Sena Mwakanjila Kale Mukulyookezya kwa Leza?
Sena Mwakanjila Kale Mukulyookezya kwa Leza?
“Jwi lya Leza lili abuumi alimwi lili anguzu.”—HEB. 4:12.
1. Ino muunzila nzi motukonzya kunjila mukulyookezya kwa Leza mazuba aano, alimwi nkaambo nzi ncocitali cuuba-uba?
MUCIBALO cainda, twakabona kuti tulakonzya kunjila mukulyookezya kwa Leza kwiinda mukubeleka kweelana amakanze aakwe cakusyomeka. Kunjila mukulyookezya kwa Leza tacili cuuba-uba pe. Mucikozyanyo, notwiiya kuti Jehova taziyandi zyintu zimwi nzyotukkomanina, cikonzya kuboola mumizeezo yesu nkuzanga. Eeci citondezya kuti tweelede kuyaambele mumakani ‘aakumvwida lyoonse.’ (Jak. 3:17) Mucibalo eeci, tulalanga-langa mbazu zisyoonto zitondezya naa tulakonzya kucita zyintu kweelana amakanze aa Leza ciindi coonse.
2, 3. Ino ncinzi ncotweelede kucita kutegwa tuzumanane kuba bantu bayandika kuli Jehova?
2 Ino mucita buti caboola kumakani aakutambula lulayo lujanika mu Bbaibbele? Magwalo atwaambila kuti makanze aa Leza ngakubunganya “zintu ziyandisi zyazisi zyoonse” kulinguwe. (Hag. 2:7) Mubwini, bunji bwesu tiitwakali kweelela notwakatalika kwiiya kasimpe. Nokuba boobo, kuyanda Leza alimwi a Mwanaakwe nkokwakatupa kucinca buumi bwesu kutegwa katumukkomanisya Leza. Kumamanino, akaambo kakupaila alimwi akusolekesya kwesu, twakalongezyegwa notwakalyaaba akubbapatizyigwa.—Amubale Bakolose 1:9, 10.
3 Nokuba boobo, kulwana tumpenda akaambo kakutalondoka tiikwakamana nitwakabbapatizyigwa. Nkondo yakazumanana alimwi iyoozumanana kuti katutalondokede. Pele tuli masimpe kuti naa twazumanana kulwana nkondo eeyi, Jehova Leza unootuyanda alimwi uyakutulongezya.
Lulayo Noluyandika
4. Ino muunzila nzi zyotatwe motukonzya kutambula lulayo lwamu Magwalo?
4 Katutanatalika kulwana tumpenda twesu tweelede kutuzyiba. Makani aapegwa ku Ŋanda ya Bwami naa cibalo cimwi cipa kuyeeya cili mumabbuku eesu cilakonzya kuyubununa kampenda nkotujisi. Kulubazu lumwi, kuti tiitwakabona kaambo makani naali kupegwa naa kwaalilwa kubelesya lulayo lulembedwe mumabbuku eesu, Jehova ulakonzya kubelesya Munakristoma kututondezya kampenda kesu.—Amubale Bagalatiya 6:1.
5. Amwaambe nzila zimwi zitali kabotu nzyotukonzya kucita notupegwa lulayo, alimwi amupandulule kaambo beembezi Banakristo ncobeelede kuzumanana kutugwasya.
5 Tacili cuuba-uba kutambula lulayo kuzwa kumuntu uutalondokede, nokuba kuti lwapegwa cabupampu alimwi caluyando. Pele kweelana a Bagalatiya 6:1, Jehova ulailila baabo bajisi zyeelelo zyakumuuya ‘kusoleka’ kutululamika kabacita oobo “amyoyo iibombede.” Kuti lulayo twalutambula amaanza obilo tuyooba bayandisi kapati kuli Leza. Masimpe ngakuti, notupaila tulazumina tobeni kuti tatulondokede. Nokuba boobo, umwi naatwaambila kulezya kwesu, kanji-kanji tulasola kulilulamika, kucesya penzi, kubuzya sikupa lulayo ncayandaula naa kukazya lulayo kweelana mbolwapegwa. (2 Bam. 5:11) Alimwi kuti lulayo lujatikizya makani mbuli micito yaumwi mumukwasyi, nsamino alimwi akulibamba, bulondo, kulikondelezya nkotuyandisya pele nkwasulide Jehova, tulakonzya kunyema, calo cikonzya kutupa kuusa alimwi akutyompya sikutupa lulayo. Pele bukali bwamana, tulazumina kuti lulayo lwali kweelela.
