Mbotugwasyigwa Mumasunko Akuliyumya Notutyompedwe

“Muyootambula nguzu waakusika alindinywe muuya uusalala.”—MIL. 1:8.

1, 2. Ino nkugwasya kuli buti Jesu nkwaakabasyomezya basikwiiya bakwe, alimwi bakali kukuyandila nzi?

JESU wakalizyi kuti basikwiiya bakwe tiibakali kukonzya kuzyicita nzyaakabaambila balikke zyoonse. Ikubona mulimo wakukambauka mbowakali mupati akuti kwakali basikukazya alimwi abalo bakali kukambauka tiibakalondokede, nkakaambo kaako ncobakali kuyandikila nguzu ziinda zyabantu. Aboobo, katanaunka kujulu Jesu wakabasyomezya basikwiiya bakwe kuti: “Muyootambula nguzu waakusika alindinywe muuya uusalala, alimwi muyooba bakamboni bangu mu Jelusalemu, mu Judaya moonse amu Samaliya, alimwi mane akusikila kumagolelo aanyika.”—Mil. 1:8.

² Eeci cisyomezyo cakatalika kuzuzikizyigwa mu Pentekoste 33 C.E. ciindi muuya uusalala nowakabasololela basikumutobela Jesu Kristo kuti bakambauke mu Jerusalemu. Kunyina cakali kukonzya kubalesya. (Mil. 4:20) Basikumutobela Jesu basyomeka kubikkilizya andiswe toonse tuyandika kugwasyigwa a Leza “mazuba oonse mane kusikila kumamanino aabweende bwazyintu oobu.”—Mt. 28:20.

3. Ino nguzu zizwa kuli Jehova inga zyatugwasya buti?

³ Jesu wakasyomezya basikwiiya bakwe kuti ‘bayakutambula nguzu waakusika muuya uusalala ali mbabo.’ Inguzu nzyapa Jehova Leza Singuzuzyoonse kubabelesi bakwe zilatugwasya toonse kuti tucite mulimo wesu wa Bunakristo ngutwakalyaaba kucita alimwi zimwi ziindi zilatugwasya kuliyumya kuzyintu zibi zikonzya kutucitikila.—Amubale Mika 3:8; Bakolose 1:29.

4. Ino ncinzi ciya kulangwa-langwa mucibalo eeci, alimwi nkaambo nzi?

⁴ Ino utupa buti nguzu kwiinda mumuuya uusalala? Ino muuya uusalala inga watugwasya buti mubukkale bwiindene? Notusoleka kubelekela Leza cakusyomeka tulaakujana mapenzi manji aaletwa a Saatani, abweende bwazyintu bubyaabi naa akutalondoka kwesu. Cilayandika kapati ku Munakristo kuliyumya mumapenzi aaya kwiinda mukutola lubazu lyoonse mukukambauka akumvwana a Jehova. Atubone muuya uusalala mboukonzya kutugwasya mumasunko ambotukonzya kuliyumya notutyompedwe.

Mbotugwasyigwa Mumasunko

5. Ino mbuti mbotukonzya kugwasyigwa amupailo?

⁵ Jesu wakayiisya basikwiiya bakwe kupaila kati: “Utatunjizyi mumusunko, pele utuvwune kumubi.” (Mt. 6:13) Jehova takabalekelezyi babelesi bakwe basyomeka balomba kuti abagwasye. Aciindi cimwi Jesu wakaamba kuti, “Taata uuli kujulu uyooinda kupa muuya uusalala kuli baabo bamulomba.” (Lk. 11:13) Eelo kaka Jehova ulatusyomezya kuti uyakutupa nguzu zyakucita cintu ciluzi! Eeci tacaambi kuti Jehova uyakutukwabilila kumasunko. (1 Ko. 10:13) Ikuti twasunkwa  nceciindi ncotweelede kupaila kapati.—Mt. 26:42.

6. Ino ncinzi Jesu ncaakabelesya kwiingula Saatani nakali kumusunka?

⁶ Jesu naakaingula Diabolosi naakali kumusunka, wakabelesya magwalo. Majwi a Leza akali mumizeezo yakwe naakavwiila kuti “Kulilembedwe kuti . . . Alimwi kulilembedwe kuti . . . Kozwa aawa Saatani! Nkaambo kulilembedwe kuti: ‘Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.’” Akaambo kakumuyanda Jehova a Jwi lyakwe kwakamupa kuti Jesu atasunkwi. (Mt. 4:1-10) Saatani naakamusunka Jesu ziindi zinji wakamuleka.

