“Amweembele Butanga Bwa Leza Ibuli Mumaanza Aanu”

“Amweembele butanga bwa Leza ibuli mumaanza aanu, ikutali cakusinikizyigwa buya pe.”—1 PE. 5:2.

1. Ino ncinzi cakali kucitika ku Banakristo ciindi Petro naakalemba lugwalo lwakwe lwakusaanguna?

CIMWI ciindi Nero katanatalika kupenzya Banakristo ku Roma, mwaapostolo Petro wakalemba lugwalo lwakwe lwakusaanguna. Wakali kuyanda kuyumya-yumya basyominyina. Diabolosi wakali ‘kuyaabweendeenda’ kutegwa ayunge Banakristo. Kutegwa baliyumye akumukazya bakali kuyandika ‘kulibatamika’ alimwi ‘akulicesya kujanza lya Leza.’ (1 Pe. 5:6, 8) Alimwi bakeelede kukamantana. Tiibakeelede “kulumana akulyana,” nkaambo eeci cakali kukonzya kupa kuti ‘banyonyoonane.’—Gal. 5:15.

2, 3. Ino nguni ngotweelede kulwana limwi, alimwi ino tulalanga-langa nzi muzibalo eezyi?

² Aano mazuba andiswe tuli mubukkale bukozyenye. Diabolosi uyandaula nzila mbwakonzya kutuyunga. (Ciy. 12:12) Ino-ino kuyakuba “mapenzi mapati aatanacitikide kuzwa kumatalikilo aanyika kusikila sunu.” (Mt. 24:21) Mbubwenya mbuli Banakristo bamumwaanda wakusaanguna mbobatakali kuyanda kuzwangana akati kabo, andiswe tatweelede kuzwangana. Kutegwa tucikonzye kucita oobo, tuyandika kugwasyigwa abaalu.

³ Atubone baalu mbobakonzya kuukkomanina mulimo ooyu wakweembela ‘butanga bwa Leza ibuli mumaanza aabo.’ (1 Pe. 5:2) Twamana kucita oobo tulabona nzila mbotu yamboweelede kucitwa kabotu mulimo ooyu. Mucibalo citobela tuyoolanga-langa mbungano mboikonzya ‘kubalemeka aabo ibabeleka canguzu’ kulanganya butanga. (1 Te. 5:12) Ikulanga-langa twaambo ootu ciyakutugwasya kuliyumya akumukazya Sinkondoma mupati katuzyi kuti ngotulwana limwi.—Ef. 6:12.

Amweembele Butanga bwa Leza

4, 5. Ino baalu beelede kububona buti butanga? Amupe cikozyanyo.

⁴ Petro wakakulwaizya baalu bakali akati ka Banakristo bamumwaanda wamyaka wakusaanguna kuti kababulanganya mbuli mbwabulanganya Leza ibutanga buli mumaanza aabo. Amubale 1 Petulo 5:1, 2.) Nokuba kuti wakali kusyomwa mumbungano, Petro wakali kubalemeka baalu naakali kwaambaula aambabo alimwi wakali kubalaya mbuli baalunyina. (Gal. 2:9) Mbubwenya mbuli Petro, Kabunga Keendelezya aano mazuba kakombelezya baalu mumbungano kuti babeleke canguzu kuzuzikizya mukuli mulemu wakweembela butanga bwa Leza.

⁵ Mwaapostolo wakalemba kuti baalu bakeelede ‘kweembela butanga bwa Leza buli mumaanza aabo.’ Cakali kuyandika kapati kuti bazyibe kuti butanga mbubwa Jehova a Jesu Kristo. Baalu bakali kuyoolyaambilila kujatikizya mbobakali kulanganya mbelele zya Leza. Amweezyezye kuti mulongwe wanu wamwaambila kuti mulanganye bana bakwe ciindi natako. Sena tamukonzyi kubalanganya kabotu akubasanina? Kuti mwana umwi waciswa, sena tamukonzyi kumutola kucibbadela? Mbubwenya buyo, baalu mumbungano beelede ‘kweembela mbungano ya Leza, eeyo njaakaula abulowa bwa Mwanaakwe mwini.’ (Mil. 20:28) Balayeeya kuti mbelele imwi aimwi yakaulwa abulowa buyandisi bwa Kristo Jesu. Akaambo  kakuti bayoolyaambilila, baalu balasanina, balakwabilila akulanganya butanga.

