Sena Mulabusula Bubi?
Sena Mulabusula Bubi?
“[Jesu] wakasula bubi.”—HEB. 1:9.
1. Ino Jesu wakaisya nzi kujatikizya luyando?
KAKANKAIZYA mboluyandika luyando, Jesu Kristo wakaambila basikwiiya bakwe kuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:34, 35) Jesu wakalailila basikumutobela kuti kabatondezya luyando lwakulyaaba kuli umwi aumwi. Luyando lwakali kuyooba citondezyo cakubazyiba. Jesu alimwi wakabakulwaizya kuti: “Amuzumanane kuyanda basinkondonyoko akubapailila aabo bamupenzya.”—Mt. 5:44.
2. Ino nzyintu zili buti nzyobeelede kusulaika babelesi ba Jehova?
2 Kunze lyakubayiisya kujatikizya luyando, Jesu wakabayiisya basikwiiya bakwe zyintu nzyobakeelede kusulaika. Eeci citondezya kuti tatweelede kuyanda buyo bululami pele tweelede kubusula bubi. Mwaapostolo Johane wakaamba cacigaminina kuti: “Muntu woonse uuzumanana kucita cibi nkokuti alimwi utyola mulawo, aboobo cibi nkutyola mulawo.”—1 Jo 3:4.
3. Mbwaanga twiiya kusulaika bubi, nimbazu nzi zyabuumi nzyotutiilange-lange mucibalo eeci?
3 Mbotuli Banakristo, tweelede kulibuzya kuti, sena ndilabusulaika bubi? Atulilingule kujatikizya mbotukonzya kutondezya kuti tulacisulaika cibi mumbazu eezyi zyone zitobela: (1) mbotukubona kuciindiizya kunywa bukoko, (2) micito iijatikizya mizimo, (3) mbotukubona kutalilemeka alimwi (4) mbotubabona aabo bayandisya kucita zibi.
Mutani Kuciindizyi Kunywa
4. Nkaambo nzi Jesu ncaakalaangulukide kucenjezya kujatikizya kuciindilizya kunywa?
4 Zimwi ziindi Jesu wakali kunywa bukoko kazyi kuti ncipego cizwa kuli Leza. (Int. 104:14, 15) Nokuba boobo kunyina naakacibelesya munzila iiteelede cipego eeci kwiinda mukuciindizya kunywa. (Tus. 23:29-33) Aboobo Jesu wakalaangulukide kupa lulayo kujatikizya makani aaya. (Amubale Luka 21:34.) Kuciindilizya kunywa kulakonzya kusololela kuzibi zipati. Nkaakaambo kaako mwaapostolo Paulo wakalemba kuti: “Mutakolwi waini pe, nkaambo kukolwa kupa butaka, pele amuzumanane kuzuzyigwa muuya.”(Ef. 5:18) Alimwi wakalailila bamacembele mumbungano kuti batabi “bazike kukunywa waini munji.”—Tit. 2:3.
5. Ino mibuzyo nzi njobeelede kulibuzya aabo basala kunywa bukoko?
5 Kuti naa mwasala kunywa bukoko, mweelede kulibuzya kuti: Sena kuciindizya kunywa bukoko ‘ndikubona mbuli mbwakubona Jesu’? Ikuti naa kandiyanda kugwasya bamwi mukaambo aaka, sena ndilaangulukide? Sena ndinywida kuti ndimane penzi? Ino ndinywa bukoko bunji buti ansondo? Ino ndilaakulimvwa buti kuti umwi waandaambila kuti ndilaakuciindizya kunywa? ‘Sena ndilakazya naa kunyema?’ Kuciindizya kunywa bukoko kulakonzya kunyonganya kuyeeya kwesu akupa kuti katutasali camaano. Basikumutobela Kristo beelede kuba amaano abusongo.—Tus. 3:21, 22.
Mutaciti Zyintu Zijatikizya Mizimo
6, 7. (a) Ino mbuti mbotweelede kwiibona mizimo? (b) Ino nkaambo nzi zyintu zijatikizya mizimo ncozyavwulila kapati mazuba aano?
6 Naakali anyika, Jesu wakamukazya Saatani amadaimona aakwe. Tanaakayanda kuti Saatani asunke lusyomo lwakwe. (Lk. 4:1-13) Alimwi wakazizyiba akuzikazya nzila zyabucenjezu izyakali kukonzya kumunyonganya kuyeeya akucita zyintu. (Mt. 16:21-23) Jesu wakabagwasya aabo beelela kuti batasunkwi amadaimona.—Mk. 5:2, 8, 12-15; 9:20, 25-27.