7. Ino Bbaibbele litugwasya buti kuti tuliyumye mumasunko?

⁷ Mbwaanga Jesu wakali kwaasyoma Magwalo naakali kuliyumya kumasunko aa Diabolosi, andiswe tulakonzya kucita oobo. Masimpe kutegwa tuliyumye kumasunko aa Diabolosi abaabo mbabelesya tweelede kuzyiba zyeelelo zya Leza akuzitobela kabotu. Bantu banji balapona kweelana anjiisyo zyamu Bbaibbele balacita oobo nobabala magwalo akuzyiba busongo bwa Leza abululami bwakwe. Masimpe ‘ijwi lya Leza’ lilaanguzu cakuti inga “[lya]konzya kuzyiba mizeezo amakanze aamumoyo.” (Heb. 4:12) Kuti muntu kaabala lyoonse magwalo ulakonzya ‘kupangika myoyo kulusinizyo lwa Jehova.’ (Dan. 9:13) Akaambo kaceeci tulakonzya kuzinzibala kuyeeya amagwalo aamba zyintu nzyotulezya.

8. Ino muunzila nzi motukonzya kuba amuuya uusalala?

⁸ Kunze lya kwaazyiba kabotu magwalo, Jesu wakakonzya kuliyumya mumasunko akaambo kakuti “[wa]kazwide muuya uusalala.” (Lk. 4:1) Tuyandika kuswena kuli Jehova kwiinda mukuzyibelesya kabotu nzila zyoonse nzyatupa kutegwa tube amuuya uusalala, tulakonzya kucita oobo kwiinda mukubala Bbaibbele, kupaila akuyanzana abakwesu abacizyi. (Jak. 4:7, 8) Ibanji bajisi bubi mumilimo ya Bunakristo alimwi eeci cibagwasya kuti bazumanane kucita kabotu kumuuya.

9, 10. (a) Ino masunko nzi ngobakonzya kuba angayo Banakristo? (b) Ino kuzinzibala kuyeeya akupaila inga kwamugwasya buti kuti muliyumye nomutyompedwe?

⁹ Ino masunko nzi ngotuyandika kuliyumya? Sena kuli nomwakasunkidwe kweenda amuntu ngomutakwetene limwi? Ikuti kamutakwete naa kukwatwa, sena kuli nomwakasyabene amuntu uutasyomi? Banakristo nobeebelela cipeku-peku naa kubelesya Intaneti, balakonzya kutondezyegwa zyintu zimwi zitali kabotu zikonzya kubayunga. Sena eeci cakamucitikila, naa mbuboobo ino ncinzi ncomwakacita? Kuyandika kuyeeya kuti, ikuti naa muntu wazyibila kucita cintu citali kabotu, eeci cilakonzya kumunjizya mumapenzi mapati. (Jak. 1:14, 15) Kamuyeeya buyo mbomukonzya kuba ansoni kuli Jehova, kumbungano akumukwasyi akaambo kakutalilemeka kwenu. Kulubazu lumwi, kuba amanjezyeezya mabotu kulakonzya kutugwasya kusyomeka akutobela njiisyo zya Leza. (Amubale Intembauzyo 119:37; Tusimpi 22:3.) Kuti mwajana masunko aali boobu, mweelede kupaila kutegwa muliyumye.

¹⁰ Kuli acimbi ncotweelede kuyeeya kujatikizya mbwaakali kusunka Diabolosi. Saatani wakamusikila Jesu naakali kuliimya kwamazuba aali 40 munkanda. Cakutadooneka Diabolosi wakali kuyeeya kuti eeci ncecakali ‘ciindi ceelede’ cakusunka lusyomo lwa Jesu. (Lk. 4:13) Saatani ulaakubona ciindi ceelede kutegwa asunke lusyomo lwesu. Aboobo cilayandika kuti lyoonse katuli bayumu kumuuya. Saatani usunka buyo kuti wabona kuti kuli mpotulezya. Aboobo lyoonse notutyompwa, tweelede kumulomba Jehova kutegwa atukwabilile akutupa muuya  wakwe uusalala kuti utugwasye.—2 Ko. 12:8-10.