6. Mbuti ijwi lya Leza mboliyubununa “mizeezo amakanze aamumoyo”?
6 Lugwalo lwamutwe wacibalo eeci lutuyeezya kuti ijwi lya Leza “lili anguzu.” Masimpe, ijwi lya Leza lili anguzu zyakucinca maumi. Lilakonzya kutugwasya kucinca twamana kubbapatizyigwa mbubwenya mbolyakatugwasya kucita oobo katutanabweza ntaamu eeyi. Mulugwalo lwakwe kubana Hebrayo, Paulo alimwi wakalemba kuti ijwi lya Leza “lilayasa mane kukwaandaanya buumi amuuya, akukwaandaanya manungo aazifwuwa kumooma, alimwi lilakonzya kuzyiba mizeezo amakanze aamumoyo.” (Heb. 4:12) Munzila imwi, notwaamvwisya makanze aa Leza, mbotwaatambula kutondezya mbotubede mumoyo. Sena zimwi ziindi kuli kwiindana kuliko aakati kambotuboneka (“buumi”) alimwi abwini mbotubede (“muuya”)? (Amubale Matayo 23:27, 28.) Amulange-lange mbomukonzya kucita mubukkale butobela.
Amuzumanane Kweenda a Mbunga ya Jehova
7, 8. (a) Ino ncinzi cakapa kuti bama Juda Banakristo bazumanane amicito imwi ya Mulawo wa Musa? (b) Ino nzyobakali kucita zyakaindana buti amakanze aa Jehova?
7 Tobanji tulakonzya kwaamba majwi aalembedwe ku Tusimpi 4:18 kakunyina kwaabala buya aamba kuti: “Inzila yabaluleme ili mbuli mumuni uumweka, uuya bungwengwemuka mane bwaca buzuba.” Eeci caamba kuti mukuya kwaciindi tunakulilemeka kabotu alimwi tuyakwaazyiba kabotu makanze aa Leza.
8 Mbubwenya mbutwakabandika mucibalo cainda, naakafwa Jesu cakali kubakatazya bama Juda Banakristo kuleka kutobela Mulawo wa Musa. (Mil. 21:20) Nokuba kuti Paulo wakabaambila Banakristo munzila yabupampu kuti tabacitobeli Mulawo, bamwi bakaukaka muzeezo wakwe. (Kol. 2:13-15) Ndiza bakali kuyeeya kuti, ikuti bazumanana kutobela zibeela zimwi zya Mulawo tabakapenzyegwi. Munzila iimwi, Paulo wakabalembela Banakristo ba Hebrayo akubaambila caantangalala kuti tabakanjili mukulyookezya kwa Leza kufwumbwa kuti bazumanana kukaka kubeleka kweelana amakanze aakwe. * (Heb. 4:1, 2, 6; amubale Bahebulayo 4:11.) Kutegwa Jehova kabakkomanina bantu bakwe, bakeelede kuzyiba kuti wakali kubasololela kubelesya nzila iimbi.
