Mibuzyo Yabasikubala

Ino myeelwe iili mulipooti yamwaka wamulimo yeelede kubonwa buti?

Amwaka, tulangila lipooti yamulimo iimwaigwa mu Yearbook. Cilakkomanisya kubona milimo ya Bwami yakukambauka akuyiisya njibacita bantu ba Jehova nyika yoonse. Kutegwa tugwasyigwe azyintu nzyotubala mulipooti tweelede kwiimvwisya kabotu alimwi akwiibona munzila yeelede myeelwe iilembedwe mumo. Atulange-lange zikozyanyo zisyoonto.

Mwaka wamulimo. Ulatalika mu September wamwaka uno kusikila mu August wamwaka uutobela. Yearbook itondezya mulimo wakacitwa mwaka wainda. Aboobo, mu Yearbook ya 2011 tujana lipooti yamwaka wamulimo wa 2010, wakatalika mu September 1, 2009, kusika mu August 31, 2010.

Mweelwe waatala wabasikumwaya a mweelwe waakati-kati wabasikumwaya. “Basikumwaya” babikkilizya Bakamboni ba Jehova babbapatizyidwe alimwi abatabbapatizyidwe beelela kukambauka makani aa Bwami. “Mweelwe waatala wabasikumwaya” ngomweelwe wiinda mulipooti yamwezi omwe mumwaka wamulimo alimwi ulakonzya kubikilizya malipooti aakamuka mulipooti yamwezi wainda. Kuti cacitika boobu, bamwi basikumwaya balakonzya kubalwa ziindi zyobilo. Nokuba boobo, mweelwe ooyu waatala taubikkilizyi mweelwe wabasikumwaya batola lubazu mumulimo wamumuunda, pele ibaluba kupa lipooti. Eeci cilayandika kapati kuti basikumwaya boonse kabapa malipooti kufwaambana amwezi. “Mweelwe waakati-kati wabasikumwaya” ngomweelwe wabasikumwaya bapa lipooti yamulimo wamumuunda mwezi uuliwoonse.

Mweelwe wamawoola. Kweelana a Yearbook yamu 2011, Bakamboni ba Jehova bakabeleka mawoola ainda ku 1.6 bbiliyoni mumulimo wamumuunda. Nokuba boobo, ooyu mweelwe taubikkilizyi mawoola oonse ngotubelesya mubukombi bwesu, nkaambo taubikkilizyi mawoola aabelesyegwa munyendo zyabweembezi, kuswaangana, ciiyo cesu tobeni ca Bbaibbele alimwi akuzinzibala kuyeeya.

Mali aabelesyegwa. Mumwaka wamulimo wa 2010, Bakamboni ba Jehova bakabelesya mali aasika ku $155 miliyoni kulanganya bapainiya baalubazu, bamisyinali alimwi abalangizi beendeenda mumilimo njobapedwe. Nokuba boobo, ooyu mweelwe taubikkilizyi mweelwe wamali aabelesyegwa kusimba mabbuku aamba zya Bbaibbele; naa mali aabelesyegwa kulanganya bakwesu abacizyi bakalyaaba kubelekela ku Bbeteli bainda ku 20,000 munyika yoonse.

Ibatola lubazu kulya zitondezyo lya ciibalusyo. Ooyu mweelwe wabantu babbapatizyidwe ibatola lubazu mukulya zitondezyo lya Ciibalusyo nyika yoonse. Sena ooyu mweelwe utondezya bananike boonse bali munyika? Peepe. Twaambo ntunji tukonzya kupa kuti bamwi cakutazyiba kabayeeya kuti balaabwiite bwakujulu. Eeci cilakonzya kubikkilizya nzyobakali kusyoma mucikombelo mobakazwa naa kunyongana mumizeezo. Aboobo, tatukonzyi kuuzyiba mweelwe wini wabananike bali anyika; alimwi tatweelede akuuzyiba. Kabunga Keendelezya takajisi mulongo wabaabo boonse balya zitondezyo lya ciibalusyo. *

Ncotuzyi ncakuti bamwi bananike “bazike ba Leza wesu” banakuliko anyika aakucitika mapenzi mapati. (Ciy. 7:1-3) Kusikila ciindi eeco, bananike banakusololela mumulimo wakukambauka akuyiisya walikucitwa kuzwa kaindi—uutondezyedwe kabotu mulipooti yesu yamwaka wamulimo.

[Bupanduluzi buyungizidwe]