Bantu Ba Jehova Mbobakazunda Munkuta
Bantu Ba Jehova Mbobakazunda Munkuta
IKAAMBO kakatalika mu 1995 alimwi kakatola myaka iili 15. Muciindi eeco coonse Banakristo bakasimpe mu Russia bakali kukazyigwa abasikukazya lwaanguluko lwabukombi. Aabo basikukazya bakakanzide kuti Bakamboni ba Jehova bazundwe mu Moscow alimwi akumasena aambi. Nokuba boobo, akaambo kakusyomeka kwabakwesu abacizyi baku Russia, Jehova wakabalongezya kuti bazunde munkuta. Ino ncinzi cakapa kuti kube kaambo aaka?
KUJANA LWAANGULUKO
Bakwesu ku Russia bakalesyegwa kukomba mu 1917, pele akati-kati kamyaka yamuma 1990 bakazumizyigwa alimwi. Mu 1991 bakalembwa kumfulumende ya Soviet Union kuti mbukombi buzumizyidwe. Nibakaandana ba Soviet Union, Bakamboni ba Jehova bakalembwa aba Russian Federation. Alimwi Bakamboni ibakapenzyegwa akaambo kabukombi myaka yamusule bakazyibwa a Mfulumende kuti bakapenzyegwa abasitwaambo twacisi. Mu 1993, Cibeela Cilanganya Zyalubeta mu Moscow, cakazumizya Bakamboni ba Jehova bazyibidwe kuti Moscow Community of Jehovah’s Witnesses kuti bazumanane. Mumwaka nguwenya ooyu, mulawo wacisi ca Russia uupa lwaanguluko lwakuti bantu kabakomba mbuli mbobayanda wakatalika kubeleka. Akaambo kaceeci mukwesu umwi wakaamba kuti, “Tiitwakali kuyeeya kuti inga twaba alwaanguluko luli boobu.” Wakazumanana kwaamba kuti, “Kwamyaka iili 50 twakali kucilangila eeci.”
Bakwesu abacizyi baku Russia bakabelesya “ciindi cili kabotu” kukambauka alimwi banji bakazumina. (2 Ti. 4:2) Umwi sikulangilila wakaamba kuti: “Ibantu bakali kukuyanda kukomba kapati.” Tiilyakalampa, mweelwe wabasikumwaya, bapainiya alimwi awambungano wakayungizyigwa. Mubwini, kuzwa mu 1990 kusika mu 1995, mweelwe wa Bakamboni mu Moscow wakayungizyigwa kuzwa ku 300 akwiinda a 5,000. Akaambo kababelesi ba Jehova bakali kuyaabuvwula mu Moscow, basikukazya kuti bantu baanguluke kukomba bakatalika kulibilika. Kumane akati-kati kamyaka yamuma 1990, bakatalika kutola bantu ba Jehova kunkuta. Mulandu ooyu kutegwa umane wakabetekwa ziindi zyone.
KUVWUNTAUZYA MULANDU KWATALIKA
Kupenzyegwa kwakusaanguna kwakatalika mu June 1995. Ikabunga kamu Moscow kakabelekela antoomwe a Cikombelo caku Russia ca Orthodox mukutamikizya bakwesu kuti bakalijatikizyidwe mukucita milimo iitali kabotu. Bamukabunga aaka bakaamba kuti bakwabilila bantu batakkomene bajisi balumi naa bakaintu naa bana bakaba Bakamboni. Mu June 1996, basikuvwuntauzya bakatalika kuvwuntauzya kutegwa bajane naa mulandu ooyu nkouli ncobeni, pele bakajana kuti kunyina mulandu pe. Aboobo, ibamukabunga nkeena aaka bakatongooka kuti bakwesu bakali kucita milimo iitali kabotu. Basikuvwuntauzya bakacita buvwuntauzi bumbi, pele zyoonse nzyibakabatamikizya zyakali zyakubeja. Nokuba boobo, ciindi catatu basikubejelezya bakatamikizya bakwesu kujatikizya kaambo nkeena. Alimwi buvwuntauzi bwakacitwa kubakwesu baku Moscow, pele basinkuta bakajana kuti Bakamboni ba Jehova bakanyina mulandu, aboobo tiibakali kuyandika kupegwa mulandu. Bamane ciindi cane basikukazya bakabatamikizya bakwesu alimwi, mbubwenya buyo alimwi basinkuta bakajana kuti bakanyina mulandu pe. Cigambya ncakuti, babelesi mumfwulumende bakalomba kuti mulandu ulangwe-langwe alimwi. Kumane mu April 13, 1998, ibakapegwa mukuli ooyu bakaamba kuti mulandu wamana.
