Amubalike Cakuliyumya

“Atubalike cakuliyumya mukusiyana nkotubikkilidwe kumbele.”—HEB. 12:1.

1, 2. Ino Paulo wakabukozyanisya kunzi buumi bwa Munakristo?

MWAKA amwaka, mizundano yakubalika ilacitwa mumasena manji aindene-indene. Aabo balaampuwo yakubalika balanjila mumuzundano kabajisi mbaakani yomwe—kuzunda. Pele ibamwi batola lubazu tabajisi makanze aakuzundana. Kulimbabo ciyandika kapati nkusika kumamanino aamuzundano.

² Mu Bbaibbele, buumi bwa Munakristo bukozyanisyigwa kumuzundano. Mwaapostolo Paulo wakakaamba kaambo aaka ku Banakristonyina bakaindi ku Korinto mulugwalo lwakwe lwakusaanguna ndwaakabalembela. Wakalemba kuti: “Sena tamuzyi kuti babalika mukusiyana boonse balabalika, pele ngumwi buyo uutambula bulumbu? Amubalike munzila iinga yamupa kuyoojana bulumbu.”—1 Ko. 9:24.

3. Nkaambo nzi Paulo ncaakaambila kuti sikubalika omwe buyo nguuzunda?

³ Sena Paulo wakali kwaamba kuti omwe buyo Munakristo nguwakali kukonzya kutambula bulumbu mpoonya ibacaala boonse bakali kulipenzya buyo? Peepe! Basikubalika mumizundano bakaiya alimwi bakali kulitakata kabajisi makanze aakuzunda. Paulo wakali kuyanda kuti Banakristonyina kabalitakata kutegwa bakajane buumi butamani. Kucita boobo kuyoobapa kutambula bulumbu bwa buumi. Masimpe mumuzundano wa Bunakristo, boonse ibabalika kusika kumamanino batambula bulumbu oobo.

4. Ino ncinzi ncotweelede kuyeeya kujatikizya muzundano ngotujisi?

⁴ Majwi aayo alakulwaizya, pele ayandika kubikkilwa maano abaabo banjila mumuzundano wabuumi mazuba aano. Nkaambo nzi? Nkaambo kakuti kufwumbwa naa bulumbu mbwabuumi bwakujulu naa mbwamu Paradaiso anyika, tabukonzyi kukozyanisyigwa acintu cili coonse. Ooyu musinzo mulamfwu, ulakatazya alimwi kuli mapenzi munzila. (Mt. 7:13, 14) Mukubula coolwe bamwi batolwaala naa bacileka. Ino mapenzi nzi aajanika mumuzundano wabuumi? Ino mbuti mbomukonzya kulikwabilila mumapenzi aaya? Ino ncinzi ncotukonzya kucita kutegwa tusike kumamanino akuzunda mumuzundano ooyu?

Kuliyumya Kulayandika Kutegwa Tuzunde

5. Kweelana acilembedwe mulugwalo lwa Bahebulayo 12:1, ino Paulo wakaamba nzi kujatikizya muzundano?

⁵ Mulugwalo ndwaakalembela Banakristo ba Hebrayo mu Jerusalemu a Judaya, Paulo alimwi wakaamba zyintu zicitika muzisobano naa mumizundano yakubalika. (Amubale Bahebulayo 12:1.) Wakaamba kaambo ncociyandika kunjila mumuzundano alimwi umwi nceelede kucita kutegwa azunde. Katutanalanga-langa lulayo lwa Paulo lwakasololelwa amuuya ndwaakalembela Banakristo ba Hebrayo, atubone cakakulwaizya Paulo kulemba lugwalo alimwi ancaakali kukulwaizya basikubala bakwe kuti bacite akubona ncotukonzya kwiiya.

6. Ino mbuti Banakristo mbobakali kupenzyegwa abasololi bazikombelo?

⁶ Banakristo bamumwaanda wakusaanguna ikapati aabo bakali kukkala ku Jerusalemu aku Judaya, bakali mumasunko manji alimwi bakali kupenzyegwa. Bakali kupenzyegwa kapati abasololi bazikombelo iba Juda bakali kuyanda kuti bantu kababamvwida. Kabatanacita eeci basololi aaba bakamubejelezya Jesu Kristo kuti wakali kukazya mfwulumende alimwi wakajaigwa mbuli cigwebenga. Alimwi bakalikanzide  kuzumanana. Mubbuku lya Milimo tulabala mbobakali kukongwa akupezyegwa Banakristo, eezyi zyakatalika mbwaakaindila buyo maleele aakacitika mu Pentekoste 33 C.E. Eezyi zyakapa kuti aaba bakali kusyomeka kabapenga kapati.—Mil. 4:1-3; 5:17, 18; 6:8-12; 7:59; 8:1, 3.

