Amwiiye ‘Zyintu Ziyandika Zijatikizya Kasimpe’
Amwiiye ‘Zyintu Ziyandika Zijatikizya Kasimpe’
“[Mulijisi] zyintu ziyandika kujatikizya luzyibo akasimpe ka Leza izili mu Mulawo.”—LOM. 2:20.
1. Nkaambo nzi ncotweelede kubikkila maano kumvwisya ncowakali kwaamba Mulawo wa Musa?
NAATALI malembe aakasololelwa amuuya aamwaapostolo Paulo, nocikatazya kuziteelela ncozipandulula zibeela zinji zya Mulawo wa Musa. Mucikozyanyo, mulugwalo ndwaakalembela ba Hebrayo, Paulo wakakasalazya kaambo kuti Jesu kali ‘mupaizi mupati uusyomeka’ uyootuula “cipaizyo cakumanya zibi” ciindi comwe kukabe kutamani, kupa kuti cikonzyeke kubantu bajisi lusyomo muli ncico kuyoojana “lufwutuko lutamani.” (Heb. 2:17; 9:11, 12) Paulo wakapandulula kuti tente lyakali buyo “cimvwule cazyintu zyakujulu” alimwi akuti Jesu wakaba Simwiimaakati “[wa]cizuminano citaliboteli” kwiinda cizuminano cakajisi Musa mbuli simwiimaakati. (Heb. 7:22; 8:1-5) Mumazuba aa Paulo, bupanduluzi buli boobu ibujatikizya Mulawo bwakali kuyandika kapati ku Banakristo alimwi buciyandika aano mazuba. Bulatugwasya kumvwisya kabotu mboziyandika zyintu Leza nzyatupede.
2. Ncoolwe nzi ncobakajisi ba Juda Banakristo ncobatakajisi Bamasi?
2 Paulo naakalembela Banakristo ku Roma, zyintu zimwi nzyaakaamba wakali kwaambila bamwi mumbungano ibakali mucikombelo caba Juda alimwi bakaisyigwa Mulawo wa Musa. Wakazumina kuti akaambo kakuti bakaluuzyi kale Mulawo, aaba bali boobu bakali acoolwe cakuba ‘azyintu ziyandika zijatikizya kasimpe’ kaamba zya Jehova alimwi azyeelelo zyakwe ziluleme. Kuziteelela ‘zyintu ziyandika zijatikizya kasimpe’ alimwi akulemeka kasimpe aaka, cakagwasya ba Juda Banakristo kusololela, kuyiisya, alimwi akumunikila baabo ibatakauzyi Mulawo Jehova ngwaakapede bantu bakwe mbubwenya mbobakacita ba Juda basyomeka bakaindi.—Amubale Baloma 2:17-20.
ZYINTU ZYAKALI KWIIMININA CIPAIZYO CA JESU
3. Mbuti mbotugwasyigwa kwiinda mukwiiya zyintu zijatikizya zipaizyo nzyobakali kutuula ba Juda bansiku?
3 Zyintu ziyandika zyakasimpe nzyaakali kwaamba Paulo ziciyandika akulindiswe kutegwa twaateelele makanze aa Jehova. Zyeelelo izyakali mu Mulawo wa Musa ziciyandika amazuba aano. Katuciyeeyede kaambo aaka, lino atubandike cibeela comwe ca Mulawo cijatikizya zipaizyo azituuzyo zisiyene-siyene mbozyakasololela ba Juda balicesya kuli Jesu Kristo alimwi akubagwasya kumvwisya Leza ncaakali kuyanda kuti kabacita. Mbwaanga zyeelelo Jehova nzyayanda kuti babelesi bakwe kabatobela tazicincide, tuyoobona alimwi mulawo wa Leza ngwaakapede bana Israyeli uujatikizya zipaizyo azituuzyo mboukonzya kutugwasya kulilingula notucita mulimo wesu uusetekene.—Malk. 3:6.
4, 5. (a) Ino Mulawo wa Musa wakali kubayeekezya nzi bantu ba Leza? (b) Ino Mulawo wa Leza uujatikizya zipaizyo wakali kwiiminina nzi?
