Kubelekela Jehova Cakumaninina
Kubelekela Jehova Cakumaninina
“Kufwumbwa zyintu zipegwa bulemu, . . . kamuzumanana kuziyeeyesya zyintu eezyi.”—FLP. 4:8.
1, 2. Ino nkaambo nzi bantu banji munyika ncobatazyibikkili maano zyintu ziyandika kapati, alimwi mibuzyo nzi njotukonzya kulibuzya?
TUPONA muciindi bantu nobajisi mapenzi manji munyika. Kubantu batamubikkili maano Jehova, kuliyumya “[mu]ziindi zikatazya” ncintu ciyumu kapati. (2 Ti. 3:1-5) Abuzuba balabeleka canguzu pele tabaciti kabotu. Akaambo kakutayanda kubikkila maano kuzyintu ziyandika kapati mubuumi, bantu banji basala kulikondelezya azyintu nzyobayeeya kuti zilakonzya kubapa kuluba mapenzi ngobajisi.
2 Kutegwa baliyumye mumapenzi, bantu babikkila kapati maano kuzyintu zyakulikondelezya. Kuti batacenjela, abalo Banakristo balakonzya kucita mbubwenya oobu. Mbuti mbotukonzya kulilesya kucita boobo? Sena eeci caamba kuti tatweelede kuba aciindi cakukkomana? Ino mbuti mbotukonzya kulikondelezya akucita milimo yesu munzila yeelede? Ino ninjiisyo nzi zyamu Magwalo zikonzya kutugwasya kuzicita kabotu zyintu kakunyina kuciindilizya?
Kamubikkila Maano Munyika Bantu Mobayandisya Kulikondelezya
3, 4. Mbuti Magwalo mbwaatugwasya kubona mbokuyandika kubikkila maano kucilongwe cesu a Jehova?
3 Cakutadooneka, bantu “bayandisya zyakulikondelezya.” (2 Ti. 3:4) Ikubikkila kapati maano kukulikondelezya kulakonzya kunyonganya cilongwe cesu a Jehova. (Tus. 21:17) Nkakaambo kaako mwaapostolo Paulo mumagwalo ngaakalembela Timoteyo a Tito wakabikkilizya lulayo lwakuti kababikkila maano kuzyintu ziyandika kapati. Kutobela lulayo oolu kuya kutugwasya kuti tutayungwi anyika.—Amubale 1 Timoteyo 2:1, 2; Tito 2:2-8.
4 Myaanda yamyaka yainda, Solomoni wakalemba kuti zimwi ziindi tatweelede kulikondelezya kutegwa tubikkile maano kuzyintu ziyandika. (Muk. 3:4; 7:2-4) Masimpe, akaambo kakuti buumi mbufwaafwi, tweelede ‘kubeleka canguzu’ kutegwa tukafutuke. (Lk. 13:24) Kutegwa eeci cikakonzyeke, tweelede kuzumanana kubikkila maano “[ku]zyintu zipegwa bulemu.” (Flp. 4:8, 9) Eeci caamba kuti tweelede kubikkila maano kapati kumbazu zyoonse zyabuumi bwa Bunakristo.
5. Ino ncintu nzi ncotweelede kubikkila maano kapati mubuumi?
5 Mucikozyanyo, nobaiya Jehova a Jesu, Banakristo balaibikkila maano mikuli yabo kwiinda mukubeleka canguzu. (Joh. 5:17) Nkakaambo kaako bantu balabalumbaizya Banakristo bakasimpe akaambo kakubeleka canguzu akusyomeka. Ikapati basilutwe bamikwasyi balabeleka canguzu kulanganya mikwasyi yabo. Kutabajanina nzyobayandika bamumukwasyi ncimwi buyo ‘akukaka Jehova.’—1 Ti. 5:8.
