Sena Mulalumba Zilongezyo Nzyomujisi?

BANA Israyeli bakalikkomene kumukomba Jehova naakabavwuna camaleele kuzwa mubuzike ku Egepita. (Kul. 14:29–15:1, 20, 21) Pele kalitanalampa, bakacinca maano, bakatalika kutongooka. Ino nkaambo nzi? Nkaambo bakali kubikkila kapati maano kumapenzi aakali kucitika munkanda muciindi cakuyeeya zyintu nzyaakabacitila Jehova. Bakaambila Musa kuti: “Nkaambo nzi mwakatupozya kuzwa ku-Egepita kuti tufwe munkanda? Taakwe zilyo. Taakwe maanzi. Atupepelefwa otu [imana] myoyo yesu yatucimwa.”—My. 21:5.

Nokwakainda myaanda yamyaka, Mwami Davida wamu Israyeli yansiku wakaimba kuti: “Mebo ndasyoma luzyalo lwako, moyo wangu uyookondwa mulufutuko lwako. Ndaimbila Jehova, nkaambo wandibamba kabotu loko.” (Int. 13:5, 6) Davida tanaakaluba luzyalo Jehova ndwaakamucitila. Muciindi caboobo, lyoonse wakali kuziyeeya nzyaakamucitila. (Int. 103:2) Mbubwenya buyo, andiswe Jehova watulongezya alimwi tweelede kuzibikkila maano zyintu nzyaatucitila. Aboobo atulange-lange zilongezyo zimwi Leza nzyatupa aano mazuba.

‘Cilongwe Cesu a Jehova’

Sintembauzyo wakaimba kuti: “Lumvwano lwa-Jehova ndulwabo bamuyoowa.” (Int. 25:14) Eelo kaka cilakkomanisya kubona bantu batalondokede kabamvwana a Jehova! Nokuba boobo, ino kuti naa twajata bubi kucita milimo yesu cakuti tatujani ciindi cinji cakupaila? Kamuyeeya buyo ciyakucitika kucilongwe cesu a Jehova. Mbwali mulongwe wesu, Jehova uyanda kuti katumusyoma akumwaambila mumupailo nzyotuyanda,  nzyotuyoowa anzyotulibilika. (Tus. 3:5, 6; Flp. 4:6, 7) Aboobo tweelede kubikkila maano kumipailo yesu.

Paul Kamboni uucili mwana naakali kuyeeya amipailo yakwe, wakabona kuti uyandika kupaila mipailo iimvwika. * Wakaamba kuti, “Ndakali acilengwa cakwiinduluka mabala nindakali kupaila kuli Jehova.” Paul naakali kuvwuntauzya mu Watch Tower Publications Index amutwe ooyu, wakajana kuti kuli mipailo iitandila ku 180 iilembedwe mu Bbaibbele. Mumipailo eeyo njobakali kupaila babelesi ba Jehova kaindi, bakali kumwaambila Leza cakali kumoyo. Paul wakati: “Kwiinda mukuzinzibala kuyeeya zikozyanyo zyamu Magwalo eezyi, ndakaiya kwaamba cine ncondiyanda mumipailo. Eeci candigwasya kumwaambila zyoonse nzyondiyanda Jehova. Lino cilandikkomanisya kupaila kulinguwe.”

‘Cakulya Aciindi Ceelede’

Cilongezyo cimwi ncatupa Jehova ncakutugwasya kumvwisya kasimpe kamu Magwalo. Notuyabutangala acakulya cakumuuya, tulijisi twaambo tutupa ‘kwiimba cakukondwa mumoyo.’ (Is. 65:13, 14) Nokuba boobo, tatweelede kuyungwa azyintu zikonzya kutulesya kuti tutabi basungu mukasimpe. Mucikozyanyo, tatweelede kuswiilila nzyobaamba basiluleyo akaambo kakuti zilakozya kutunyonganya akutupa kuleka kubikkila maano kucakulya cakumuuya cipegwa “aciindi ceelede” eeco Jehova ncatupa kwiinda “muzike musyomesi uucenjede.”—Mt. 24:45-47.

André wakali kubelekela Jehova kwamyaka minji wakayungwa abasiluleyo. Wakali kuyeeya kuti ikubala makani aabasiluleyo a Intaneti kwaciindi cisyoonto buyo takukonzyi kumunyonganya. Wakati: “Nindakatalika ndakakwelelezyegwa amakani ngobakali kwaamba kuti ngamasimpe. Nindakalanga nzibakali kwaamba ndakatalika kubona kuti tacigwasyi kuba mumbunga ya Jehova. Pele mukuya kwaciindi, nindakali kuvwuntauzya kukazyanya kuliko akati kabasiluleyo a Bakamboni ba Jehova, ndakabona bucenjezu mbubakajisi bamayi bakubeja. Makani aakubeja ngobaamba kujatikizya ndiswe, ‘mpaakaimvwi bumboni’ bwabo. Aboobo ndakatalika kubala mabbuku eesu akujanika kumiswaangano. Ndimane ndakabona kuti nzinji nzindakaindwa.” Mucoolwe André wakapiluka mumbungano.

