Mutalyeeni Akuyeeya Kutaluzi

“INO ncinzi eci ncowacita?” Leza wakabuzya Eva naakamana kulya mucelo wacisamu cakakasyidwe. Wakavwiila kuti: “Inzoka njiyakandoongelezya, aboobo ndalya.” (Matl. 3:13) Saatani, muzoka uucenjede iwakapa kuti atamvwidi Leza, wakazooitwa kuti “muzoka waciindi, . . . nguuena bantu boonse baansi.”—Ciy. 12:9.

Cibalo eeci cili mubbuku lya Matalikilo citondezya kuti Saatani ulicenjede, ulacenga bantu. Cakutadooneka Eva wakacengwa abubeji bwa Saatani. Nokuba boobo, tatweelede kuyeeya kuti Saatani alikke nguukonzya kutucenga. Alimwi Bbaibbele litucenjezya kuti tulakonzya ‘kulyeena akuyeeya kutaluzi.’—Jak. 1:22.

Muzeezo wakuti tulakonzya kulicenga tobeni inga walibonya mbuli kuti ncintu citakonzyeki. Nokuba boobo, kuli kaambo Leza ncatucenjezyela. Aboobo, kulayandika kuzyiba mbotukozya kulicenga alimwi akubona mizeezo iitali kabotu mboikonzya kutunyonganya. Cikozyanyo camu Magwalo cilakonzya kutugwasya.

Ncotukonzya Kwiiya Kuli Baabo Bakalyeena

Mu 537 B.C.E., Koresi Mupati waku Persia wakapa mulawo wakuti bama Juda bakatoledwe buzike ku Babuloni bapiluke ku Jerusalemu akuyooyakulula tempele. (Ezr. 1:1, 2) Mwaka wakatobela kweelana amakanze a Jehova, bantu bakatalika kuyaka tempele mpya. Bantu bakapiluka bakakkomana akutembaula Jehova akaambo kakulongezya matalikilo amulimo ooyu uuyandika kapati. (Ezr. 3:8, 10, 11) Kalitanalampa, basikukazya bakaboola kunyonganya mulimo wabo wakuyakulula alimwi bantu bakatyompwa. (Ezr. 4:4) Nokwakainda myaka iili 15 kuzwa nobakapiluka, mfwulumende yabana Persia yakakasya milimo yakuyaka yoonse yakali kucitwa mu Jerusalemu. Kutegwa basinizye kuti eeci cacitika, bapati bamfulumende kubusena oobo bakasika ku Jerusalemu ‘akusinikizya kuti [bama Juda] bauleke milimo ooyu.’—Ezr. 4:21-24.

Akaambo kakukasyigwa ooku, bama Juda bakalyeena. Bakatalika kwaamba kuti: “Ciindi cakuyakulula iŋanda ya-Jehova tacina kusika.” (Hag. 1:2) Bakayeeya kuti Leza tayandi kuti tempele iyakululwe cakufwaambana. Muciindi cakujana nzila iikonzya kubagwasya kuti baucite mulimo ooyu, bakauleka mulimo ooyu uusetekene akutalika kubotya maanda aabo. Musinsimi wa Leza Hagai wakababuzya kuti: “Sa casika ciindi canu cakukala mumaanda aavumbidwe kabotu, nekuba kuti iŋanda eyi [tempele ya Jehova] icimwaikide?”—Hag. 1:4.

Sena kuli ncomukonzya kwiiya mucikozyanyo eeci? Kucilanga munzila iitaluzi ciindi ncabikkide Leza kujatikizya makanze aakwe cilakonzya kutupa kuti tutazibikkili maano izyintu zijatikizya bukombi bwesu. Mucikozyanyo, amuyeeye kuti kuli beenzu mbomulangila. Ikulangila kulakonzya kumupa kuti mubeleke milimo imwi. Kumane, mwatambula mulumbe wakuti beenzu banu balamuka kusika. Sena mulaleka kulibambila?