Similawo wakali kulanganya mulandu ooyu wakaamba kuti, “pele alimwi cintu catakali kuyeeyelwa cakacitika.” Nokuba kuti iwakali kwiiminina babetesi iwakakalanga-langa kaambo ciindi casanu wakazumina kuti taaku bumboni bwakuti Bakamboni ba Jehova bakacita cintu citeendelani amulawo, wakaamba kuti bakwesu beelede kupegwa mulandu uumbi. Baiminizi aaba bakaamba kuti ba Moscow Community of Jehovah’s Witnesses bakacita zyintu ziteendelani amulawo wacisi awanyika yoonse. Aboobo, bapulisa baku Northern Administrative Circuit mu Moscow bakabaula saimoni bakwesu. * Mpoonya mu September 29, 1998, mulandu wakatalika kubetekwa mu Nkuta ya Golovinsky mu Moscow. Cibeela cabili cakubeteka mulandu ooyu cakatalika.
BBAIBBELE MUNKUTA
Mukaambo aaka Tatyana Kondratyeva ngowakali mupulisa wakali kulanganya kaambo. Wakapa mulandu kweelana amulawo wacisi wakalembwa mu 1997. Mulawo ooyu wakali kwaamba kuti zikombelo zyaba Orthodox, ba Islamu, ba Juda aba Bbuda nzyezikombelo bantu nzyobazibide. * Mulawo nguwenya ooyu wapa kuti zikombelo zimbi zitapegwi lwaanguluko. Mulawo ooyu wakali kuzumizya nkuta kukasya zikombelo zipa kuti bantu kabatamvwani abamwi. Babetesi bakaamba kuti mfwulumende yeelede kulesya Bakamboni ba Jehova nkaambo bapa kuti bantu kabatamvwani abamwi alimwi banyonganya zikwati.
Similawo wakali kwiiminina bakwesu munkuta wakabuzya kuti: “Ino mbaani mu Mbungano ya Moscow basotoka mulawo?” Mupulisa wakali kulanga-langa kaambo wakaalilwa kwaamba naaba omwe. Pele wakaamba kuti mabbuku aa Bakamboni ba Jehova apa kuti bantu kabatamvwani azikombelo zimwi. Kusinizya kaambo nkaakali kwaamba, wakabala kuzwa mumagazini ya Ngazi Yamulindizi a Sinsimuka! alimwi amabbuku amwi (amubone aatala). Naakabuzigwa kuti muunzila nzi mabbuku aaya mbwaapa bantu kutamvwana, wakaamba kuti: “Bakamboni ba Jehova bayiisya kuti mbebakombi bakasimpe.”
Similawo umbi mukwesu, wakapa ma Bbaibbele kumubetesi akumupulisa akubabalila lugwalo lwa Baefeso 4:5 lwaamba kuti: “Mwami omwe, lusyomo lomwe, lubbapatizyo lomwe.” Mubetesi, mupulisa asimilawo boonse bakalijisi ma Bbaibbele mumaanza, bakabandika amagwalo mbuli lwa Johane 17:18 a Jakobo 1:27. Mubetesi wakabuzya kuti: “Sena magwalo aaya apa bantu kuti kabasula zikombelo zimbi?” Mupulisa wakaamba kuti tanaakali kukonzya kwiingula kweelana azili mu Bbaibbele. Similawo wakabweza mabbuku aa Cikombelo ca Orthodox aasampaula Bakamboni ba Jehova akubuzya kuti: “Sena majwi aaya taasotoki mulawo?” Mupulisa wakali kulanganya kaambo wakaingula kuti: “Tandikonzyi kwiingula kujatikizya makani aa bukombi.”
MULANDU WABULA BUMBONI
Naakali kutamikizya Bakamboni kuti bamwaya zikwati, mupulisa wakali kulanganya kaambo wakaamba kuti tabasekeleli mapobwe mbuli Kkilisimasi. Nokuba boobo, wakazumina kuti mulawo wamu Russia tauzumizyi bamucisi kusekelela Kkilisimasi. Bantu bamu Russia kubikkilizya a Bakamboni ba Jehova balakonzya kulisalila. Mupulisa wakali kulanganya kaambo alimwi wakaamba kuti mbunga yesu ‘taipi bana ciindi ceelede cakulyookezya alimwi akukkomana.’ Nokuba boobo, naakabuzyigwa, wakazumina kuti taaku naakabuzyide kale mukubusi uuli woonse wakakomezyegwa abazyali Bakamboni. Similawo naakabuzya mupulisa wakali kulanganya kaambo kuti naa wakajanika kale kumiswaangano ya Bakamboni ba Jehova wakaingula kuti: “Tiicakali kuyandika kucita oobo.”