7 Naakabikkwa kuba Mwami mu 1914, Jesu wakamutanda Saatani amadaimona aakwe ibakali kunyonganya kujulu. Akaambo kaceeci, mazuba aano kwiinda lyoonse Saatani uluujisi “[k]weena nyika yoonse.”(Ciy. 12:9, 10) Aboobo tacigambyi kuti bantu banji ilabakkomanisya mizimo alimwi iyaabuvwula. Ino ncinzi ncotweelede kucita kutegwa tulikwabilile?
8. Ino ncinzi ncotweelede kucita notulanga-langa zyakulikondelezya nzyotusala?
8 Bbaibbele lilatucenjezya kumapenzi aaboola akaambo kamizimo. (Amubale Deuteronomo 18:10-12.) Mazuba aano, Saatani amadaimona aakwe balabanyonganya bantu amabbuku aamizimo, zisobano zyamucipeku-peku azyaakkompyuta. Notusala zyakweebelela tweelede kulibuzya kuti: ‘Sena mumwezi ooyu wainda kuli nondakasalide cakulikondelezya mbuli mabbasikopo, zisobano zyaacipeku-peku, zisobano zyaakkompyuta, mabbuku naa zyakulikondelezya zimwi ziyoosya? Sena ndilikazyi kaambo nconditeelede kujatikizyigwa mumizimo naa sena ndilayuubya-ubya ntenda yakucita boobo? Sena kuli nondiyeeya mbwakonzya kulimvwa Jehova kujatikizya zyakulikondelezya nzyondisala? Ikuti naa ndilakuzumizya kuyunga kwa Saatani, sena luyando lwangu kuli Jehova anjiisyo zyakwe ziluleme ziyakundigwasya kusala camaano alimwi akutayungwa?’—Mil. 19:19, 20.
Amutobele Kucenjezya kwa Jesu Naamba Zyakutalilemeka
9. Ino mbuti muntu mbwakonzya kuyandisya kucita zyintu zibi?
9 Jesu wakaluuzyi mulawo ngwaakaamba Jehova wakoonana. Wakati: “Sena tiimwakabala kuti ooyo wakabalenga kuzwa kumatalikilo, wakalenga mwaalumi amukaintu alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’? Lino tabacili bobilo, pele baba mubili omwe. Aboobo eeco Leza ncaakaswaanganya kutabi muntu uucaandaanya.” (Mt. 19:4-6) Jesu wakalizyi kuti nzyotubona zilakonzya kujatikizya nzyotuyeeya. Mumulumbe wakwe waa Cilundu wakaamba kuti: “Mwakamvwa kuti kwakaambwa kuti: ‘Utaciti bumambe.’ Pele ndimwaambila kuti kufwumbwa muntu uulangisisya mukaintu cakuti wamunyomenena, wacita kale bumambe anguwe mumoyo wakwe.” (Mt. 5:27, 28) Aboobo, aabo batabikkili maano kukucenjezya kwa Jesu mubwini bayanda kucita zibi.
10. Amwaambe cakacitika icitondezya kuti muntu ulakonzya kucileka kweebelela zyintu ziletela muzeezo wakoonana.
10 Saatani ukulwaizya bantu kuba amuzeezo wakoonana kwiinda mukubala naa kweebelela zyintu ziletela muzeezo wakoonana. Bweende bwazyintu bwa mazuba aano buzwide zyintu eezyi. Aabo beebelela zyintu zili boobu cilabakatazya kuziluba alimwi balazibila. Amubone cakacitika ku Munakristo umwi. Wakati: “Cakusisikizya ndakali kweebelela zyintu ziletela muzeezo wakoonana. Ndakali kukkala munyika yangu ndelikke mondatakali kubelekela Jehova. Ndakalizyi kuti ncondakali kucita tiicakali kabotu pele ndakali kuyeeya kuti milimo njondakali kubelekela Leza yakali kutambulwa.” Ino ncinzi cakamupa kucinca mizeezo? Waamba kuti: “Nokuba kuti cakali cintu cikatazya, ndakayeeya kuti ndibaambile baalu penzi lyangu.” Mukuya kwaciindi mukwesu ooyu wakacileka cilengwa eeci cibi. Wakati: “Nondakacileka cilengwa eeci ndakabona kuti mizeezo yangu yakkalikana.” Aabo basula bubi tabeelede kweebelela zyintu ziletela muzeezo wakoonana.
11, 12. Ino mbuti mbotukonzya kutondezya kuti tatuyandi kucita cibi notusala nyimbo?
