‘Amuyume Akuba Basicamba’
‘Amuyume Akuba Basicamba’
‘Amuyume akuba basicamba . . . Jehova Leza wanu uli aandinywe.’—JOS. 1:7-9.
INO INGA MWAINGULA BUTI?
․․․․․
Muunzila nzi ba Enoki a Nowa mobakatondezya busicamba?
․․․․․
Mbuti bamakaintu bamwi bakaindi mbobakapa cikozyanyo cibotu calusyomo abusicamba?
․․․․․
Nzikozyanyo nzi zyabakubusi zitondezya busicamba izimukkomanisya?
1, 2. (a) Ncinzi ciyandika zimwi ziindi kutegwa tube abukkale bubotu mubuumi? (b) Ncinzi ncotutiilange-lange mucibalo eeci?
BUSICAMBA caamba kutayoowa, kutaba ansoni alimwi akubula bukandu. Muntu sicamba inga twamwaamba kuti muntu muyumu, uuzumanana alimwi uukakatila. Zimwi ziindi kuyandika busicamba kutegwa tube abukkale bubotu mubuumi bwabuzuba abuzuba.
2 Bamwi bantu ibakaindi tiibakali kuyoowa nimuba mubukkale bukatazya kapati. Bamwi bakatondezya busicamba mubukkale bukozyenye abwababelesi ba Jehova banji. Ncinzi ncotukonzya kwiiya kuzikozyanyo eezyi zyamu Bbaibbele zyabusicamba? Mbuti mbotukonzya kuba basicamba?
BAKAMBONI BASICAMBA MUNYIKA MBYAABI
3. Ncinzi ncaakasinsima Enoki kujatikizya bantu babyaabi?
3 Kalitanacitika Zambangulwe, kwakali kuyandika busicamba kutegwa muntu abe kamboni wa Jehova akati kabantu babyaabi. Pele, Enoki “imuntu waciloba mumulongo kuzwa kuli Adamu,” cabusicamba wakaamba mulumbe ooyu wabusinsimi wakuti: “Amubone! Jehova wakaboola amakumi-makumi aazyuulu zyabangelo bakwe basalala, kuti abeteke bantu boonse, akubazula boonse basampaula Leza mumicito yabo iisampaula Leza njobakacita munzila iisampaula Leza, alimwi akujatikizya zyintu zyoonse ziyumya mate nzyobakali kumwaamba basizibi basampaula Leza.” (Jud. 14, 15) Enoki wakaamba businsimi oobu mbuli kuti bwakacitika kale nkaambo wakali masimpe kuti buyoozuzikizyigwa. Alimwi bantu babi bakanyonyoonwa ncobeni azambangulwe.
4. Muubukkale buli buti Nowa ‘mwaakali kweenda a Leza’?
4 Zambangulwe lyakacitika mu 2370 B.C.E., myaka iinda ku 650 kuzwa ciindi Enoki naakafwa. Lino Nowa wakazyalwa, wakaba amukwasyi alimwi walo abana bakwe bakapanga bwato. Bangelo babyaabi bakalisamika mibili yabantu akoonana abamakaintu babotu akuzyala Babbabbani. Bubi bwabantu bwakayoosya alimwi nyika yakazula luuni. (Matl. 6:1-5, 9, 11) Nokuba kuti wakali mubukkale buli boobo, “Nowa wakali kweenda a-Leza” alimwi wakapa bumboni kali “mukambausi wabululami.” (Amubale 2 Petulo 2:4, 5.) Tuyandika busicamba buli boobu mazuba aano aamamanino.
BAKATONDEZYA LUSYOMO ABUSICAMBA
5. Mbuti Musa mbwaakatondezya lusyomo alimwi abusicamba?
5 Musa wakapa citondezyo cibotu calusyomo alimwi abusicamba. (Heb. 11:24-27) Kuzwa mu 1513 B.C.E. kusika mu 1473 B.C.E., Leza wakabelesya Musa kusololela bana Israyeli kuzwa mu Egepita alimwi akwiinda munkanda. Nokuba kuti Musa wakali kulimvwa kuti teeleli kucita mulimo ooyu, wakaucita. (Kul. 6:12) Walo amunyina Aroni cakwiinduluka-induluka bakaunka kuli Farao silunya waku Egepita alimwi cabusicamba bakaambilizya Zipenzyo Zili Kkumi nzyaakabelesya Jehova kuusya nsoni baleza ba Egepita alimwi akufwutula bantu bakwe. (Kul., caandaano 7-12) Musa wakatondezya lusyomo alimwi abusicamba nkaambo wakali kugwasyigwa a Leza, mbubwenya mbotucita andiswe.—Dt. 33:27.
