Mweelede Kuyanda Bululami Amoyo Wanu Woonse

“Ulayandisya bululami.”—INT. 45:7.

1. Ino ncinzi ciyootugwasya kweenda “munzila zyabululami”?

KWIINDA mu Jwi lyakwe alimwi amuuya wakwe uusalala, Jehova ulasololela bantu bakwe “munzila zyabululami.” (Int. 23:3) Pele akaambo kakutalondoka, zimwi ziindi tulaleya kuzwa muzila eeyi. Kutegwa tutalike alimwi kucita ciluzi, tweelede kusolekesya. Ino ncinzi ciyootugwasya kuzwidilila? Mbubwenya mbuli Jesu, tweelede kuyanda kucita ciluzi.—Amubale Intembauzyo 45:7.

2. Ino “nzila zyabululami” ninzi?

² Ino “nzila zyabululami” ninzi? Nzila eezyi ziiminina bukkale bwesu mubuumi kweelana azyeelelo zya Jehova zyabululami. Mu Chihebrayo amu Chigiliki, “bululami” caamba kupona kweelana anjiisyo zyakulilemeka. Akaambo kakuti Jehova “[n]cikalilo cabululami,” bakombi bakwe balanga kuli nguwe kuti nguweelede kubatondezya nzila yabululami njobeelede kutobela.—Jer. 50:7.

3. Mbuti mbotukonzya kwiiya kujatikizya bululami bwa Leza?

³ Tulakonzya kumukkomanisya Leza lilikke notupona kweelana azyeelelo zyakwe ziluleme. (Dt. 32:4) Tulakonzya kucita oobo kwiinda mukwiiya kujatikizya Jehova Leza mu Jwi lyakwe, Ibbaibbele. Ikuti twazumanana kwiiya kujatikizya nguwe, tuyoozumanana kuswena kulinguwe mazuba oonse, alimwi tuyooyandisya bululami bwakwe. (Jak. 4:8) Alimwi tweelede kuzumina busolozi bwa Jwi lya Leza ilyakasololelwa amuuya ciindi notuyandika kusala zyakucita mubuumi bwesu.

Amuyandaule Bululami bwa Leza

4. Ino kuyandaula bululami bwa Leza kubikkilizya nzi?

⁴ Amubale Matayo 6:33. Kuyandaula bululami bwa Leza cibikkilizya zinji kunze buyo lyakutola ciindi cilamfwu mumulimo wakukambauka makani mabotu aa Bwami. Kutegwa mulimo wesu uusetekene utambulwe kuli Jehova, buzuba abuzuba tweelede kupona kweelana azyeelelo zyakwe zisumpukide. Ino ncinzi ncobeelede kucita boonse ibayandaula bululami bwa Jehova? Beelede “kusama buntu bupya bwakalengwa kweelana akuyanda kwa Leza mubululami bwini-bwini alimwi amukusyomeka.”—Ef. 4:24.

5. Ino ncinzi ciyootugwasya kumana penzi lyakutyompwa?

⁵ Ciindi notusoleka kupona kweelana azyeelelo zya Leza ziluleme, zimwi ziindi tulakonzya kutyompwa akaambo kakulezya kwesu. Ino ncinzi cikonzya kutugwasya kumana penzi lyakutyompwa alimwi akwiiya kuba aluyando akucita bululami? (Tus. 24:10) Tweelede kupaila lyoonse kuli Jehova “amyoyo iituba alimwi alusyomo luyumu nta.” (Heb. 10:19-22) Kuti kakuli tuli Banakristo bananike naa tujisi bulangizi bwakuyoopona anyika, tweelede kuba alusyomo mucinunuzyo ca Jesu Kristo alimwi amumulimo wakwe kali Mupaizi Mupati kapati. (Lom. 5:8; Heb. 4:14-16) Mwaapostolo  Johane wakalemba kuti: “Bulowa bwa Jesu . . . bulatusalazya kuzibi zyoonse.” (1 Jo. 1:6, 7) Bbaibbele lyaamba kuti: “Nekuba kuti [zibi zyesu] zili mbuli zisani zisalalisya ziyooba mbuli boya bwambelele.” Eelyo kaka oobu mbubambe bubotu Jehova mbwaakatucitila kwiinda mucipaizyo cacinunuzyo ca Mwanaakwe ngwayandisya!—Is. 1:18.

