Kumusyoma Jehova Cakumaninina Citupa Kuliiba

“Jehova ulaswiilila nemukwiilila.”—INT. 4:3.

1, 2. (a) Ino mapenzi nzi akamucitikila Davida? (b) Ino nintembauzyo nzi njotutiibandike?

MWAMI DAVIDA wakalela mu Israyeli kwamyaka iili mboibede, pele wakazooba amapenzi. Mwanaakwe Abisalomu wakalibikka kuba mwami, mpoonya Davida wakatandwa mu Jerusalemu. Awalo mweenzyinyina ngwaakali kusyoma wakamukaka, amane wakaunka abantu basyomeka basyoonto kayaabulila katasamide mpato ku Cilundu ca Elaioni. Nikwakainda ciindi, Simeyi, wamumukwasyi wa Mwami Saulo wakamufwusa mabwe akulundumuna kasuko kumwi kamusinganya Davida.—2 Sam. 15:30, 31; 16:5-14.

² Sena aya mapenzi aajazya nsoni akali kukonzya kumupa kuti Davida afwe? Peepe, nkaambo wakali kumusyoma Jehova. Aya masimpe kweelana acilembedwe mu Intembauzyo yatatu yakalembwa a Davida ciindi naakali kutija Abisalomu. Alimwi wakalemba Intembauzyo yane. Muntembauzyo eezyi zyobilo wakali kutondezya mbwaakali kumusyoma Leza kuti ulamvwa akwiingula mipailo. (Int. 3:4; 4:3) Intembauzyo eezyi zitusyomezya kuti Jehova uli ababelesi bakwe masiku asikati, ulabagwasya akubapa luumuno alimwi balaliiba. (Int. 3:5; 4:8) Atulange-lange intembauzyo eezyi akubona mbotukonzya kumusyoma Leza.

Ciindi ‘Banji Nobatubusizya Nkondo’

3. Kweelana ambokutondezyedwe ku Intembauzyo 3:1, 2, ino mapenzi nzi ngaakajisi Davida?

³ Imutumwa wakaamba kuti: “Myoyo yabantu ba-Israyeli ili kuli-Abisalomu.” (2 Sam. 15:13) Akaambo kakugambwa nkwaakabajana Abisalomu bantu bakali kumugwasya, Davida wakabuzya kuti: “O Jehova! Bavula basinkondoma! Mbanji-banji bandibusizya inkondo! Mbanji-banji bandaamba kuti, takonzyi kujana lufutuko muli-Leza.” (Int. 3:1, 2) Bana Israyeli banji bakali kuyeeya kuti Jehova takonzyi kumuvwuna Davida kuli Abisalomu abeenzyinyina.

4, 5. (a) Ino ncinzi Davida ncaakali masimpe kuti ciyakucitika? (b) Ino majwi aakuti “sikusumpula mutwe wangu” aamba nzi?

⁴ Davida wakali kumusyoma Leza. Wakaimba kuti: “Pele yebo, O Jehova, nduwe intobo yangu, nduwe bulemu bwangu asikusumpula mutwe wangu.” (Int. 3:3) Davida wakali alusyomo lwakuti Jehova ulamukwabilila mbubwenya sikalumamba mbwasyoma kuti intobo ilakonzya kumukwabilila. Masimpe, mwami uucembede wakatija kalivwumbide kumutwe alimwi kalangide aansi kutondezya kuti waba ansoni. Pele Mupatikampatila uyakucinca bukkale bwa Davida kuti bukabote alimwi. Jehova uyakupa kuti akaime alimwi, akaleke kuba ansoni akunyamuna mutwe wakwe, akumubikka acuuno caatala alimwi. Davida wakapaila kuli Leza kasyoma kuti ulamwiingula. Sena andinywe mbomumusyoma oobo Jehova?

⁵ Kwiinda mumajwi aakuti “sikusumpula mutwe wangu,” Davida wakali kwaamba kuti Jehova ulamugwasya. Bbaibbele lyakuti Today’s English Version lyaamba kuti: “Pele yebo, O Mwami, lyoonse nduwe uundikwabilila; ucita kuti ndizunde akundijolela nguzu.” Kujatikizya majwi aakuti “sikusumpula mutwe wangu,” buvwuntauzi bumwi bwaamba kuti: “Kuti Leza wasumpula . . . ‘mutwe’ wamuntu umwi, Umupa kuti abe abulangizi alusyomo.” Akaambo kakugusyigwa acuuno cabwami bwa Israyeli, Davida wakatyompwa. Aboobo, ‘kusumpula mutwe wakwe’ cakamupa kuti abe  anguzu alimwi akumusyoma Leza cakumaninina.