6. Mbuti mbotukonzya kupa bumboni cabusicamba ciindi nitubuzyigwa-buzyigwa abeendelezi bamfwulumende?
6 Tuyandika busicamba mbubwenya mbuli Musa nkaambo Jesu wakaamba kuti: “Muyooabwa kubeendelezi abami akaambo kandime kuti bukabe bumboni kuli mbabo akuli bamasi. Pele ciindi nibamutola, mutalibiliki kuti muyooamba buti naa muyooamba nzi, nkaambo nzyomweelede kwaamba muyoopegwa aciindi eeco, nkaambo tamuli ndinywe mwaambaula, pele muuya wa Uso nguwaambaula kwiinda mulindinywe.” (Mt. 10:18-20) Ikuti naa twaangwa akubuzyigwa-buzyigwa abeendelezi bamfwulumende, muuya wa Jehova uyootugwasya kupa bumboni cabulemu katujisi lusyomo abusicamba.—Amubale Luka 12:11, 12.
7. Nkaambo nzi Joshua ncaakali sicamba alimwi ancaakazwidilila?
7 Kwiiya Mulawo wa Leza lyoonse kwakayumya lusyomo lwa Joshua iwakabweza busena bwa Musa alimwi akumupa kuba sicamba. Mu 1473 B.C.E., bana Israyeli bakalilibambilide kunjila munyika Yakasyomezyedwe. Leza wakabaambila kuti: ‘Amuyume akuba basicamba.’ Kwiinda mukutobela Mulawo, Joshua wakali kuyoocita zyintu camaano alimwi akuzwidilila. Wakaambilwa kuti: “Utakankami nikuba kuyoowa, pe, nkaambo Jehova Leza wako uli ayebo koonse koonse nkoya.” (Jos. 1:7-9) Eelo kaka akamuyumya-yumya majwi aaya Joshua! Cakutadooneka, Leza wakali anguwe nkaambo mumyaka buyo iili cisambomwe mu 1467 B.C.E, wakamanizya kuzunda Nyika Yakasyomezyedwe.
BAMAKAINTU BASICAMBA IBAKABWEZA NTAAMU
8. Ncikozyanyo nzi Rahabu ncaakapa mumakani aalusyomo abusicamba?
8 Kwamyaanda yamyaka, bamakaintu banji cabusicamba bakabweza ntaamu kabali bakombi ba Jehova. Mucikozyanyo, sibwaamu Rahabu waku Jeriko wakatondezya lusyomo muli Leza, cabusicamba wakasisa basikutwela bobilo mbaakatuma Joshua, mpoonya baiminizi bamwami wakabatondezya nzila iimbi. Walo alimwi abanamukwasyi wakwe bakafwutulwa ciindi bana Israyeli nibakazunda Jeriko. Rahabu wakaileka micito yakwe mibi, wakaba mukombi wa Jehova uusyomeka, mpoonya wakaba umwi wabamakaapanyina ba Mesiya. (Jos. 2:1-6; 6:22, 23; Mt. 1:1, 5) Rahabu wakalelekwa akaambo kalusyomo abusicamba bwakwe.
