Masimpe Eeyi Nje Magazini Yakwiiya!

Magazini yakwiiya yabambululwa kutegwa kaikkomanisya kapati mboiboneka alimwi kutegwa kaimugwasya nomwiiya Jwi lyakasimpe ka Jehova.—Int. 1:2; 119:97.

Kwainda myaka yone notwakatalika kumwaya mamagazini obilo aa Ngazi Yamulindizi, yomwe yabuleya alimwi yomwe yesu toonse—Bakamboni ba Jehova alimwi abasikwiiya Bbaibbele bayaambele kumuuya.

Kujatikizya magazini yakwiiya, mukwesu umwi iwabelekela Jehova kwaciindi cilamfwu wakalemba kuti: “Magazini yakwiiya ya Ngazi Yamulindizi yakusaanguna yakandikkomanisya kapati alimwi yakandisika amoyo. Makani aayandika kapati aamu Bbaibbele aapandululwa mumagazini eeyi yakwiiya akandinjila mumoyo. Ndalumba kapati akaambo kabubambe oobu bubotu.” Aumwi mukwesu wakalemba kuti: “Ndilangila kubelesya ciindi cinji kubala magazini yakwiiya eeyi alimwi akubelesya Bbaibbele lyangu.” Tusyoma kuti andinywe mbomulimvwa oobo.

Mbubwenya mbomuzyi, Ngazi Yamulindizi yali kumwayigwa kuzwa mu 1879, eeci cakonzyeka akaambo kakugwasyigwa amuuya wa Jehova. (Zek. 4:6) Mumyaka eeyi iili 133 yainda, civwumbyo camagazini eeyi cacinca ziindi zinji. Mumwaka wa 2012, magazini yakwiiya iili yoonse aacivwumbyo inoojisi cifwanikiso cibotu citondezya bantu bakambauka, kutuyeezya mulimo wesu ngwatupede Leza wakulungulula makani mabotu aa Bwami bwa Jehova. (Mil. 28:23) Mpoonya apeeji 2, cifwanikiso eeci cinoojisi majwi aapandulula cicitika alimwi akubusena nkocakacitikila. Eeci cinootuyeezya toonse mumwaka woonse wa 2012 kuti bantu ba Jehova balakambauka makani mabotu “munyika yoonse.”—Mt. 24:14.

Nkucinca nzi kumbi kwacitwa mumagazini eeyi? Kabbokesi kakwiinduluka kaletwa kumatalikilo aacibalo cakwiiya cilicoonse. Eeci ciyoomutondezya twaambo tupati-pati ntomweelede kulangaula nomubala akwiiya cibalo eeco. Cakutadooneka, kumamanino aaciiyo beendelezya ciiyo ca Ngazi Yamulindizi bayoozumanana kubelesya mibuzyo eeyi kwiinduluka twaambo tupati-pati twayiigwa. Muyoobona kuti cibeela camumabali-bali aamincali cakomezyegwa alimwi manamba aamapeeji amincali alalibonya kapati.

Mbubwenya mbokwapandululwa mumagazini eeyi, cibeela cipya cakuti “Makani Eesu Aakaindi,” cabikkilizyigwa kutegwa citondezye kuyaambele kwacitika kujatikizya Bakamboni ba Jehova bamazuba aano. Alimwi, zimwi ziindi makani aajatikizya bakwesu anoojanika ansi amutwe wakuti “Bakalyaaba Amoyo Woonse.” Makani aaya anoopandulula lukkomano, kukkutila alimwi akukondwa nkobakajana bakwesu abacizyi akaambo kakubelekela kubusena kubulide basikumwaya ba Bwami.

Amukkomane kwiiya Jwi lya Leza kwiinda mukugwasyigwa amagazini eeyi.

Basikumwaya

[Cifwanikiso icili apeeji 3]

1879

[Cifwanikiso icili apeeji 3]

1895

[Cifwanikiso icili apeeji 3]

1931

[Cifwanikiso icili apeeji 3]

1950

[Cifwanikiso icili apeeji 3]

1974

[Cifwanikiso icili apeeji 3]

2008