9. Ino tweelede kuzilanga buti zyintu naa kwaba kucinca mukumvwisya twaambo tuli mu Magwalo?
9 Mazuba aano, kuli kucinca kuliko mukumvwisya njiisyo zimwi zyamu Bbaibbele. Eeci taceelede kutunyonganya pe; pele ceelede kutupa kuyumya lusyomo lwesu muciinga camuzike musyomesi uucenjede. Baiminizi baciinga “[ca]muzike” nobazyiba kuti mbotututeelela twaambo tumwi tuyandika kusalazya naa kululamika, tabawayi-wayi kucita oobo. Baciinga camuzike bayanda kucita zyintu kweelana amakanze aa Leza muciindi cakuyoowa kupegwa mulandu akaambo kakucinca mukumvwisya njiisyo zimwi zyamu Magwalo. Ino mucita buti kuti kwaba kucinca mukumvwisya Magwalo?—Amubale Luka 5:39.
10, 11. Ino nziiyo nzi nzyotukonzya kwiiya kweelana ambobakacita bamwi nobakaambilwa kubelesya nzila zipya zyakukambauka?
10 Atubone cikozyano acimbi. Kumamanino aamwaanda wamyaka wa 19 akumatalikilo amwaanda wamyaka wa 20, Basikwiiya Bbaibbele bamwi ibakalicibwene kwaamba makani aabuleya bakayeeya kuti kabakambauka kwiinda mukupa makani aalibambilwa kabotu kubantu baswiilila. Bakali kukkomana kwaamba makani kubuleya alimwi bamwi bakali kulumbaizyigwa abaswiilizi babo. Nokuba boobo, cakalibonya kuti Jehova wakali kuyanda kuti bantu bakwe kababeleka munzila ziindene indene zyakukambauka kubikkilizya amulimo wakuŋanda aŋanda. Bamwi ibakalicibwene kwaamba makani kubuleya bakakaka kutobela malailile mapya. Bakali kulibonya kuti mbantu basimide kumuuya ibalyaabide ku Mwami. Nokuba boobo, makanze aa Leza naakazyibwa aajatikizya mulimo wakukambauka, mizeezo yabo amakanze aabo zyakalibonya. Ino Jehova wakalimvwa buti nobakacita oobo? Tanaakabalongezya pe. Aboobo bakaisiya mbunga.—Mt. 10:1-6; Mil. 5:42; 20:20.
11 Eeci tacaambi kuti cakali cuuba-uba ikukambauka kubuleya kuli baabo boonse ibakazumanana kusyomeka kumbunga. Kumatalikilo imulimo ooyu wakabakatazya banji. Pele nokuba boobo bakaatobela malailile. Mukuya kwaciindi bakaleka kulibilika alimwi Jehova wakabalongezya. Ino mucita buti kuti mwaambilwa kubelesya nzila imwi yakukambauka njomutanacitide? Sena mulilibambide kusoleka nzila mpya?
Ciindi Muyandwa Wesu Naleka Kumubelekela Jehova
12, 13. (a) Ino Jehova ujisi makanze nzi nalailila kuti basimucita zibi bateempwi kabagusyigwa mumbungano? (b) Ino musunko nzi bazyali Banakristo bamwi ngobajisi, alimwi ncinzi cipa musunko ooyu kukatazya kapati?
12 Tatudooneki buya kuti tulaizuminizya njiisyo yakuti tweelede kusalala kumubili akumuuya akulilemeka kutegwa tumukkomanisye Leza. (Amubale Tito 2:14.) Nokuba boobo, kuli ziindi kusyomeka kwesu kumakanze a Leza aaya nikukonzya kusunkwa. Mucikozyanyo, kuti mwana musankwa uuli alikke wabanabukwetene Banakristo bacita kabotu, wacileka kumubelekela Leza. Akaambo kakuyanda ‘kulikondelezya kwakaindi kaniini buyo’ muciindi cakukkomanisya Jehova abazyali bakwe Banakristo, imwana musankwa ooyu wagwisyigwa mumbungano.—Heb. 11:25.