9. Muunzila nzi Debola, Baraki a Jaeli mobakatondezya busicamba?
9 Joshua naakafwa muma 1450 B.C.E., babetesi bakabikkila maano kubona kuti kwaba bululami mu Israyeli. Nikwakainda myaka iili 20 bana Israyeli kabapenzyegwa a Mwami Jabini, Leza wakatuma musinsimi mwanakazi Debola kutegwa aambile Mubetesi Baraki kubweza ntaamu. Baraki wakabunganya baalumi bali 10,000 a Cilundu ca Tabori alimwi wakalilibambilide kubalwana basikalumamba ba Jabini ibakali kusololelwa asilutwe wampi Sisera. Sisera wakanjila mukkuti lya Kisoni abasikalumamba bakwe ibakajisi nkalaki zyankondo zisika ku 900. Ciindi bana Israyeli nibakaunka mukkuti, Leza wakaleta mvwula mpati yalo yakapa kuti busena bwakulwanina bulobe, mpoonya nkalaki zyabana Kanana zyakanjomba. Baalumi ba Baraki bakazunda, ‘basimpi boonse iba Sisera bakajaigwa apanga.’ Sisera wakatijila mutente ya Jaeli, pele Jaeli wakamujaya Sisera ciindi naakali koona. Kweelana amajwi aabusinsimi aa Debola ngakaambila Baraki, “bulemu” bwakuzunda bwakapegwa kumukaintu, Jaeli. Akaambo kakuti Debola, Baraki a Jaeli bakali basicamba, nyika yabana Israyeli “yakaumuna myaka iili makumi one.” (Bab. 4:1-9, 14-22; 5:20, 21, 31) Mazuba aano, bamaalumi abamakaintu banji balatondezya lusyomo abusicamba mbuli babelesi ba Leza bakaindi.
MAJWI EESU ALAKONZYA KUBAKULWAIZYA BAMWI KUBA BASICAMBA
10. Nkaambo nzi ncotukonzya kwaamba kuti majwi eesu alakonzya kubakulwaizya bamwi kuba basicamba?
10 Nzyotwaamba zilakonzya kubakulwaizya aabo mbotukomba limwi Jehova. Mumwaanda wamyaka wa 11 B.C.E., Mwami Davida wakaambila mwanaakwe Solomoni kuti: ‘Koliyumya akuba sicamba, ukaicite. Utayoowi nikuba kukankama, nkaambo Leza Jehova, Leza wangu, uli ayebo. Takooyookuleka nanka kukusia, mane milimo yoonse yakubelekela iŋanda ya Jehova imane.’ (1 Mak. 28:20) Solomoni wakabeleka cabusicamba akuyaka tempele lya Jehova libotu mu Jerusalemu.
11. Ino majwi aabusicamba ngaakaamba musimbi muna Israyeli akamugwasya buti mwaalumi umwi mubuumi bwakwe?
11 Mumwaanda wamyaka wakkumi B.C.E., majwi ngaakaamba cabusicamba mwana musimbi muna Israyeli akamugwasya kapati muntu iwakali sicinsenda. Ooyu musimbi wakajatwa abasikalumamba basikusaala mpoonya wakaba mubelesi wa Naamani silutwe wampi yabana Aramu. Akaambo kakuti musimbi ooyu wakalizyi maleele Jehova ngaakacita kwiinda muli Elisha, wakaambila muka Naamani kuti balumi bako balakonzya kupona ikuti baunka kumusinsimi wa Leza mu Israyeli. Naamani wakaunka ku Israyeli, camaleele wakasilikwa alimwi wakazooba mukombi wa Jehova. (2 Bam. 5:1-3, 10-17) Ikuti naa mucili mukubusi alimwi mulamuyanda Leza mbuli musimbi ooyu muna Israyeli, Leza ulakonzya kumugwasya kuba basicamba kutegwa mubakambaukile bamayi banu, basicikolonyoko, abantu bambi buyo.
12. Ino majwi aa Mwami Hezekiya akabajatikizya buti bantu bakwe?
12 Majwi aabelesyegwa kabotu ciindi camapenzi alakonzya kukulwaizya busicamba. Mumwaanda wamyaka walusele B.C.E., ciindi bana Asuri nibakali kuyanda kulwana Jerusalemu, Mwami Hezekiya wakaambila bantu kuti: “Amuliyumye akuba basinguzu. Mutayoowi nikuba kukankama kubusyu bwamwami wa-Asuri abantu banji mbali abo, nkaambo mbotuli abo mbanji kwiinda mbajisi walo. Walo ulijisi kuboko kwanyama buyo, anukuti iswe, Jehova Leza wesu nguutugwasya akulwa munkondo zyesu.” Ino bantu bakacita buti nibakamvwa majwi aaya? Bbaibbele lyaamba kuti: “Bantu bakasyoma majwi aa-Hezekiya mwami wa-Juda.” (2 Mak. 32:7, 8) Majwi aali boobu alakonzya kutugwasya kuba basicamba alimwi alakonzya kubagwasya Banakristo bamwi ciindi nitupenzyegwa.
