‘Kulangila’ Nkaambo nzi Ncokuyandika Kapati?

“NCINZI ciyooba citondezyo cakubako kwako acamamanino aabweende bwazyintu?” (Mt. 24:3) Kwiingula mubuzyo ooyu, Jesu wakapa basikwiiya bakwe citondezyo cilimvwisya, caamba zyoonse ziyakucitika, citakatazyi kuzyiba alimwi ciyakucitika ncobeni. Cililembedwe mucaandaano 24 ca Matayo, caandaano 13 ca Maako amucaandaano 21 ca Luka. Amane wakayungizya kuti: “Amulangile.”—Mt. 24:42.

Kuti naa citondezyo eeci cakali kukonzya kulibonya kabotu, nkaambo nzi ncaakayungizya majwi aakucenjezya aali boobu? Atulange-lange twaambo tobilo ootu. Kakusaanguna, zyintu zinyonganya zilakonzya kupa kuti bamwi baleke kubikkila maanu kucitondezyo, calo cikonzya kupa kuti baleke kulangila akutacita kabotu kumuuya. Cabili, Munakristo ulakonzya kucibona citondezyo, pele akaambo kabukkale bwakwe ulakonzya kuyeeya kuti tacimujatikizyi pe. Ulakonzya kuyeeya kuti “mapenzi mapati” kweelana abusinsimi bwa Jesu acili kulamfwu alimwi akuti takuyandiki “kulangila.”—Mt. 24:21.

“Tiibakabikkila Maano”

Jesu wakayeezya basikumutobela kujatikizya bantu bakali kupona mumazuba aa Nowa. Kukambauka nkwaakali kucita Nowa, kuyaka bwato bupati alimwi alunya lwakali kucitika mumazuba aayo zyakali kulibonya. Nokuba boobo, banji “tiibakabikkila maano.” (Mt. 24:37-39) Mbubwenya buyo kutabikkila maano kukucenjezya kuli boobu nkokuli aano mazuba. Mucikozyanyo, zikwankwani zyamumugwagwa zilijisi mulumbe uumvwika, pele banji tabazibikkili maano. Mumigwagwa imujanika bantu ziindi zinji, beendelezi kanji-kanji balabikka zikwankwani zipa kuti banamutekenya kabatabalisyi kapati myootokala. Mbubwenya buyo, Munakristo ulakonzya kuzyiba citondezyo cakumazuba aakumamanino pele inga wazumanana amicito iiteendelani acitondezyo. Eeci ncecakacitika kumukubusi wazyina lyakuti Arielle waku West Africa.

Arielle wakali kukkomana kweebela cisobano cabbola yabamakaintu yamaanza aacipeku-peku. Kucikolo nobakatalisya kabunga kabbola, kuyandisya kuba mucisobano cakamupa kuti ataboni ntenda zyakumuuya zyakali kukonzya kumucitikila. Wakatalika kusobana bbola mukabunga aaka kali gookkipa. Ino ncinzi cakatobela? Wakapandulula kuti: “Bamwi mbotwakali limwi mukabunga aaka bakalisyabidwe kubasankwa bakali kubelesya misamu iikola alimwi akufweba. Bakali kundifwubaazya akaambo kakuti tiindakali kucita nzyobakali kucita, ndakali kuyeeya kuti inga tacindinyonganyi. Pele tiilyakalampa, cisobano cakatalika kundinyonganya kumuuya. Lyoonse ndakali kuyeeya buyo cisobano. Ciindi camiswaangano ya Bunakristo ku Ŋanda ya Bwami ndakali kuyeeya buyo cisobano. Bukkale bwangu bwa Bunakristo abwalo bwakanyongana. Ndakatalika kuyandisisya kuzunda kutali kusobana buyo. Akaambo kamuuya wakuzundana ngondakaba aanguwo ndakali kubeleka canguzu kulibambila cisobano. Ndakakopana mumizeezo.  Ndakaleka kuba abeenzuma akaambo kacisobano.”

“Cakasika ciindi cilibilisya mbotwakali kuzundana limwi nobakapegwa penooti. Ndakalibambila kuti ndiijate bbola. Pele cakutayeeyela ndakalijana kuti ndapaila kuli Jehova kuti andigwasye kwiijata bbola. Eeci cakacitika cakandipa kubona bukkale bwangu bwakumuuya mbobwakanyongene. Ino mbuti mbondakabukuluka alimwi kumuuya?

“Ndakaliyebelede kale DVD yakuti Young People Ask—What Will I Do With My Life? * Ndakayeeya kuti ndiyeebelele alimwi akubikkila maano. Kayi ndakajisi penzi mbuli lya André, mukubusi uuli mucisobano. Ndakabikkila maano kapati kuli ceeco mwaalu ncakaambila André kucita: kubala akuzinzibala kuyeeya lugwalo lwa Bafilipi 3:8. Kucita boobo kwakandigwasya. Ndakazwa mukabunga kacisobano mundakabede.

“Eelo kaka kwakaba kucinca kupati! Muuya wakuzundana akukopana mumizeezo wakamana. Ndakakkomana alimwi akumvwana abalongwe Banakristo. Ndakatalika kuziyandisya zyintu zyakumuuya. Ndakatalika alimwi kubikkila maano kumiswaangano alimwi yakali kundikkomanisya. Alimwi ndakatalika kucita kabotu mumulimo wamumuunda. Lino kanji-kanji ndilabeleka kandili mupainiya wakugwasilizya.