Kubikkila Maano Kubukombi Bwesu
6. Ino mbuti mbotuzyiba kuti tweelede kubikkila maano kapati kubukombi bwesu kuli Jehova?
6 Lyoonse Jehova ucibona kuti cilayandika kapati kumukomba munzila yeelede. Mucikozyanyo, mu Mulawo wa Musa bana Israyeli bakapenga kapati nobakaleya mubukombi bwa Jehova. (Jos. 23:12, 13) Mumwaanda wakusaanguna C.E., basikutobela Kristo bakali kuyandika kubeleka canguzu kutegwa bukombi bwakasimpe butasofwaazyigwi anjiisyo zyakubeja akutalilemeka kabotu. (2 Jo. 7-11; Ciy. 2:14-16) Mazuba aano Banakristo bakasimpe balabubikkila maano bukombi bwabo.—1 Ti. 6:20.
7. Ino Paulo wakali kulibambila buti mulimo wakukambauka?
7 Mulimo wakukambauka ulatukkomanisya kapati. Pele kutegwa tuzumanane kukkomana mumulimo wakukambauka, tweelede kubona mbouyandika akulibambila kakucili ciindi. Paulo wakapandulula mbwaakali kubabikkila maano bantu mbaakali kuyiisya. Wakalemba kuti: “Ndaba zyintu zyoonse kubantu bamisyobo yoonse kutegwa ziyume zitete ndibafwutule bamwi. Pele ndicita zyintu zyoonse akaambo kamakani mabotu, kutegwa ndaabile bamwi.” (1 Ko. 9:22, 23) Paulo wakali kukkomana kugwasya bantu kumuuya alimwi wakali kujana nzila zigaminide mbwaakali kukonzya kubagwasya baswiilizi bakwe. Aboobo wakali kubakulwaizya kuti bazumanane kukomba Jehova.
8. (a) Mbuti mbotweelede kubabona bantu mbotuyiisya mumulimo? (b) Ino kusololela ciiyo ca Bbaibbele kuyungizya buti lukkomano lwesu mumulimo?
8 Ino mulimo wakukambauka wakali kuyandika buti kuli Paulo? Paulo wakalilibambide kuba “muzike” wa Jehova akuli baabo bakali kuswiilila mulumbe wakasimpe. (Lom. 12:11; 1 Ko. 9:19) Notuyiisya bantu Jwi lya Leza—kuciiyo ca Bbaibbele caaŋanda, kumiswaangano ya Bunakristo naa ciindi Cakukomba Mumukwasyi—sena tulabona kuti tujisi mukuli kujatikizya baabo mbotuyiisya? Ambweni tulimvwa kuti kusololela ciiyo ca Bbaibbele comwe cisitikide mulimo uukatazya kapati. Masimpe, kuyandika kujana ciindi kuzwa kuzyintu nzyotuyandisya akucibelesya kugwasya bamwi. Eeci cileendelana amajwi aa Jesu aakuti, “kupa kulakkomanisya kapati kwiinda kutambula.” (Mil. 20:35) Kuyiisya bamwi kuti bakafwutuke kuyootupa kukkomana kutakonzyi kujanwa kumulimo uuli woonse.
9, 10. (a) Sena kubelekela Jehova cakumaninina caamba kuti tatukonzyi kuba aciindi cakulyookezya akumvwana abeenzuma? Amupandulule. (b) Ino ncinzi cikonzya kugwasya mwaalu kuba muntu uukulwaizya alimwi uusikilika?
9 Kubelekela Jehova cakumaninina tacaambi kuti tatukonzyi kuba aciindi cakulyookezya akukkomana abamwi. Jesu wakatupa cikozyanyo cibotu cakuba aciindi ikutali buyo cakuyiisya bantu pele acakulyookezya alimwi akumvwana abeenzuma. (Lk. 5:27-29; Joh. 12:1, 2) Kunze lyaboobo kubelekela Jehova cakumaninina tacaambi kuti lyoonse katuciindilizya kucita zyintu. Jesu naakaciindilizya, bantu nobatakamutobela. Ibana abalo bakali kukkomana kuba anguwe. (Mk. 10:13-16) Mbuti mbotukonzya kwiiya cikozyanyo ca Jesu?
