“Uletelezye Amabbuku Aakuvwunga, Ikapati Aalya Aazisalu”

KWIINDA mumajwi aaya, mwaapostolo Paulo wakaambila Timoteo misyinalinyina kuti amuletele mabbuku. Ino Paulo wakali kwaamba mabbuku nzi aakuvwunga alimwi azisalu? Ino ncinzi cakamupa kwaamba boobu? Alimwi ino ncinzi ncotukonzya kwiiya kukulomba ooku?

Kuzikusika akati-kati kamwaanda wamyaka wakusaanguna C.E. Paulo naakalemba majwi aaya, mabbuku aali 39 aazwa mu Magwalo aa Chihebrayo akalibikkidwe kale muzibeela zili 22 naa 24, bunji bwangawo akalivwungidwe alimwi lelikke. Ba Professor Alan Millard bakajana kuti mabbuku aaya nokuba kuti akali kudula, “ibakalivwubide bakali kukonzya kuba angawo.” Bamwi bakali kukonzya kujana buyo lyomwe. Mucikozyanyo, muzibe waku Etiopiya wakalijisi bbuku munkalaki yakwe alimwi wakali ‘kubala bbuku lyamusinsimi Isaya cakupozya.’ “Wakajisi cuuno cipati mubwami bwa Kandake mwami mukaintu wabana Etiyopiya alimwi nguwakali kulanganya lubono loonse lwa Mwami mukaintu ooyu.” Kuboneka kuti wakalivwubide ncaakabeda azibeela zya Magwalo.—Mil. 8:27, 28.

Paulo naakali kulomba Timoteo, wakalemba kuti: “Waboola, uletelezye ajansi lyampeyo ndindakasiya ku Tulowa kuli Kapo, uletelezye amabbuku aakuvwunga, ikapati aalya aazisalu.” (2 Ti. 4:13) Eeci citondezya kuti Paulo wakalijisi mabbuku manji. Akati kamabbuku oonse ngaakajisi, aakali kuyandika kapati akali yaayo aamba Majwi aa Leza. Kujatikizya bbala lya “zisalu” mukapango aaka, sikwiiya Bbaibbele A. T. Robertson wakaamba kuti: “Aaya aboneka kuti mabbuku aa Cizuminano Cakale aazisalu aakali kudula kwiinda aamalelebo.” Kuzwa kubwana Paulo wakali “sicikolo wa Gamaliyeli” iwakali kuyiisya Mulawo wa Musa alimwi wakali kulemekwa abantu boonse. Aboobo cilakonzyeka kuti Paulo wakali kukonzya kuba amabbuku aaya aa Jwi lya Leza.—Mil. 5:34; 22:3.

Banakristo Mbobakali Kwaabelesya Mabbuku Aakuvwunga

Aabo bakajisi mabbuku aa Magwalo Aasalala bakali acoolwe. Aboobo, ino mbuti Banakristo banji mbubakali kukonzya kumvwa Ijwi lya Leza kuciindi eeco? Ilugwalo lwakusaanguna Paulo ndwaakalembela Timoteo lulakonzya kutupa muzeezo. Wakalemba kuti: “Kusikila ndikaboole ooko, kozumanana kulitakata kubala kubuleya.” (1 Ti. 4:13) Ikubala kubuleya cakali cibeela camuswaangano wa mbungano zya Banakristo, icilengwa cakali kucitwa abantu ba Leza kuzwa ciindi naakali kupona Musa.—Mil. 13:15; 15:21; 2 Ko. 3:15.

 Kali mwaalu, Timoteo wakeelede “kulitakata” kubala cakupozya, kutegwa aabo batakajisi Magwalo bagwasyigwe. Ciindi Ijwi lya Leza nolyakali kubalwa, boonse bakali kuswiililisya kutegwa baamvwe majwi oonse alimwi bazyali abana bakeelede kubandika kuŋanda izyakali kubalwa kumiswaangano.