4 Mulawo wa Musa wakali kubagwasya ba Juda bansiku kuzyiba kuti mbaasizibi. Mucikozyanyo, kuti muntu wajata mutunta wamuntu wakeelede kusalazyigwa. Aboobo, impwizi iisalala imbotu yakali kujaigwa akuumpwa. Kumane itwe lyakali kubelesyegwa kupanga ‘maanzi aakusalazya,’ aakali kusansailwa muntu iwakali kusalazyigwa mubuzuba bwatatu alimwi amubuzuba bwaciloba kuzwa naasofwaala. (My. 19:1-13) Alimwi kutegwa kacibayeekezya kuti mbantu bakazyalwa acibi, mukaintu iwatumbuka wakeelede kukkala muciimo cakusofwaala kwamazuba aali mbwaabede, kumane milandu yakwe yakali kumana kwiinda mukutuula cipaizyo.—Lev. 12:1-8.
5 Zipaizyo zyabanyama zyakali kuyandika amubukkale bumbi busiyene-siyene bwabuzuba abuzuba ikumanya zibi. Kufwumbwa naa muntu wakalizyi naa pe, zipaizyo eezyi kubikilizya azyakali kucitilwa kutempele lya Jehova zyakali “cimvwule” cacipaizyo ca Jesu cilondokede.—Heb. 10:1-10.
MAKANZE AACIPAIZYO
6, 7. (a) Nzyintu nzi zyakali kubagwasya bana Israyeli mukusala zyintu zyakutuula, alimwi ino eeci cakali kwiiminina nzi? (b) Mibuzyo nzi njotukonzya kulibuzya?
6 Munyama uuliwoonse iwakali kupaizyigwa kuli Jehova wakeelede kuba ‘uululeme,’ nkokuti tiibakeelede kupaizya munyama moofu, uutyokede, mulema, naa uuciswa. (Lev. 22:20-22) Bana Israyeli nibakali kutuula micelo naa maila kuli Jehova, akeelede kuba “kabalwebalwe,” ‘mabotu kwiinda’ aabutebuzi bwabo. (My. 18:12, 29) Cituuzyo citali kabotu tiicakali kutambulwa a Jehova. Ceelelo ciyandika icijatikizya zipaizyo zyabanyama cakali kutondezya kuti cipaizyo ca Jesu tiicakali kuyooba akampenda naa kabala alimwi akuti Jehova wakali kuyoopaizya cintu ncayandisya kapati kutegwa anunune bantu.—1 Pe. 1:18, 19.
7 Kuti muntu iwakali kupa cipaizyo kuli Jehova wakali kumuyanda ncobeni Jehova akaambo kabubotu bwakwe boonse, wakali kusala zyintu zibotu kapati nzyaakajisi. Umwi aumwi wakajisi mukuli wakupa cipo ciinda kubota. Nokuba boobo, bakalizyi kuti Leza takkomani acituuzyo cijisi kampenda nkaambo eeci cakali kutondezya kuti muntu ooyu cipaizyo ucibona kuti nkwiinzya buyo mulawo naa mukuli uuminya. (Amubale Malaki 1:6-8, 13.) Eeci ceelede kutupa kuyeeya kujatikizya mulimo wesu kuli Leza: ‘Ino muuya nzi ngonditondezya nendibelekela Jehova? Sena inga ceelela kulingula mulimo wangu kuli Leza alimwi amakanze ngondijisi?’
8, 9. Nkaambo nzi ncotweelede kwaalanga-langa makanze ngobakajisi bana Israyeli ciindi nobakali kupa zipaizyo?