10 Kujatikizya mwaalu, mukwesu uumwi wakaamba kuti: “Ulilyaabide kubeleka canguzu, pele talangili kuti bamwi bacite zyintu nzyobatakonzyi.” Sena oobo mbomubede andinywe? Tweelede kuzyiba zyintu nzyobakonzya kucita bamwi. Mucikozyanyo, bana bacita kabotu ciindi bazyali babo nobababikkila mbaakani akubagwasya kuzizuzikizya. Mbubwenya buyo, baalu balakonzya kukulwaizya bamwi mumbungano kuyaambele kumuuya akubatondezya nzila zigaminide zikonzya kubagwasya kucita oobo. Kuyungizya waawo kuti mwaalu kalicesya, takatazyi kusikila alimwi ulakonzya kutukulwaizya. (Lom. 12:3) Mucizyi uumwi wakaamba kuti: “Tandiyandi kuti mwaalu kacita zyintu mbuli kuti usobana buya. Pele kuti lyoonse kataseki-seki, cilakatazya kumusikila.” Umwi wakaamba kuti baalu bamwi “balakatazya kusikila, balayoosya.” Baalu tabeelede kupa kuti basyominyina bakomba Jehova, “Leza uukkomene” kabausa.—1 Ti. 1:11.
Kusikila Azyeelelo Kutegwa Mupegwe Mikuli Mumbungano
11. Ino caamba nzi kusika azyeelelo mumbungano?
11 Paulo naakakulwaizya baalumi mumbungano kuti babeleke canguzu kuti beelele kupegwa mikuli, makanze aakwe tanaakali aakukulwaizya muntu uuli woonse kuti alijanine mpuwo. Muciindi caboobo, wakalemba kuti: “Ikuti naa muntu kayanda mulimo wabulangizi, uyanda mulimo mubotu.” (1 Ti. 3:1, 4) “Kuyanda mulimo wabulangizi” kweelede kupa kuti baalumi Banakristo kabayandisya kubeleka canguzu kutegwa babe abube bwakumuuya ibuyandika mukugwasya banyina. Kuti kwainda mwaka omwe kuzwa ciindi naakabbapatizyigwa mukwesu alimwi kasika azyeelelo zyamu Magwalo zya bakutausi zilembedwe mulugwalo lwa 1 Timoteyo 3:8-13, ulakonzya kusalwa. Cakutainda mumbali kapango ka 8 kaamba kuti: “Bakutausi beelede kuba bantu basimide mumizeezo.”
12, 13. Amupandulule nzila zimwi bakwesu bacili bana mbobakonzya kusika azyeelelo zyakupegwa mikuli.
12 Sena uli mukwesu wakabbapatizyigwa uubelekela Jehova cakumaninina uujisi myaka iitandila ku 20? Kuli nzila zinji nzyokonzya kutobela kutegwa usike azyeelelo. Nzila yomwe njakuyungizya ciindi ncobeleka mumulimo wamumuunda. Sena ulakkomana kubeleka abakwesu bamisela iindene-indene mumulimo wamumuunda? Sena uyandaula muntu ngokonzya kwiiya limwi Bbaibbele? Kuti kosololela ziiyo zya Bbaibbele kweelana amalailile aapegwa amiswaangano ya Banakristo, uyooyaambele mukuyiisya kwako. Kuyungizya waawo, uya kutalika kubeetelela aabo baiya nzila zya Jehova. Ngoyiisya Bbaibbele atalika kubona kuti uyandika kucinca, cakukkazika moyo alimwi munzila yabupampu uya kuzyiba mbokonzya kumugwasya kutobela njiisyo zyamu Bbaibbele.