Mumulandu ooyo bakaita haazibwene mukusilika basondokede kuti ape bumboni. Wakapa twaambo twakuti kubala mabbuku eesu kupa muntu kunyongana mumizeezo. Similawo wakali kwiiminina Bakamboni wakabona kuti majwi aa haazibwene kunkuta akali kukozyanya aakali acipepa cakalembwa aba Moscow Patriarchate, mupulisa wakazumina kuti zyintu zinji nzyaakalemba kujatikizya mulandu ooyu zyakazwa mucipepa eeco. Wakati, “tubelesya ka diskette komwe.” Mibuzyo iimbi njaakabuzyigwa yakatondezya kuti taaku naakasilika kale Kamboni wa Jehova. Mukwiimpana aceeci, haazibwene mukusilika basondokede wakapa bumboni munkuta bwakuti wakali kubalangilila Bakamboni bainda ku 100 mu Moscow. Alimwi wakajana kuti bakali buyo kabotu akuti balazilemeka kapati zikombelo zimwi kuzwa ciindi nibakaba Bakamboni.
TWAKAZUNDA—PELE MULANDU TAUNAMANA
Mu March 12, 1999, mubetesi wakasala bantu bayiide bali bosanwe kuti babale mabbuku aa Bakamboni ba Jehova alimwi mulandu bakawiimika. Pele kacitanacitika eeci, bamfwulumende yamu Russia bali mu Cibeela cilanganya Lubeta bakalisalide kale kabunga kabantu bayiide kuti babale mabbuku eesu. Bantu bakabikkwa a Cibeela eeci bakapa lipooti mu April 15, 1999, kuti taaku cibi ncobakajana mumabbuku eesu. Aboobo, mu April 29, 1999, ba Cibeela cilanganya Lubeta bakasala kuti Bakamboni ba Jehova bazumanane kuba cikombelo cizyibidwe amulawo mu Russia. Nokuba kuti kwakali bubambe buli boobu eeco ciindi, bankuta yamu Moscow bakazumanana kuti kube nkamu mpya iilanga-langa mabbuku eesu. Eeci cakagambya, Bakamboni ba Jehova bakalizyibidwe mucisi ca Russia a Cibeela cilanganya Lubeta kuti ncikombelo citobela mulawo, kulubazu lumwi Cibeela cilanganya Lubeta camu Moscow cakali kuvwuntauzya kaambo kakuti bakali kwaambwa kuti basotoka mulawo.
Kwakainda myaka yobilo mulandu kautanabetekwa, pele mu February 23, 2001 Mubetesi Yelena Prokhorycheva wakamanizya kulanga-langa mulandu ooyu. Naakamana kulanga-langa nzyobakajana bakabunga kabantu bayiide mbaakasalide, wakaamba kuti: “Taaku kaambo kakonzya kutupa kuti tulesye milimo ya Bakamboni ba Jehova mu Moscow.” Kumamanino cakazyi kuzyibwa kuti bakwesu tiibakajisi mulandu mutwaambo toonse ntobakapedwe. Nokuba boobo, mupulisa waakakaka kaambo aaka alimwi wakalembela ku Nkuta iimbi yamu Dolopo lya Moscow kutegwa mulandu ukaindulukwe. Nikwakainda myezi yotatwe, mu May 30, 2001, nkuta yakakaka kukosola makani kwakacitwa a Mubetesi Prokhorycheva. Nkuta yakalailila kuti mulandu ooyu weelede kulangwa-langwa alimwi amupulisa wakali kulanganya kaambo aaka pele kukasalwe mubetesi uumbi. Cibeela catatu cakubeteka mulandu cakali aafwaafwi kutalika.
KUZUNDWA—PELE MULANDU TAUNAMANA
Mu October 30, 2001, Mubetesi Vera Dubinskaya wakatalika kuulanga-langa alimwi mulandu ooyu. * Mupulisa wakali kulanganya kaambo aaka Kondratyeva wakainduluka kupa mulandu Bakamboni ba Jehova kuti bapa kuti bantu kabasulana, pele alimwi wakayungizya kuti ikulesya Bakamboni ba Jehova bakazyibidwe amulawo, yakali nzila yakuti baanguluke Bakamboni mu Moscow. Nibakali kwiingula kaambo aaka, Bakamboni boonse bali 10,000 bamu Moscow bakalomba nkuta kuti ikake ncaakaamba mupulisa ooyu.
