Sena Mulakkomana “Acoolwe Cakupa”?

BANAKRISTO bakusaanguna mu Filipi bakalizyibidwe akaambo kabwaabi bwabo kugwasyilizya bukombi bwakasimpe. Mulugwalo lwakasololelwa amuuya mwaapostolo Paulo wakabalembela kuti: “Ndilamulumba lyoonse Leza wangu nondimwiibaluka mukukombelezya koonse nkondikombela ndinywe nyoonse. Mukukombelezya akumwi ndilakomba cakukondwa, akaambo kalubazu ndomwajisi mukugwasyilizya kumwaya makani mabotu kuzwa buzuba bwakusaanguna nomwakaatambula kusikila lino.” (Flp. 1:3-5) Paulo wakali kuyeeya ciindi Ludiya abaŋanda yakwe nobakabbapatizyigwa alimwi Ludiya wakamukombelezya Paulo ambaakali kukambauka limwi kuti bakkale kuŋanda yakwe.—Mil. 16:14, 15.

Kakutanainda ciindi, mbungano mpya eeyi iyakatalisyigwa ku Filipi ziindi zyobilo bakamutumina zipego Paulo ciindi naakali kuswaya basyominyina bakali ku Tesalonika kwakali kulampa makkilomita aatandila ku 160. (Flp. 4: 15, 16) Nikwakainda myaka misyoonto, ciindi bakwesu baku Filipi alimwi a Makedoniya nibakali mumapenzi alimwi “abucete bwabo butaambiki,” bakamvwa kujatikizya Banakristonyina bakali kupenzyegwa ku Jerusalemu alimwi bakali kuyanda kubagwasya. Paulo wakasinizya kuti eeci cakali “kwiindilila ambobakali kukonzya.” Nokuba boobo, wakalemba kuti: “Bakazumanana kutulomba akutukombelezya kapati kuti bazumizyigwe kuba acoolwe cakupa.”—2 Ko. 8:1-4; Lom. 15:26.

Nikwakainda myaka iitandila kukkumi kuzwa ciindi bana Filipi nibakaba Banakristo, bakacili kutondezya muuya wabwaabi. Nibakamvwa kuti Paulo wakalaangidwe ku Roma bakatuma Epafrodita kuti atole ziyandika kuli Paulo musinzo uulampa makkilomita aali 1,287. Cakutadooneka bana Filipi bakapa lugwasyo kuli Paulo kutegwa azumanane kuyumya-yumya bakwesu akukambauka nokuba kuti wakalaangidwe.—Flp. 1:12-14; 2:25-30; 4:18.

Mazuba aano Banakristo bakasimpe bacibona kuti ncoolwe cipati kugwasilizya mulimo wa Bwami wakukambauka akugwasya bamwi kuba basikwiiya. (Mt. 28:19, 20) Balagwasyilizya mulimo wa Bwami kwiinda mukwaaba ciindi cabo, nguzu alimwi amali. Ikabbokesi ikali mucibalo eeci kalatondezya nzila zimwi mbomukonzya kugwasyilizya mumulimo ooyu ngwatupede Leza.

[Kabbokesi kali apeeji 22, 23]

NZILA BAMWI NZYOBABELESYA MUKUSANGA

KUSANGA KUMULIMO WANYIKA YOONSE

Bantu banji balabikka mali ambali kutegwa bakaabikke mutubbokesi tulembedwe kuti: “Mulimo Wanyika Yoonse.”

Amwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Alimwi bantu balakonzya kusanga mali kwiinda mukwaatuma ku Watch Tower Society, Attention Treasury, P. O. Box 33459, Lusaka 10101, naa kuofesi yamutabi ya Bakamboni ba Jehova iili icisi cenu. (Izyakusanga zilembedwe ansi aawa zilakonzya kutumwa kuofesi yamutabi mucisi canu.) Macceki aatuminwa kukkeyala eeyi ayelede kulembwa kuti: “Watch Tower Society.” Ngale naa zyintu zimbi ziindene-indene azyalo zilakonzya kusangwa. Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncipego.

IKULIBAMBILA NZYOMUKONZYA KUSANGA

Kunze lyakusanga buyo mali, kuli nzila zimbi nzyomukonzya kubelesya ikupa zyintu mukugwasilizya mulimo wa Bwami uucitwa nyika yoonse. Nzila eezyi zibikkilizya:

Bukwabilizi (Insurance): Watch Tower Bible and Tract Society of Pennsylvania ilakonzya kulembwa kuti njiiya kubweza mali aabukwabilizi bwa buumi (life insurance policy) naa aalya aapegwa kumuntu wasika aciimo cakuleka mulimo (retirement/pension plan).

Nkomo Yamali Aakubbanki: Nkomo yamali aakubbanki, mapepa aatondezya mali ngaakabikka naa nkomo yamali ngapegwa muntu wasika aciimo cakuleka mulimo alakonzya kupegwa ku Watch Tower Bible and Tract Society of Pennsylvania muntu afwa kweelana aziyandika kubbanki lyakubusena nkwakkede.

Mali Ngomujisi Mukkampani (Stocks and Bonds): Mali ngomujisi mukkampani alakonzya kusangwa ku Watch Tower Bible and Tract Society of Pennsylvania kacili cipego buyo naa Watch Tower Bible and Tract Society of Pennsylvania ilakonzya kulembwa kuti njiiyakubweza mali muntu aakufwa.

Nyika Amayake (Real Estate): Nyika amayake izikonzya kusambalwa zilakonzya kusangwa, ikuti naa muntu wasanga busena mpakkede inga wazumanana kukkala aawo ciindi nacipona.

Mali Aapegwa Amwaka (Gift Annuity): Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova. Eelyo muntu ooyu wasanga mali aaya naa muntu uumbi buyo ngwaasala, unoopegwa mali amwaka kusikila akafwe.

Bwaapauzi Bwazyintu (Wills and Trusts): Zyintu naa mali alakonzya kupegwa ku Watch Tower Bible and Tract Society of Pennsylvania kwiinda mukubelesya pepa lyamalailile aabwaapauzi bwazyintu ilizumizyidwe amulawo naa kuti Watch Tower Bible and Tract Society of Pennsylvania ilakonzya kulembwa kuti njiyeelede kupegwa mali aajanika mubwaapauzi bwazyintu. Izyintu naa mali aapegwa kugwasya mbunga yabukombi alakonzya kugwasya munzila iimwi mumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti uusanga alibambile kabotu.

Lyoonse kamutanatuma zyakusanga zilembedwe atala aawa mulakonzya kubandika abakuofesi yamutabi iili mucisi cenu.