‘Jehova Uyakundivwuwa’

6. Ino nkaambo nzi Davida ncaakaambila kuti mipailo yakwe yakaingulwa kuzwa kucilundu ca Jehova cisalala?

⁶ Kasyoma muli Jehova, Davida wakazumanana kati: “Ndakakwiilila Jehova ajwi lyangu, elyo wakandivuwa kuzwa kucilundu cakwe cisalala.” (Int. 3:4) Kutobela malailile a Davida, ibbokesi lyacizuminano liiminina kubako kwa Leza lyakatolwa ku Cilundu ca Ziyoni. (Amubale 2 Samuele 15:23-25.) Nkokuti cileelela kwaamba kuti mipailo ya Davida yakaingulwa kuzwa kucilundu ca Jehova cisalala.

7. Ino nkaambo nzi Davida ncaatakayoowa?

⁷ Akaambo kakuti Davida wakalizyi kuti mupailo wakwe kuli Leza ulaingulwa tanaakayoowede pe. Muciindi cakuyoowa wakaimba kuti: “Ndakalala akoona; ndakabuka, nkaambo Jehova nguundilela.” (Int. 3:5) Naaba masiku naakali kuyeeya kuti kulakonzya kumucitikila cintu citali kabotu, Davida tanaakali kuyoowa kuunka kukoona. Wakali masimpe kuti ulabuka akaambo kazyintu zyakamucitikila kale zyakali kumupa kuti kasyoma kuti Leza ulamugwasya ncobeni. Andiswe mbubwenya tulakonzya kucita oobo ikuti katutobela “inzila zya-Jehova” akuzumanana kucita oobo cakutaleka.—Amubale 2 Samuele 22:21, 22.

8. Ino Intembauzyo 27:1-4 itondezya buti kuti Davida wakali alusyomo muli Leza?

⁸ Kusyomeka kwa Davida kuli Leza kwakalibonya muntembauzyo iimwi yakasololelwa amajwi aaya aakuti: “Jehova ngumumuni wangu alufutuko lwangu. Ino ngwani ngwenjoowa? Jehova ninguzu zyabuumi bwangu. Ngwani ngwencija? . . . Nekuba kuti inkamu yalibamba kundilwisya, moyo wangu tuuyoowi . . . Nkocili cintu comwe ncenkumbila kuli-Jehova, ncenjandaula; nkokuti nkale muŋanda ya-Jehova mazuba oonse aabuumi bwangu, kuti njeebele bubotu bwa-Jehova akuliiya makani mucikombelo cakwe.” (Int. 27:1-4) Kuti naa mbotulimvwa andiswe oobu alimwi abukkale bwesu kabuzumizya, tunakujanika lyoonse kumiswaangano yambungano abakombima.—Heb. 10:23-25.

9, 10. Nokuba kuti majwi aali ku Intembauzyo 3:6, 7 alaamba oobu, ino nkaambo nzi ncomukonzya kwaamba kuti Davida tanaakali alunya?

 ⁹ Nokuba kuti Davida wakeenwa a Abisalomu alimwi bantu banji bakaleka kumusyoma, wakaimba kuti: “Nsikonzyi kuyoowa zyuulu zyuulu zyabantu balibambide kukundilwisya kumabazu oonse. Buka, O Jehova; kondifutula, O Leza wangu; Nkaambo nduwe uuma basinkondoma boonse mumaseya, alimwi watyola meno aabasizibi.”—Int. 3:6, 7.

