Mutalekeli Kuciswa Kumupa Kutakkomana

AMWEEZYEEZYE kuti mwabuka mafwumofwumo kamulombozya kuti kusiye buzuba kabutanatalika. Muyeeya kuliyumya kumapenzi aakumubili alimwi aamumizeezo buzuba oobo. Zimwi ziindi mulakonzya kulimvwa mbuli Jobu iwakaamba kuti: “Mane ndayeeya kuti cabota kusinwa, ndifwe, kwiinda kukala nkenciswa boobu.” (Job. 7:15) Mbuti kuti bukkale buli boobu bwazumanana kwamyaka iili mbwiibede?

Eeci ncecakacitika kuli Mefiboseti, mwana aa Jonatani mweenzyinyina aa Mwami Davida. Ciindi Mefiboseti naakajisi myaka yosanwe yakuzyalwa, “wakawida ansi, aboobo wakalemana.” (2 Sam. 4: 4) Kuboneka kuti wakaindila kutyompwa ciindi naakabejelezyegwa, alimwi kulangilwa kuti eeci cakamupa kuti cimukatazye kuliyumya kubulema bwakwe. Pele wakazumanana kuba cikozyanyo cibotu cakutalekela kuciswa, kubejelezyegwa, alimwi amapenzi kuti zimulesye kukkomana.—2 Sam. 9:6-10; 16:1-4; 19:24-30.

Mwaapostolo Paulo awalo ncikozyanyo cibotu. Cimwi ciindi wakalemba kujatikizya “bumvwa mumubili” mbwaakeelede kuliyumya. (2 Ko. 12: 7) Bumvwa mbwaakaamba kulangilwa kuti bwakali bulwazi butaponi, naa ambweni mbantu bakali kumupa buyumuyumu mumulimo wakwe kali mwaapostolo. Kufwumbwa naa cakali buti, penzi lyakazumanana, alimwi wakeelede kuliyumya.—2 Ko. 12:9, 10.

Mazuba aano, malwazi aatasilikiki naa malwazi aamumizeezo alabapenzya babelesi ba Leza bamwi. Kabajisi myaka yakuzyalwa iili 18, ba Magdalena bakaciswa bulwazi bwiitwa kuti systemic lupus erythematosus, bulwazi bwalo tuzunda twamumubili motuzundwa. Bakaamba kuti “Ndakayoowa kapati. Mukuya kwaciindi ndakali kuyaabwiindila kuciswa, cakulya tiicakali kugaigwa kabotu mwida, ndakajisi bulwazi bwazilonda zyakumulomo, alimwi apenzi lyakutakomena.” Abalo ba Izabela bakajisi bulwazi bukatazya. Bakaamba kuti: “Kuzwa kubwana ndali kuciswa bulwazi bwakutyompwa. Eeci candipa kuba apenzi lyakutakkalikana mumizeezo, kutayoya kabotu, alimwi akucisa mwida. Akaambo kaceeci, kanji-kanji ndilakatala kapati.”

Kuzumina Mbobede

Kuciswa kulakonzya kunyonganya buumi bwanu. Cacitika eeci, cilagwasya kukkala ansi alimwi akulilingula. Kuzumina kuti tamucicikonzyi kucita zyintu nzyomwakali kukonzya kucita tacili cuuba-uba. Ba Magdalena bakaamba kuti: “Bulwazi bwangu buciyaambele. Bunji bwaziindi ndilimvwa kukatala kubuka. Akaambo kakutazyiba cikonzya kundicitikila akaambo kabulwazi bwangu, cipa kuti kacindikatazya kulibambilila limwi zyakumbele. Cindityompya kapati ncakuti tandicikonzyi kucita zyintu nzindakali kucita mumulimo wa Jehova.”

Ba Zbigniew bakaamba kuti: “Myaka mbwiiyaabuya, bulwazi bwamumagondo butegwa rheumatoid arthritis bwandimana nguzu akunyonyoona muswaanganina zifwuwa. Zimwi ziindi nendizimbide kapati, ndilaalilwa kubeleka mulimo uuliwoonse. Eeci cindipa kutakkomana.”

Myaka yainda, ba Barbara bakajanwa kuti bajisi kkansa yakubongo. Bakaamba kuti: “Mubili wangu wakacinca mukaindi kasyoonto buyo. Ndilimvwa kubula nguzu, ndilaciswa-ciswa mutwe, alimwi ndijisi penzi lyakuziluka. Akaambo kabulwazi oobu mbondakatalika kuciswa, ndakeelede kucinculula zyintu zyoonse.”

Bantu boonse aaba mbabelesi ba Jehova balyaabide. Kucita kuyanda kwa Leza ncecintu ncobabikkila kapati maano. Babikka lusyomo lwabo muli Leza cakumaninina alimwi balagwasyigwa anguwe. —Tus. 3:5, 6.

Mbuti Jehova Mbwagwasya?