Kamuyeeya kuti, basinsimi ba Hagai a Zekariya bakagwasya bama Juda kuzyiba kuti Jehova uyanda kuti tempele iyakululwe cakufwaambana. Hagai wakabaambila kuti: “Nubantu boonse bacisi, . . . amubeleke.” (Hag. 2:4) Bakeelede kuzumanana amulimo ngobakapedwe kabali alusyomo lwakuti  muuya wa Leza uyakubagwasya. (Zek. 4:6, 7) Sena eeci cilakonzya kutugwasya kuzilanga munzila iiluzi zyintu kujatikizya buzuba bwa Jehova?—1 Ko. 10:11.

Kuyeeya Kugwasya Muciindi Cakulyeena

Mulugwalo lwakwe lwabili mwaapostolo Petro wakaamba kujatikizya ciindi ca Jehova cakutalisya “majulu mapya anyika mpya.” (2 Pe. 3:13) Wakaamba kuti basabuzi baladooneka kuti naa Leza kuli nayoobweza ntaamu muzyintu zicitika sunu. Cakutazyiba balakazya balati taaku ciyakucitika, nkaambo “izyintu zyoonse zilazumanana mbubonya mbozyakabede kuzwa kumatalikilo aazilenge.” (2 Pe. 3:4) Petro wakali kuyanda kupandulula kaambo aaka mbokaluzi. Wakalemba kuti: “Ndisensemuna mizeezo yanu mibotu kwiinda mukumuyeezya.” Wakali kuyeekezya Banakristonyina kuti basabuzi aaba bakalisweekede. Kaindi Leza wakabweza ntaamu akaambo kazyintu nzyibakali kucita wakacita oobo kwiinda mukuleta zambangulwe munyika yoonse.—2 Pe. 3:1, 5-7.

Hagai awalo wakabaambila mbubonya bama Juda bakatyompwa mu 520 B.C.E. Wakabakulwaizya kuti: “Amuyeeye makani aamusikila.” (Hag. 1:5) Kutegwa abagwasye kuyeeya wakaambila bakombinyina kujatikizya makanze a Leza azisyomezyo zyakwe kujatikizya bantu bakwe. (Hag. 1:8; 2:4, 5) Nobakamana kukulwaizyigwa, mulimo wakuyaka wakatalika alimwi—nokuba kuti wakalikasyidwe. Kumane basikukazya bakasoleka alimwi kukasya mulimo wakuyaka, pele taku nobakazwidilila. Bakazumizyigwa kuyaka alimwi mumyaka iili yosanwe bakamanizya kuyaka tempele.—Ezr. 6:14, 15; Hag. 1:14, 15.

Amuyeeye Makani Aamusikila

Mbuli bama Juda bamu mazuba aa Hagai, sena muyeeya kuti tulakonzya kutyompwa kuti naa twasikilwa mapenzi? Kuti kacili boobo nkokuti cilakonzya kutukatazya kuzumanana kusungwaala kukambauka makani mabotu. Pele ino ncinzi cikonzya kututyompya? Ndiza tulakonzya kupenga akaambo kakutalulama kwabweende oobu bwazyintu. Amuyeeye Habakkuku naakabuzya kuti: “Njooleka lili kukukwiilila notamvwi? Ndakulilila nkaambo kakupyopyongana kwabantu.” (Hab. 1:2) Akaambo kakubona kuti mamanino amuka, Munakristo ulakonzya kuleka kupakamana akutalika kubikkila kapati maano kuzyintu nzyayanda. Sena mubona kuti eeci cilakonzya kumucitikila? Kuti katuzibona munzila iili boobu zyintu, nkokuti tulalyeena. Eelo kaka cilagwasya kutobela lulayo lwamu Magwalo lwa ‘kuyeeya makani aamusikila’ alimwi ‘akusensemuna mizeezo yesu’! Inga twalibuzya kuti, ‘Sena cilandigambya kuti bweende bwazyintu oobu bubyaabi bwatola ciindi cilamfwu kwiinda mbondali kuyeeya?’

