‘Amubaumbulizye Boonse Balila’
‘Amubaumbulizye Boonse Balila’
‘Jehova wandinanika kuti . . . nduumbulizye boonse balila.’—IS. 61:1, 2.
1. Ino ncinzi Jesu ncaakabacitila balila, alimwi nkaambo nzi?
JESU KRISTO wakaamba kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:34) Jesu naakali kubeleka mulimo wa Leza, wakali kutondezya bubotu bwabube bwa Bausyi. Akati kabube oobu nduyando Jehova ndwajisi kubantu. (1 Jo. 4:7-10) Mwaapostolo Paulo wakalubona luyando oolu ciindi naakaamba Jehova kuti ngu “Leza siluumbulizyo loonse.” (2 Ko. 1:3) Jesu wakatondezya luyando oolu ciindi naakazuzikizya businsimi bwa Isaya. (Amubale Isaya 61:1, 2.) Jesu wakabala businsimi oobu mucikombelo ku Nazareta mpoonya wakaamba kuti ngonguwe wakazuzikizya businsimi oobu. (Lk. 4:16-21) Ciindi Jesu naakali kubeleka mulimo wakwe wakukambauka, caluyando wakabaumbulizya balila akubakulwaizya, calo cakapa kuti babe aluumuno lwamumizeezo.
2, 3. Nkaambo nzi basikumutobela Kristo ncobeelede kumwiiya caboola kumakani aakuumbulizya bamwi?
2 Boonse basikumutobela Jesu beelede kumwiiya kwiinda mukubaumbulizya boonse balila. (1 Ko. 11:1) Paulo wakaamba kuti: “Amuzumanane kukulwaizyanya akuyakana umwi amweenzinyina.” (1 Te. 5:11) Cilayandika kapati kuumbulizya bamwi, akaambo kakuti bantu bapona “[mu]ziindi zikatazya ncobeni.” (2 Ti. 3:1) Bantu banji basyomeka nyika yoonse mboizulwa balapona abantu baamba akucita zyintu ziletela buumba, zicisya mutwe alimwi zipa kuusa.
3 Mbubwenya mbuli Bbaibbele mbolyakasinsima kujatikizya mazuba aano aamamanino aabweende bwazyintu obuno bubyaabi, bantu banji ‘balaliyanda, bayandisya mali, balalidunda, balalisumpula, balasampaula, tabamvwidi bazyali, tabalumbi, tabasyomeki, tabajisi luyando lwakuzyalwa andulo, tabanyoneki, balabejelezya, tabalilesyi, mbakali, tabayandi bubotu, mbasikwaaba bamwi, tabalaiki, balalitukumuna, bayandisya zyakulikondelezya kwiinda kuyandisya Leza.’ Bukkale buli boobu bwaindila kubija, nkaambo ‘bantu babyaabi abasilweeno babija akubijila limwi.’—2 Ti. 3:2-4, 13.
4. Ino ncinzi cacitika kubukkale munyika mazuba aano?
4 Zyintu zili boobu tazyeelede kutugambya pe, nkaambo Jwi lya Leza lilasalazya kwaamba kuti “nyika yoonse ili mumaanza aamubi.” (1 Jo. 5:19) “Nyika yoonse” ibikkilizya mbunga zyoonse zyatwaambo twacisi, bukombi alimwi amakwebo aanyika eeyi ikubikkilizya anzila zyoonse zibelesyegwa mukumwaya makani. Cakutadooneka, Saatani Diabolosi uleelela kwiitwa kuti “mweendelezi wanyika” alimwi “leza wabweende bwazyintu oobu.” (Joh. 14:30; 2 Ko. 4:4) Bukkale munyika yoonse mboizulwa buya bwiindila kubija nkaambo Saatani ulijisi bukali bupati mbwaanga ulizyi kuti ujisi buyo kaindi kaniini kuti Jehova amunyonyoone. (Ciy. 12:12) Eelo kaka cilaumbulizya kuzyiba kuti ino-ino Leza uyakunyonyoona Saatani abweende bwakwe bwazyintu bubyaabi alimwi kaambo nkaakatalisya kajatikizya bweendelezi bwa Jehova kayoomana!—Matl., caandaano 3; Jobu, caandaano 2.
