe kugwasya babelesi bakwe kutegwa baliyumye kumapenzi alimwi akubapa busongo muziindi zikatazya. *
7 Ibantu batulangilila balalamwa nobabona bantu ba Leza mbobaliyumya akaambo kakuyanda kusyomeka noliba leelyo nobapenzyegwa. Bakamboni bakali kulibonya kuti bajisi nguzu zilibedelede, aaya akali masimpe. Mwaapostolo Paulo utusyomezya kuti: “Ikuti naa kamusampaulwa akaambo kazyina lya Kilisito, mulakkomana, nkaambo muuya wabulemu, nkokuti imuuya wa Leza, uli alindinywe.” (1 Pe. 4:14) Mbwaanga tulapenzyegwa akaambo kakutobela zyeelelo ziluleme, eeci citondezya kuti Leza ulakkomana. (Mt. 5:10-12; Joh. 15:20) Eelo kaka kukkomaninwa a Jehova ooku kuleta zilongezyo!
Mbotugwasyigwa Kutegwa Tutayungwi Abeenzuma
8. (a) Ncinzi cakapa kuti Joshua a Kalebe batayungwi a beenzyinyina? (b) Ncinzi ncotukonzya kwiiya kucikozyanyo ca Joshua a Kalebe?
8 Inzila yomwe Banakristo njobeelede kuliyumya nkuyungwa abeenzyinyina. Akaambo kakuti muuya wa Jehova ulaanguzu kwiinda muuya wanyika, tulakonzya kubakazya bantu batusampaula, ibaamba twaambo twakubeja kujatikizya ndiswe naa ibayanda kuti tutobele nzyobayanda. Mucikozyanyo, ncinzi cakapa kuti Joshua a Kalebe batabatobeli beenzinyina basikutwela bali kkumi nobakatumwa kucisi ca Kanana? Muuya uusalala wakabasololela kuti babe amuzeezo uumbi.—Amubale Myeelwe 13:30; 14:6-10, 24.
9. Nkaambo nzi Banakristo ncobeelede kulisungula kwiindana abantu bamwi?
9 Muuya uusalala wakabayumya baapostolo ba Jesu kutegwa bamumvwide Leza muciindi cakumvwida baabo bakali kulibona kuti mbaamayi beni-beni babukombi bwakasimpe. (Mil. 4:21, 31; 5:29, 32) Bantu banji balombozya kutobela nzyobacita bamwi kutegwa batazwangani. Pele Banakristo bakasimpe balazumanana kuli ceeco ncobazyi kuti ncamasimpe. Akaambo kamuuya wa Leza, tatuyoowi kwiindana abamwi. (2 Ti. 1:7) Atulange-lange inzila aimwi motuteelede kuyungwa.
10. Ino nkukopana kuli buti nkobankonzya kuba ankuko Banakristo bamwi?
10 Bakubusi bamwi balakopana nobamvwa kuti mweenzyinyina tanaakalilemeka kweelana ambwaamba magwalo. Kutegwa bazumanane kumvwana amweenzinyina, ulakonzya kuyeeya kuti atabaambili buyo baalu bakonzya kumugwasya kumuuya kutegwa bataleki kumvwana. Sizibi ulakonzya kukombelezya beenzinyina kuti batabaambili bambi. Pele penzi lili boobu talicitikili buyo bakubusi balikke. Ibapati abalo balakonzya kwaalilwa kwaambila baalu cibi ncaacita umwi mumukwasyi naa mweenzinyina. Pele ncinzi Banakristo bakasimpe ncobeelede kucita mubukkale buli boobu?
11, 12. Ino ncinzi ncotukonzya kucita kuti umwi mumbungano watwaambila kuti tutayubununi cibi ncaakacita, alimwi nkaambo nzi?
11 Amubone bukkale oobu. Amuyeeye kuti Choolwe mukwesu uucili mwana wazyiba kuti mweenzyinyina mumbungano Chimuka wakajisi cilengwa cakweebelela zyintu ziletela muzeezo wakoonana. Choolwe waambila Chimuka kuti, ndililibilikide kapati akaambo kacintu ncocita. Pele Chimuka tanaabikkila maano. Choolwe naambila mweenzyinyina kuti aambile baalu makani aaya, Chimuka wavwiila kuti, ikuti naa tumvwana ncobeni Choolwe toko kubaambila baalu. Sena Choolwe inga wayoowa kuti cilongwe cabo cilamana? Ndiza uyeeya kuti baalu tabako kumusyoma kuti naa Chimuka akazye. Mbubwenya buyo, izyintu taziko kuba kabotu kuti naa Choolwe aumune buyo. Masimpe ngakuti, cilongwe ca Chimuka a Jehova cilakonzya kumana. Choolwe weelede kuzyiba kuti “kuyoowa muntu kulateya kakole, pele uusyoma Jehova ulakala kabotu.” (Tus. 29:25) Ino ncinzi cimbi ncayelede kucita Choolwe? Ulakonzya kubandika a Chimuka alimwi. Ambweni aciindi eeci Chimuka ulakonzya kuzumina kubandika penzi eeli. Choolwe weelede kumukulwaizya alimwi Chimuka kuti abaambile baalu alimwi weelede kumwaambila kuti, ikuti atabaambili ciindi ncibamvwana, walo Choolwe ulabaambila baalu makani aaya.—Lev. 5:1.