8 Ikuti cipaizyo camuna Israyeli cakali cakuliyandila kutegwa atondezye kulumba kuli Jehova mbuli mbobakali kucita nobakali kutuula zipaizyo zitentwa kutegwa balombe kulekelelwa, nkokuti kusala munyama mubotu kunyina nokwakali kukatazya kapati. Sikupa cituuzyo wakali kukkomana kupa Jehova cipaizyo cibotu kapati. Banakristo mazuba aano kunyina nobapa zituuzyo zyaambidwe mu Mulawo wa Musa, pele nokuba boobo, abalo balapa zipaizyo kwiinda mukubelesya ciindi, nguzu alimwi alubono lwabo mukubelekela Jehova. Mwaapostolo Paulo wakaamba kuti ‘kwaambilizya caantangalala’ kujatikizya bulangizi bwa Banakristo alimwi “[a]kucita zibotu akwaabana zyintu nzyomujisi abamwi” nzipaizyo zimukkomanisya Leza. (Heb. 13:15, 16) Makanze ngobajisi babelesi ba Jehova ciindi nobacita milimo iili boobu, kutondezya kulumba kuzyintu zyoonse Leza nzyaabapa. Aboobo, mbobazilanga zyintu alimwi amakanze ngobajisi Banakristo nobacita mulimo wabo mazuba aano kuleendelana amakanze ngobakajisi aabo ibakali kupa zipaizyo zyakuliyandila kaindi.
9 Mubukkale bumwi, kweelana a Mulawo wa Musa kuti naa muna Israyeli wabisya, wakeelede kupa cituuzyo cimanya zibi. Mbokunga zituuzyo eezyi zyakali kuyandika buya, sena muyeeya kuti cakali kukatazya kubana Israyeli kutuula cakuliyandila? (Lev. 4:27, 28) Ikuti muntu iwakali kupa zipaizyo eezyo wakali kuyanda kuba acilongwe cibotu a Jehova, kulibonya kuti tiicakali kumukataazya pe.
10. “[N]zipaizyo” nzi Munakristo nzyakonzya kupa kutegwa abukulusye cilongwe canyonganizyigwa?
10 Mbubwenya buyo amazuba aano, mulakonzya kumulebya mukwesu kakunyina kuzyiba. Manjezyeezya anu alakonzya kumuyeezya kuti mwalubizya. Muntu uuliwoonse uuyanda kubelekela Jehova uyoocita zyoonse nzyakonzya kutegwa abambe kaambo, sena takonzyi kucita oobo? Eeci caamba kuti weelede kulilekelela, ikuti kacili cibi cipati, weelede kulomba lugwasyo lwakumuuya kubaalu basiluyando Banakristo. (Mt. 5:23, 24; Jak. 5:14, 15) Aboobo, kuli cintu cimwi ncotweelede kupa kutegwa tulekelelwe cibi ncotwabisizya muntuma naa Leza. Ikuti twapa “zipaizyo” zili boobu, nkokuti tuyoobukulusya cilongwe cesu a Jehova alimwi amukwesu alimwi tuyooba amanjezyeezya aasalala. Mukuya kwaciindi, kuyootugwasya kubona kuti nzila ya Jehova nimbotu.
11, 12. (a) Nzyintu nzi zyakali kucitwa ciindi nokwakali kupegwa zipaizyo zyakutontozya? (b) Mbubotu nzi zipaizyo zyakutontozya mbozijisi mubukombi bwakasimpe mazuba aano?
11 Zipaizyo zimwi zyaambidwe mu Mulawo wa Musa zyakali kubonwa kuti zyakali zipaizyo zyakutontozya. Zipaizyo eezyi zyakali kwiiminina luumuno a Jehova. Muntu iwakali kupa cipaizyo cili boobu amukwasyi wakwe bakali kulya nyama yatuulwa, ndiza bakali kulida mubusena bumwi bwakulida mutempele. Mupaizi iwakali kutuula alimwi abapaizi bamwi ibakali kubeleka mutempele bakali kupegwa cibeela cimwi canyama. (Lev. 3:1; 7:31-33) Muntu iwakali kupa cipaizyo eeci, wakali kucita oobo akaambo kakuti wakali kuyanda kuba acilongwe cibotu a Leza. Cakali mbuli kuti sikupa cipaizyo, mukwasyi wakwe, bapaizi alimwi a Jehova bakali kulida antoomwe cakulya muluumuno kabakkomene.
