‘Amupakamane’—Nobanakristo Mumikwasyi

“Atupakamane akubatama.”—1 TE. 5:6.

1, 2. Ino ncinzi ciyandika kutegwa mukwasyi uzumanane kupakamana kumuuya?

KAAMBA “buzuba bwa-Jehova obo bupati buyoosya,” mwaapostolo Paulo wakalembela Banakristo ku Tesalonika kuti: “Bakwesu, tamuli mumudima pe, kuti buzuba oobo bukamusikile cakutayeeyela mbuli mbobukonzya kusikila babbi, nkaambo nywebo nyoonse muli bana bamumuni alimwi abana basyikati. Tatuli bamasiku naa bamudima pe.” Paulo wakayungizya akwaamba kuti: “Aboobo tutani kooni mbuli mbobacita bamwi, pele atupakamane akubatama.”—Joel. 2:31; 1 Te. 5:4-6.

² Lulayo lwa Paulo kubana Tesalonika lulakonzya kubagwasya ikapati Banakristo bapona “kumamanino aaciindi.” (Dan. 12:4) Mamanino aabweende bwazyintu oobu bubyaabi mbwaayabuswena, Saatani ukanzide kulesya bakombi bakasimpe banji kuti kabamubelekela Leza. Inga cainda kubota kutobela malailile a Paulo kutegwa tuzumanane kupakamana kumuuya. Kutegwa mukwasyi wa Banakristo upakamane, umwi aumwi mumukwasyi weelede kuzuzikizya mulimo Jehova ngwamupede kweelana ancolyaamba Bbaibbele. Aboobo, ino mulimo nzi balumi, bakaintu abana ngobajisi kutegwa ‘bapakamane’ mumukwasyi?

Nobalumi—Amumwiiye “Mweembezi Mubotu”

3. Kweelana a 1 Timoteyo 5:8, ino mukuli wamulumi mbwali mutwe ubikkilizya nzi?

³ Bbaibbele lyaamba kuti: “Mutwe wamukaintu mwaalumi.” (1 Ko. 11:3) Ino mukuli wamulumi mbwali mutwe ubikkilizya nzi? Magwalo aamba boobu kujatikizya mulimo ngwajisi mutwe waŋanda: “Ikuti muntu katababambi kabotu bamukwasyi wakwe, ikapati aabo bamuŋanda yakwe, nkokuti walukaka lusyomo alimwi mubi kapati kwiinda muntu uunyina lusyomo.” (1 Ti. 5:8) Masimpe, mulumi weelede kujanina mukwasyi wakwe ziyandika zyakumubili. Kutegwa agwasye mukwasyi kupakamana kumuuya, tayeelede buyo kubajanina mali aayandika. Weelede kubagwasya kumuuya boonse bamumukwasyi kuyumya cilongwe cabo a Jehova. (Tus. 24:3, 4) Ino mbuti mbwakonzya kucita oobo?

4. Ino ncinzi cikonzya kugwasya mulumi kuzwidilila mukugwasya mukwasyi wakwe kumuuya?

⁴ Akaambo kakuti “mulumi ngomutwe wamukaintu wakwe mbubonya Kilisito mbwali mutwe wambungano,” mwaalumi uukwete weelede kubona akwiiya citondezyo ca Jesu cabusilutwe kumbungano. (Ef. 5:23) Amubone Jesu mbwaakacipandulula cilongwe ncaakajisi abasikwiiya bakwe. (Amubale Johane 10:14, 15.) Ino ncinzi cikonzya kugwasya kutegwa mulumi agwasye mukwasyi wakwe kumuuya? Nkwiiya nzyaakaamba anzyaakacita Jesu “mweembezi mubotu,” ‘akwiitobelesya mikondo yakwe.’—1 Pe. 2:21.

