Cilayandika Kusolekesya

KUKOMBA MUMUKWASYI kulayandika kapati kutegwa bana bakomene “mululayo lwa Jehova akubayiisya kutobela mizeezo yakwe.” (Ef. 6:4) Kuti kamuli bazyali, mulizyi kuti bana cilabakatazya kubikkila maano. Ino inga mwabagwasya buti kutegwa kababikkila maano? Amubone bazyali bamwi mbobacikonzya kucita oobo.

Ba George baku California mu U.S.A., bakaamba kuti: “Ibana besu nobakacili basyoonto, mebo abakaintu bangu twakali kubelesya nzila ziindene-indene nitwakali kucita ziiyo zya Bbaibbele zyamumukwasyi. Zimwi ziindi toonse tulaakusama mbuli bantu mbotubala mu Bbaibbele akucita zisobano nzyotubala mubbuku lyakuti, Ibbuku Lyangu Lyamakani Aa-Bbaibbele. Alimwi twakali kupanga zyintu zyakubelesya mbuli mapanga, nkoli yabami, zisuwo azimwi buyo. Twakali kusobana zisobano zyamu Bbaibbele zyakuti ‘ino ndime ni’ alimwi twakali kubuzyanya mibuzyo yamu Bbaibbele iindene-indene imwi ikatazya pele imwi tiiyakali kukatazya. Alimwi kwakali milimo njotwakali kucitila antoomwe mbuli kupanga cintu cili mbuli bwato bwa Nowa naa kupanga mulongo wazyintu mbozyakali kucitika zilembedwe mu Bbaibbele. Zimwi ziindi twakali kuzekaula bantu mbotwakali kubala mu Bbaibbele. Ecino ciindi, tujisi mulimo wakuzekaula zilwanyo zyakumuuya zilembedwe kuba Baefeso 6:11-17, mwalo oomo aumwi mwayakupandulula cilwanyo acimwi ncociiminina. Eezyi nzila zyatugwasya kapati kucikkomanina ciiyo camukwasyi.”

Ba Debi, batumbu baku Michigan mu U.S.A., bakaamba kuti: “Mebo abalumi bangu cakali kutukatazya kukkomanisya mwaneesu naakali amyaka yotatwe. Mpoonya, bumwi buzuba nindakali kubala kaano ka Izaka a Rabeka mubbuku lyakuti Ibbuku Lyangu Lyamakani Aa-Bbaibbele ndakabweza zidooli zyobilo akutalika kucita mbuli kuti nzyezyakali kwaambaula. Kuzwa ciindi eeci wakatalika kubikkila maano kutwaambo toonse. Myezi yakatobela, zidooli zyobilo eezyi zyakali kubelesyegwa kuba bantu bamu Bbaibbele baindene-indene. Twamana kubala cibalo, mwaneesu wakali kuyandaula zidooli azyintu zimwi kutegwa zibelesyegwe mucibalo eeco. Cakali mbuli kuti uyandaula bbwe lyamuulo waatala. Cibbokesi camabbusu cakajisi ntambo iisalala cakaba ŋanda ya Rahabu. Cisamu cacipyaango cakali kulampa mamita aali 1.5 cakasamikwa inzoka yakupanga yalo yakali kwiiminina nzoka yamukuba iilembedwe kubbuku lya Myeelwe 21:4-9. Twakali kuziyobola zyintu eezyi mucibbeke cipati. Cakali kukkomanisya ncakuti, mwaneesu wakali kukkala muŋanda kalanga-langa ‘mucibbeke cakajisi zyintu eezyi nzyotwakali kubelesya.’ Cakali kukkomanisya kubona mbwakali kuzipandulula zisobano eezyi munzila njaakali kukonzya.”

Kukomezya bana tacili cuuba-uba pe, pele kuti kamuyanda kuti babe aluyandisyo lwakumubelekela Jehova, mweelede kubayiisya lyoonse ikutali buyo ansondo. Pele kukomba mumukwasyi matalikilo buyo aakubayiisya zyintu zyakumuuya. Cakutadooneka cilayandika kusolekesya.