¹⁰ Davida tanaakali silunya pe. Kuti naa basinkondonyina ‘baumwa mumaseya,’ nkokuti Leza nguwacita oobo. Mwami Davida wakalilembela Mulawo alimwi wakalizyi kuti Jehova waamba kuti: “Lubeteko ndulwangu, njoobweedezya bulumbu bweelede.” (Dt. 17:14, 15, 18; 32:35) Alimwi cili kuli Leza ‘kutyola menyo aabasizibi.’ Ikutyola menyo aabo caamba kubanyanga nguzu kutegwa bataciti cibi. Jehova ulibazyi basimucita zibi nkaambo “ulabona moyo.” (1 Sam. 16:7) Eelo kaka tulikkomene kubona kuti Leza ulatupa kuti katusyomeka akuba anguzu zyakuzunda Saatani mwami wababi, walo ino-ino uuyakusowelwa mumulindi uutagoli uunakuli mbuli syuumbwa uuvwuluma utakwe menyo uulangilwa biyo kunyonyoonwa.—1 Pe. 5:8, 9; Ciy. 20:1, 2, 7-10.

“Lufutuko Lulazwa Kuli-Jehova”

11. Ino nkaambo nzi ncotweelede kubapailila basyomima?

¹¹ Davida wakalizyi kuti Jehova alikke nguukonzya kuleta lufwutuko ndwayandisya. Pele sintembauzyo taliyeeyi buyo lwakwe. Ino mbuti bantu boonse mbayanda Jehova? Kakkomene Davida, wakamanizya intembauzyo yakwe eeyi yakasololelwa amuuya amajwi aakuti: “Lufutuko lulazwa kuli-Jehova. Coolwe cako nkucili kubantu bako.” (Int. 3:8) Masimpe, Davida wakalijisi mapenzi mapati, pele nokuba boobo wakali kubabikkila maano bantu ba Jehova boonse alimwi wakali kusyoma kuti Leza ulabalongezya. Andiswe tweelede kubabikkila maano basyomima. Tweelede kubapailila akulomba Jehova kuti abape muuya uusalala kutegwa bacikonzye kuliyumya akuba basicamba nobakambauka makani mabotu.—Ef. 6:17-20.

12, 13. Ino ncinzi cakamucitikila Abisalomu, alimwi ino Davida wakalimvwa buti?

¹² Lufwu lwa Abisalomu lwakali kujazya nsoni—ooku nkucenjezya kuli baabo boonse bapenzya bamwi, ikapati aabo bapenzya bananike ba Leza mbuli Davida. (Amubale Tusimpi 3:31-35.) Nkondo noyakatalika, basikalumamba ba Abisalomu bakazundwa. Abisalomu katantide ambongolo wakaangila acisamu cipati akaambo kakuti masusu aakwe mabotu akajatwa amutabi. Aawa mpaakaangila wakacili muumi pele tanaakajisi nguzu zyakulikwabilila—kusikila ciindi Joabu naakamuyasa mivwi yotatwe mucamba naakafwa.—2 Sam. 18:6-17.

¹³ Sena Davida wakakkomana naakamvwa cakamucitikila mwanaakwe? Peepe. Muciindi cakukkomana wakalila kumwi kazemba kaamba kuti: “Maawe mwanaangu Abisalomu! Mwanaangu! Abisalomu! Nindakafwa ndemwini mucibaka cako! Abisalomu mwanaangu! Mwanaangu!” (2 Sam. 18:24-33) Alikke majwi a Joabu ngaakamuyumya-yumya kuti aleke kulila Davida. Eelo kaka Abisalomu wakafwa bubi, akaambo kamakanze aakwe aabulyato cakamupa kuti alwane bausyi—imunanike wa Jehova!—2 Sam. 19:1-8; Tus. 12:21; 24:21, 22.

Davida Alimwi Watondezya Kuti Ulamusyoma Leza

14. Ino ncinzi ncotukonzya kwaamba kubona mbuyakalembwa Intembauzyo 4?

¹⁴ Mbubwenya mbwaakaamba mu Intembauzyo yatatu, muli yane waamba mupailo uzwa ansi aamoyo ngwaakapaila Davida kutondezya kuti uli alusyomo muli Jehova. (Int. 3:4; 4:3) Ndiza Davida wakalemba nyimbo eeyi kulumba Leza akaambo kakuti Abisalomu wakaalilwa kumugusya abwami. Naa wakailemba naakali kuyeeya baimbi bana Levi. Kufumbwa naa cakali buti, kuzinzibala kuyeeya Intembauzyo eeyi kulakonzya kuyumya lusyomo lwesu muli Jehova.