Mbotukonzya Kugwasyigwa Kuti Tuliyumye Notutyompedwe

11, 12. (a) Ino nkaambo nzi ncobatyompwa banji aano mazuba? (b) Ino ncinzi cikonzya kutugwasya kuliyumya notutyompedwe?

¹¹ Mbotutalondokede tulatyompwa ciindi aciindi. Aaya masimpe nkaambo ciindi ncotupona ncamapenzi. Tupona muciindi cikatazya mwalo bantu boonse mobapenga. (2 Ti. 3:1-5) Mboiyaabusika nkondo ya Harmagedoni, penzi lyakubula mali, kukopana mumizeezo alimwi amapenzi aamwi ayaabuvwula. Aboobo taceelede kutugambya kuti twamvwa kuti bamwi cilabakatazya kubajanina nzyobayandika bamukwasyi. Kuti naa eeci cilamucitikila ino inga mwaliyumya buti kupenzi eeli?

¹² Kamuyeeya kuti Jesu wakasyomezya basikwiiya bakwe kuti uyakubapa mugwasyi—nkokuti muuya uusalala. (Amubale Johane 14:16, 17.) Muuya uusalala nenguzu ziinda, mububumbo boonse. Akaambo kamuuya uusalala Jehova ulatupa nguzu kutegwa tuliyumye notusunkwa. (Ef. 3:20) Imwaapostolo Paulo wakaamba kuti ikuti naa twalomba tuyakupegwa “nguzu zigambya iziinda zyabantu” nokuba kuti “tulasyanikizyigwa munzila iili yoonse.” (2 Ko. 4:7, 8) Jehova tatusyomezyi kuti ulaamanizya mapenzi pe, pele utusyomezya kuti kwiinda mumuuya uusalala ulakonzya kutuyumya.—Flp. 4:13.

13. (a) Ino mbuti mukubusi umwi mbwaagwasigwa kuti aliyumye mumapenzi ngaakajisi? (b) Sena kuli mbomuzyi bapengede boobu?

¹³ Amubone cikozyanyo ca Stephanie uuli amyaka iili 19 alimwi mupainiya waciindi coonse. Naakali amyaka iili 12 wakaciswa bulwazi bwakulebuka mubili abwa kubongo. Amane wakaandulwa ziindi zyobilo, amubili wakalebuka alimwi ziindi zyobilo, calo cakamupa kuti kateendi kabotu alimwi kataboni kabotu. Nokuba boobo, Stephanie ulasoleka kucita zyintu ziyandika mbuli kujanika kumiswaangano akukambauka. Alimwi ulimvwa kuti Jehova ulamuyumya amuuya wakwe. Mabbuku aamba zyamu Bbaibbele aajisi zyakuluula zya Banakristo, zilamukulwaizya kapati ciindi natyompedwe. Bakwesu abacizyi balamuyumya-yumya kwiinda mukumulembela magwalo naa kumukulwaizya miswaangano kautanatalika anowamana. Bantu bajisi luyandisisyo  abalo balamulumba Stephanie akaambo kazyintu nzyabayiisya kuzwa mu Bbaibbele nobamuswaya kuŋanda. Akaambo kaceeci, Stephanie ulamulumba kapati Jehova. Lugwalo ndwayandisya kapati ndugwalo lwa Intembauzyo 41:3, lwalo ndwasyoma kuti lulamugwasya.

14. Ino ncinzi ncotuteelede kucita kuti katutyompedwe, alimwi nkaambo nzi?

¹⁴ Ikuti katutyompedwe tatweelede kuyeeya kuti kucileka kucita zyintu zyakumuuya cilakonzya kutugwasya kumanizya mapenzi ngotujisi. Taaku nocikonzya kutugwasya kuti naa twacita boobo. Nkaambo nzi? Nkaambo kakuti milimo yakumuuya mbuli ciiyo cesu tobeni, kwiiya Bbaibbele mumukwasyi, kukambauka akujanika kumiswaangano nenzila imwi njotukonzya kutambula muuya uusalala. Milimo ya Bunakristo ilakatalusya lyoonse. (Amubale Matayo 11:28, 29.) Ziindi zinji bakwesu abacizyi nobaboola kumiswaangano inga balikatede, pele casika ciindi cakuya kuŋanda, balakatalusyigwa.