6. Ino beembezi bansiku bakajisi mukuli nzi?

⁶ Amuyeeye mukuli ngobakajisi bakali kweembela mbelele zini kaindi. Bakeelede kuliyumya akaambo kakupya masyikati alimwi akutontola masiku kutegwa balanganye butanga. (Matl. 31:40) Mane buumi bwabo bwakali kuba muntenda kutegwa bavwune mbelele. Mweembezi Davida wakavwuna butanga kubanyama bamusyokwe kubikkilizya asyuumbwa amunyama uumbi mukali. Kujatikizya munyama umwi aumwi, Davida wakaamba kuti: “Ndakamujata kucilezu, ndakamuuma akumujaya.” (1 Sam. 17:34, 35) Eelo kaka wakali sicamba! Wakali afwaafwi amunyama ooyu. Nokuba boobo, wakacita ncaakali kukonzya kutegwa afwutule mbelele.

7. Ino mbuti baalu mbobakonzya kukwempa mbelele kumulomo wa Saatani?

⁷ Mazuba aano, baalu beelede kulwana Diabolosi uuli mbuli syuumbwa. Eeci cilakonzya kubikilizya busicamba bwakuvwuna mbelele kumulomo wa Diabolosi. Kwiinda mukumulwana Diabolosi baalu balakonzya kuvwuna mbelele. Balakonzya kugwasya bakwesu batasimide bacegwa mutukole twa Saatani. (Amubale Juda 22, 23.) Pele baalu tabakonzyi kuuzuzikizya mulimo ooyu kakunyina kugwasyigwa a Jehova. Balailanganya kabotu mbelele yalicisa, kwaanga akusilika zicisa kwiinda mukuyuumbulizya a Jwi lya Leza.

8. Ino baalu babusololela kuli butanga, alimwi munzila nzi?

⁸ Beembezi bakali kubusololela butanga kumacelelo mabotu ankozyakali kukonzya kunywa meenda. Mbubwenya buyo, baalu balasololela butanga kumbungano, ikukulwaizya kujanika kumiswaangano lyoonse kutegwa butanga kabusaninwa kabotu akujana “cakulya cabo aciindi ceelede.” (Mt. 24:45) Baalu beelede kujana ciindi cakugwasya baabo baciswa kumuuya kutegwa batambule busani buzwa mu Jwi lya Leza. Mbelele yakaleya ndiza ilakonzya kuyanda kupiluka kubutanga. Muciindi cakukonga munyina, ibaalu balapandulula njiisyo zyamu Magwalo akumutondezya mbwakonzya kuzibelesya mubuumi bwakwe.

9, 10. Mbuti baalu mbobeelede kulanganya baabo baciswa kumuuya?

 ⁹ Ciindi nomwaciswa, ino musilisi nzi ngomuyanda? Sena nguyooyo uutola ciindi cisyoonto kumuswiilila akumulembela musamu kutegwa alanganye mulwazi uutobela? Naa inga mwayanda musilisi uumuswiilila akumupandulwida cilubide alimwi akumulembela misamu iikonzya kumugwasya?

¹⁰ Mbubwenya buyo, baalu balakonzya kumuswiilila muntu waciswa kumuuya akumugwasya kuti cilonda cipone, nkokuti “kumunanika mafwuta muzyina lya Jehova.” (Amubale Jakobo 5:14, 15.) Mbuli mabbona aaku Gileadi, Jwi lya Leza lilakonzya kumuumbulizya mulwazi. (Jer. 8:22; Ezk. 34:16) Ciindi njiisyo zyamu Bbaibbele nozibelesyegwa, zilakonzya kugwasya muntu wakatyompwa kubukuluka akutalika kubelekela Jehova cabusungu. Masimpe, ciindi baalu nobamvwa muntu uuciswa kumuuya mbwalimvwa alimwi akupaila anguwe balamugwasya.

Ikutali Cakusinikizyigwa Buya Pele Cakuliyandila

11. Ino ncinzi cibapa kuti baalu kabeembela butanga bwa Leza cakuliyandila?

¹¹ Kumane Petro wakayeekezya baalu mbobeelede kuucita mulimo wabweembezi ambobateelede kuucita. Baalu beelede kweembela butanga bwa Leza “ikutali cakusinikizyigwa buya pe, pele cakuliyandila.” Ino ncinzi cibapa baalu kubelekela ibanyina cakuliyandila? Aboobo, ino ncinzi cakapa kuti Petro ayembele akusanina mbelele zya Jesu? Nkaambo wakali kumuyanda Mwami. (Joh. 21:15-17) Akaambo kaluyando baalu ‘tabaciliponeni beni, pele baponena yooyo iwakabafwida.’ (2 Ko. 5:14, 15) Oolu luyando, kubikkilizya aluyando ndobajisi kuli Leza akubanyina lubapa kuti baalu beembele butanga, babelesye nguzu zyabo, lubono alimwi aciindi. (Mt. 22:37-39) Balalyaaba tabasinikizyigwi buya.