5. Ino Mweembezi Mubotu uizyi buti mbungano?

⁵ Ikuti twabelesya maambilambali inga twaamba kuti, icilongwe cili akati kamweembezi ambelele zyakwe ciyeeme akuzyibana akusyomana. Mweembezi ulizizyi kabotu mbelele zyakwe, azyalo mbelele zilimuzyi alimwi zilamusyoma. Zilalizyiba akulitobela jwi lyakwe. Jesu wakaamba kuti: “Mbelele zyangu ndilizizyi alimwi azyalo zilindizyi.” Tajisi buyo luzyibo lwaatala-tala kujatikizya mbungano. Bbala lyaci Giliki lyakasandululwa kuti “ndilizizyi” lipandulula “kuzyiba kabotu.” Masimpe mweembezi mubotu ulizizyi kabotu  mbelele zyakwe. Uliizyi mbelele imwi aimwi ncoiyandika, mpoilezya amoicita kabotu. Taku ncatazyi kujatikizya mbelele zyakwe. Azyalo mbelele zilimuzyi kabotu mweembezi alimwi zilabusyoma busolozi bwakwe.

6. Ino mbuti balumi mbobakonzya kwiiya cikozyanyo ca Mweembezi Mubotu?

⁶ Kutegwa acite busilutwe bwakwe mbuli Kristo, mulumi weelede kuzyiba kuti mweembezi akuti aabo mbalanganya nimbelele. Weelede kubazyiba kabotu banamukwasyi. Sena mulumi ulakonzya kuba aluzyibo luli boobo? Inzya, kuti kabandika kabotu abanamukwasyi boonse, kuti kabaswiilila nobaamba zibalibilisya, kasololela muzyintu nzyobacita mbuli mukwasyi alimwi akubikkila maano kumakani mbuli bubambe bwakukomba mumukwasyi, kujanika kumiswaangano, kuunka mumulimo wamumuunda, kulyookezya alimwi akulikondelezya. Kuti mulumi Munakristo waiya ncolyaamba Jwi lya Leza akubazyiba kabotu banamukwasyi kutegwa kapa citondezyo cibotu muzyintu nzyasala, cakutadooneka banamukwasyi banakumusyoma alimwi uyakukkomana kubabona kabazumanana mukasimpe.

7, 8. Ino mbuti mulumi mbwakonzya kwiiya cikozyanyo ca Mweembezi Mubotu cakutondezya luyando kuli baabo mbalanganya?

⁷ Mweembezi mubotu ulaziyanda mbelele zyakwe. Twabala Makani Mabotu aajatikizya buumi bwa Jesu alimwi amulimo wakwe, tulakkomana kubona mbwaakali kubayanda basikwiiya bakwe. Nkakaambo kaako ‘wakatuulila mbelele buumi bwakwe.’ Balumi beelede kutobela cikozyanyo ca Jesu mukutondezya luyando kuli baabo mbobalanganya. Muciindi cakudyaaminina mukaintu wakwe, mulumi uuyanda kukkomanisya Leza unakumuyanda mukaintu “mbubonya awalo Kilisito mbwaakayanda mbungano.” (Ef. 5:25) Weelede kwaambaula anguwe munzila yalubomba akumulemeka.—1 Pe. 3:7.

⁸ Silutwe wamukwasyi weelede kubayiisya bana kwiinda mukubikkila kapati maano kunjiisyo zya Leza. Alimwi weelede kubayanda bana bakwe. Nomubalaya akaambo kakuti balubizya, mweelede kucita oobo caluyando. Bana balaindana kumvwisya ncobeelede kucita. Aboobo bausyi beelede kubakkazikila moyo. Kuti bamaalumi kabatobela lyoonse cikozyanyo ca Jesu, baya kupa kuti muŋanda mube luumuno. Mikwasyi yabo ilakkomana aluumuno lwakumuuya oolo sintembauzyo ndwaakaimba.—Amubale Intembauzyo 23:1-6.

9. Mbubonya mbuli syaanene wesu Nowa, ino balumi Banakristo bajisi mukuli nzi, alimwi ncinzi ciya kubagwasya kuti bauzuzikizye?

