“Mulangizi Mubotu Alimwi Mulongwe Uuyandwa”
“Mulangizi Mubotu Alimwi Mulongwe Uuyandwa”
BA JOHN (JACK) BARR, bamu Kabunga Keendeelezya ka Bakamboni ba Jehova, bakamanizya buumi bwabo bwaanyika mu Mujibelo mafwumo-fwumo mu December 4, 2010. Bakali aamyaka iili 97 yakuzyalwa. Bakali kwaambwa kuti “mulangizi mubotu alimwi mulongwe uuyandwa.”
Ba Jack Barr bakazyalilwa ku Aberdeen mu Scotland. Mbabakali basyoonto akati kabana botatwe. Bazyali babo boonse bakali bananike. Ba Barr bakali kwaamba kuti bakakomenena mumukwasyi uuli kabotu alimwi bakali kubalumba kapati bazyali babo akaambo kacitondezyo cabo cibotu.
Ba Jack nibakali bakubusi cakali kubakatazya kapati kukanana abantu mbobatazyi. Nokuba boobo, bakabeleka canguzu kutegwa balimane penzi eeli, bumwi buzuba mu Nsondo mangolezya mu 1927 kabajisi myaka iili 14, bakaambila bausyi kuti bakali kuyanda kuunka ambabo mumulimo wakukambauka wakuŋanda aŋanda. Aaya ngaakali matalikilo aamulimo wabo. Kuzwa buzuba oobo kusikila nibakafwa ba Barr, bakali basungu kukambauka makani mabotu.
Banyina nobakali kuyanda kufwa muntenda, nceciindi ba Jack nibakatalika kuyeeya mbobuyandika buumi. Mu 1929 bakalyaaba kuli Jehova, bamane mu 1934 bakabbapatizyigwa. Mpoonya mu 1939, bakaba bamwi bamukwasyi wa Bbeteli wamu London ku England. Aaya ngaakali matalikilo aamulimo wabo waciindi coonse walo ngobakabeleka myaka iili 71.
Mu October 29, 1960, Ba Barr bakatalika “cilongwe cibotu kwiinda” ciindi nobakakwata ba Mildred Willett ibakali bapainiya kwaciindi cilamfwu alimwi ibakali bamisyinali. Mukwesu amucizyi Barr bakali acikozyanyo cibotu, bakali banabukwetene balyaabide alimwi bakazumanana mbubwenya oobu kusikila ba Mildred nobakamanizya buumi bwabo bwaanyika mu October, 2004. Mukwesu amucizyi Barr kuzwa ciindi nibakakwatana bakali kubala antoomwe cibeela camu Bbaibbele abuzuba.
Kuli baabo bakabazyi, izyina lya Jack Barr linobayeezya muntu wakali kupa malailile mabotu—aakkazika moyo, aaluzyalo alimwi aazwa mu Magwalo. Bakali kubeleka canguzu, bakali kubabikkila maano bamwi, mulangizi mubotu alimwi mulongwe uusyomeka. Nibakali kwiingula mumiswaangano, nibakali kupa makani anibakali kupaila bakali kutondezya mbobakali kukayanda kasimpe alimwi ambocakali ciyumu cilongwe cabo a Jehova.
Nokuba kuti tulabayeeya ba Barr, tulikkomene akaambo kacipego ncobakatambula cakuba abuumi butafwi—cintu ncobakali kulangila alimwi ncobakali kwaamba lyoonse.—1 Ko. 15:53, 54. *
[Bupanduluzi buyungizidwe]
^ munc. 8 Kutegwa mujane makani aamba buumi bwaba John E. Barr, amubone Ngazi Yamulindizi ya Chingisi yamu July 1, 1987, amapeeji 26-31.