Tatweelede kuyeeya kuti mapenzi aatucitikila ncitondezyo cakuti Leza tatukkomanini. (Malo. 3:33) Amuyeeya buyo zyintu zyakamucitikila Jobu nokuba kuti ‘wakanyina mulandu alimwi wakaliluleme.’ (Job. 1:8) Leza tasunki muntu azyintu zibyaabi. (Jak. 1:13) Malwazi oonse—kubikkilizya amalwazi aataponi alimwi aamumizeezo—twakaakona kuzwa kubazyali besu bakusaanguna, ba Adamu a Eva.—Lom. 5:12.

Pele Jehova a Jesu tabakabalekelezyi bantu baluleme. (Int. 34:15) Kwaambisya ciindi notuli mumapenzi, tulamulumba Leza kuti “macijilo eesu alimwi ndilinga lyesu.” (Int. 91:2) Aboobo, ciindi nomuli mubukkale bukatazya, ino ncinzi cikonzya kumugwasya kuzumanana kukkomana?

Mupailo: Kutobela cikozyanyo cababelesi ba Leza bakaindi basyomeka, mulakonzya kuwaala makatazyo aanu kuli Taateesu wakujulu kwiinda mumupailo. (Int. 55:22) Kwiinda mukucita oobo, mulakonzya kuba ‘aluumuno lwa Leza oolo lwiinda kumvwisya koonse.’ Luumuno oolo “luyookwabilila myoyo yanu amizeezo yanu.” (Flp. 4:6, 7) Akaambo kakusyoma Leza kwiinda mukupaila, ba Magdalena bazumanana kuliyumya kubulwazi bwabo butasilikiki. Bakaamba kuti: “Kwaambila Jehova zili mumoyo wangu cilandikatalusya alimwi cindipa kukkomana alimwi. Lino ndilicizyi ncobeni ncocaamba kusyoma Leza buzuba abuzuba.”—2 Ko. 1:3, 4.

Naingula mipailo yanu, Jehova ulakonzya kumupa nguzu kwiinda mumuuya wakwe uusalala, mu Jwi lyakwe, alimwi amubunyina bwa Bunakristo. Tamweelede kulangila kuti Leza inga wabumana bulwazi bwanu munzila yamaleele. Pele mulakonzya kusyoma nguwe kuti amupe busongo anguzu ziyandika kutegwa muliyumye kupenzi lili lyoonse. (Tus. 2:7) Ulakonzya kumuyumya, kumupa “nguzu zigambya iziinda zyabantu.”—2 Ko. 4:7.

Mukwasyi: Bukkale bwaaŋanda bwaluyando alweetelelo bulakonzya kumugwasya kuliyumya ciindi nomuciswa. Pele kamuyeeya kuti abalo bayandwa banu balapenga. Balakonzya kulimvwa mbuli kuti taakwe ncobakonzya kucita mbubonya mbuli ndinywe. Nokuba boobo, balilibambilide kumugwasya nomuba muziindi zikatazya. Kupaila ambabo kuyoomugwasya kuba amoyo uukkede.—Tus. 14:30.

Ba Barbara bakaamba boobu kujatikizya mwanaabo musimbi alimwi abacizyi bamwi bacili bana-bana kuti: “Balandigwasya kutola lubazu mumulimo wakukambauka. Busungu bwabo bulandiyumya-yumya alimwi bundipa kukkomana.” Ba Zbigniew bajana kuti lugwasyo lwa mukaintu wabo lwabagwasya kapati. Bakaamba kuti: “Bakaintu bangu mbababeleka bunji bwamilimo yaaŋanda. Alimwi balandisamika akundinyamwida cibbeeke cangu camabbuku ciindi notuunka kumiswaangano yambungano alimwi anotuli mumulimo wakukambauka.”

Basyomima: Ciindi notuli antoomwe abasyomima, tulakulwaizyigwa akuumbulizyigwa. Mbuti kuti kamutakonzyi kuunka kumiswaangano akaambo kakuciswa? Ba Magdalena bakaamba kuti: “Mbungano ilabikkila maano kubona kuti ndilagwasyigwa amiswaangano kwiinda mumateepu aakulekkooda. Bakombima kanji-kanji balandiswaya kutegwa babone naa kuli cimbi ncobakonzya kucita kundigwasya. Alimwi balanditumina magwalo aakundiyumya-yumya. Kuzyiba kuti balandiyeeya alimwi akuti balabikkila maano kujatikizya buumi bwangu, cilandigwasya kuliyumya.”

Ba Izabela, ibaciswa bulwazi bwakutyompwa bakaamba kuti: “Mumonya mumbungano, ndilijisi ‘bamataata’ alimwi ‘abamaama’ banji balo bandiswiilila alimwi balasola kundimvwisya. Imbungano ngomukwasyi wangu, nkaambo nkonkuko nkondijana luumuno alukkomano.”