11 Inyimbo amajwi aali mumo alakonzya kutujatikizya. Inyimbo ncipego kuzwa kuli Leza alimwi zyali kubelesyegwa mubukombi kuzwa kaindi. (Kul. 15:20, 21; Ef. 5:19) Pele nyika ya Saatani mbyaabi ikulwaizya nyimbo zikulwaizya mizeezo yakutalilemeka. (1 Jo. 5:19) Ino inga mwazyiba buti kuti nyimbo nzyomuswiilila zilamunyonganya naa pe?
12 Mulakonzya kulibuzya kuti: ‘Sena nyimbo nzyondiswiilila zitembaula bujayi, bumambi, bwaamu akusampaula? Kuti muntu ndamubalila majwi aali munyimbo zimwi, sena inga wabona kuti tandiyandi kucita zyintu zibi naa kuti ndilinyongene mumizeezo?’ Tatukonzyi kwaamba kuti twakacileka kucita zibi kakuli tuciswiilila nyimbo izyaamba zyintu eezyo. Jesu wakaamba kuti: “Zyintu izizwa kumulomo zizwa mumoyo, eelyo zyintu eezyo zilamusofwaazya muntu. Mucikozyanyo, mumoyo mulazwa mizeezo mibi, bujayi, bumambe, bwaamu, bubbi, bumboni bwakubeja akusampaula.”—Mt. 15:18, 19; amweezyanisye a Jakobo 3:10, 11.
Amubabone Mbwababona Jesu Aabo Bacita Zibi
13. Ino Jesu wakali kubabona buti bantu bakali kuzumanana kucita zibi?
13 Jesu wakaamba kuti wakaboolela basizibi kuti beempwe. (Lk. 5:30-32) Mbuti mbwaakali kubabona aabo bakazumanana kucita zibi? Jesu wakacenjezya kuti tatweelede kweenwa abantu bali boobu. (Mt. 23:15, 23-26) Alimwi wakati: “Tabali boonse baamba kulindime kuti ‘Mwami, Mwami,’ ibayoonjila mu Bwami bwakujulu, pele ooyo uucita kuyanda kwa Taata uuli kujulu. Ibanji bayooamba kulindime mubuzuba oobo kuti: ‘Mwami, Mwami, sena tiitwakasinsima muzyina lyako, kutanda madaimona muzyina lyako, akucita milimo mipati minji muzyina lyako?’” Nokuba boobo, uyakubakaka aabo bateempwi kati: “Amuzwe kulindime.” (Mt. 7:21-23) Nkaambo nzi ncayakubapeda mulandu uuli boobu? Nkaambo tabamulemeki Leza alimwi balabapenzya bantu akaambo kazyintu zibi nzyobacita.
14. Nkaambo nzi basizibi bateempwi ncobagusyilwa mumbungano?
14 Ijwi lya Leza lyaamba kuti basizibi bateempwi beelede kugusyigwa mumbungano. (Amubale 1 Bakolinto 5:9-13.) Eeci cileelela akaambo katwaambo totatwe: (1) kutegwa zyina lya Jehova litasampaulwi, (2) kutegwa mbungano itasofwaali, alimwi (3) akugwasya sizibi kuti ayempwe kuti kacikonzyeka.
15. Ikuti katuyanda kusyomeka kuli Jehova, mibuzyo nzi iiyandika kapati njotweelede kulibuzya?
15 Sena andiswe tubabona mbwababona Jesu aabo bacita zibi? Tweelede kwiibikkila maano mibuzyo eeyi: ‘Sena inga ndasala kumvwana lyoonse amuntu wakagusyigwa naa wakalizandula kumbungano ya Banakristo? Ino kuti muntu uuli boobu kali musazinyoko wakazwa aŋanda? Bukkale buli boobo bulakonzya kusunka lusyomo lwesu kuli Leza. *
16, 17. Ino mbuyumuyumu nzi bakaintu bamwi Banakristo mbobakajana, alimwi ncinzi cakabagwasya kutobela bubambe bwakugusya basizibi bateempwi?
16 Atubone cikozyanyo camucizyi umwi wakajisi mwana mupati wakali kubelekela Jehova aciindi cimwi. Mukuya kwaciindi, wakasala kucita cibi. Aboobo wakagusyigwa mumbungano. Mucizyi ooyu wakali kumuyanda Jehova alimwi wakali kumuyanda kapati mwanaakwe cakuti cakamuyumina kapati kwaatobela Magwalo aamba kuti taelede kuyanzana anguwe.