Amuzilange-lange Zilwanyo Zyanu Zyakumuuya

6. Ino nkaambo nzi cilayandika kulanga-langa zilwanyo zyesu zyakumuuya?

⁶ Ciindi coonse tweelede ‘kusama acamba cilikwabilizyo cabululami,’ nkaambo ncibeela ciyandika kapati cazilwanyo zyakumuuya zizwa kuli Leza. (Ef. 6:11, 14) Kuti kakuli twakalyaaba ino-ino kuli Jehova naa twaubeleka myaka minji mulimo wakwe, cilayandika kapati kuti katuzilanga-langa zilwanyo zyesu zyakumuuya buzuba abuzuba. Nkaambo nzi? Nkaambo kakuti Diabolosi amadaimona aakwe bakawaalwa anyika. (Ciy. 12:7-12) Saatani ulinyemede alimwi ulizyi kuti ciindi cakwe ncisyoonto. Nkakaambo kaako, ncaaletela zilebyo ziyumu kubantu ba Leza. Sena tulalumba kububotu bwakuba “[a]cilikwabilizyo cabululami”?

7. Ino mbuti mbotuya kulilemeka kuti naa katuyandika kukwabililwa a “cilikwabilizyo cabululami”?

⁷ Cilikwabilizyo cakucamba cikwabilila moyo. Akaambo kakuti tatulondokede, moyo wesu uleena alimwi ulaabulwazi butaponi. (Jer. 17:9) Mbwaanga moyo wesu ulombozya kucita cibi, uyandika kuyiisyigwa. (Matl. 8:21) Ikuti katucibelesya kabotu “cilikwabilizyo cabululami” cakucamba tatukonzyi kucisamununa kwakaindi kasyoonto kutegwa tulikondelezye azyintu Leza nzyatayandi; naa kucita zyintu zibi. Tatukasowi ciindi cinji kweebelela cipeku-peku. Muciindi caboobo, tulazumanana kubeleka canguzu kucita nzyayanda Jehova. Nokuba kuti twalubizya kwaciindi cisyoonto kwiinda mukuba amizeezo iitali kabotu, tuya kugwasyigwa a Jehova akupiluka kulinguwe.—Amubale Tusimpi 24:16.

8. Nkaambo nzi ncotuyandika “ntobo mpati yalusyomo”?

⁸ Akati kazilwanyo zyesu zyakumuuya kuli “ntobo mpati yalusyomo.” Eeyi intobo ilatugwasya “kuzima mivwi yoonse iiyaka mulilo iifwuswa amubi.” (Ef. 6:16) Aboobo, lusyomo akuyanda Jehova amoyo woonse kutugwasya kucita bululami akuzumanana kweenda munzila iitola kubuumi butamani. Ikuti naa twaiya kumuyanda Jehova, nkokuti tuya kuyandisya kucita bululami bwakwe. Pele ino mbuti kujatikizya manjezeezya eesu? Ino atugwasya buti notusoleka kuyandisya bululami?

Amuzumanane Kuba Amanjezeezya Mabotu

9. Ino mbuti mbotugwasyigwa kuti twazumanana kuba amanjezeezya mabotu?

⁹ Notwakabbapatizyigwa twakalomba Jehova kuti atupe “manjezyeezya mabotu.”  (1 Pe. 3:21) Akaambo kakuti tulaalusyomo mucinunuzyo, ibulowa bwa Jesu bulavumba zibi zyesu aboobo tulakkomaninwa a Leza. Kutegwa tuzumanane kukkomaninwa a Leza, tweelede kuba amanjezeezya mabotu. Kuti manjezeezya eesu kaatuyeekezya twalubizya, tweelede kukkomana akaambo kakuti eeci citondezya kuti alabeleka kabotu kweelana akuyanda kwa Jehova. (1 Ti. 4:2) Pele alimwi manjezeezya alabeleka kuli baabo bayanda kutobela bululami.

10, 11. (a) Amwaambe cakacitika citondezya kaambo ncotweelede kwaatobela manjezeezya aakayiisyigwa a Bbaibbele. (b) Nkaambo nzi kuyanda bululami ncokukkomanisya kapati?