Mupulisa ooyu wakaamba kuti tiicakali kuyandika kuti ape bumboni butondezya kuti Bakamboni bakajisi mulandu. Wakaamba kuti imulandu wakali kujatikizya mabbuku anzyobasyoma Bakamboni ba Jehova kutali milimo yabo. Wakaambilizya kuti ulaita mwaambilizi wa Cikombelo ca Orthodox mu Russia kuti azikupe bumboni. Pele kwaambilizya ooko kwakatondezya kuti basololi bazikombelo bakalijatikizyidwe kulesya Bakamboni. Mu May 22, 2003, mubetesi wakalailila kuti bantu bayiide baabale alimwi mabbuku aa Bakamboni ba Jehova.
Mu February 17, 2004, mulandu wakatalika alimwi kutegwa babone ncobakajana bantu bayiide nibakabala. Bantu bayiide bakajana kuti mabbuku eesu akulwaizya basikubala “kukamantana mumukwasyi alimwi akulemeka bubambe bwalukwatano” alimwi bakabona kuti kaambo nkobakali kwaamba kuti mabbuku eesu apa kuti bantu kabatamvwani “takajisi bumboni.” Basikwiiya zyamu Bbaibbele bamwi bakazumina. Haazibwene mumakani abukombi wakabuzyigwa kuti: “Nkaambo nzi Bakamboni ba Jehova ncobakambaukila?” Wakaingula kuti: “Mulimo wakukambauka ngomulimo uuyandika ku Munakristo. Mbwaamba Makani Mabotu alimwi ngomulimo Kristo ngwaakaambila basikwiiya bakwe kuti bacite—‘kamuya mukambauke kumasena woonse.’” Nokuba boobo, mu March 26, 2004, imulimo wa Bakamboni ba Jehova wakalesyegwa mu Moscow. Mu June 16, 2004, ba Nkuta ya Moscow bakautobela muzeezo ooyu. * Kaamba cakacitika, umwi mukwesu wali Kamboni kwaciindi cilamfwu wakaamba kuti: “Mumazuba aa Soviet Union, muna Russia uuli woonse wakeelede kuleka kusyoma muli Leza. Pele aano mazuba beelede kuba mucikombelo ca Orthodox.”
Ino bakwesu bakacita buti mulimo niwakalesyegwa? Bakacita mbubwenya mbwaakacita Nehemiya wansiku. Ciindi basikukazya bantu ba Leza nibakali kusola kulesya mulimo wakuyakulula bwaanda bwa Jerusalemu, Nehemiya abantu bakwe tiibakayungwa munzila iili yoonse. Muciindi caboobo, ‘bakazumanana kuyaka’ alimwi “bakapangika myoyo yabo kumilimo.” (Neh. 4:1-6) Mbubwenya buyo, bakwesu mu Moscow tiibakayanda kuyungwa abasikukazya kuti baleke mulimo weelede kucitwa cino ciindi iwakukambauka makani mabotu. (1 Pe. 4:12, 16) Bakali aalusyomo lwakuti Jehova uyakubagwasya alimwi bakalilibambilide kuzumanana kukomba Jehova.
KUKAZYIGWA KWAZUMANANA
Mu August 25, 2004, bakwesu bakalomba wakali muleli wacisi ca Russia Vladimir Putin ku Kremlin. Mukulomba kwabo bakatondezya kutakkomana akaambo kamulimo wabo wakalesyegwa, bakalemba mavolyumu aali 76 aakasainwa abantu bali 315,000. Basololi bazikombelo zya Orthodox mu Russia bakatondezya ncobakali kuyanda. Mwaambilizi wa Moscow Patriarchy wakaamba kuti: “Tatwiiyandi milimo ya Bakamboni ba Jehova.” Musololi waba Mozilemu wakaamba kuti makani aaya “akakosolwa kabotu kapati.”
