Atukkomane Caantoomwe!

KUKONDWA alimwi akusekelela kulakatazya aano mazuba. Kubantu banji, kujana makani mabotu aakubandika cilibonya kuti inga tiicakonzyeka. Buumi bwamazuba aano, kwaambisya mumadolopo mapati, bwapa kuti bantu kabakkala balikke.

Bahaazibwene mu Lwiiyo Lujatikizya Mboibeleka Mizeezo ba Alberto Oliverio, bakaamba kuti: “Bantu banji balalendelelwa, aboobo tacidoonekwi kuti buumi mumadolopo mapati bupa bantu kukkala balikke. Akaambo kaceeci, ziindi zinji citupa kutabikkila maano kulibaabo mbotubeleka limwi, basimukoboma naa kulibaabo babeleka muzintoolo mumasena motukkala.” Kulizandula kuliboobu kanji-kanji kupa kutyompwa.

Pele bukkale alimwi amuuya wa Banakristoma uliindene. Mwaapostolo Paulo wakalemba kuti: “Amukondwe lyoonse.” (1 Te. 5:16) Kuli twaambo tunji tukonzya kutupa kusekelela alimwi akukkomana caantoomwe. Tukomba Leza Mupati Kampatila, Jehova; tulaumvwisya mulumbe wakasimpe wamu Bbaibbele; tulijisi bulangizi bwalufwutuko abwabuumi butamani  alimwi tulakonzya kubagwasya bamwi kutegwa abalo batambule zilongezyo zili boobu.—Int. 106:4, 5; Jer. 15:16; Lom. 12:12.

Kusekelela alimwi akukkomana abamwi nzitondezyo zya Banakristo bakasimpe. Aboobo tacigambyi kuti Paulo wakalembela bana Filipi kuti: “Ndilasekelela alimwi ndilakondwa andinywe nyoonse. Mbubonya oobo, andinywe mweelede kusekelela akukondwa andime.” (Flp. 2:17, 18) Mumajwi buyo masyoonto, Paulo wakaamba ziindi zyobilo kujatikizya kusekelela akukondwa abamwi.

Aboobo, Banakristo beelede kucicenjelela cilengwa cakulyaandaanya. Kunyina muntu uulyaandaanya uukonzya kusekelela abakombinyina. Aboobo, mbuti mbotukonzya kulutobela lulayo lwa Paulo lwakuti “amuzumanane kukondwa mu Mwami” abakwesu?—Flp. 3:1.

Amusekelele Abakombinyoko

Ciindi Paulo naakalemba lugwalo kubana Filipi, kulibonya kuti wakali muntolongo ku Roma akaambo kamulimo wakwe wakukambauka. (Flp. 1:7; 4:22) Nokuba boobo, kwaangwa kunyina nokwakamulesya kuba musungu mumulimo wakukambauka. Muciindi caboobo, wakakkomana kubelekela Jehova kusikila mpaakali kugolela alimwi akuba “mbuli cituuzyo cakunywa citilwa.” (Flp. 2:17) Mbwaakali kuzibona zyintu Paulo citondezya kuti kukkomana takuyeeme abukkale bwamuntu. Nokuba kuti wakali muntolongo, Paulo wakaamba kuti: “Ndilazumanana kukondwa.”—Flp. 1:18.

Paulo wakalitalisyide kale mbungano ku Filipi alimwi wakali kubayanda banyina. Wakalizyi kuti kubandika makani aajatikizya lukkomano ndwaakajana mukubelekela Jehova kulakonzya kubakulwaizya abalo. Aboobo, wakalemba kuti: “Lino bakwesu ndiyanda kuti nywebo muzyibe kuti zyintu zyakandicitikila mubwini zyapa kuti makani mabotu aunke kumbele, cakuti nketani nzyondaangidwe akaambo ka Kilisito zyazyibwa koonse-koonse ku Balindizi ba Mwami muna Loma akubantu boonse.” (Flp. 1:12, 13) Kwaamba cakuluula eeci cikulwaizya ninzila yomwe yakamupa kuti Paulo asekelele akukkomana antoomwe abanyina. Kulibonya kuti bana Filipi abalo bakakkomana antoomwe a Paulo. Kutegwa bakkomane tiibakeelede kutyompwa akaambo kazyintu zyakamucitikila Paulo. Muciindi caboobo, bakeelede kwiiya cikozyanyo cakwe. (Flp. 1:14; 3:17) Kwiinda waawo, bana Filipi, bakazumanana kumupailila Paulo alimwi akumupa kufwumbwa ncaakali kuyandika akumugwasyilizya.—Flp. 1:19; 4:14-16.