12 Kuti kacili boobu, mweenzyinyoko ambweni takonzyi kubona kuti muyanda kumugwasya. Pele mukuya kwaciindi uyakuzyiba kuti ntaamu njomwakabweza itondezya kuti mulamuyanda. Kuti sikubisya wazumina kugwasyigwa ulakonzya kumulumba akaambo kakumugwasya. Kulubazu lumwi, ikuti naa mwaleka kumvwana, sena eeco tacitondezyi kuti tali mweenzinyoko ncobeni? Lyoonse cilayandika kukkomanisya Jehova Mulongwe wesu wiinda boonse. Kuti katumuyanda Jehova, abaabo bamuyanda balakonzya kubona kuti mulasyomeka alimwi balakonzya kuba beenzinyoko beni-beni. Tatweelede kuzumizya Diabolosi kuti anjile mumbungano ya Banakristo. Ikuti naa twacita oobo, muuya uusalala wa Jehova ulausa. Pele tulakonzya kucita kweelana amboutusololela muuya uusalala kutegwa mbungano ya Banakristo kaisalala.—Ef. 4:27, 30.
Mbotugwasyigwa Kuti Tuliyumye Mumapenzi
13. Ino mapenzi aali buti aasikila bantu ba Jehova, alimwi nkaambo nzi ncaavwulila?
13 Mapenzi alakonzya kuboola munzila zinji—kubula mali, kubula mulimo, ntenda zilicitikila, kufwidwa muyandwa, kuciswa alimwi azimwi. Akaambo kakuti tupona “[muziindi] zikatazya,” toonse tulalangilwa kusikilwa mapenzi kufwumbwa ciindi. (2 Ti. 3:1) Kuti atusikila mapenzi aali boobu, tatweelede kulibilika kapati. Muuya uusalala ulakonzya kutugwasya kuliyumya mumapenzi aali woonse.
14. Ino ncinzi cakamugwasya Jobu kuliyumya mumapenzi aakwe?
14 Jobu wakasikilwa mapenzi manji. Wakasweekelwa lubono, wakafwidwa bana, tanaakajisi balongwe, wakaciswa bulwazi bupati alimwi mukaintu wakwe wakalilekede kumusyoma Jehova. (Job. 1:13-19; 2:7-9) Pele Jobu wakaumbulizyigwa a Elihu. Ikaambo kapati nkaakaamba Elihu a Jehova nibakali kwaambila Jobu nkakuti: “Koima cakuumuna akuyeeyesya milimo iigambya ya-Leza.” (Job. 37:14) Ino ncinzi cakamugwasya Jobu kuliyumya mumapenzi aakwe? Alimwi ncinzi cikonzya kutugwasya andiswe kuliyumya mumapenzi eesu? Ikuyeeya milimo mipati iicitwa kwiinda mukugwasyigwa amuuya uusalala wa Jehova kulakonzya kutugwasya kuliyumya mumapenzi. (Job. 38:1-41; 42:1, 2) Ndiza tulayeeya kuti cimwi ciindi twakalibonena kuti Leza wakatugwasya kapati. Alimwi ucitubikkila maano.
15. Ino ncinzi cakagwasya mwaapostolo Paulo kuti aliyumye mumapenzi?
15 Mwaapostolo Paulo wakaliyumya mumapenzi manji akaambo kalusyomo lwakwe. (2 Ko. 11:23-28) Ino ncinzi cakamugwasya kuti ayume akutalibilika kapati muciindi eeco? Wakali kumusyoma Jehova. Kujatikizya ciindi ncaakali kupenzegwa calo cakapa kuti ajaigwe, Paulo wakalemba kuti: “Mwami wakali andime lyoonse alimwi wakandipa nguzu, kutegwa kwiinda mulindime mulimo wakukambauka uzuzikizyigwe cakumaninina akuti bamasi boonse baumvwe; alimwi ndakavwunwa kumulomo wasyuumbwa.” (2 Ti. 4:17) Aboobo, kuzwa kuzyintu zyakamucitikila, Paulo wakali kukonzya kubayumya-yumya basyominyina kuti “mutalibiliki acintu niciba comwe.”—Amubale Bafilipi 4:6, 7, 13.