Ciindi Cakulindila

Amulange-lange majwi aa Jesu kujatikizya mamanino aabweende oobu bwazyintu. Mucibalo ca Maako cabusinsimi bwa Jesu bwamazuba  aamamanino cakwiinduluka-induluka Jesu utukulwaizya kupakamana. (Mk. 13:33-37) Alimwi tulacenjezyegwa abusinsimi bupandulula buzuba bupati bwa Jehova bwa Harmagedoni. (Ciy. 16:14-16) Ino nkaambo nzi ncotucenjezyegwa cakwiinduluka-induluka? Kuyeekezyegwa kuli boobu kulayandika akaambo kakuti kulindilila kwaciindi cilamfwu kulakonzya kuti bantu baleke kupakamana.

Jesu wakabelesya cikozyanyo kwaamba mbociyandika kuzumanana kupakamana notulangila mamanino aabweende bwazyintu oobu. Wakali kwaamba muntu wakabbidwa zyintu muŋanda. Ino wakeelede kucita nzi kutegwa mubbi atanjili muŋanda yakwe? Wakali kuyandika kuti ataoni masiku oonse. Jesu wakamanizya kwiinda mukwaamba kuti: “Amulibambile, nkaambo aciindi ncomutayeeyeli, Mwana wamuntu ulaboola.”—Mt. 24:43, 44.

Cikozyanyo eeci citondezya mbokuyandika kulindila, nokuba kwaciindi cilamfwu. Tatweelede kulimvwa kuti bweende bwazyintu oobu bubyaabi bwatola ciindi cilamfwu kwiinda mbotwali kuyeeya. Tatweelede kulyeena kwiinda mukuyeeya kuti ‘ciindi ca Jehova tacinasika.’ Kuyeeya kuli boobu kulakonzya kututolwaazya kukambauka makani mabotu aa Bwami.—Lom. 12:11.

Kutayeeya Zyintu Zitaluzi

Kujatikizya kuyeeya kutaluzi, njiisyo iijanika ku Bagalatiya 6:7 ilakonzya kubeleka iyakuti: “Mutalyeeni pe . . . Kufwumbwa cintu muntu ncasyanga, ncencico eeco ncayootebula.” Kuti naa taku cisyangidwe mubulongo, insaku ilakonzya kumena cakufwaambana. Mbubonya buyo, ikuti katutaisensemuni mizeezo yesu, tulakonzya kutalika kuyeeya zyintu zitaluzi. Mucikozyanyo, tulakonzya kuyeeya kuti ‘ibuzuba bwa Jehova masimpe bulasika—pele kutali ino-ino.’ Kuyeeya kuli boobu kulakonzya kutupa kuliiba akutabikkila maano kuzyintu zyakumuuya. Mukuya kwaciindi busungu mbotwakajisi mubukombi bwesu bulakonzya kumana. Aboobo, ibuzuba bwa Jehova bulakonzya kutujana katutalibambilide.—2 Pe. 3:10.

Pele tatukonzyi kuyeeya zyintu zitaluzi kuti lyoonse katuzyi “kuyanda kwa Leza, ikubotu, kutambulika alimwi kulondokede.” (Lom. 12:2) Kubala Jwi lya Leza lyoonse kulakonzya kugwasya kapati. Magwalo alakonzya kuyumya lusyomo lwesu lwakuti lyoonse Jehova ulakonzya kucita ncayanda aciindi ncabikkide.—Hab. 2:3.

Ciiyo cesu, mipailo, kujanika kumiswaangano, kukambauka alubomba kuya kutugwasya ‘kuyeeya kubako kwabuzuba bwa Jehova.’ (2 Pe. 3:11, 12) Jehova uyakubona kuti twazumanana. Mwaapostolo Paulo utwaambila kuti: “Tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.”—Gal. 6:9.

Aboobo eecino tacili nceciindi cakulyeena akuyeeya kuti buzuba bwa Jehova bwasumpizyigwa. Pele eecino nciindi cakuyuma nkaambo buzuba bwa Jehova bwaswena.

[Cifwanikiso icili apeeji 4]

Hagai a Zekariya bakabakulwaizya bama Juda kuti bayake

[Cifwanikiso icili apeeji 5]

Ino naakacita buti mukamwiniŋanda naakazyiba kuti mubbi ulaboola?