13. Nciiyo nzi ncotujana kuli Obadiya mubanzi wa Mwami Ahabu?
13 Zimwi ziindi busicamba bulakonzya kutondezyegwa kwiinda muzyintu nzyotucita kutali nzyotwaamba. Mumwaanda wamyaka wakkumi B.C.E., Obadiya mubanzi wa Mwami Ahabu, cabusicamba wakasisa basinsimi ba Jehova bali 100 ‘mumpangala mumwi makumi osanwe amumwi makumi osanwe’ kutegwa batajaigwi a Mwami mwanakazi mubyaabi Jezebeli. (1 Bam. 18:4) Mbubwenya mbuli Obadiya iwakali kuyoowa Leza, babelesi ba Jehova basyomeka banji mazuba aano cabusicamba balabakwabilila bakombinyina kwiinda mukutaambila babapenzya makani aajatikizya mbabo.
ESITA—MWAMI MWANAKAZI SICAMBA
14, 15. Ino Esita Mwami mwanakazi wakatondezya buti lusyomo abusicamba, alimwi ncinzi cakatobela?
14 Esita Mwami mwanakazi wakatondezya lusyomo abusicamba ciindi nikwakaba makanze aakatalisyigwa a Hamani mubyaabi aakujaya ba Juda boonse mu Bwami bwa Persia mumwaanda wamyaka wasanu B.C.E. Nkakaambo kaako ba Juda ncobakalila akuliimya kulya alimwi bakapaila kuzwa aansi amoyo. (Es. 4:1-3) Esita Mwami mwanakazi wakatyompwa kapati. Mweeninyina Moodekai wakamutumina lugwalo lupa mulawo wakujaya akumwaambila kuti aambile mwami kuti abavwune ba Judanyina. Pele kufwumbwa muntu uunka kumwami kakunyina kwiitwa wakeelede kujaigwa.—Es. 4:4-11.
15 Moodekai wakaambila Esita kuti naa takoounka kumwami, Jehova uyoobelesya nzila iimbi kutegwa avwune ba Juda. Moodekai alimwi wakaamba kuti kaambo nkaakabeda mwami mwanakazi Esita kakali kakugwasya bantu ba Jehova. Esita wakaambila Moodekai kuti abunganye ba Juda mu Susa alimwi baliimye kulya akaambo kanguwe. Naakaamba kuti: “Ime abalo bandilindilila tuyakuliimya mbuli ndinywe; elyo ndaya kumwami nekuba kuti ndatyola mulao. Kuti ndafwa, ndafwa.” (Es. 4:12-17) Esita wakacita cabusicamba alimwi bbuku liitwa azyina lyakwe litondezya kuti Leza wakavwuna bantu bakwe. Mumazuba eesu, Banakristo bananike alimwi abeenzinyina balyaabide balatondezya busicamba buli boobo nibali mumapenzi alimwi ‘uuswiilila mipailo’ uli ambabo lyoonse.—Amubale Intembauzyo 65:2; 118:6.
“KOBA ACAMBA”
16. Nciiyo nzi ncobaiya bakubusi besu kucikozyanyo ca Jesu?
16 Ciindi cimwi mumwaanda wamyaka wakusaanguna C.E., Jesu naakajisi myaka yakuzyalwa iili 12 “bakamujana mutempele kakkede akati kabamayi kaswiilila akubabuzya mibuzyo.” Kuyungizya waawo, “boonse aabo bakali kumuswiilila bakali kwiile kulijata kumulomo akaambo kabusongo mbwaakajisi alimwi ambwaakali kwiingula.” (Lk. 2:41-50) Nokuba kuti wakali muniini, Jesu wakalijisi lusyomo abusicamba ibwakali kuyandika kutegwa abuzye bamayi bapati kutempele. Kuyeeya cikozyanyo ca Jesu kuyoobagwasya bakubusi ibali mumbungano ya Bunakristo kuzibelesya zyoolwe zyoonse kutegwa ‘baliiminine kumuntu uuli woonse uukonzya kubabuzya kaambo kajatikizya bulangizi mbobajisi.’—1 Pe. 3:15.