16, 17. Amupe cikozyanyo citondezya Jehova mbwaabagwasya bantu bakwe nobasikilwa mapenzi mazuba aano.
16 Mupainiya wazyina lya Roxana wakalibonena Jehova mbwabapa nzyobayandika bantu bakwe. Naakalomba kuti basikumulemba milimo bamupe mazuba akuunka kumuswaangano wacooko, cabukali bakamuvwiila kuti naa akaunke baya kumutanda milimo. Nokuba boobo Roxana wakaunka pele wakapaila kuti atatandwi milimo. Naakamana kupaila, moyo wakamukkala. Mbubwenya mbwaakamwaambilide sikumulemba milimo, Mumuhulo niwakainda muswaangano wacooko, wakatandwa milimo. Roxana wakanyongana. Wakali kuuyanda mulimo ooyo nkaambo mpaakali kulida nokuba kuti wakali kuvwolwa mali masyoonto. Alimwi wakapaila kayeeya kuti, Leza takonzyi kwaalilwa kumupa cakulya akaambo kakuti tanaakalilwa kumupa cakulya cakumuuya kumuswaangano wacooko. Naakali kuya kuŋanda Roxana wakabona cikwankwani cakalembedwe kuti “Tuyanda Babelesi” bajisi luzyibo lwakubelesya mincini mipati yakusumya zisani, mpoonya wakalembela. Nokuba kuti Roxana tanaakalijisi luzyibo luyandika kumulimo ooyo, mupati wamulimo wakamunjizya mulimo alimwi wakali kuvwola mali manji kwiinda ngaakali kuvwola nkwaakali kubeleka kaindi. Roxana wakabona kuti mupailo wakwe waingulwa. Cilongezyo cipati ncakuti wakali kukonzya kubakambaukila babelesinyina makani mabotu. Bantu bosanwe kubikkilizya amupati wamulimo bakakatambula kasimpe akubbapatizyigwa.
17 Zimwi ziindi inga calibonya mbuli kuti mipailo yesu tayiingulwi cakufwaambana kweelana ambotuyeeya. Ikuti naa mboobo, Jehova ulikazyi kaambo ncocili boobo alimwi ambweni andiswe inga twakateelela mukuya kwaciindi. Tulakonzya kuba masimpe kuti Leza takonzyi kubalekelezya babelesi bakwe basyomeka.—Heb. 6:10.
Mbotugwasyigwa Kuliyumya Mumapenzi Amasunko
18, 19. (a) Ino nkaambo nzi ncotweelede kulangila kusikilwa mapenzi alimwi amasunko? (b) Ino mbuti mbomukonzya kuliyumya mumapenzi?
18 Bantu ba Jehova tabagambwi nobasikilwa masunko, kutyompwa, kupenzyegwa akuyungwa abeenzinyina. Nyika ilitusulide. (Joh. 15:17-19) Muuya uusalala ulakonzya kutugwasya kuzunda mapenzi aakonzya kutusikila notubelekela Leza. Jehova takatulekeli kuti tusunkwe kwiinda nguzu zyesu pe. (1 Ko. 10:13) Takatusiyi pe alimwi takatulekelezyi pe. (Heb. 13:5) Kutobela Jwi lyakwe ndyaakasololela amuuya kulatukwabilila akutuyumya. Alimwi muuya wa Leza ulakonzya kukulwaizya basyomima kuti batugwasye notuli mumapenzi.
19 Toonse atuzumanane kulomba muuya uusalala kwiinda mukupaila akwiiya Magwalo. “Amuyumizyigwe anguzu zyakwe zyoonse kweelana abulemu bwanguzu zyakwe ikutegwa muliyumye cakumaninina kumwi kamukkazyikide moyo alimwi akukondwa.”—Kol. 1:11.
[Bupanduluzi buyungizidwe]
^ munc. 6 Mucikozyanyo amubone Ngazi Yamulindizi ya May 1, 2001, apeeji 16; a Sinsimuka! yamu February 8, 1993, apeeji 21 a 22.
Ino Inga Mwaingula Buti?
• Ino mbuti mbotukonzya kulibambila kuliyumya notupenzyegwa?
• Ino inga mwacita buti kuti muntu wamwaambila kuti mutayubununi cibi ncacita?
• Ino ndusyomo nzi ndomukonzya kuba andulo kuti mwasikilwa mapenzi aali woonse?
[Mibuzyo yaciiyo]
[Cifwanikiso icili apeeji 28]
Ncinzi ncotukonzya kwiiya kucikozyanyo ca Joshua a Kalebe?
[Cifwanikiso icili apeeji 29]
Ino inga mwamugwasya buti mweenzinyoko wacita cibi?