7. Ino mbukkale nzi bukatazya mbobakajisi Banakristo mbaakalembela Paulo?

⁷ Aaba Banakristo alimwi bakali kupona kabuyanda kumana kale bweende bwazyintu bwaba Juda. Jesu wakabaambila kujatikizya lunyonyooko lwakali kulangilwa kumusyobo waba Juda batasyomeki. Alimwi wakalibaambilide basikumutobela kujatikizya zyintu zyakali kuyoocitika mamanino kaatanasika, akubapa malailile aagaminide ngobakeelede kutobela kutegwa bafwutuke. (Amubale Luka 21:20-22.) Aboobo, ino bakeelede kucita nzi? Jesu wakabacenjezya kuti: “Pele amulilingule nobeni kutegwa myoyo yanu itabi niilengaana akaambo kabulyato, budakwi akulibilika azyintu zyamubuumi, eelyo buzuba oobo bukaile kumusikila kamutalibambilide.”—Lk. 21:34.

8. Ino ncinzi cakapa kuti Banakristo bamwi batyompwe?

⁸ Ciindi Paulo naakalemba lugwalo kuba Hebrayo, kwakaindide myaka iitandila ku 30 kuzwa Jesu naakapede kucenjezya ooko. Ino Banakristo bakajatikizyigwa buti nokwakainda ciindi? Bamwi bakazundwa amapenzi alimwi azyintu zyamubuumi, bakaalilwa kucita zyintu zyakumuuya izyakali kuyoobapa kuti bayume. (Heb. 5:11-14) Ibamwi bakalimvwa kuti buumi nibwakabota kuti nibakacita zyakali kucita ba Juda banji ibakabazingulukide. Kayi ba Juda aaba taaku nibakalekela limwi kumusyoma Leza; bakacili kwiitobela Milawo yakwe imwi. Bamwi Banakristo bakoongelezyegwa abamwi mumbungano aabo bakali kutobela Mulawo wa Musa azilengwa zyaba Juda. Ino ncinzi Paulo ncaakali kukonzya kwaamba kutegwa agwasye banyina Banakristo kuti bazumanane kupakamana kumuuya alimwi akuliyumya mumuzundano?

9, 10. (a) Ino nkukulwaizya nzi nkwaakalemba Paulo nkotubala kumamanino aalugwalo lwa Bahebulayo caandano 10? (b) Nkaambo nzi Paulo ncaakalembela zyintu nzyobakali kucita bakamboni basyomeka bansiku?

⁹ Kwiinda mukusololelwa amuuya, cilakkomanisya kubona Paulo mbwaakayumya-yumya Banakristo ba Hebrayo. Mucaandano 10 mulugwalo lwakwe, Paulo wakatondezya kuti Mulawo wakali “ncimvwule buyo cazyintu zibotu ziboola” alimwi wakatondezya mpindu yacipaizyo cacinunuzyo ca Kristo. Kumamanino kwacaandaano eeco, Paulo wakakulwaizya basikubala kuti: “Muyandika kuliyumya, ikutegwa mwamanizya kucita kuyanda kwa Leza, mukatambule zyintu eezyo izyakasyomezyegwa. Nkaambo kusyeede buyo ‘kaindi kaniini,’ eelyo ‘ooyo uuboola ulasika alimwi takoomuka pe.’”—Heb. 10:1, 36, 37.

¹⁰ Mucaandaano 11 cabbuku lya Bahebulayo, Paulo wakapandulula kabotu ncicakali kwaamba kuba alusyomo lwini-lwini muli Leza. Mpoonya wakapa zikozyanyo zyakaindi zya baalumi abamakaintu bakajisi lusyomo. Sena kucita boobo kwakali kuleya kaambo? Peepe. Mwaapostolo wakalizyi kuti bakombinyina bakeelede kuzyiba kuti lusyomo caamba kuba sicamba alimwi akuliyumya. Cikozyanyo cibotu ncobakatondezya babelesi basyomeka ba Jehova bakaindi cakali kukonzya kuyumya ba Hebrayo kutegwa bacikonzye kulwana mapenzi alimwi abuyumuyumu mbobakali kujana. Naakamana kwaamba lusyomo lwabaabo bakali kusyomeka kaindi, Paulo wakaamba kuti: “Akaambo kakuti tuzingulukidwe ankamu mpati boobu yabakamboni, aswebo atuzisowe zyoonse zitulemena alimwi acibi eeco cifwambaana kutuzambaila, alimwi atubalike cakuliyumya mukusiyana nkotubikkilidwe kumbele.”—Heb. 12:1.