Makani Mabotu ali Mukukambaukwa Nyika Yoonse
5. Mbuti businsimi bujatikizya mulimo wakukambauka mbobuli mukuzuzikizyigwa mumazuba aano aakumamanino?
5 Ecino nciindi cikatazya kapati mubuumi bwabantu, nzyaakasinsima Jesu zili mukuzuzikizyigwa. Wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.” (Mt. 24:14) Mulimo ooyu wakukambauka munyika yoonse kujatikizya Bwami bwa Leza wazumanana kuyaambele. Mazuba aano, Bakamboni ba Jehova bainda ku 7,500,000, ibajanika mumbungano ziinda ku 107,000 nyika yoonse mbwiizulwa balakambauka kujatikizya Bwami bwa Leza, mbubwenya Jesu mbwaakali kucita mumulimo wakwe wakukambuka akuyiisya. (Mt. 4:17) Akaambo kamulimo wesu wakukambauka, luumbulizyo lulapegwa kuli baabo balila. Mumyaka buyo yobilo yainda bantu basika ku 570,601 bakabbapatizyigwa akuba Bakamboni ba Jehova.
6. Ino ncinzi ncomukonzya kwaamba kujatikizya bupati bwamulimo wakukambuka?
6 Bupati bwamulimo ooyu wakukambauka bulakonzya kubonwa kwiinda mukuzyiba mweelwe wamabbuku aapandulula Bbaibbele aasandululwa akumwaigwa mumyaambo iinda ku 500 a Bakamboni ba Jehova. Mulimo uuli boobu kunyina nookacitikide kale mubuumi bwabantu. Masimpe kubako kwambunga ya Jehova yaanyika, mulimo alimwi akukomena kwanjiyo kulagambya. Ikuti kakunyina kusololelwa alimwi akugwasyigwa amuuya uusalala wa Leza uulaanguzu, tacikonzyeki kuti mulimo uuli boobu inga wacitwa munyika ino yeendelezyegwa a Saatani. Akaambo kakuti makani mabotu alakambaukwa munyika yoonse, luumbulizyo kuzwa mu Magwalo lulapegwa kutali buyo kubakombima pele akubantu boonse balila batambula mulumbe wa Bwami.
Kuumbulizya Bakombima
7. (a) Nkaambo nzi ncotuteelede kulangila Jehova kuti agusye zyintu zyoonse zitupa kuusa lino? (b) Ino tuzyiba buti kuti cilakonzyeka kuliyumya ciindi notuli mukupenzyegwa?
7 Cakutadooneka munyika ino iizwide bubi akupenga, tuyoojana mapenzi aatupa kuusa. Tatukonzyi kulangila kuti Leza agusye zyintu zyoonse zitupa kutakkomana naa buumba katananyonyoona bweende bwazyintu obuno. Kwaciindi cino, notucilangila buzuba oobo, mapenzi aakasinsimwa ngotujana ayootondezya kuti naa tulasyomeka kuli Jehova abweendelezi bwakwe naa pe. (2 Ti. 3:12) Nokuba boobo, akaambo kakugwasyigwa akuumbulizyigwa a Tateesu wakujulu, tulakonzya kuba mbuli Banakristo bananike baku Tesalonika balo bakapenzyegwa, pele bakaliyumya akuzumanana kuba alusyomo.—Amubale 2 Batesalonika 1:3-5.
8. Ino mbumboni nzi bwamu Magwalo butondezya kuti Jehova ulabaumbulizya babelesi bakwe?
8 Tatweelede kudooneka kuti Jehova ulabapa luumbulizyo babelesi bakwe. Mucikozyanyo, ciindi buumi bwamusinsimi wakwe Elija nibwakali muntenda akaambo ka Mwami Mwanakazi Jezebele iwakali kuyanda kumujaya, musinsimi wakayoowa akutija, akwaamba kuti wakali kuyanda kufwa. Muciindi cakumunyemena Elija, Jehova wakamuumbulizya akumupa busicamba kutegwa azumanane amulimo wakwe wabusinsimi. (1 Bam. 19:1-21) Kaambo kamwi katondezya kuti Jehova ulabaumbulizya babelesi bakwe kalalibonya kwiinda mumbungano ya Banakristo yamumwaanda wakusaanguna. Mucikozyanyo, tulabala kujatikizya ciindi ‘mbungano mu Judaya, mu Galilaya amu Samaliya moonse nozyakaba muluumuno alimwi zyakali kuyumizyigwa.’ Kuyungizya waawo, “akaambo kakuti [z]yakali kweenda cakuyoowa Jehova amuluumbulizyo lwamuuya uusalala, [z]yakazumanana kuyungizyigwa.” (Mil. 9:31) Eelo kaka tulikkomene kuti andiswe tulijisi “luumbulizyo lwamuuya uusalala”!