¹⁰ Ikuti twacita cibi, manjezeezya eesu alatupenzya. Mukubusi umwi wakacileka kweenda “munzila zyabululami.” Wakatalika kweebelela zyintu ziletela muzeezo wakoonana alimwi akufweba lubanje. Wakali kulimvwa bubi naakali kuunka kumiswaangano alimwi wakali kulimvwa mbuli sikuupa-upa ameso naakali kuunka mukukambauka aboobo wakacileka kucita milimo yabunakristo eeyi. Wakaamba kuti: “Tiindakalizyi kuti manjezeezya aangu ayakundipenzya akaambo kazyintu zyindakacita.” Wakayungizya kuti: “Ndakapona oobu kwamyaka iili yone.” Mpoonya wakatalika kuyeeya mbwakonzya kutalika kubelekela Leza alimwi. Nokuba kuti wakali kuyeeya kuti Jehova takonzyi kuuvwiila mupailo wakwe wakapaila akulomba kulekelelwa. Nokwakainda buyo ciindi cisyoonto kuzwa naakamanizya kupaila, banyina bakamuswaya akumukulwaizya kuti kajanika kumiswaangano. Wakaunka Kuŋanda ya Bwami akulomba mwaalu kuti batalike kwiiya. Mukuya kwaciindi wakabbapatizyigwa alimwi wakamulumba Jehova kuti wakamufutula.

¹¹ Eelo kaka cilagwasya kucita cintu ciluzi! Notuyabwiiya kuyanda bululami akubutobela, tuyakukkomana kucita ceeco cikkomanisya Taateesu wakujulu. Amuciyeeye buyo eeci. Buzuba buya kusika bantu boonse nobaya kukkomana amanjezeezya mabotu, nkaambo baya kulondoka. Aboobo, lino atuyandisye bululami kuzwa ansi amoyo akukkomanisya Jehova.—Tus. 23:15, 16.

12, 13. Ino inga twaayiisya buti manjezeezya eesu?

¹² Ino inga twacita nzi kutegwa tuyiisye manjezeezya eesu? Notwiiya Magwalo a mabbuku aamba zya Bbaibbele, cilayandika kapati kuyeeya kuti “moyo wamululami ulayeeya kabotu mbweelede kuvuwa.” (Tus. 15:28) Amubone eeci mbocigwasya ciindi notuba amibuzyo kujatikizya milimo. Kuti mulimo uumwi kauteendelani ancaamba magwalo, tobanji tulafwaambana kutobela busolozi mbobatupa baciinga camuzike musyomesi uucenjede. Kuti mubuzyo iwabuzyigwa kujatikizya mulimo umwi kautapandulwidwe mubuzwide, tweelede kubelesya njiisyo zyamu Bbaibbele zyaamba kujatikizya mulimo ooyo alimwi tweelede kupaila kutegwa tujane bwiinguzi. Eeci cilabeleka kunjiisyo zikonzya kutupa  kuti tutanyemyi bamwi. (1 Ko. 10:31-33) Tweelede kubikkila maano kapati kunjiisyo zijatikizya cilongwe cesu a Leza. Ikuti naa tulamusyoma ncobeni Jehova tulakonzya kulibuzya kuti, ‘Sena kuti naa ndaucita mulimo ooyu ndilamunyemya Jehova?’—Int. 78:40, 41.

¹³ Ikuti katulibambila Ciiyo ca Ngazi Yamulindizi naa Ciiyo ca Bbaibbele Cambungano, tweelede kuzinzibala kuyeeya makani ngotubala. Sena tulaakufwaambana ikweenga aali bwiinguzi akuunka kumuncali uutobela? Kulibambila kuli boobu takukonzyi kutugwasya pe naa kutupa kuti katuziyeeya zyintu nzyotubala. Kuti katuyanda bululami, tuyandika kubala akuzinzibala kuyeeya zyintu zilembedwe mu Jwi lya Leza. Ikwiiya kuyanda bululami amoyo wesu woonse kuyandika kusolekesya.

Inzala Anyota Yabululami

14. Mbuti Jehova Leza a Jesu Kristo mbobayanda kuti katulimvwa notubabelekela?

¹⁴ Jehova Leza a Jesu Kristo bayanda kuti katukkomene notubabelekela. Ino ncinzi ciyakupa kuti katukkomana? Nkuyanda bululami. Amulumbe wakwe waa Cilundu Jesu wakaamba kuti: “Balikkomene aabo bafwa nzala anyota yabululami, nkaambo bayookkuta.” (Mt. 5:6) Ino majwi aaya ayandika buti kuli baabo bayanda kucita bululami?

15, 16. Muunzila nzi nzala anyota yakumuuya mozikonzya kumana?