⁹ Cikozyanyo acimwi cibotu ncobakonzya kwiiya basilutwe bamikwasyi ya Banakristo, ncica Nowa. Syaanene wesu Nowa wakali kupona kumazuba aamamanino muciindi cakwe. Pele Jehova “wakamufwutula antoomwe abamwi ibali ciloba naakaleta zambangulwe kunyika eeyo yabantu basampaula Leza.” (2 Pe. 2:5) Nowa wakalijisi mukuli wakugwasya bamukwasyi wakwe kuti bafwutuke zambangulwe. Basilutwe bamikwasyi Banakristo abalo balijisi mukuli mbuli wa Nowa mazuba aano aamamanino. (Mt. 24:37) Eelo kaka cilayandika kwiiya cikozyanyo ca “Mweembezi Mubotu” alimwi akusolekesya kumutobela!

Nobamakaintu—‘Amuyake Mukwasyi Wanu’

10. Ino caamba nzi kumukaintu kulibombya kumulumi wakwe?

¹⁰ Mwaapostolo Paulo wakalemba kuti: “Bakaintu kabalibombya kubalumi babo mbuli mbobacita ku Mwami.” (Ef. 5:22) Aaya majwi taapi muzeezo wakuti bamakaintu mbafwuba-fwuba. Katanalenga mukaintu wakusaanguna Eva, Leza wakaamba kuti: “Tacili cibotu kuti muntu akale alike pe. Atumucitile sikumugwasya uumweelede.” (Matl. 2:18) Mulimo ‘wamugwasyi,’ nkokuti wakugwasya mulumi kulanganya mikuli yamumukwasyi—mulimo uulemekwa kapati.

11. Ino mukaintu musongo ‘uuyaka buti mukwasyi wakwe’?

¹¹ Mukaintu uuli amaano ulabeleka canguzu kutegwa agwasye mukwasyi wakwe. (Amubale Tusimpi 14:1.) Mukwiimpana amukaintu  mufwuba-fwuba uutalemeki mutwe wamukwasyi, mukaintu musongo ulabulemeka bubambe oobu. Muciindi cakutondezya muuya uudumide munyika wakutamvwa akulicitila zyintu, ulalibombya kumulumi wakwe. (Ef. 2:2) Mukaintu mufwuba-fwuba ulaubaula mulumi wakwe, pele mukaintu musongo ulasoleka kupa kuti bana bakwe alimwi abantu bambi kabamulemeka kapati mulumi wakwe. Mukaintu uuli boobu tayandi kutondezya kuti tamulemeki mulumi wakwe kwiinda mukukazyanya anguwe. Alimwi kuli makani aakubelesya kabotu mali. Mukaintu mufwuba-fwuba ulaabelesya cabuyamba mali aamukwasyi. Imukaintu uugwasya mulumi tali boobo pe. Babelekela antoomwe amulumi caboola kumali mbwaayelede kubelesyegwa. Ulacita zyintu cabupampu. Tasinikizyi mulumi wakwe kuti kabeleka ciindi cilamfwu kutegwa kavwola mali manji.

12. Ino ncinzi mukaintu ncakonzya kucita kutegwa ‘bapakamane’ mumukwasyi?

¹² Mukaintu musongo ulaugwasya mukwasyi wakwe kuti “upakamane” kwiinda mukugwasya mulumi wakwe kuyiisya bana zyintu zyakumuuya. (Tus. 1:8) Ulajanika akutola lubazu mububambe bwa Kukomba Mumukwasyi. Kuyungizya waawo ulabagwasilizya balumi bakwe nobalaya bana babo. Eelo kaka ulaindana amukaintu uutabelekeli antoomwe amulumi wakwe, uujisi bana bapengede kumubili akumuuya!

13. Ino nkaambo nzi ncokuyandika kuti mukaintu kabelekela antoomwe amulumi wakwe ciindi nacita milimo yakumuuya?

¹³ Ino mbuti mukaintu ubelekela antoomwe amulumi wakwe mbwalimvwa nabona mulumi wakwe kabikkila maano kapati kumilimo yamumbungano ya Bunakristo? Eelo kaka cilamukkomanisya eeci! Takwe makani naa mulumi wakwe mukutausi naa mwaalu, naa ngwamu Kkomiti ya Hospital Liaison naa ngwamu nkamu yamayake ya Maanda aa Bwami iili mucilawo cabo, ulakkomana akaambo kacoolwe eeci. Mbwaambaula akucita zyintu kutegwa agwasye mulumi wakwe, kuyandika kulyaaba. Alimwi ulizyi kuti milimo yakumuuya njabeleka mulumi wakwe igwasya banamukwasyi boonse kuti bapakamane kumuuya.