9. Nkaambo nzi kwiiya zyintu zijatikizya Jesu ncokukonzya kutuumbulizya?
9 Mbotuli Banakristo, tulaumbulizyigwa kwiinda mukwiiya zyintu zijatikizya Jesu Kristo alimwi akweenda mumikondo yakwe. Jesu wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, akwiiya kulindime, nkaambo ndimubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Mt. 11:28-30) Kwiiya nzila mbotu iiyaka ijatikizya Jesu mbwaakali kubalanganya bantu alimwi akutobela cikozyanyo cakwe cibotu cilagwasya kapati kumanizya penzi lyakulibilika mumizeezo.
10, 11. Ino mbaani bakonzya kupa luumbulizyo mumbungano?
10 Alimwi tulakonzya kuumbulizyigwa a Banakristoma. Mucikozyanyo, amubone baalu mumbungano mbobagwasya baabo bali mubukkale bupa kuusa kapati. Sikwiiya Jakobo wakalemba kuti: “Sena kuli uuciswa akati kanu? Aite baalu bambungano, eelyo abamupailile akumunanika mafwuta muzyina lya Jehova.” Mpoonya ncinzi ciyoocitika? “Mupailo walusyomo ulamuponya ooyo uucisidwe, alimwi Jehova ulamubusya. Kunze lyaboobo, ikuti naa wakacita zibi, ulalekelelwa.” (Jak. 5:14, 15) Bantu bamwi bamumbungano abalo balakonzya kupa luumbulizyo.
11 Bamakaintu tacibakatazyi kwaambila bamakaintunyina kujatikizya mapenzi aasiyene-siyene. Kwaambisya bamacembele balakonzya kupa lulayo kubacizyi bacili bana-bana. Aaba bamakaintu Banakristo basimide, ambweni zyintu zikozyenye zyakabacitikila kale mubuumi. Luzyalo lwabo alimwi akubikkila maano kulakonzya kubagwasya kapati. (Amubale Tito 2:3-5.) Masimpe ngakuti, baalu alimwi abamwi balakonzya alimwi baleelede ‘kubaumbulizya aabo ibatyompedwe mumoyo’ akati kesu. (1 Te. 5:14, 15) Alimwi cilagwasya kuyeeya kuti Leza ‘ulatuumbulizya mumapenzi eesu oonse, ikutegwa tukonzye kuumbulizya bamwi ibali mumapenzi aali oonse.’—2 Ko. 1:4.
12. Nkaambo nzi ncociyandika kuti katujanika kumiswaangano ya Bunakristo?
12 Nzila imwi iiyandika kapati iikonzya kutuletela luumbulizyo nkujanika kumiswaangano ya Bunakristo kwalo nkotukonzya kukulwaizyigwa amibandi yamu Bbaibbele. Tubala kuti Judasi alimwi a Sila “bakaamba makani manji aakukulwaizya bakwesu akubayumya.” (Mil. 15:32) Miswaangano kaitanatalika alimwi anoyamana, kulaba mibandi iiyaka akati kabasimbungano. Nokuba kuti tulapenga akaambo kabukkale buletela kuusa, tatweelede kulyaandaanya pe, akaambo kakuti kucita boobo kulakonzya kupa kuti zyintu ziindile kubija. (Tus. 18:1) Muciindi caboobo, tuyoogwasyigwa ikuti twatobela lulayo ndwaakapa mwaapostolo Paulo lwakuti: “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katuyumizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.”—Heb. 10:24, 25.
Amujane Luumbulizyo mu Jwi lya Leza
13, 14. Amupandulule Magwalo mbwaakonzya kutuumbulizya.
13 Kufwumbwa naa tuli Banakristo babbapatizyidwe naa twakatalika ino-ino kwiiya zyintu zijatikizya Leza alimwi amakanze aakwe, tulakonzya kujana luumbulizyo lwini-lwini mu Jwi lya Leza. Paulo wakalemba kuti: “Zyintu zyoonse zyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.” (Lom. 15:4) Magwalo Aasalala alakonzya kutuumbulizya akutugwasya kuti ‘tweelele ncobeni, katulibambilide cakumaninina kubeleka mulimo mubotu uuli woonse.’ (2 Ti. 3:16, 17) Kuzyiba kasimpe kujatikizya makanze aa Leza alimwi akuba alusyomo lwini-lwini kujatikizya bulangizi bwakumbele kuyootuumbulizya kapati. Aboobo, atulibelesye kabotu Jwi lya Leza alimwi amabbuku aapandulula Bbaibbele aakonzya kutuumbulizya akutugwasya munzila zisiyene-siyene.