13 Bazyali batyompwa. Caboola kumakani aakugusyigwa mumbungano balizyi kuti Bbaibbele lyaamba kuti: “Muleke kuyanzana amuntu uuli woonse uutegwa mukwesu pele kali sibwaamu, syaacivwulemwangu, sikukomba mituni, simatusi, mukolwi, naa mufwumpi, alimwi mutasoli nokuba kulya amuntu uuli boobo.” (1 Ko. 5:11, 13) Alimwi balizyi kuti mabala aakuti “uuli woonse” mukapango aaka abikkilizya banamukwasyi bakazwa aŋanda. Pele balamuyanda mwanaabo. Akaambo kakuti balamuyanda kapati balakonzya kuyeeya kuti: ‘Ino mbuti mbotukonzya kumugwasya mwana wesu kupiluka kuli Jehova kuti katutabandiki anguwe? Sena tatukonzyi kumugwasya kuti twazumanana kubandika anguwe?’ *
14, 15. Ino nkusala kuli buti bazyali bali abana bakagusyigwa mumbungano nkobeelede kucita?
14 Eelo kaka tulabayeeya bazyali bali mubukkale buli boobo! Nokuba boobo, mwanaabo musankwa wakasala ncaakali kuyanda, wakasala nzila iitali ya Bunakristo muciindi cakuzumanana kukkomanisya bazyali bakwe abasyominyina. Kulubazu lumwi, ibazyali bakwe bakanyina cakwaamba mukaambo aaka. Aboobo bakatyompwa.
15 Ino ncinzi ncobakonzya kucita bazyali aaba? Sena balakonzya kwaatobela malailile aa Jehova? Naa sena bayakuzumanana kubandika amwanaabo uugusyidwe akaambo kakuti “nkaambo kayandika kapati mumukwasyi”? Nobasala tabeelede kuluba mbwalimvwa Jehova muzyintu nzyobacita. Makanze aakwe ngakuti mbunga yakwe kaisalala alimwi akuti, ikuti kacikonzyeka basizibi beempwe. Ino bazyali Banakristo inga bacita buti kutegwa eeci cibeleke?
16, 17. Ino ncinzi ncotwiiya notuzinzibala kuyeeya cakamucitikila Aroni?
16 Musa mwanookwabo a Aroni wakajana buyumu-yumu mubana bakwe bobilo. Kamuyeeya buyo mbwaakalimvwa ciindi bana bakwe ba Nadabu a Abihu nibakapaizya mulilo uumbi kuli Jehova amane wakabajaya. Masimpe eeci cakapa kuti cilongwe cabo abazyali cimane. Pele kuli acimbi cakacitika. Jehova wakalailila Aroni abana bakwe basyomeka kuti: “Mutatebezyi masusu aanu nekuba kudeluula zyakusama zyanu [mukulila], kuti mutafwi, kuti bukali [bwa Jehova] butasikili imbungano yoonse yabantu.” (Lev. 10:1-6) Kaambo kalalimvwisya. Mbotumuyanda Jehova kweelede kwiindana ambotubayanda banamukwasyi batasyomeki.
17 Mazuba aano, Jehova tabajayi mpoonya-mpoonya aabo batatobeli mulawo wakwe. Ulabapa ciindi cakuti beempwe akuleka kucita milimo mibi. Ino Jehova ulimvwa buti, ikuti ibazyali bamwana uuteempwi bazumanana kumusunka Leza kwiinda mukubandika lyoonse amwanaabo musankwa naa musimbi wakagusyigwa mumbungano?
18, 19. Ino zilongezyo nzi nzyobajana banamukwasyi ibatobela malailile aa Jehova aajatikizya bantu bakagusyigwa mumbungano?
18 Ibanji bakagusyidwe mumbungano balazumina kuti, bakagwasyigwa akaambo kakuti ibeenzinyina abamumukwasyi bakali kutobela malailile. Nibakali kulumbaizya mucizyi uucili mwana wakapilusyigwa, ibaalu bakalemba kuti “wakaleka kucita milimo yakwe mibi akaambo kakuti mupati wakwe musankwa wakali kubulemeka bubambe bwakugusyigwa mumbungano.” Wakaamba kuti “akaambo kakuti mucizyi wakwe wakaatobela malailile aamu Magwalo cakamugwasya kuti apilusyigwe.”