12 Aboobo, kupa cipaizyo cakutontozya cakali mbuli kutamba Jehova kutegwa balide antoomwe cakulya. Eelo kaka cakali coolwe cipati kumuna Israyeli kuti Jehova wazumina kutamba ooku! Tacidoonekwi pe kuti sikutamba wakali kuyanda kuti mweenzu ooyo uulemekwa apegwe cakulya cibotu. Zipaizyo zyakutontozya zyakali cibeela cazyintu izyakali kuyandika zijatikizya kasimpe, alimwi cakali kwaamba kuti kwiinda mucipaizyo cipati ca Jesu, aabo boonse bantu bayanda kuba acilongwe a Mulengi wesu balakonzya kucita oobo. Mazuba aano, tulakonzya kuba acilongwe a Jehova kwiinda mukupa lubono alimwi akubelesya nguzu zyesu mumulimo wakwe cakuliyandila.
KUCENJEZYA KUJATIKIZYA ZIPAIZYO
13, 14. Nkaambo nzi cipaizyo ncaakali kuyanda kutuula Mwami Saulo ncocatakali kutambulika kuli Jehova?
13 Kweelana a Mulawo wa Musa, kutegwa cipaizyo citambulwe, sikupa wakeelede kuba amakanze mabotu. Bbaibbele alimwi lilijisi zikozyanyo zitucenjezya zijatikizya zipaizyo nzyaatakali kutambula Leza. Nkaambo nzi ncaatakali kuzitambula? Atulange-lange twaambo tobilo.
14 Musinsimi Samueli wakaambila Mwami Saulo kuti Leza wakali kuyanda kulwana bana Amaleki. Saulo wakeelede kunyonyoona cisi cabasinkondo kubikkilizya abanyama. Naakazunda, Saulo wakazumizya basikalumamba bakwe kuti batamujayi Agagi, mwami wabana Amaleki. Saulo alimwi kunyina naakajaya banyama bakali kuboneka kabotu kutegwa akape cipaizyo kuli Jehova. (1 Sam. 15:2, 3, 21) Ino Jehova wakacita buti? Wakamukaka Saulo akaambo kakusotoka mulawo. (Amubale 1 Samueli 15:22, 23.) Ino twiiya nzi? Kutegwa Leza atambule zipaizyo zyesu, tweelede kutobela milawo yakwe.
15. Ino bukkale bubyaabi bwabana Israyeli bamwi ibakali kupa zipaizyo mumazuba aa Isaya bwakatondezya nzi?
15 Cikozyanyo cili boobo cilajanika mubbuku lya Isaya. Mumazuba aa Isaya, bana Israyeli bakali kupa zituuzyo kuli Jehova cakwiinzya buyo mulawo. Nokuba boobo, bukkale bwabo bubyaabi bwakapa kuti zituuzyo zyabo zibe zyabuyo. Jehova wakababuzya kuti: “Zipaizyo zyanu zinji zili amilimonzi kulindime? . . . Ndizwide zituuzyo zyabagutu amafuta aabanyama baneneede. Nsiyandi bulowa bwabacende na bwatubelele na bwampongo. . . . Mutaleti limbi zipaizyo zyabuyo. Tununkilizyo tulandisesemya.” Ncinzi cakalubide? Leza wakabaambila kuti: “Nekuba kuti mwakomba zikombyo zinji, nsikooyooswiilila. Maanza aanu alizwide bulowa. Amusambe, mulisalazye. Amugwisye bubi bwamilimo yanu kumeso aangu. Amuleke kucita bubi.”—Is. 1:11-16.