Sena tulatondezya muuya wakukondwa mbuli Paulo? Sena tulasoleka kubulanga munzila  mbotu buumi bwesu alimwi amulimo wesu wa Bunakristo? Ciindi notuyanzana abakwesu, ncintu cibotu kukkomana antoomwe kujatikizya mulimo wakukambauka. Tatweelede kulindila kuti mane tukabe acakuluula cilibedelede kutegwa tucite oobo. Ndiza twakacikonzya kugwasya muntu umwi kuba aluyandisisyo mumulumbe wa Bwami kwiinda mukubelesya ntalisyo imwi naa kupandulula kabotu twaambo. Ambweni twakalijisi mubandi mubotu amwiniŋanda kujatikizya kapango kamwi kamu Bbaibbele. Andiza mwakazyibwa kuti muli umwi wa Bakamboni ba Jehova ciindi nomwakali mucilawo canu calo cakapa kuti mupe bumboni. Kubandika zyakuluula zili boobu kupa kukkomana antoomwe.

Bunji bwabantu ba Jehova balalyaaba alimwi bazumanana kulyaaba kutegwa mulimo wakukambauka ubelekwe. Bapainiya, balangizi beendeenda, babelekela ku Bbeteli, bamisyinali alimwi ababelesi babelekela kumasi aambi balalyaaba cakumaninina mumulimo waciindi coonse alimwi balikkomene akaambo kakucita oobo. Sena tulakondwa akusekelela antoomwe ambabo? Aboobo, atutondezye kuti tulabalumba aaba “basimilimoma kujatikizya Bwami bwa Leza.” (Kol. 4:11) Ciindi notuli antoomwe kumiswaangano yambungano naa kumiswaangano mipati ya Bunakristo, tweelede kubakulwaizya. Alimwi tulakonzya kwiiya cikozyanyo cabo cibotu. Alimwi tulakonzya kujana “ciindi” cakuswiilila zyakuluula alimwi amajwi aabo aakulwaizya kwiinda mukubatamba kumaanda eesu akulida antoomwe.—Flp. 4:10.

Amukkomane Abaabo Bali Mumasukusyo

Kuliyumya naakali kupenzyegwa alimwi akulwana masukusyo kwakamuyumya Paulo kutegwa azumanane kusyomeka kuli Jehova. (Kol. 1:24; Jak. 1:2, 3) Kuzyiba kuti banyina baku Filipi abalo bayoojana masukusyo ngaonya alimwi kuti bayookulwaizyigwa akaambo kakuliyumya kwakwe kwakapa kuti Paulo akkomane akusekelela ambabo. Aboobo wakalemba kuti: “Nywebo mwapegwa coolwe akaambo ka Kilisito, ikutali buyo kuti mumusyome pe, pele alimwi akuti mupenge akaambo kanguwe. Nkaambo nywebo mulwana nkondo njimunya njomwakabona kandilwana, lino njomumvwide kuti ndicilwana.”—Flp. 1:29, 30.

Mbubwenya buyo, mazuba aano Banakristo balakazyigwa akaambo kakukambauka. Zimwi ziindi balakazyigwa calunya, pele ziindi zinji kukazyigwa kumwi kulakatazya kuzyiba. Kulakonzya kuboola kwiinda mukubejelezyegwa abasiluleyo, kukazyigwa abamumukwasyi, kusampaulwa ambotubeleka limwi naa basicikoloma. Jesu wakatucenjezya kuti masukusyo aali boobo tayeelede kutugambya naa kututyompya. Muciindi caboobo, ntwaambo tweelede kutupa kukkomana. Wakaamba kuti: “Mulikkomene nywebo ciindi bantu nobamusampaula akumupenzya akumubejelezya zyintu zibi ziindene-indene akaambo kandime. Amukondwe akusekelela, mbwaanga bulumbu bwanu kujulu mbupati.”—Mt. 5:11, 12.

Tatweelede kuyoowa ikuti twamvwa kuti bakwesu balapenzyegwa calunya muzisi zimbi. Muciindi caboobo, tweelede kukkomana akaambo kakuliyumya kwabo. Tulakonzya kubapailila, kulomba Jehova kutegwa abagwasye kuzumanana kuba alusyomo akuliyumya. (Flp. 1:3, 4) Nokuba kuti kunyina zyintu zinji nzyotukonzya kubacitila bakwesu bali boobo, tulakonzya kubagwasyilizya aabo bali mumasukusyo mumbungano yesu. Tulakonzya kubabikkila maano akubagwasyilizya. Tulakonzya kujana ciindi cakukkomana ambabo kwiinda mukubatamba kuti batusangane ciindi ca Kukomba Mumukwasyi, kubeleka abalo mumulimo wakukambauka alimwi akuba ambabo ciindi cakulikondelezya.

Eelo kaka tulijisi twaambo tunji tutupa kukkomana caantoomwe! Tweelede kuukazya muuya ooyu wanyika wakulyaandaanya akuzumanana kukkomana abakwesu. Kwiinda mukucita oobu, tuyoopa kuti luyando alimwi alukamantano mumbungano luyaambele alimwi tunookkomene abunyina bwa Bunakristo. (Flp. 2:1, 2) Paulo utukulwaizya kuti: “Lyoonse amukondwe mu Mwami. Alimwi ndainduluka kuti, Amukondwe!”—Flp. 4:4.

[Nkotwakajana cifwanikiso icili apeeji 6]

Globe: Courtesy of Replogle Globes