‘Nkamu ya Bakamboni’

11. Ino kuyeeya ‘nkamu mpati yabakamboni’ inga kwatugwasya buti?

¹¹ ‘Nkamu mpati yabakamboni’ tiiyakali buyo nkamu yabantu beebelela muntu naa nkamu njobayanda kuti izunde. Muciindi  caboobo, bakali kutola lubazu mumuzundano uuli mbuli wakubalika. Alimwi bakazwidilila mumuzundano ooyu kusika kumamanino. Nokuba kuti lino balifwide, balakonzya kwaambwa kuti bakali basikubalika bacibwene ibakali kukonzya kukulwaizya baabo ibatalika ino-ino kubalika mumuzundano. Kamuyeeya buyo mbobakali kukonzya kumvwa kuti aakati kabaabo beebelela kwakali basikubalika bacibwene. Eeci cilakonzya kupa kuti babalike kapati kusika kumamanino. Bakamboni aaba bakaindi bakatondezya kuti muzundano ooyu wamaambilambali nokuba kuti ulakatazya, bakali kukonzya kuzwidilila. Aboobo, akaambo kakuziyeeya zyintu nzyobakali kucita ‘bankamu yabakamboni,’ Banakristo ba Hebrayo bamumwaanda wamyaka wakusaanguna bakaliyumya alimwi ‘bakabalika cakuliyumya mukusiyana’ alimwi andiswe tulakonzya kucita mbubwenya oobo mazuba aano.

12. Ino zitondezyo nzyaakaamba Paulo zitugwasya buti?

¹² Ibanji Paulo mbakaamba ibasyomeka bakali mubukkale bukozyenye abukkale bwesu. Mucikozyanyo, Nowa wakali kupona kalitanacitika Zambangulwe. Tupona kuciindi camamanino aabweende bwazyintu oobu. Abrahamu a Sara bakaambilwa kuti basiye munzi wabo kutegwa bakabeleke mulimo wa Leza akulindila cisyomezyo ca Jehova kuti cizuzikizyigwe. Tuyandika kulyaaba akuzuminwa a Jehova akutambula zilongezyo nzyatusyomezya. Musa wakeenda munkanda iiyoosya kaya ku Nyika Yakasyomezyegwa. Tuli mubweende bwazyintu oobu buyanda kunyonyoonwa kale bwalo butusololela kunyika mpya yakasyomezyegwa. Zyakabacitikila baalumi aaba, kuzwidilila alimwi akwaalilwa kwabo, kuliyumya akulezya kwabo, zyoonse eezyi tuyandika kuzyibikkila maano.—Lom. 15:4; 1 Ko. 10:11.

Bakazwidilila—Munzila nzi?

13. Ino mbuyumuyumu nzi Nowa mbwaakajisi, alimwi ncinzi cakamugwasya kuti abumane?

¹³ Ino ncinzi cakagwasya babelesi ba Jehova kuliyumya akuzwidilila mumuzundano wakubalika? Amubone Paulo ncaakaamba kujatikizya Nowa. (Amubale Bahebulayo 11:7.) Nowa ‘tanaakaningalibona’ ‘zambangulwe lyamaanzi lyakali kuya kunyonyoona zyintu zyoonse zyanyama.’ (Matl. 6:17) Cakali cintu catakaningacitikide alimwi cikankamanisya. Nokuba boobo, Nowa tanaakadooneka kuti zambangulwe inga lyacitika. Nkaambo nzi? Akaambo kakuti wakali alusyomo lwakuti kufwumbwa Jehova nzyaasyomezya uyakuzicita. Nowa tanaakalimvwa kuti ncaakaambilwa kucita cakali kukatazya kapati. Muciindi caboobo, ‘wakacita mbubonya mbwaakalaililwa.’ (Matl. 6:22) Kubona zyintu nzyaakeelede kucita Nowa mbuli kuyaka bwato, kukobolola banyama, kubikka mubwato cakulya cabantu a cabanyama, kukambauka mulumbe wakucenjezya bantu akugwasya mukwasyi wakwe kuti kabali bayumu kumuuya, wakali mulimo mupati. Nokuba boobo, lusyomo lwa Nowa akuliyumya kwakwe kwakapa kuti abe abuumi alimwi akulongezyegwa walo amukwasyi wakwe.

14. Ino muubuyumuyumu nzi ba Abrahamu a Sara mobakaliyumya alimwi eeci cituyiisya nzi?

¹⁴ Abrahamu a Sara mbobakatobela amulongo wa Paulo ‘wankamu yabakamboni iituzingulukide.’ Buumi bwabo bwakacinca nibakalongela ku Uri alimwi tiibakalizyi cakali kuyoobacitikila kumbele. Bakaba cikozyanyo cibotu mukutondezya lusyomo akumvwida ciindi camapenzi. Kujatikizya kulyaaba kwa Abrahamu kubukombi bwakasimpe, cakweelela wakaitwa kuti “usyi wabaabo boonse bajisi lusyomo.” (Lom. 4:11) Paulo wakaamba buyo twaambo tupati-pati nkaambo basikubala bakalaazyi kale makani aajatikizya buumi bwa Abrahamu. Nokuba boobo, ciiyo ncaakaiya Paulo cakali cipati: “Boonse aaba [kubikilizya Abrahamu a mukwasyi wakwe] bakafwa kabajisi lusyomo, nokuba kuti tiibakabona kuzuzikizyigwa kwazisyomezyo eezyo, pele bakazibona kulaale akuzitambula alimwi akwaambilizya caantangalala kuti bakali beenzu alimwi bamuzwakule batakkalilili  munyika iilya.” (Heb. 11:13) Cakutadooneka, lusyomo lwabo muli Leza alimwi acilongwe ncobakajisi anguwe cakabagwasya kubalika mumuzundano cakuliyumya.