Aabo bajisi mapenzi aindene-indene tabeelede ‘kulipambukanya.’ Muciindi caboobo, balayandisya kuyanzana ambungano. (Tus. 18:1) Aboobo, balabakulwaizya kapati bamwi. Kumatalikilo mulakonzya kuwayawaya kwaambila bakwesu abacizyi zyintu nzyomuyandika. Pele bakombinyoko bayookkomana kubaambila cakutainda mumbali. Ciyoobapa coolwe cakutondezya ‘luyando lwabunyina lutali lwakuupaupa ameso.’ (1 Pe. 1:22) Mulakonzya kubazyibya kuti mulomba kutolwa kumuswaangano, kubeleka ambabo mumulimo wakukambauka, naa kuti muyanda kubandika ambabo. Nokuba boobo, tatweelede kubasungilizya pele tweelede kubalumba aabo batugwasya.

Amuzilange munzila yeelede zyintu: Ciyeeme alindinywe naa muyakuzumanana kukkomana nomuliyumya kubulwazi butasilikiki. Kulyeetezya akuusa kulakonzya kumupa mizeezo iitali kabotu. Ibbaibbele lyaamba kuti: “Moyo wamuntu ulayumuna bulwazi, pele moyo uutyokede, ngwani uukonzya kuuyumuna?”—Tus. 18:14.

Ba Magdalena bakaamba kuti: “Ndabeleka canguzu kutabikkila maano kumapenzi aangu. Ndilasola kukkomana mazuba ngondilimvwa kabotu. Ndilakulwaizyigwa kwiinda mukubala makani aabantu bakazumanana kusyomeka nokuba kuti bakali kuciswa malwazi aatasilikiki.” Ba Izabela balayumizyigwa kwiinda mukuzyiba kuti Jehova ulabayanda alimwi ulababikkila maano. Bakaamba kuti: “Ndilimvwa kuti ndilayandika kapati, alimwi akuti kuli ngondiponena. Alimwi ndilijisi bulangizi bubotu bwakumbele.”

Ba Zbigniew bakaamba kuti: “Bulwazi bwangu bundiyiisya kulicesya akulibombya. Bundiyiisya kuba aluzyibo akubelesya bupampu alimwi akulekelela bamwi kuzwa ansi amoyo. Ndaiya kujana lukkomano mukubelekela Jehova kakunyina kulyeetezya. Mubwini, ndakulwaizyigwa kuzumanana kuyaambele kumuuya.”

Kamuyeeya kuti Jehova ulikubwene kabotu-kabotu kuliyumya kwanu. Ulamufwida lubomba nomuli mupenzi alimwi ulamubikkila maano. ‘Takalubi milimo yanu alimwi aluyando ndomwakatondezya kuzyina lyakwe.’ (Heb. 6:10) Camoyo woonse mulakonzya kusyoma cisyomezyo ncasyomezya bantu boonse bamuyoowa cakuti: “Ziyume zitete, tandikakusiyi pe alimwi tandikakulekelezyi pe.”—Heb. 13:5.

Ikuti naa zimwi ziindi mulimvwa kutyompwa, amubikkile maano kubulangizi butaliboteli bwakupona munyika mpya. Ciindi caswena afwaafwi meso aanu naayoobona zilongezyo zya Bwami bwa Leza anyika.

 [Kabbokesi/Cifwanikiso icili apeeji 28, 29]

Balazumanana Kukambauka Nokuba Kuti Baciswa Bulwazi Butasilikiki

“Tandicikonzyi kweenda endikke, aboobo bakaintu bangu naa bakwesu abacizyi bamwi balandisindikila mubukambausi. Ndilapeta zyakwaamba alimwi amagwalo aamu Bbaibbele.”—Ba Jerzy, mboofwu.

“Kunze aakucita bukambausi bwaaluwaile, kanji- kanji ndilabalembela tugwalo bantu bajisi luyandisisyo. Kuti kandili mucibbadela, kanji-kanji ndilabikka Bbaibbele alimwi amabbuku aapandulula Bbaibbele afwaafwi abulo bwangu. Kucita oobo kwandigwasya kutalisya mibandi mibotu.”—Ba Magdalena, baciswa bulwazi bwa systemic lupus erythematosus.

“Ndilauyanda mulimo waŋanda aŋanda, pele kuti kanditalimvwide kabotu ndicita bukambausi bwaafooni.”—Ba Izabela, bajisi penzi lyakutyompwa kwakulazyigwa.

  “Ndilakkomana kucita nyendo zyakupilukila akugwasyilizya ciindi notusololela ciiyo ca Bbaibbele. Ikuti kandilimvwide kabotu, ndilayandisya kubeleka kuŋanda aŋanda.”—Ba Barbara, baciswa bulwazi bwakkansa kubongo.

“Ndilanyamuna kabbeeke kamagazini kauba-uba. Ndilabeleka mubukambausi kusikila mpondigolela kweelana abulwazi bwangu bwamumagondo.”—Ba Zbigniew, baciswa bulwazi bwamumagondo.

 [Cifwanikiso icili apeeji 30

Bana abapati balakonzya kukulwaizya bamwi