14 Jesu wakatusiila cikozyanyo cibotu kapati kwiinda mukubelesya Magwalo naakali kuyiisya alimwi akuumbulizya bamwi. Mucikozyanyo ciindi cimwi kuzwa naakabusyigwa Jesu ‘wakabapandulwida Magwalo’ basikwiiya bakwe bobilo. Naakali kubandika ambabo bakaumbulizyigwa. (Lk. 24:32) Mwaapostolo Paulo wakaciiya cikozyanyo ca Jesu kwiinda ‘mukusalazya Magwalo.’ Baswiilizi baku Beleya “bakaliyandide kapati mumyoyo kutambula jwi, kabavwuntauzya cakulomya mu Magwalo abuzuba.” (Mil. 17:2, 10, 11) Eelo kaka cilayandika kapati kuti katubala Bbaibbele abuzuba alimwi amabbuku aa Bunakristo aakabambilwa kutuumbulizya akutupa bulangizi muziindi zino zikatazya!
Azimwi Nzila Mbotukonzya Kuumbulizya Bamwi
15, 16. Ino nzyintu nzi nzyotukonzya kucita kutegwa tubagwasye akubaumbulizya Banakristoma?
15 Tulakonzya kubagwasya alimwi akubaumbulizya Banakristoma munzila zisiyene-siyene. Mucikozyanyo, balakonzya kututuma kubaulila zyintu bantu bacembeede naa basyomima bacisidwe. Bamwi tulakonzya kubabikkila maano kwiinda mukubagwasya milimo yaaŋanda. (Flp. 2:4) Ambweni tulakonzya kubalumbaizya bakombima akaambo kabube bwabo bubotu mbuli luyando, bunkutwe, busicamba alusyomo.
16 Kutegwa tubaumbulizye bacembeede, tulakonzya kubaswaya akuswiililisya nibatwaambila kujatikizya buumi bwabo azilongezyo nzyobajana mumulimo wabo wakubelekela Jehova. Kucita boobo kulakonzya kutuyumya-yumya akutuumbulizya. Tulakonzya kubabalila Bbaibbele naa mabbuku aapandulula Bbaibbele ciindi nitubaswaya. Ambweni tulakonzya kwiiya ambabo cibalo ciyooyiigwa lya Ciiyo ca Ngazi Yamulindizi naa makani ayoobandikwa mu Ciiyo ca Bbaibbele Cambungano cansondo eeyo. Tulakonzya kweebelela DVD iitondezya makani aamu Bbaibbele ambabo. Alimwi tulakonzya kubabalila naa kubaambila zyakuluula zikulwaizya zizwa mumabbuku eesu.
17, 18. Mbotuli babelesi ba Jehova basyomeka, nkaambo nzi ncotukonzya kuba alusyomo lwakuti uyakutugwasya akutuumbulizya?
17 Kuti naa twazyiba kuti mukwesu naa mucizyi uyandika luumbulizyo, tulakonzya kumubikkilizya mumipailo yesu tobeni. (Lom. 15:30; Kol. 4:12) Notuzumanana kuliyumya mumapenzi alimwi akuumbulizya bamwi tulakonzya kuba alusyomo lwakajisi sintembauzyo walo wakaimba kuti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.” (Int. 55:22) Masimpe, lyoonse Jehova unootuumbulizya akutugwasya mbotuli babelesi bakwe basyomeka.
18 Leza wakaambila bakombi bakwe bansiku kuti: “Ndime, ndime uumuumbulizya.” (Is. 51:12) Jehova uyoocita mbubwenya akulindiswe akulongezya milimo yesu mibotu amajwi ngotwaamba notuumbulizya baabo balila. Kufwumbwa naa bulangizi bwesu mbwakujulu naa anyika, umwi aumwi wesu ulakonzya kuumbulizyigwa amajwi aa Paulo ngaakalembela Banakristonyina bananikidwe amuuya kuti: “Mwami wesu Jesu Kilisito lwakwe a Leza Taateesu, ooyo wakatuyanda akutupa luumbulizyo lutamani abulangizi bubotu kwiinda muluzyalo lwakwe, abakkazyike myoyo yanu akumuyumya mumilimo mibotu iili yoonse alimwi amajwi.”—2 Te. 2:16, 17.
Sena Muciyeeyede?
• Ino mulimo wesu wakuumbulizya baabo balila mupati buti?
• Ino nzyintu nzi zimwi nzyotukonzya kucita kutegwa tuumbulizye bamwi?
• Ino mbumboni nzi buliko mu Magwalo butondezya kuti Jehova ulabaumbulizya bantu bakwe?
[Mibuzyo yaciiyo]
[Cifwanikiso apeeji 28]
Sena mulajana ciindi cakuumbulizya balila?
[Cifwanikiso apeeji 30]
Bana abapati balakonzya kukulwaizya bamwi