Nkakaambo kaako bantu bakayungwa mu Russia akutalika kulwana Bakamboni ba Jehova. Bakamboni bamwi bakali mumulimo wakukambauka mu Moscow bakaumwa abasikukazya. Mwaalumi umwi wakanyemede wakatandila mucizyi umwi kuzwa muŋanda mwaakali kukambaukila, wakamuuma canguzu kumusana cakunga wakawa akutalika kumuuma kumutwe. Wakali kuyandika kutolwa kucibbadela. Bamapulisa taaku ncobakacita kuli yooyo wakamuuma. Bakamboni bamwi bakaangwa, bakadinta minwe, bakafwotolwa akubikkwa mucitolokesi masiku oonse. Bapati bamilimo mumasena aakuswaanganina mu Moscow bakakongwa kuti bayootandwa mulimo kuti bazumanana kuzumizya Bakamboni kubelesya masena aabo. Tiikwakainda ciindi, mbungano zinji zyakabula masena aakuswaanganina. Mbungano zili 40 zyakali kubelesya ŋanda ya Bwami yomwe iijisi maanda one mapati. Mbungano imwi yakali kubelesya busena oobu yakali kutalika Muswaangano Waabuleya, aciindi ca 7:30 mafwumo-fwumo. Mulangizi weendeenda wakaamba kuti “kutegwa basikumwaya bajanike bakeelede kubuka aciindi ca 5 koloko, pele bakalyaaba kucita oobo kwiinda amwaka omwe.”
‘KUTI KUKABE BUMBONI’
Mu December 2004 basimilawo besu bakalangaula lugwasyo kuli ba European Court of Human Rights kutegwa kusinizyigwe kuti kulesya mulimo kwakacitwa ku Moscow tiikwakali kwamumulawo. (Amubone kabbokesi kakuti “Mulandu Wakakosolwa ku Russia Ncowakaindulukwa ku France,” kali apeeji 6.) Nikwakainda myaka iili cisambomwe mu June 10, 2010, Nkuta eeyi yakakosola kuti Bakamboni ba Jehova bakanyina mulandu. * Nkuta yakalanga-langa milandu yoonse njotwakapegwa pele tiibakajana bumboni buli boonse. Alimwi nkuta yakaambila mfwulumende ya Russia kuti babazumizye Bakamboni akucita zyoonse ziyandika.—Amubone kabbokesi kakuti “Nkuta mboyakaakosola makani,” kali apeeji 8.
Nkuta yaku Europe yakasala kuti yeelede kukwabilila milimo njobacita Bakamboni ba Jehova, eeci tiicakali buyo mu Russia pele cakali kubikkilizya azisi zili 46 izili mu Council of Europe. Babetesi banji, basikubamba milawo alimwi abantu bamunyika balanga-langa zyeelelo zya bantu abalo bayakukkomana kubona mbokakamana kaambo aaka. Nkaambo nzi? Akaambo kakuti ba Nkuta yaku Europe bakaakosola kale makani aaya ziindi zili lusele ikukwabilila Bakamboni ba Jehova, bakabelesya nzila njimunya eeyi ziindi zili fwuka nibakali kulanga-langa kaambo aaka munkuta mpati yaku Argentina, Canada, Japan, Russia, South Africa, Spain, United Kingdom, alimwi aku United States. Bakamboni ba Jehova munyika yoonse balakonzya kubelesya ncoyakasala Nkuta yaku Europe kukwabilila bukombi bwabo.
Jesu wakaambila basikumutobela kuti: “Muyooabwa kubeendelezi abami akaambo kandime kuti bukabe bumboni kuli mbabo akuli bamasi.” (Mt. 10:18) Makani oonse aali kubetekwa munkuta mu Russia kwamyaka iili 15, apa bantu bamu Muscow amumasena aambi coolwe cakumvwa zyina lya Jehova kwiinda lyoonse. Zyoonse zyakali kucitika munkuta zyakapa kuti ‘bube bumboni’ alimwi zyakagwasya kuti “makani mabotu aunke kumbele.” (Flp. 1:12) Mubwini Bakamboni nibakambauka mu Moscow mazuba aano bantu banji baamba kuti: “Sena mulimo wanu tiiwakalesyegwa?” Mubuzyo ooyu upa bakwesu coolwe cakupandulwida bantu makani aajatikizya nzyotusyoma. Cilasalala kuti taaku cikonzya kutulesya kucita mulimo wesu wakukambauka. Tupailila kuti Jehova azumanane kulongezya alimwi akubakwabilila bakwesu abacizyi besu basicamba mu Russia.
[Bupanduluzi buyungizidwe]
^ munc. 8 Mulandu wakatolwa kunkuta mu April 20, 1998. Mu May 5, kakwiindide nsondo zyobilo, icisi ca Russia cakanjila mucizuminano ca European Convention on Human Rights.