Kuti kakuli cimunyonganya kutegwa muleke kubikkila maano kucitondezyo Jesu ncaakapa, amubweze ntaamu ziyandika mbubwenya mbwaakacita Arielle. Mulakonzya kusola nzila zitobela. Amuvwuntauzye mu Watch Tower Publications Index, yalo yaambwa kuti nimaapu iitondezya mbono zisisidwe. Mulakonzya kujana mabbuku aapa lulayo lugwasya alimwi azyakuluula zyabantu zitondezya mbobakaliyumya mumasunko ngobakajisi. Amugwasyigwe amiswaangano ya Bunakristo kwiinda mukulibambila kabotu akulemba twaambo. Bamwi bajana kuti kukkalila kuzyuuno zili kumbele kulagwasya. Ciindi nokuli mubandi abaswiilizi, amusole kutola lubazu kumatalikilo aamubandi. Kuyungizya waawo, amuzumanane kupakamana kumuuya kwiinda mukubona zyintu zicitika mazuba aano mbozyeendelana acitondezyo alimwi azibeela zimbi zyaamba “mazuba aamamanino.”—2 Ti. 3:1-5; 2 Pe. 3:3, 4; Ciy. 6:1-8.

“Amulibambile”

Citondezyo camazuba aamamanino cilalibonya “munyika yoonse.” (Mt. 24:7, 14) Banji bakkala mumasena muli malwazi, nzala, mizuzumo yanyika azyintu zimbi zyakasinsimwa. Mukwiimpana bamwi bali mumasena muli luumuno akuliiba. Kuti zibeela zyacitondezyo tazyinacitika nkomukkala, sena mweelede kuyeeya kuti mapenzi mapati acili kule? Peepe.

Mucikozyanyo, amuyeeye ncaakasinsima Jesu kujatikizya “zilwazi anzala.” (Lk. 21:11) Cakusaanguna, Jesu tanaakaamba kuti zitondezyo eezyi ziyakucitika mumasena oonse aciindi comwe naa munzila iikozyenye. Muciindi caboobo, wakaamba kuti eezyi zyakali kuyoocitika “mumasena aaindene-indene.” Aboobo, tatukonzyi kulangila zyintu zikozyenye kucitika aciindi comwe mumasena oonse. Cabili, naakamana kwaamba kuti kuyooba nzala, Jesu wakatondezya kuti bamwi basikumutobela bakeelede kupakamana kutegwa batabi balyato naakati: “Pele amulilingule nobeni kutegwa myoyo yanu itabi niilengaana akaambo kabulyato.” (Lk. 21:34) Aboobo, Banakristo  boonse tabeelede kulangila kuti zibeela zyacitondezyo bayoozibona zyoonse. Muciindi caboobo, Jesu wakaamba kuti: “Mwaakubona zyintu eezyi kazicitika, amukazyibe kuti Bwami bwa Leza buli afwaafwi.” (Lk. 21:31) Kunyina makani azitucitikila kumasena nkotukkala, nzila zyamazuba aano zyakumwaya makani zilatugwasya kubona zibeela zyoonse zyacitondezyo.

Alimwi amuyeeye kuti Jehova wakabikka kale ‘buzuba alimwi aciindi’ mapenzi mapati nayootalika. (Mt. 24:36) Zyintu zicitika anyika tazikacinci buzuba oobu.

Jesu wakakulwaizya Banakristo kulikoonse nkobabede kuti: “Amulibambile.” (Mt. 24:44) Tweelede kuti katulibambilide lyoonse. Nokuba boobo, tatukonzyi kunoocita zyintu zyakumuuya ciindi coonse abuzuba. Kuyungizya waawo taaku uuzyi aumwi ncanoocita mapenzi mapati aakutalika. Bamwi banoobeleka mumuunda naa kulanganya milimo yaaŋanda. (Mt. 24:40, 41) Aboobo, ncinzi ncotukonzya kucita kutondezya kuti tulilibambilide?

Ba Emmanuel aba Victorine, abana babo basimbi bali cisambomwe bakkala mucibeela ca Africa kwalo zibeela zyacitondezyo zyoonse nkozitacitiki. Aboobo, bakayeeya kuti kababandika zyintu zyakumuuya abuzuba kutegwa batondezye kuti balilibambilide. Ba Emmanuel bapandulula kuti: “Cakali kukatazya kujana ciindi ceelela kuli boonse. Kumamanino twakasala cisela cawoola akati ka 6 a 6:30 cifwumofwumo. Twamana kulanga-langa lugwalo lwabuzuba, tulalibambila mincali misyoonto mubbuku liyooyiigwa muciiyo cambungano cansondo eeyo.” Sena bubambe oobu bwabagwasya kupakamana? Inzya. Ba Emmanuel mbaasicuuno bakabunga kabaalu mumbungano. Ba Victorine balabeleka kabali bapainiya bagwasilizya ziindi zinji alimwi bagwasya bantu banji kwiiya kasimpe. Bana babo basimbi boonse bacita kabotu kumuuya.

Jesu utukulwaizya kuti: “Amulangile, amupakamane.” (Mk. 13:33) Mutazumizyi cintu cimwi kumunyonganya kumuuya. Muciindi caboobo, amubikkile maano kululayo lujanwa mumabbuku eesu alimwi amumiswaangano yambungano, mbubwenya mbwaakacita Arielle. Mbubwenya mbuli mukwasyi waba Emmanuel, amusole kucita cintu cimwi abuzuba kutegwa mutondezye kuti mulilibambilide alimwi ‘mulalangila.’

[Bupanduluzi buyungizidwe]

[Cifwanikisi cili apeeji 4]

Kubandika zyintu zyakumuuya abuzuba kwabagwasya ba Emmanuel amukwasyi wabo kutegwa ‘kabalibambilide’