19 Ino inga twaamba nzi kumakani aaya? Aawa tweelede kubeleka canguzu kutegwa tutatobeli ncotuyanda akaambo kakutalondoka akutobela zyintu zitako mu Magwalo. Tweelede kusyoma cakumaniina kuti inzila Leza zyabelesya kumana mapenzi eesu lyoonse, zili kabotu.
“Jwi lya Leza Lili Abuumi”
20. Ino muunzila nzi zyobilo molukonzya kubelesyegwa lugwalo lwa Bahebulayo 4:12? (Amubone bupanduluzi buyungizyidwe.)
20 Paulo naakalemba kuti “jwi lya Leza lili abuumi” tanaakali kwaamba Ijwi lya Leza lilembedwe, Ibbaibbele. * Cibalo citondezya cintu ncaakasyomezya mujwi lya Leza. Paulo wakali kwaamba kuti Leza tasyomezyi cintu amana waluba. Jehova wakacisinizya eeci kwiinda mumusinsimi Isaya naakati: “Ijwi lyangu . . . Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.” (Is. 55:11) Aboobo, tatweelede kulibilika akaambo kakuti izyintu tazyeendi kufwambaana kweelana ambotuyanda. Jehova ‘ucibeleka ambuli sunu’ akaambo kakuti uyanda kuti azuzikizye makanze aakwe.—Joh. 5:17.
21. Ino lugwalo lwa Bahebulayo 4:12 inga lwabakulwaizya buti bamadaala abamacembele basyomeka bali “[mu]nkamu mpati”?
21 Bamadaala abamacembele bali “[mu]nkamu impati” bamubelekela Jehova kwamyaka minji. (Ciy. 7:9) Ibanji tiibakali kuyeeya kuti inga bacembaala mubukkale bwamazuba aano. Nokuba boobo, tiibatyompwa. (Int. 92:14) Balizyi kuti ijwi lya Leza ndyaakasyomezya ndyamasimpe—lili abuumi alimwi Jehova ubelekela kuti azuzikizye makanze aakwe. Akaambo kakuti makanze aa Leza alayandika kapati kulinguwe, tulakonzya kumukkomanisya kuti naa twazibikkila maano zyintu eezi nzyayakucita. Mubuzuba oobu bwaciloba, Jehova wali kulyookezya kazyi kuti makanze aakwe ayakuzuzikizyigwa, akuti bantu bakwe kabali nkamu bayoobeleka kweelana amakanze aakwe. Ino mbuti nywebo? Sena andinywe kumugama mwakanjila kale mukulyookezya kwa Leza?
[Bupanduluzi buyungizidwe]
^ munc. 8 Basololi banji akati kabama Juda bakali kuutobela kapati Mulawo wa Musa, pele Mesiya naakasika bakamukaka. Tiibakazumanana kutobela makanze aa Leza.
^ munc. 13 Amubone bbuku lya “Amuliyobole Muluyando lwa Leza,” mapeeji 207-209.
^ munc. 20 Aano mazuba, Leza ulaambaula andiswe kwiinda mu Jwi lyakwe lyalo lijisi nguzu zyakucinca maumi eesu. Aboobo, kuyungizya waawo imajwi aa Paulo aalembedwe ku Bahebulayo 4:12 alakonzya kubeleka mu Bbaibbele lyoonse.
Mutakaimpyi Kaambo
• Ino ncinzi ciyandika kutegwa tunjile mukulyookezya kwa Leza aano mazuba?
• Ino makanze aa Leza akulisungula kwesu kutambula lulayo lwamu Magwalo ziswaangene buti?
• Ino muumbazu nzi mocikonzya kukatazya kutobela lulayo lwamu Magwalo, pele nkaambo nzi ncotuyandika kutobela?
• Ino muunzila nzi zyobilo molukonzya kubelesyegwa lugwalo lwa Bahebulayo 4:12?
[Mibuzyo yaciiyo]
[Cifwanikiso icili apeeji 31]
Ibazyali balatyompwa