15. Ino nkaambo nzi ncotweelede kupaila kuli Jehova kwiinda mu Mwanaakwe?

 ¹⁵ Davida alimwi wakatondezya kuti ulamusyoma Leza alimwi wakali masimpe kuti ulaswiilila akwiingula mipailo yakwe. Wakaimba kuti: “Kondivwiila nendila, O Leza wabululami bwangu. Nduwe wandaatulula nendali mumapenzi. Kondifwida luzyalo akuswiilila cikombyo cangu.” (Int. 4:1) Andiswe tulakonzya kuba alusyomo mbuli loolo kuti katucita bululami. Akaambo kakuzyiba kuti Jehova ngu “Leza wabululami” alimwi ulabalongezya bantu bakwe baluleme, tulakonzya kupaila kulinguwe kwiinda mu Mwanaakwe katuli alusyomo mucinunuzyo ca Jesu. (Joh. 3:16, 36) Eelo kaka eeci citupa kuti tube aluumuno!

16. Nkaambo nzi Davida ncaakatyompelwa?

¹⁶ Zimwi ziindi, tulakonzya kutyompwa calo cikonzya kutupa kuti tuleke kusyomeka. Kwaciindi cili mbocibede, andiza mbocakabede akuli Davida naakaimba kuti: “Nywebo nubantu, bulemu bwangu bulaleka lili kusampaulwa? Mulaleka lili kuyandisya zyabuyo akulangaula bubeji?” (Int. 4:2) Ibbala lyakuti “nubantu” zimwi ziindi lilabelesyegwa kwaamba bantu munzila iitali kabotu. Basinkondonyina Davida bakali ‘kuziyanda zyintu zyabuyo.’ Majwi aaya mu Bbaibbele lya New International Version aamba kuti: “Ino mulatola ciindi cilamfwu buti kuyanda zyintu zyakubeja akuyandaula baleza bakubeja?” Nokuba kuti twatyompwa akaambo kazyintu nzyobacita bamwi, tweelede kuzumanana kupaila kuzwa ansi aamoyo akumusyoma cakumaninina Leza wakasimpe uuli alikke.

17. Amupandulule mbotukonzya kucita kweelana a Intembauzyo 4:3.

¹⁷ Davida mbwaakali kumusyoma Leza kulalibonya mumajwi aakuti: “Amuzibe kuti Jehova walisalila balulami. Jehova ulaswiilila nemukwiilila.” (Int. 4:3) Ikuba sicamba kulayandika kutegwa tuzumanane kusyomeka kuli Jehova. Mucikozyanyo, bube buli boobu bulayandika mumukwasyi wa Banakristo ikapati kuti umwi wagusyigwa mumbungano. Leza ulabalongezya aabo bamusyoma akucita kuyanda kwakwe. Ikusyomeka kuli Jehova kupa kuti bantu bakwe kabakkomene.—Int. 84:11, 12.

18. Kweelana a Intembauzyo 4:4, ino tweelede kucita nzi kuti naa twakaambilwa majwi mabi naa kucitilwa cintu cibi?

¹⁸ Ino kuti naa muntu umwi waamba naa kucita cintu cimwi catucima? Tulakonzya kuzumanana kukkomana kuti naa twacita ncaakaamba Davida naakati: “Amukankame, mutabisyi. Amwaambile myoyo yanu amalo aanu, akuumuna.” (Int. 4:4) Ikuti naa twakaambilwa majwi mabi naa kucitilwa cintu cibi, tatweelede kujolela. (Lom. 12:17-19) Tulakonzya kwaapailila makani aaya katutanoona. Kuti naa twaapailila makani aaya, tulakonzya kwaalanga munzila iimbi iikonzya kutupa kuti tumulekelele ncobeni. (1 Pe. 4:8) Kuli kaambo kayandika nkaakaamba mwaapostolo Paulo mululayo lwakwe, kuboneka kuti kayeeme a Intembauzyo 4:4 kakuti: “Amunyeme, nokuba boobo, mutabisyi pe; mutabbizyi zuba kamunyemede pe, mutamupi coolwe Diabolosi.”—Ef. 4:26, 27.