13 Nobakwesu bacili bana mulakonzya kubagwasya bapati mumbungano kwiinda mukulyaaba kubacitila milimo njomukonzya. Alimwi mulakonzya kubikkila maano kulubuwa lwa Ŋanda ya Bwami kwiinda mukugwasilizya kusalazya kutegwa kalweebeka. Muuya wakulyaaba wakugwasya oomo momukonzya, upa bumboni bwakuti mulabikkila maano kumulimo wanu. Mbubwenya mbuli Timoteyo, mulakonzya kwiiya kulanganya zyintu ziyandika mumbungano.—Amubale Bafilipi 2:19-22.
14. Mbuti bakwesu bacili bana mbobakonzya “kusolwa naa baleelela” kubeleka mumbungano?
14 Nobaalu, amubabelesye bakwesu bacili bana balo basolekesya ‘kutija zisusi zyabukubusi’ alimwi babeleka canguzu kutobela “bululami, lusyomo, luyando, aluumuno,” amilimo iimwi mibotu. (2 Ti. 2:22) Kwiinda mukubapa milimo yakucita mumbungano, balakonzya “kusaanguna kusolwa naa baleelela” kupegwa mikuli kutegwa ‘kuyaambele kwabo kubonwe abantu boonse.’—1 Ti. 3:10; 4:15.
Mbomukonzya Kutondezya Kuti Mulabikkila Maano Mumbungano a Mumukwasyi
15. Kweelana alugwalo lwa 1 Timoteyo 5:1, 2 mbuti mbotukonzya kutondezya kuti tulababikkila maano bamwi?
15 Kubikkila maano kubikkilizya kubalemeka bakwesu abacizyi. Mululayo ndwaakalembela Timoteyo, Paulo wakatondezya mbociyandika kulemeka bamwi. (Amubale 1 Timoteyo 5:1, 2.) Eeci cilayandika kapati kwaambisya notuyanzana abaabo mbotwiindene limwi zizyo. Cikozyanyo ca Jobu cakulemeka bamakaintu, ikapati bakaintu bakwe cilayandika kutobela. Tanaakali kuyanda kubalanga bamakaintu bambi akubanyomenena. (Job. 31:1) Kulemeka bakwesu abacizyi kuya kutugwasya kuti muntu ngotutalibambilide kukwatana limwi tumupe muzeezo wakuti tulamuyanda naa kucita zyintu zimwi zikonzya kupa bamwi kutaanguluka kuba andiswe. Kulemeka bamwi kulayandika kapati kuti bantu bobilo kabeebana. Munakristo uubikkila maano takonzyi kunyonganya mizeezo yamuntu ngobaindene limwi zizyo.—Tus. 12:22.
16. Amutondezye kwiindana kuliko kujatikizya bantu munyika mbobaubona mukuli wamwaalumi uukwete uujisi bana alimwi a Bbaibbele ncolyaamba.
16 Alimwi tweelede kubikkila maano kapati kumilimo Leza njatupede mumukwasyi. Bantu bamunyika ya Saatani balauubya-ubya mukuli wamwaalumi uukwete alimwi uulaabana. Basikubamba zyakulikondelezya cilabakkomanisya kutalemeka alimwi akufwubaazya baalumi bakwete alimwi balaabana. Pele Magwalo aamba kuti mulumi ulijisi mukuli mupati nkaambo waambwa kuti “ngomutwe wamukaintu wakwe.”—Ef. 5:23; 1 Ko. 11:3.