12. Ino mwaapostolo Paulo wakalyaaba kusika aali?

¹² Ino baalu beelede kulyaaba kusika aali? Mukweembela butanga, baiya mwaapostolo Paulo iwakali kwiiya Jesu. (1 Ko. 11:1) Akaambo kakubayanda banyina baku Tesalonika, Paulo abeenzyinyina bakalilibambide ‘ikutali buyo kukambauka makani mabotu aa Leza, pele akwaaba buumi bwabo.’ Nobacita oobo, balaba babombe moyo “mbubonya mbuli mutumbu uunyonsya mbwabalanganya kabotu bana bakwe.” (1 Te. 2:7, 8) Paulo wakalimuzyi kabotu mutumbu mbwalimvwa kubana bakwe. Ulakonzya kubacitila zyoonse nzyobayanda akubuka aakati kamasiku kutegwa abape cakulya.

13. Ino baalu beelede kwiibeleka buti milimo eeyi?

¹³ Nokuba kuti baalu bali amulimo wabweembezi, tabeelede kubalekelezya banamukwasyi. (1 Ti. 5:8) Ciindi baalu nobali ambungano nceciindi ncobeelede kuba amukwasyi wabo. Kutegwa baicite kabotu milimo yabo yoonse yobile ciindi aciindi beelede kutamba bamwi kuti babasangane mu Kukomba kwabo Mumukwasyi. Kwamyaka iili mboibede ba Masanao ibaalu ku Japan, bakali kutamba batakwete abatakwetwe alimwi amikwasyi iitajisi bamausyi kuciiyo cabo camukwasyi. Mukuya kwaciindi, aabo bakagwasyigwa bamwi bakaba baalu alimwi balaiya cikozyanyo cibotu caba Masanao.

Tamweelede Kujana Mpindu Cabumpelenge—Mweendelezye Butanga Caluyando

14, 15. Nkaambo nzi baalu ncobateelede “kujana mpindu cabumpelenge,” alimwi muunzila nzi mobakonzya kumwiiya Paulo mukaambo aaka?

¹⁴ Petro alimwi wakabakulwaizya baalu kuti kabeembela butanga “ikutali akaambo kakuyanda kujana mpindu cabumpelenge, pele caluyandisisyo.” Mulimo wabaalu ulatola ciindi cili mbocibede, pele tabalangili kupegwa mali pe. Petro wakabacenjezya ibaalunyina icikonzya kucitika kuti naa kabeembela butanga akulangila kuti baya “kujana mpindu cabumpelenge.” Eeci cakalibonya kubasololi bazikombelo bamu “Babuloni Mupati” bakali  kupona buumi bubotu kakuli bantu banji bakali kubapenzya. (Ciy. 18:2, 3) Baalu mazuba aano bali akaambo kabotu ncobateelede kucita oobo.

¹⁵ Paulo wakabapa cikozyanyo cibotu baalu Banakristo. Nokuba kuti wakali mwaapostolo alimwi wakali kukonzya kuba “mukuli uuminya” ku Banakristo baku Tesalonika, tanaakali “kulya cakulya camuntu uuli woonse kakunyina kucibbadelela.” Muciindi caboobo, ‘wakoonda mulimo canguzu masiku asyikati.’ (2 Te. 3:8) Banji baalu bamazuba aano kubikilizya abalangizi beendeenda, balatondezya cikozyanyo cibotu. Nokuba kuti balakkomana kutambwa abasyominyina, tabapi muntu naba omwe “mukuli uuminya.”—1 Te. 2:9.

16. Ino caamba nzi kweembela butanga “cakuliyandila”?

¹⁶ Baalu beelede kweembela butanga “cakuliyandila.” Luyandisisyo ndobajisi lulalibonya kwiinda mukulyaaba kugwasya butanga. Nokuba boobo, baalu tabasinikizyi butanga kuti kabamubelekela Jehova; naa tabakulwaizyi bamwi kuti babe amuuya wakuzundana nobamubelekela Leza. (Gal. 5:26) Baalu balizyi kuti imwi aimwi mbelele ililibedelede. Balilibambide kugwasya banyina kuti kabamubelekela Jehova kabakkomene.