14. (a) Ino ncinzi cikonzya kumukatazya mukaintu uugwasya mulumi wakwe, alimwi mbuti mbwakonzya kulimana penzi eelyo? (b) Ino mbuti mukaintu mbwapa kuti kube lukkomano aŋanda?

¹⁴ Cilakonzya kumukatazya mukaintu kubelekela antoomwe amulumi wakwe kuti mulumi wasala kucita zyintu munzila mukaintu njatakkomanini. Nokuba boobo, ulatondezya kuti ‘uli mukkede moyo, mubombe’ alimwi ubelekela antoomwe amulumi wakwe muzyintu nzyasala. (1 Pe. 3:4) Mukaintu uucita kabotu ulaiya zikozyanyo zyabamakaintu bana Leza bakaindi bakali azikozyanyo zibotu mbuli ba Sara, Rute, Abigayeli a Maliya banyina Jesu. (1 Pe. 3:5, 6) Alimwi ulabaiya bamakaintu bapati bamazuba aano “balilemeka munzila iisalala.” (Tit. 2:3, 4) Kwiinda mukumuyanda akumulemeka mulumi wakwe,  mukaintu uuli amaano upa kuti cikwati cabo kacili kabotu alimwi abantu boonse mumukwasyi kabakkomene. Boonse muŋanda yakwe balalikwaya. Mulumi uumuyanda Jehova alimwi umubelekela canguzu ulakkomana kuba amukaintu uumugwasya.—Tus. 18:22.

Nobakubusi—‘Amuzumanane Kubona Zyintu Zitalibonyi’

15. Ino mbuti bana mbobakonzya kubelekela antoomwe abazyali kutegwa mukwasyi ‘kaupakamene’?

¹⁵ Ino nywebo nobana mbuti mbomukonzya kubelekela antoomwe abazyali banu kutegwa nyoonse mumukwasyi ‘mupakamane’ kumuuya? Amubone cipego ncaakamusyomezya Jehova. Ndiza nimwakacili bana bazyali banu bali kumutondezya zitondezyo zitondezya buumi mbobunoobede mu Paradaiso. Nomwakali kuyaabukomena ndiza bakatalika kubelesya Bbaibbele amabbuku amwi aa Bunakristo kutegwa bamugwasye kubona buumi butamani mbobuyakuba munyika mpya. Kuti mwazumanana kubelekela Jehova akupona kweelana ambwayanda ciya kumugwasya kuti “[mu]pakamane.”

16, 17. Ino ncinzi bana ncobakonzya kucita kutegwa bakazwidilile nobabalika mubuumi bwabo boonse?

¹⁶ Amwaayeeye majwi ngaakaamba mwaapostolo Paulo aali ku 1 Bakolinto 9:24. (Amubale.) Kamubalika mubuumi bwanu boonse kutegwa muzunde. Kamusala zyintu ziya kumupa kuba abuumi butamani. Kuba azyintu zinji zyakumubili kwabapa kuti bantu banji batakatambuli bulumbu. Eelo kaka nkufwubaala ooku! Kuyeeya buvwubi takukonzyi kutupa lukkomano lwini-lwini. Zyintu nzyotukonzya kuula amali nzyaciindi buyo cisyoonto. Pele nywebo mweelede ‘kulanga zyintu zitalibonyi.’ Nkaambo nzi? Nkaambo kakuti “izyintu zitalibonyi tazimani pe.”—2 Ko. 4:18.