17 Ino nomwakamugwasya buti mucizyi ooyu? Imwaalu wakamugwasya kuzyiba kuti Jehova ulizyi mbwalimvwa. Mukwesu ooyu wakamuyeekezya mucizyi kubona mbwaakalimvwa Jehova nibakazanga bana bakwe bangelo. Mwaalu wakamwaambila kuti nokuba kuti Jehova ulizyi mbobukatazya bukkale oobu, basizibi bateempwi bayandika kugusyigwa. Wakaabikkila maano makani ngaakaambilwa akubutobela bubambe bwakugusya. * Kusyomeka kuli boobo kupa kuti Jehova akkomane.—Tus. 27:11.
18, 19. (a) Kuleka kubandika amuntu wakagusyigwa kutondezya kuti ncinzi ncotutayandi? (b) Ino ncinzi ciyakucitika kuti katusyomeka kuli Leza akububambe bwakwe?
18 Kuti kamuli mubukkale buli boobo, kamuyeeya kuti Jehova uleetezyegwa. Ikuleka kubandika amuntu wakagusyigwa naa wakalizandula, citondezya kuti tamwiiyandi micito yakapa kuti agusyigwe. Kuti mwacita boobo, mutondezya kuti mulamuyanda alimwi muyanda kucita cikonzya kumugwasya. Kusyomeka kwanu kuli Jehova kulakonzya kupa kuti ooyo uugwasyigwa ayempwe akupiluka kuli Jehova.
19 Muntu umwi wakagusyidwe wakalemba kuti: “Ndilikkomene kuti akaambo kakuti Jehova ulabayanda bantu bakwe ulasalazya mbunga yakwe. Cintu cilibonya kuti cilakatazya kuli baabo bali anze ambungano, cilayandika alimwi cilagwasya kapati.” Sena muyeeya kuti muntu ooyu naakagwasyigwa akwaamba majwi aaya ikuti bamumbungano abamumukwasyi nibakazumanana kubandika anguwe kagusyidwe? Ikutobela bubambe bwamu Magwalo bwakugusya basizibi bupa bumboni bwakuti tulabuyanda bululami abubambe mbwabikkide Jehova bwakuti katulilemeka.
“Amusule Bubi”
20, 21. Ino nkaambo nzi ncociyandika kusula bubi?
20 Mwaapostolo Petro wakacenjezya kuti: “Amulibatamike, amupakamane.” Ino wakaambila nzi boobu? Nkaambo “Sinkondonyoko, Diabolosi, uyaabweendeenda mbuli syuumbwa uuvwuluma, uyandaula muntu ngwatiimene buumbulu.” (1 Pe. 5:8) Sena muntu ooyu ndinywe? Eeci ciya buyo mbomubusulide bubi.
21 Ikusula zyintu zibyaabi tacili cuuba-uba. Twakazyalwa mucibi alimwi tukkala munyika motukulwaizyigwa kutobela nzyotuyeeya. (1 Jo. 2:15-17) Kuti twamutobela Jesu Kristo akumuyanda Jehova Leza, tulakonzya kusula zyintu zibyaabi. Aboobo tweelede kuzumanana ‘kusula bubi’ akusyoma kuti “ulabamba . . . basalali bakwe, ulabavuna kumaanza aabasizibi.”—Int. 97:10.
[Bupanduluzi Buyungizyidwe]
^ munc. 15 Kutegwa mujane twaambo atumbi mumakani aaya amubone bbuku lyakuti Amuliyobole Muluyando lwa Leza amapeeji 207-209.
^ munc. 17 Amubone Ngazi Yamulindizi yamucingisi yamu January 15, 2007, mapeeji 17-20.
Ino Inga Mwaingula Buti?
• Ino ncinzi ciyakutugwasya kwaalanga bweelede makani aajatikizya bukoko?
• Ino inga twalikwabilila buti kumizimo?
• Ino nkaambo nzi ncokuli kubi kweebelela zyintu ziletela muzeezo wakoonana?
• Ino mbuti mbotutondezya kuti tulizisulide zyintu zibi kuti muntu ngotuyanda wagusyigwa mumbungano?
[Mibuzyo yaciiyo]
[Cifwanikiso icili apeeji 29]
Kuti naa mwasala kunywa bukoko, ino ncinzi ncomweelede kuzyiba?
[Cifwanikiso icili apeeji 30]
Amukucenjelele kuyungwa a Saatani nomusala zyakulikondelezya
[Cifwanikiso icili apeeji 31]
Muntu weebelela zyintu zileta muzeezo wakoonana uyandisya nzi?