16. Ncinzi cipa kuti Leza acitambule cituuzyo naa pe?
16 Jehova tanaakali kuzikkomanina zituuzyo zyakali kupegwa abasizibi bateempwi. Nokuba boobo, mipailo alimwi azipo zyabaabo ibakali kusoleka kupona kweelana amalailile aa Leza zyakali kutambulwa kulinguwe. Zyintu zijatikizya Mulawo zyakali kuyiisya bantu bali boobo kuti bakali basizibi alimwi bakali kuyandika kulekelelwa. (Gal. 3:19) Kuzyiba kaambo aako kwakali kubapa kuusa akuyanda kulekelelwa. Mbubwenya buyo, mazuba aano tweelede kuzyiba kuti tuyandika cituuzyo ca Kristo, calo cikonzya kumana zibi. Kuti katuciteelelesya eeci, akucilumba, nkokuti Jehova “uyookondwa” azyintu zyoonse nzyotumupa mumulimo ngotwakalyaaba kucita.—Amubale Intembauzyo 51:17, 19.
AMUBE ALUSYOMO MUCIPAIZYO CA JESU
17-19. (a) Mbuti mbotukonzya kutondezya kulumba kuli Jehova akaambo kacipaizyo cacinunuzyo ca Jesu? (b) Ncinzi ciyoolangwa-langwa mucibalo citobela?
17 Bubotu mbotujisi kwiinda baabo bakapona Bunakristo kabutanatalika mbwakuti tatukkutili kubona buyo ‘cimvwule’ camakanze aa Leza. (Heb. 10:1) Milawo iijatikizya kupa zituuzyo yakayumya-yumya ba Juda kuba amuuya mubotu wakuba acilongwe cibotu a Leza—kumulumba amoyo woonse, akumupa zyintu ziinda kubota alimwi akuzyiba kuti tuyandika kunununwa. Tulalumba akaambo kabupanduluzi bwamu Magwalo aa Banakristo aa Cigiliki, tulakonzya kumvwisya kuti kwiinda mucinunuzyo, Jehova uyoogusya zyintu ziletwa acibi alimwi akuti noliba lino ulatugwasya kuba amanjezeezya mabotu kulinguwe. Cipaizyo cacinunuzyo ca Jesu mbubambe bubotu kapati.—Gal. 3:13; Heb. 9:9, 14.
18 Nokuba boobo, ikucimvwisya kapati cipaizyo cacinunuzyo kulayandika kutegwa citugwasye. Mwaapostolo Paulo wakalemba kuti: “Mulawo waba musolozi wesu uututola kuli Kilisito, ikutegwa twaambwe kuti tuli balulami akaambo kalusyomo.” (Gal. 3:24) Alimwi lusyomo luli boobo lweelede kuti kalujisi milimo. (Jak. 2:26) Aboobo Paulo wakakulwaizya Banakristo bamumwaanda wamyaka wakusaanguna ibakajisi luzyibo lwazyintu zyakali kwaambwa mu Mulawo wa Musa kuti kabalubelesya. Kwiinda mukucita boobo, bukkale bwabo bwakali kuyooendelana anjiisyo zya Leza nzyobakali kuyiisya.—Amubale Baloma 2:21-23.
19 Nokuba kuti Banakristo mazuba aano tabayandiki kutobela Mulawo wa Musa, mbubwenya buyo beelede kupa zipaizyo zitambulika kuli Jehova. Mbotukonzya kucita boobo, ciyoobandikwa mucibalo citobela.
AMUJANE BWIINGUZI KUMIBUZYO EEYI:
․․․․․
Ino zipaizyo zilembedwe mu Mulawo wa Musa zyakali kwiiminina nzi?
․․․․․
Nkukozyanya nzi kuliko kujatikizya zipaizyo zyakali kupegwa abana Israyeli azyeezyo zipegwa a Banakristo mazuba aano?
․․․․․
Nzyintu nzi zipa kuti cipaizyo citambulwe kuli Jehova naa pe?
[Mibuzyo yaciiyo]
[Majwi aakwelelezya sikubala aali apeeji 17]
Zyeelelo zya Jehova kubabelesi bakwe, tazicinci pe
[Cifwanikiso icili apeeji 18]
Nguuli munyama ngomwakali kukonzya kupa kuli Jehova?
[Cifwanikiso icili apeeji 19]
Aabo bapa zipaizyo Jehova nzyatambula balakkomana akutambulwa kulinguwe