Ibbuku lya Isaya lizyibidwe kapati ilyakalembelwa ku Lwizi Lwamunyo ndilamfwu lilatandila kusika kumamita aali 7.3. Ibbuku lyakali kulema akaambo kakuti lyakalijisi tusamu kumamanino alimwi acivwumbyo kutegwa likwabililwe. Ambweni Banakristo banji tiibakali kukonzya kunyamuna mabbuku manji baunka kukukambauka. Nokuba kuti Paulo wakalijisi mabbuku manji, ndiza tanaakali kucikonzya kubweza mabbuku oonse munyendo zyakwe. Kuboneka kuti wakaasiya amwi kumweenzinyina Kapo ku Tulowa.

Ino Ncinzi Ncotukonzya Kwiiya Kucikozyanyo ca Paulo?

Paulo katanatuma mulumbe naakaangwa ku Roma ciindi cabili, wakalemba kuti: “Ndalwana nkondo mbotu, ndabalika mukusiyana mane kumamanino. . . . Kuzwa lino ndibambilidwe musini wabululami.” (2 Ti. 4:7, 8) Kuboneka kuti majwi aaya wakaalemba mu 65 C.E. ciindi Nero naakali kupenzya bantu. Eeci ciindi bakamupenzya kapati muntolongo. Alimwi wakalizyi kuti uyakujaigwa ino-ino. (2 Ti. 1:16; 4:6) Kuboneka kuti Paulo wakali kuyanda kuti mabbuku aakwe aboole. Nokuba kuti wakalizyi kuti wakalwana nkondo mbotu kusikila kumamanino, wakali kuyanda kuti azumanane kuliyumya kwiinda mukubala Jwi lya Leza.

Kuboneka kuti Timoteo wakacili ku Efeso naakautambula mulumbe kuzwa kuli Paulo. (1 Ti. 1:3) Kuzwa ku Efeso kuya ku Roma kwiinda ku Tulowa, kuboneka kuti kuli makkilomita aali 1,600. Mulugwalo oolo Paulo wakaambila Timoteo kuti: “Soleka kusikila mpogolela kusika okuno mupeyo kautanatalika.” (2 Ti. 4:21) Ibbaibbele talyaambi naa Timoteo wakajana bwato buya ku Roma kutegwa akasike muciindi Paulo ncaakaamba.

Ino ncinzi ncotukonzya kwiiya kukulomba kwa Paulo kuti atuminwe “mabbuku aakuvwunga, ikapati aalya aazisalu”? Wakazumanana kuyandisisya Jwi lya Leza muciindi eeci camapenzi mubuumi bwakwe. Eeci cakamupa kuti kacita kabotu kumuuya akukulwaizya bantu banji.

Eelo kaka tulilelekedwe kuti katujisi Bbaibbele likkwene litugeme! Tobamwi tulijisi ma Bbaibbele manji aaindene-indene. Mbuli Paulo, tuyandika kuba aluyandisisyo lwakumvwisya Magwalo. Akati kamagwalo akasololelwa amuuya aali 14 Paulo ngaakalemba, lugwalo lwabili ndwaakalembela Timoteo ndolwakali lwamamanino. Ikulomba kwakwe kulajanika kumamanino aabbuku eeli. Mubwini, ikukombelezya kwa Paulo kuli Timoteo kuti ‘amuletele mabbuku aakuvwunga, ikapati aalya aazisalu,’ cakali akati kazyintu zyamamanino nzyaakali kuyanda.

Sena andinywe mulayanda kulwana nkondo mbotu kusika kumamanino mbuli mbwaakacita Paulo? Sena andinywe muyanda kuzumanana kumubelekela Mwami kweelana ambwayanda kuti tucite? Mulakonzya kucita oobo kwiinda mukutobela ncaakabaambila Banakristo Paulo. “Kolibamba lyoonse omwini akubikkila maano kapati kukuyiisya kwako,” ikwiinda mukubala Bbaibbele lyoonse lyalo lijanika kubantu banji alimwi lipangidwe kabotu kwiinda mabbuku aakuvwunga aakaindi.—1 Ti. 4:16.

[Maapu/Zifwanikiso izili apeeji 18, 19]

(Kutegwa mubone bwini mbwaakkede mabala, amubone bbuku lini)

Efeso

Tulowa

Roma