Mibuzyo Yabasikubala

Sena cilakonzyeka kuzyiba businsimi buliko mu Magwalo aa Cihebrayo ibwaamba Mesiya?

Kwiiya Magwalo aa Cihebrayo cakusitikila kutugwasya kuzyiba businsimi bunji bwakazuzikizyigwa kujatikizya Jesu Kristo. Businsimi oobu bwakaambila limwi mumukwasyi Mesiya mwaakali kuyoozyalilwa, naakali kuzooba Mesiya, ncaakali kuzoocita, izyakali kuzoomucitikila alimwi Jehova Leza ncaakali kuyanda kuti acite. Businsimi boonse oobu antoomwe butugwasya kumuzyiba Jesu kali Mesiya. Nokuba boobo, kuyandika kucenjela naa tuyanda kuzyiba mweelwe wini-wini wabusinsimi bwaamba Mesiya bujanika mu Magwalo aa Cihebrayo.

Tabali boonse ibazumina azyintu zyaambwa kuti mbusinsimi bwaamba Mesiya. Mubbuku lyakwe lyakuti The Life and Times of Jesus the Messiah, ba Alfred Edersheim bakaamba kuti basololi bacikombelo caba Juda bakaindi cakasala zibalo zisika ku 456 kuzwa mu Magwalo aa Cihebrayo kuti zyaamba Mesiya, nokuba kuti bunji bwazibalo eezyo tazimwaambi Mesiya cigaminina. Kuzilanga-langa kabotu zibalo eezyi zili 456 cipa kudooneka kuti naa zimwi aakati kazibalo eezyi mbusinsimi bwaamba Jesu Kristo. Mucikozyanyo, ba Edersheim bakaamba kuti ba Juda bakalikwaamba kuti Matalikilo 8:11 yaamba Mesiya. Bakali kusyoma kuti “itu lyaolifa lyakaletwa anziba lyakazwa ku Mulundu wa Mesiya.” Mulembi wabbuku eeli alimwi wakaamba lugwalo lwa Kulonga 12:42. Naakali kupandulula ba Juda mbobakali kulumvwa lugwalo oolu munzila iitaluzi, wakalemba kuti: “Mbubwenya Musa mbwaakazwa munkanda, awalo Mesiya uyoozwa mu Roma.” Basikwiiya banji alimwi abamwi bajana kuti cilakatazya kweendelanya magwalo aaya obilo abupanduluzi bulubide kuli Jesu Kristo.

Nokuba kuti twabikkila buyo maano kubusinsimi bwakazuzikizyigwa kujatikizya Jesu Kristo, kuli buyumu-yumu kuzumina mweelwe wini-wini wabusinsimi. Mucikozyanyo, Isaya caandano 53, ijisi makani manji abusinsimi aamba Mesiya. Isaya 53:2-7 yakasinsima kuti: “Katajisi ciwa cibotu . . . Wakasampaulwa akukakigwa kubantu . . . Wakalemenwa maciswe esu . . . Pele wakayaswa nkaambo kamilandu yesu . . . Wakeenzegwa mbuli kabelele kaya kukujayigwa.” Sena cibalo coonse eeci mu Isaya caandano 53 ceelede kubonwa kuti mbusinsimi bomwe bwaamba Mesiya, naa sena cibeela acimwi caamba Mesiya ceelede kubonwa kuti mbusinsimi?

Alimwi atulange-lange lugwalo lwa Isaya 11:1, lwaamba kuti: “Mulasyuuka mutabi mucifumpu ca-Jese, nkabela kasamu kazwa mumiyanda yakwe kalazyala micelo.” Businsimi oobu bulajanika alimwi mukapango 10 kabujisi mabala aakozyenye. Sena tupango ootu tobilo tweelede kutubona kuti mbusinsimi bobilo bwaandeene naa kuti mbusinsimi bomwe bwalembwa ziindi zyobilo? Kulanga-langa lugwalo lwa Isaya caandano 53 alimwi a Isaya caandano 11 kulakonzya kuujatikizya mweelwe oonse wabusinsimi bwaamba Mesiya.

Aboobo, tatweelede kuyanda kuzyiba mweelwe wini wabusinsimi bwaamba Mesiya buli mu Magwalo aa Cihebrayo. Mbunga ya Jehova yamwaya milongo yabusinsimi yaamba Jesu alimwi ambobwakazuzikizyigwa. * Milongo eeyi ilakonzya kutugwasya akutukulwaizya notucita ciiyo cesu tobeni, kukomba mumukwasyi alimwi amumulimo wamumuunda. Businsimi bunji bwaamba Mesiya kufwumbwa naa buli bongaye butupa bumboni bwakuti Jesu ngu Kristo naa Mesiya.

[Bupanduluzi buyungizidwe]