^ munc. 10 “Bacikombelo ca Orthodox mu Russia bakapa kuti mulawo ubambwe akaambo kakulibilika kuti balaleka kuba ampuwo mu Russia alimwi bayanda kuti milimo ya Bakamboni ba Jehova ilesyegwe.”—Associated Press, June 25, 1999.
^ munc. 20 Mubuzuba mbubwenya oobu, nceciindi niyakakkwana myaka iili kkumi kuzwa niwakatalika kubeleka mulawo mu Russia iwakali kutondezya kuti Bakamboni ba Jehova bakali kupenzyegwa mubulelo bwa Soviet.
^ munc. 22 Mulimo niwakalesyegwa cakapa kuti akalo kabunga kazumizyidwe amulawo kakali kubelesyegwa ambungano mu Moscow kaleke kubeleka. Basikukazya bakali kuyanda kuti bakwesu baleke kucita mulimo wabo.
^ munc. 28 Mu November 22, 2010, babetesi bali bosanwe baku Grand Chamber of the European Court of Human Rights bakakaka kuti mulandu uye ku Nkuta ya Grand Chamber. Nibakaamba boobu, kwakatobelwa cakaambwa mu June 10, 2010 kuti mulandu wamana alimwi ncobakaamba cakeelede kutobelwa.
[Kabbokesi/Cifwanikiso icili apeeji 6]
Mulandu Wakakosolwa ku Russia Ncowakaindulukwa ku France
Mu February 28, 1996, cisi ca Russia cakatalisya cizuminano ciitwa kuti European Convention on Human Rights. (Mu May 5, 1998, cisi ca Russia cakacizuminizya cizuminano eeci). Akaambo kakulemba cizuminano eeci, mfwulumende yaku Russia yakaamba kuti bantu bamucisi eeci beelede kuti kabajisi
‘lwaanguluko lwakuzulilwa mucikombelo akutola lubazu mumicito yacikombelo eeco mumaanda aabo alimwi akubuleya mpoonya akucinca cikombelo kuti bayanda kucita oobo.’—Cibalo 9.
‘lwaanguluko lwakulemba akwaambila bamwi twaambo tumwi munzila yabulemu kweelana ambobayeeya.’—Cibalo 10.
‘lwaanguluko lwakuswaangana cakuliiba.’—Cibalo 11.
Bantu naa tubunga twabantu bajatikizyidwe mukupenzyegwa alimwi badyaamininwa amilawo balakonzya kwaamba twaambo twabo kunkuta ya European Court of Human Rights ku France mu Strasbourg (kweelana ambokutondezyedwe atala aawa). Eeyi nkuta ibambidwe ababetesi bali 47—mweelwe wabo uleelene amweelwe wazisi zijatikizyidwe mucizuminano ca European Convention on Human Rights. Inkuta eeyi njenjiyo iibamba milawo. Zisi zyoonse zili mucizuminano eeci zyeelede kwiitobela milawo iibambwa ankuta eeyi.
[Kabbokesi kali apeeji 8]
Nkuta Mboyakaakosola Makani
Ntootu twaambo totatwe tulembedwe mubufwaafwi tutondezya Nkuta mboyakaakosola makani.
Mulandu omwe ngwakuti Bakamboni ba Jehova bapa kuti mikwasyi yaandaane. Babetesi bakaamba kuti ooku kwakali kubeja. Bakati:
“Ikukazya akutayanda kwabana mukwasyi batali mucikombelo eeco ibatayandi alimwi batalemeki cikombelo camusazinyina anzyacita mucikombelo cakwe, eezyi zyezileta manyongwe.”—Munc. 111.
Alimwi babetesi tiibakajana bumboni kumulandu wakuti “balanyonganya mizeezo,” bakati:
“Basinkuta baligambidwe kuti Nkuta [zyaku Russia] tiizyakaamba zyina lyamuntu naaba omwe wakanyongana mizeezo akaambo kakubelesya nzila eezyo.”—Munc. 129.
Aumwi mulandu ngobakabapa ngwakuti akaambo kakukaka kubikkwa bulowa, Bakamboni ba Jehova bakali kunyonganya buumi bwabasyominyina. Babetesi bakaamba kuti ooku kwakali kubeja, bakati:
“Ilwaanguluko lwakuzumina naa kukaka busilisi bumwi, eeci cilayandika kuzyintu muntu nzyaelede kulisalila. Muntu mupati ulaangulukide kulisalila, mucikozyanyo ulakonzya kusala kuti aandulwe naa asilikwe munzila imwi naa kubikkwa bulowa.”—Munc. 136.