Mutabi Mbuli Basimalelo Pele Mube Zikozyanyo

17, 18. (a) Nkaambo nzi baapostolo zimwi ziindi ncobakali kujanina buyumu-yumu kutobela malailile aa Jesu aakulicesya? (b) Ino nzyintu nzi zikonzya kutucitikila zikozyenye azyeezyi zyakali kubacitikila kaindi?

¹⁷ Mbubwenya mbotwabandika kale, baalu beelede kuzyiba kuti butanga mbobalanganya mbubwa Leza, tabuli bwabo pe. Tabeelede “kuba mbuli basimalelo kuli baabo ibali ndukono lwa Leza.” (Amubale 1 Petulo 5:3.) Zimwi ziindi, baapostolo ba Jesu bakali kuyanda mikuli kabajisi makanze aataluzi. Mbuli baabo bakali kweendelezya zisi, bakali kuziyanda zyuuno zyaatala.—Amubale Maako 10:42-45.

¹⁸ Aano mazuba bakwesu ‘bayanda mulimo wabulangizi’ beelede kubona ncobayandila kuucita mulimo ooyu. (1 Ti. 3:1) Aabo babeleka kabali baalu lino beelede kulibuzya kuti naa bayanda cuuno caatala mbuli baapostolo bamwi mbobakali kucita. Kuti naa baapostolo bakalijisi buyumu-yumu mumakani aaya, nkokuti baalu beelede kubeleka canguzu kutegwa batabi aamuuya ooyu wanyika wakuyanda kweendelezya bamwi.

19. Ino ncinzi ncobeelede kuyeeya baalu nobabweza ntaamu yakukwabilila butanga?

¹⁹ Kuli ziindi zimwi baalu nobeelede kuyuma, mbuli ciindi nobakwabilila butanga kuli “baumpe babutambo.” (Mil. 20:28-30) Paulo wakaambila Tito kuti azumanane ‘kukulwaizya akusinsa anguzu zyoonse.’ (Tit. 2:15) Noliba leelyo nobeelede kusinsa buya, ibaalu balabalemeka aabo bajatikizyidwe. Balabona kuti muciindi cakunyema buya, kukombelezya caluyando kanji-kanji kulakonzya kugwasya muntu umwi kuti atobele nzila iiluzi.

20. Ino baalu mbuti mbobakonzya kwiiya Jesu mukuba cikozyanyo cibotu?

²⁰ Cikozyanyo cibotu ca Kristo cilabakulwaizya baalu kuyanda butanga. (Joh. 13:12-15) Tulakkomana notubala mbwaakabayiisya basikwiiya bakwe kuti kabakambauka akugwasya bantu kuba basikwiiya. Kulicesya kwakwe kwakabagwasya kapati basikwiiya bakwe kuti ‘kabalicesya akubona bamwi kuti balabainda.’ (Flp. 2:3) Abalo baalu aano mazuba  balakulwaizyigwa kutobela cikozyanyo ca Jesu, cakuti abalo baba “zikozyanyo kubutanga.”

21. Ino nzilongezyo nzi baalu nzyobalangila kutambula?

²¹ Petro wakamanizya makani aakwe kubaalu kwiinda mukwaamba cisyomezyo ciyakucitika kumbele. (Amubale 1 Petulo 5:4.) Balangizi bananike ‘bayootambula musini wabulemu uutakulumpali’ antoomwe a Kristo kujulu. Beembezi ‘bambelele zimwi’ bayakuba acoolwe cakweembela butanga bwa Leza bwaanyika kabasololelwa “[a]mweembezi silutwe.” (Joh. 10:16) Mucibalo citobela tuyakubandika bakwesu abacizyi mumbungano mbobakozya kugwasya baabo basalidwe kuti kabasololela.

Ikwiinduluka

• Nkaambo nzi ncocakali kuyandika kuti Petro aambile baalunyina mbobakeelede kweembela butanga bwa Leza bwakali mumaanza aabo?

• Muunzila nzi baalu mobeelede kugwasya baabo baciswa kumuuya?

• Ino ncinzi cibakulwaizya baalu kuti beembele butanga bwa Leza buli mumaanza aabo?

[Mibuzyo yaciiyo]

[Cifwanikiso icili apeeji 21]

Mbuli beembezi bakaindi, baalu aano mazuba beelede kukwabilila “mbelele” zili mumaanza aabo