“Ciinga Coonse Cabakwesu”

Kukamantana kwabakwesu ncileleko kuzwa kuli Jehova. (Int. 133:1) Nkakaambo kaako mwaapostolo Petro ncaakalembela kuti: “Amube aluyando kuciinga coonse cabakwesu.” (1 Pe. 2:17) Ikuba akati kabakwesu Banakristo cilakkomanisya nkaambo tulagwasyigwa abaabo bali mbuli bataata, bamaama, bakwesu abacizyi bali mukasimpe.—Mk. 10:29, 30.

Nokuba boobo, zyintu zitucitikila zimwi  ziindi zilakonzya kupa kuti tuleke kumvwana abakwesu abacizyi. Mucikozyanyo, cilakonzya kutuubaubila kunyemena umwi akaambo kakutalondoka kwakwe akumubona kuti zyoonse nzyacita tazili kabotu. Ikuti cintu cili boobu cacitika, cilakonzya kugwasya kuyeeya kuti Jehova ulabayanda babelesi bakwe nokuba kuti tabalondokede. Nokuba boobo, “Ikuti naa twaamba kuti: ‘Tunyina cibi,’ twalyeena lwesu tobeni alimwi kasimpe takako pe mulindiswe.” (1 Jo. 1:8) Tweelede ‘kuzumanana kweengelelana akulekelelana camoyo woonse.’—Kol. 3:13.

Ann uucili mwana wakazyiba mbociyandika kumvwana abakwesu Banakristo ciindi naakapenga. Kalilemeka mbuli mwana mutaka wamucikozyanyo ca Jesu, Ann wakaleka kuswaangana ambungano ya Banakristo. Tiikwakainda ciindi, wakaliyeeya akupiluka mumbungano. (Lk. 15:11-24) Ino ncinzi Ann ncaakayiya kuli cakamucitikila? Wakaamba kuti: “Lino mbwaanga ndakapiluka mumbunga ya Jehova, ndilababikkila maano boonse bakwesu abacizyi nokuba kuti tabalondokede. Kaindi ndakali kubona kuti zyoonse nzyobakali kucita tiizyakali kabotu. Pele lino ndikanzide kuti nditalekeli cintu neciba comwe kuti cindilesye kukkomana abasyomima. Taaku cintu cili munyika ceelede kutupa kuti tusiye paradaiso yesu yakumuuya.”

Lyoonse Mweelede Kulumba Zilongezyo Nzyomujisi

Lusyomo ndotujisi lwakuti Bwami bwa Leza mbobuya kumana mapenzi ngobajisi bantu boonse, ncintu ciyandika kapati. Ciindi cakusaanguna nitwakaba alusyomo oolu, twakakkomana kapati. Twakalimvwa mbuli kuti musambazi wamucikozyanyo ca Jesu ‘wakasambala zyintu zyoonse nzyaakajisi’ kutegwa ‘aule ngale yomwe iiyandika kapati.’ (Mt. 13:45, 46) Jesu tanaakaamba kuti musambazi wakaleka kwiiyanda ngale yakwe. Mbubwenya buyo, andiswe tatweelede kuleka kulumba bulangizi mbotujisi.—1 Te. 5:8; Heb. 6:19.

Atubone cikozyanyo caba Jean ibamubelekela Jehova kwamyaka iinda ku 60. Bakaamba kuti: “Icandigwasya kapati kuti kandiyeeya Bwami bwa Leza nkwaambila bamwi kujatikizya bwami oobu. Ndabona mbobakkomana akaambo kakuzyiba Bwami oobu ncobuya kucita, andime ndilakkomana. Nondibona basikwiiya Bbaibbele mbobacinca akaambo kakuzyiba Bwami ncobuya kucita kundipa kuyeeya kuti, ‘Aaka nkakasimpe nkondeelede kwaambila bamwi.’”

Tulijisi twaambo tunji tukonzya kutupa kuti katulumba zilongezyo nzyotujisi. Nokuba kuti tulakonzya kutyompwa azyintu zitucitikila mbuli kuciswa, kucembaala, kutyompwa, kufwidwa akubula mali, tulizyi kuti eezyi zyoonse nzyakaindi buyo kasyoonto. Mu Bwami bwa Leza, kuyungizya azilongezyo zyakumuuya tuyakupegwa zilongezyo azimbi. Mapenzi oonse ngotuliyumya lino ayakumana mubweende bwazyintu bupya.—Ciy. 21:4.

Kwaciindi eecino, tweelede kulumba zilongezyo zyakumuuya nzyotujisi alimwi akutondezya kulumba mbuli mbwaakacita sintembauzyo wakaimba kuti: “Nzinji loko nzowakacita, O Jehova Leza wangu, nkokuti malele aako amakanze aako kulindiswe; taakwe uukonzya kukozyanizigwa ayebo. Na njanda kuzikanana nanka kuzyaamba, nzinji loko, tazibaliki.”—Int. 40:5.

[Bupanduluzi Buyungizyidwe]

Cifwanikiso icili apeeji 18]

Tulilongezyedwe akaambo kakugwasyigwa kumuuya muziindi zyamapenzi