15. (a) Sena Jehova usyomezya Banakristo kuti bana kulya bukkede? Amupandulule ncaamba magwalo. (b) Ino ncinzi ncatusyomezya Leza alimwi mubuzyo nzi ngotukonzya kubuzya?

¹⁵ Eeci tacaambi kuti mukuli ngobajisi Banakristo tauminyi. Kuyandika kubeleka canguzu kuti mube Banakristo basyomeka. (Mt. 16:24-26; Lk. 13:24) Nokuba boobo, kwiinda mumuuya uusalala, Jehova ulakonzya kubayumya bakatede. Musinsimi Isaya wakalemba kuti: “Abo babikide myoyo yabo kuli-Jehova balabukulusya inguzu zyabo, balaya butanta amababa mbuli basikwaze, balazuzaana akutakataala, balaya bweenda cakutawizuka.” (Is. 40:29-31) Kuti kakuli boobo, tulakonzya kulibuzya kuti, Ino nkaambo nzi kakonzya kutupa kuti milimo ya Banakristo kaitukatalisya?

16. Ino ncinzi ncotunga twacita kutegwa tutaciti zyintu zikonzya kutulemya akututyompya?

¹⁶ Ijwi lya Jehova litukulwaizya “[kusinizya] zyintu ziyandika kapati.” (Flp. 1:10) Kakozyanisya buumi bwa Banakristo kumusinzo mulamfwu kapati, Mwaapostolo Paulo wakasololelwa kulemba kuti: “Aswebo atuzisowe zyoonse zitulemena . . . , alimwi atubalike cakuliyumya mukusiyana nkotubikkilidwe kumbele.” (Heb. 12:1) Ikaambo nkaakali kwaamba nkakuti cilayandika kapati kutacita milimo iikonzya kutulemya. Ambweni tobamwi tulaliminya kwiinda mukucita zyintu zinji. Kuti naa ziindi zinji mulakatala akuba azyintu zinji zyakucita ndiza inga camugwasya kulanga zintu nzyomucita kumilimo, ikuswaya bamwi akulikondelezya. Kuzilanga kabotu zyintu kulakonzya kutupa kuzyiba kulezya kwesu akutacita milimo imwi iitayandiki.

17. Ino ncinzi cikonzya kubatyompya bamwi, pele ncisyomezyo nzi Jehova ncatupa mumakani aaya?

¹⁷ Bamwi balakonzya kutyompwa akaambo kakuti mamanino aabweende bwazyintu amuka kweelana ambobakali kuyeeya. (Tus. 13:12) Boonse balimvwa boobo balakonzya kukulwaizigwa amajwi aajanika kubbuku lya Habakuku 2:3 aakuti: “Cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” Jehova utusyomezya kuti mamanino aabweende bwazyintu oobu ayakusika aciindi ncabikkide.

18. (a) Ino nzisyomezyo nzi zimuyumya-yumya? (b) Ino cibalo citobela ciyakutugwasya buti?

¹⁸ Masimpe, boonse babelesi ba Jehova  basyomeka balangila ciindi nokuyakumana kukatala akutyompwa, eelyo boonse bayakupona nobayookkomana ‘anguzu zyabulombe bwabo.’ (Job. 33:25) Naaba mazuba aano tulakonzya kuyumizigwa amuuya usalala kwiinda mukutola lubazu muzyintu zyakumuuya. (2 Ko. 4:16; Ef. 3:16) Kutyompwa kutamulesyi kujana zilongezyo zitamani. Mapenzi aali woonse aaboola akaambo kamasunko, kukatala naa kutyompwa, alakonzya kumana lino naa ayakumana munyika ya Leza ipya. Mucibalo citobela tuya kulanga-langa muuya uusalala mboubagwasya Banakristo kuliyumya nobapenzegwa, nobayungwa alimwi anobasikilwa mapenzi aaindene-indene.

Ino Inga Mwaingula Buti?

• Ino kubala Bbaibbele kutugwasya buti?

• Ino mbuti mupailo akuzinzibala kuyeeya mbokutugwasya?

• Ino ncinzi ncotunga twacita kutegwa tutaciti zyintu zikonzya kututyompya?

[Mibuzyo yaciiyo]

[Cifwanikiso icili apeeji 24]

Miswaangano ya Bunakristo ilatuyumya kumuuya