19. Ino Intembauzyo 4:5 inga yatugwasya buti mubukombi bwesu?

¹⁹ Kakankaizya mbokuyandika kumusyoma Leza, Davida wakaimba kuti: “Amupaizye zipaizyo zyabululami, musyome muli-Jehova.” (Int. 4:5) Zituuzyo nzyobakali kutuula bana Israyeli zyakajisi mulimo lilikke buyo nobakajisi makanze aali kabotu. (Is. 1:11-17) Kutegwa bukombi bwesu butambulwe a Leza, andiswe tweelede kuba amakanze mabotu  alimwi tweelede kumusyoma cakumaninina.—Amubale Tusimpi 3:5, 6; Bahebulayo 13:15, 16.

20. Ino ‘mumuni wabusyu bwa Jehova’ wiiminina nzi?

²⁰ Davida wakazumanana kuti: “Bantu banji balaamba kuti, Ngwani uukonzya kutubonya bubotu? Kotulanzya busyu bwako, O Jehova, utumunikile.” (Int. 4:6) ‘Mumuni wabusyu bwa Jehova’ caamba mbwatuyanda Leza. (Int. 89:15) Aboobo Davida naakapaila kuti: “Kotulanzya busyu bwako,” wakali kupandulula kuti ‘kotuyanda.’ Akaambo kakuti tulamusyoma Jehova, ulatuyanda alimwi tulakkomana kucita kuyanda kwakwe.

21. Ino ncinzi ncotusyomezyegwa kuti naa twatola lubazu mumulimo wakukambauka uucitwa mazuba aano?

²¹ Kalanga kuzyintu zikkomanisya nzyaamupa Leza iziinda zyeezyo zyamuciindi cakutebula, Davida wakaimbila Jehova kuti: “Wanditangazya mumoyo wangu kwiinda bamwi bavuzizigwa maila awaini.” (Int. 4:7) Tulakonzya kuba masimpe kuti tuyakukkomana kuti naa twabeleka canguzu mumulimo wakukambauka uucitwa mazuba aano. (Lk. 10:2) Akaambo kakuti bananike mbibasololela, tulakkomana nkaambo mweelwe ‘wabasikutebula’ uyaabukomena. (Is. 9:3) Sena mulatola lubazu mumulimo ooyu wakutebula uukkomanisya?

Katuzumanana Kusyomeka Kuli Leza

22. Kweelana a Intembauzyo 4:8, ino ncinzi cakabacitikila bana Israyeli akaambo kakutobela Mulawo wa Leza?

²² Davida wakamanizya kulemba Intembauzyo eeyi amajwi aakuti: “Ndalyoolola akoona muluumuno, nkaambo nduwe olike, O Jehova, ondikazika kabotu.” (Int. 4:8) Ciindi bana Israyeli nibakali kutobela Mulawo wa Jehova, bakali kumvwana anguwe alimwi bakaliliibide. Mucikozyanyo, ‘bama Juda abana Israyeli bakaliliibide’naakali kulela Solomoni. (1 Bam. 4:25) Aabo basyoma Leza bakali kukkomana nokuba kuti bantu bakali muzisi zyakali munsi-munsi tiibakali kubayanda. Mbubwenya mbuli Davida, tuloona cakuliiba nkaambo Leza ulatukwabilila.

23. Ino ncinzi ciyakucitika kuti twamusyoma Leza cakumaninina?

²³ Atuzumanane kusyomeka mumulimo wa Jehova. Alimwi katupaila katujisi lusyomo kutegwa tube “[a]luumuno lwa Leza oolo lwiinda kumvwisya koonse.” (Flp. 4:6, 7) Eeci cilatukkomanisya kaka! Alimwi tulakonzya kuba masimpe kuti Jehova uyakutugwasya kuti twazumanana kusyomeka kulinguwe.

Ino Inga Mwaingula Buti?

• Ino mapenzi nzi ngaakajana Davida akaambo ka Abisalomu?

• Ino mbuti Intembauzyo 3 mboitugwasya kuba alusyomo?

• Ino muunzila nzi Intembauzyo 4 mboikonzya kuyumya lusyomo lwesu muli Jehova?

• Ino inga twagwasyigwa buti akaambo kakusyoma Leza cakumaninina?

[Mibuzyo yaciiyo]

[Cifwanikiso icili apeeji 29]

Nokuba kuti wakatija akaambo ka Abisalomu, Davida wakali kumusyoma Jehova

[Zifwanikiso izili apeeji 32]

Sena mulamusyoma Jehova cakumaninina?