15. Ino ncinzi cakakulwaizya Musa kupona kweelana ambwaakasala?

¹⁵ Musa ncikozyanyo acimbi cibotu cababelesi ba Jehova akati ka ‘nkamu yabakamboni.’ Musa wakasiya buumi busumpukide alimwi bubotu ‘akusala kupenzyegwa antoomwe abantu ba Leza.’ Ino ncinzi cakamukulwaizya kucita boobo? Paulo wiingula kuti: “Wakagamikide meso aakwe kubulangizi bwakupegwa bulumbu. . . . Wakazumanana kuzyandamana mbuli kuti wakali mubwene Ooyo uutalibonyi.” (Amubale Bahebulayo 11:24-27.) Musa tanaakanyonganizyigwa “[a]kulikkomanisya acibi muzyakulikondelezya zyakaindi kaniini buyo.” Musa tanaakali kumudooneka Leza azisyomezyo zyakwe cakuti wakatondezya busicamba akuliyumya. Wakazumanana kulyaaba kusololela bana Israyeli kuzwa mu Egepita kuya ku Nyika Yakasyomezyedwe.

16. Ino nkaambo nzi Musa ncaatakatyompwa naakakasyigwa kunjila mu Nyika Yakasyomezyegwa?

¹⁶ Mbubwenya mbuli Abrahamu, Musa tanaakazibona zisyomezyo zya Leza kazizuzikizyigwa naakali kupona. Bana Israyeli kabali afwaafwi kunjila mu Nyika Yakasyomezyegwa, Musa wakaambilwa kuti: “Ulabona nyika ameso aako kule, pele kusika tokooyoosika oko kunyika njendapa bana ba Israyeli.” Eeci cakali boobo, akaambo kakuti walo a Aroni bakanyema akaambo kakuzanga kwa bantu, ‘bakapapila [Leza] akati kabana ba Israyeli kumaanzi aa Meriba-Kadesi.’ (Dt. 32:51, 52) Sena Musa wakatyompwa naa wakacimwa? Peepe. Wakabalongezya bantu alimwi wakamanizya amajwi aakuti: “Muli acoolwe noba Israyeli. Taakwe bantu bali mbuli ndinywe, bavwunwa kuli Jehova. Nintobo iimugwasya, ndipanga lyakuzundya.”—Dt. 33:29.

 Ncotwiiya

17, 18. (a) Kujatikizya muzundano wakubuumi, ino ncinzi ncotukonzya kwiiya ku ‘nkamu yabakamboni’? (b) Ino ncinzi ncotuyoobandika mucibalo citobela?

¹⁷ Kulanga-langa buumi bwabaabo bali ‘munkamu yabakamboni iituzingulukide’ citondezya kuti, kutegwa tubalike mumuzundano kusikila kumamanino tweelede kuba alusyomo muli Leza azisyomezyo zyakwe. (Heb. 11:6) Tweelede kutondezya lusyomo oolu kweelana ambotupona lino. Kwiindana abaabo batajisi lusyomo, babelesi ba Jehova balizizyi zili kumbele. Tulakonzya kumubona “Ooyo uutalibonyi” akubalika mumuzundano cakuliyumya.—2 Ko. 5:7.

¹⁸ Muzundano ngobajisi Banakristo ulakatazya. Nokuba boobo, cilakonzyeka kuzwidilila mumuzundano wakubalika. Mucibalo citobela tuyoolanga-langa azimbi zikonzya kutugwasya.

Sena Inga Mwapandulula?

• Nkaambo nzi Paulo ncaakalembela makani aajatikizya bakamboni basyomeka bakaindi?

• Ino kuyeeya ‘nkamu yabakamboni ituzingulukide’ inga kwatukulwaizya buti kubalika cakuliyumya?

• Ino mwaiya nzi kweelana ambutwabandika kujatikizya bakamboni basyomeka mbuli Nowa, Abrahamu, Sara alimwi a Musa?

[Mibuzyo yaciiyo]

[Cifwanikiso icili apeeji 19]

Ba Abrahamu a Sara bakalilyaabide kusiya zyintu zibotu zyamu Uri