¹⁷ “Izyintu zitalibonyi” zibikkilizya zilongezyo zya Bwami. Aboobo, mweelede kupona munzila iikonzya kumupa kuti mukajane zilongezyo eezyi. Mulakonzya kukkomana ncobeni kwiinda mukubelekela Jehova. Kubelekela Leza wakasimpe kulakonzya kumupa kuti mucikonzye kuzuzikizya mbaakani zyanu zyaciindi cisyoonto azitola ciindi cilamfwu. * Kubikka mbaakani zyakumuuya zikonzya kubeleka, kulakonzya kumugwasya kubelekela Leza kutegwa mukatambule bulumbu bwabuumi butamani.—1 Jo. 2:17.

18, 19. Ino mbuti mukubusi mbwakonzya kuzyiba kuti kasimpe wakacita kuti kabe kakwe?

¹⁸ Nobana, icintu cakusaanguna cikonzya kumugwasya kweenda munzila iitola kubuumi, nkuba acilongwe a Jehova. Sena mwakacita kale oobo? Amulibuzye kuti: ‘Sena ndilisimide kumuuya, naa ndilatola lubazu muzyintu zyakumuuya akaambo kakuti bazyali bangu balacita oobo? Sena ndijisi bube bumupa kukkomana Leza? Sena ndilasoleka kucita zyintu zijatikizya bukombi bwakasimpe mbuli mukupaila lyoonse, kwiiya Bbaibbele, kujanika kumiswaangano alimwi akutola lubazu mumulimo wamumuunda? Sena ndilamvwana a Leza kwiinda mukuyumya cilongwe cangu anguwe?’—Jak. 4:8.

¹⁹ Kamuyeeya cikozyanyo ca Musa. Nokuba kuti wakakomenena kucisi cimbi, wakayanda  kuzyibwa kuti ukomba Jehova muciindi cakuzyibwa kuti mwana wamwana musimbi wa Farao. (Amubale Bahebulayo 11:24-27.) Nobakubusi Banakristo, amube amakanze akubelekela Jehova cakusyomeka. Kuti naa mwacita oobo, muyooba alukkomano lwini-lwini, mulapona buumi buli kabotu lino alimwi mulaba abulangizi ‘bwakujatisya buumi bwini-bwini.’—1 Ti. 6:19.

20. Mukubalika kwaku buumi, ino nguni uupegwa bulumbu?

²⁰ Muzisobano zyansiku, muntu omwe buyo ngowakali kupegwa bulumbu. Pele tacili boobo kukubalika kwaku buumi. Leza uyanda kuti “bantu boonse bafwutulwe akuba aluzyibo lwini-lwini lwakasimpe.” (1 Ti. 2:3, 4) Banji bakacikonzya kale alimwi banji mubalika limwi. (Heb. 12:1, 2) Boonse ibayakuzumanana kubalika bayakupegwa bulumbu. Aboobo amube amakanze aakuzwidilila.

21. Ino ncinzi ciyoolangwa-langwa mucibalo citobela?

²¹ Kusika kwa “buzuba bupati buyoosya bwa-Jehova” takudoonekwi pe. (Malk. 4:5) Kusika kwabuzuba oobu takweelede kujana Mikwasyi ya Banakristo kaitalibambilide. Kulayandika kapati kuti boonse banamukwasyi kabacita milimo yabo kweelana ambwaamba Magwalo. Ino ncinzi acimwi ncomweelede kucita kutegwa muzumanane kupakamana kumuuya alimwi akuyumya cilongwe canu a Leza? Cibalo citobela ciya kubandika zyintu zyotatwe zikonzya kubujatikizya bukkale bwakumuuya bwamukwasyi woonse.

[Bupanduluzi buyungizidwe]

Ino Ncinzi Ncomwaiya?

• Ino nkaambo nzi ncokuyandika kuti mikwasyi ya Banakristo ‘kaipakamene’?

• Ino mbuti mulumi mbwakonzya kwiiya Mweembezi Mubotu?

• Ino ncinzi mukaintu musongo ncakonzya kucita kutegwa kabelekela antoomwe amulumi wakwe?

• Ino mbuti bana mbobakonzya kugwasilizya mumikwasyi yabo kutegwa bapakamane kumuuya?

[Mibuzyo yaciiyo]

[Cifwanikiso icili apeeji 9]

Mukaintu uubelekela antoomwe amulumi wakwe ulayandika kapati