¹⁵ Inyika njotukkala yeendelezyegwa amubi. (1 Jo. 5:19) Kuti naa twabala muteende wamucisi cili coonse, tulajana makani manji aamba zyalunya akulwana. Bantu baluleme balakatazigwa alunya ndobacita bantu babi. (Muk. 8:9) Mbotuli bantu bamuyanda Jehova, tulizyi kuti walo alikke nguukonzya kumana nzala anyota yakumuuya yalo aabo bayanda kwiiya bululami njobajisi. Aabo bataciti kuyanda kwa Leza ino-ino bayakugusyigwa, pele aabo bayanda bululami tabakapenzyegwi limbi abaabo batatobeli milawo ibacita zibi. (2 Pe. 2:7, 8) Eelo kaka eeci cilakatalusya!

¹⁶ Mbotuli babelesi ba Jehova alimwi ibatobela Jesu Kristo, tulizyi kuti boonse aabo ibali anzala alimwi abafwide nyota yabululami “bayookkuta.” Bayookkuta kwiinda mububambe bwa Leza bwa majulu mapya anyika mpya mwalo “muyooba bululami.” (2 Pe. 3:13) Aboobo, tutatyompwi naa kugambwa kuti kudyaamininwa akupenzyegwa zyapa kuti kutabi bululami munyika ino ya Saatani. (Muk. 5:8) Jehova, mupatikampatila ulizyi cicitika alimwi uyakubafutula boonse aabo bayanda bululami.

Ikuyanda Bululami Mbokukonzya Kumugwasya

17. Ino mbubotu nzi bujanika akaambo kakuyanda bululami?

¹⁷ Ibbuku lya Intembauzyo 146:8 likankaizya mbocigwasya ikutobela bululami. Sintembauzyo wakalemba kuti: “Jehova ulayandisya baluleme.” Kamuciyeeyela buyo eeci! Mwami wabubumbo boonse ulatuyanda akaambo kakuti tulabuyanda bululami. Akaambo kakuti Jehova ulatuyanda, tulaalusyomo lwakuti uyakutupa zyoonse nzyotuyanda zyakumubili notubikka zya Bwami mubusena bwakusaanguna mubuumi  bwesu. (Amubale Intembauzyo 37:25; Tusimpi 10:3.) Mukuya kwaciindi nyika yoonse iyakuzula baabo bayanda bululami. (Tus. 13:22) Kubantu banji ba Leza, ibulumbu bwakucita bululami buya kubakkomanisya kapati alimwi bayakupegwa buumi butamani muparadaiso anyika. Noliba lino, aabo bayanda bululami bwa Leza bali aluumuno lwalo lupa kuti kabamvwana mumikwasyi amumbungano.—Flp. 4:6, 7.

18. Ncinzi ncotweelede kucita notucilindila buzuba bwa Jehova?

¹⁸ Notulindila kusika kwabuzuba bupati bwa Jehova, tweelede kuyandaula bululami. (Zef. 2:2, 3) Aboobo, tweelede kutondezye kuti tulaziyanda ncobeni nzila zya Jehova Leza zyabululami. Eeci cibikkilizya kusama “cilikwabilizyo cabululami” cakucamba kutegwa cikwabilile moyo wesu wacikozyanyo. Alimwi tweelede kuba amanjezeezya mabotu alo aakonzya kutukkomanisya akukkomanisya Jehova.—Tus. 27:11.

19. Ino tweelede kukanza kucita nzi, alimwi ncinzi ciyakubandikwa mucibalo citobela?

¹⁹ “Meso [aa Jehova] alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Mak. 16:9) Eelo kaka alatuyumya-yumya majwi aaya notucita ciluzi munyika eeyi iizwide manyongwe abubi. Masimpe, kusyomeka kwesu kulakonzya kubagambya bantu banji bazandukide kuli Leza. Pele tulagwasyigwa kapati notutobela bululami bwa Jehova. (Is. 48:17; 1 Pe. 4:4) Aboobo, atukanze kuzumanana kuyandisya bululami amoyo wesu woonse akucita ciluleme calo ciyakutupa kukkomana. Nokuba boobo, kuyandisya bululami amoyo wesu woonse kulabikkilizya akusula bubi. Cibalo citobela ciyakututondezya eeci ncocaamba.

Ino Inga Mwaingula Buti?

• Ino kucikkomanina cinunuzyo inga kwatugwasya buti kuti katubuyanda bululami?

• Ino nkaambo nzi ncociyandika kusama “cilikwabilizyo cabululami”?

• Mbuti mbotukonzya kwaayiisya manjezeezya eesu?

[Mibuzyo yaciiyo]

[Cifwanikiso icili apeeji 26]

Manjezeezya aayiisyidwe alatugwasya kwiingula mibuzyo iijatikizya milimo