17. Amupandulule kutola lubazu ciindi cakukomba mumukwasyi mbokutondezya kuti tulabikkila maano kumikuli yesu.
17 Mulumi ulakonzya kubajanina nzyobayandika zyakumubili bamumukwasyi. Pele kuti katabagwasyi kumuuya citondezya kuti tajisi busongo. (Dt. 6:6, 7) Nkakaambo kaako lugwalo lwa 1 Timoteyo 3:4 lwaamba kuti, kuti kamuli basilutwe mumukwasyi alimwi muyanda kusika azyeelelo kutegwa mube amikuli iiyungizyidwe mumbungano, mweelede ‘kubeendelezya kabotu bamuŋanda yanu, kamujisi bana balibombya cakumaninina.’ Aboobo amulibuzye kuti, ‘Sena lyoonse ndilazandula ciindi cakukomba mumukwasyi muŋanda yangu?’ Bamakaintu bamwi Banakristo bacita kubakombelezya buya balumi babo kuti kabasololela mukwasyi muzyintu zyakumuuya. Mulumi umwi aumwi weelede kubikkila maano kapati kumukuli ooyu. Masimpe mukaintu Munakristo weelede kubelekela antoomwe amulumi kutegwa bubambe bwa Kukomba Mumukwasyi kabweenda kabotu lyoonse.
18. Ino mbuti bana mbobakonzya kwiiya kubikkila maano?
18 Bana abalo bakulwaizyigwa kubikkila maano kuzyintu zikonzya kubagwasya kumubelekela Jehova kumbele. (Muk. 12:1) Bana baniini balakonzya kuyiisyigwa kubeleka milimo miyumu, mbuli kubeleka milimo yaaŋanda njobakonzya kweelana aciimo cabo. (Malo. 3:27) Mwami Davida naakacili mwana, wakaiya kuba mweembezi mubotu. Alimwi wakaiya kulemba akwiimba nyimbo—milimo yalo yakamupa kuti acikonzye kubelekela mweendelezi wamu Israyeli. (1 Sam. 16:11, 12, 18-21) Cakutadooneka, Davida naakacili mwana wakalizyi mbociyandika kusobana pele alimwi wakaiya milimo mibotu yalo njaakabelesya kutembaula Jehova naakakomena. Imulimo wabweembezi wakamugwasya kulela bana Israyeli cakukkazyika moyo. Inywebo nobana, ino milimo nzi iigwasya njomwiiya—milimo iikonzya kumugwasya kubelekela Mulengi wenu akumugwasya kuti mukaibelesye kumbele?
Tweelede Kulizyiba Kabotu
19, 20. Ino ncinzi ncomukanzide kucita kutegwa muzumanane kulilemeka kabotu akukomba?
19 Tweelede kulizyiba kabotu akuziba zyintu nzyotukonzya kucita, ikutali kulijaya buya kubeleka. Tatuyandiki ‘kwiindilila kululama.’ (Muk. 7:16) Bamwi tabazibikkili maano zyintu mube muŋanda, kumilimo naa nobabandika a Banakristonyina bakwesu abacizyi. Ibamumukwasyi tabeelede kufubaazyanya kutegwa luumuno luli muŋanda luzumanane. Mumbungano toonse tulakonzya kukkomana kuti katuli akati kabeenzuma, katubandika alimwi katuyiisya munzila iiyaka.—2 Ko. 13:10; Ef. 4:29.
20 Tukkala munyika bantu mobatabikkili maano kumilawo ya Jehova. Mukwiimpana, bantu ba Jehova bakubona kuti kusyomeka kuli Leza kulayandika kapati. Eelo kaka cilakkomanisya kuba akati kabantu bakomba Jehova “cakumaniina”! Tweelede kubikkila maano kubukombi bwesu ambotupona.
Ino Inga Mwaingula Buti?
• Ino nkaambo nzi ncotuteelede kubona buumi mbuli mbobabubona bantu munyika?
• Ino mbuti mbotukonzya kukkomana kumwi katubikkila maano kumulimo wamumuunda?
• Sena mbotwiicita mikuli njotujisi, cilatondezya kuti tulabikkila maano naa pe?
• Amupandulule ncociyandika kapati kulemeka bakwesu abanamukwasyi.
[Mibuzyo yaciiyo]
[Zifwanikiso izili apeeji 12]
Mulumi weelede kubapa zyintu nzyobayandika bamukwasyi zyakumubili azyakumuuya