17. Nkaambo nzi Jesu ncaakaambila basikwiiya bakwe kuti ‘kamuba acamba,’ alimwi nkaambo nzi ncotuyandika kucita zyintu cabusicamba?
17 Jesu wakakulwaizya bamwi kuti: “Koba acamba.” (Mt. 9:2, 22) Wakaambila basikwiiya bakwe kuti: “Amubone! Ciindi cilasika, masimpe casika kale, nomutiimwaikizyanye kuya mwanu-mwanu eelyo mulandisiya ndelikke; nokuba boobo tandili ndelikke nkaambo Taata uli andime. Ndamwaambila zyintu eezyi kutegwa kwiinda mulindime mube aluumuno. Munyika munoojisi mapenzi, pele amuyume! Mebo ndaizunda nyika.” (Joh. 16:32, 33) Mbubwenya mbuli basikutobela Jesu bakusaanguna, nyika taituyandi, pele tatweelede kuba mbuli bantu bamunyika. Ikuyeeya busicamba bwa Mwana aa Leza cilakonzya kutupa busicamba kutegwa tuzumanane kusalala munyika eeyi. Jesu wakaizunda nyika andiswe tulakonzya kwiizunda.—Joh. 17:16; Jak. 1:27.
18, 19. Ino mwaapostolo Paulo wakapa bumboni nzi bwalusyomo abusicamba?
18 Mwaapostolo Paulo wakaliyumya mumasunko manji. Ciindi cimwi, nibatakali basikalumamba bana Roma ibakamuvwuna, ba Juda bamu Jerusalemu nibakamujaya. Masiku aayo, “Mwami wakaima munsi lyakwe akwaamba kuti: ‘Koba aacamba! Nkaambo mbubonya mbowali kundilungulula mu Jelusalemu, weelede kuyoolungulula mbubonya akwalo ku Loma.’” (Mil. 23:11) Paulo wakacita mbubwenya oobo.
19 Cabusicamba Paulo wakasinsa ‘batumwa bacibwene kwiinda boonse,’ ibakali kuyanda kusofwaazya mbungano mu Korinto. (2 Ko. 11:5; 12:11) Mukwiimpana ambabo, wakali kukonzya kupa bumboni bwakali kusinizya kuti wakali mwaapostolo—kwaangwa, kuumwa, nyendo zyantenda, muntenda zimbi, mukufwa nzala anyota, mukutoona masiku kanji-kanji alimwi akulibilika kapati kujatikizya basyominyina. (Amubale 2 Bakolinto 11:23-28.) Eelo kaka wakalijisi lusyomo abusicamba—zyoonse zisinizya kuti nguzu zizwa kuli Leza!
20, 21. (a) Amupe cikozyanyo citondezya kuti tulakonzya kuzumanana kuba basicamba. (b) Muubukkale buli buti motweelede kutondezya busicamba, alimwi ncinzi ncotukonzya kusinizya?
20 Tabali boonse Banakristo ibayoopenzyegwa kapati. Pele boonse beelede kuba basicamba kutegwa bacikonzye kulwana mapenzi mubuumi. Mucikozyanyo: Mukubusi umwi ku Brazil wakanjide mukabunga kazigwebenga. Naakaiya Bbaibbele, wakabona kuti wakali kuyandika kucinca, pele kufwumbwa iwakali kuzwa mukabunga aaka, kanji-kanji wakali kujaigwa. Wakapaila akubelesya magwalo kutondezya musololi wakabunga ncaakali kuyandila kuzwa mukabunga. Mukubusi ooyo wakazumizyigwa kakunyina kusubulwa alimwi wakaba sikumwaya wamakani mabotu aa Bwami.
21 Busicamba bulayandika mukukambauka makani mabotu. Banakristo bakubusi balayandika kuba abube oobu kutegwa bazumanane kusyomeka kucikolo. Inga kwayandika kuba aacamba kulomba ciindi kumulimo kutegwa tukajanike kuzibeela zyoonse kumuswaangano wacooko. Mulongo ulakonzya kuzumanana. Kufwumbwa naa tujana mapenzi nzi, Jehova uyooiswiilila ‘mipailo yesu yalusyomo.’ (Jak. 5:15) Mubwini ulakonzya kutupa muuya wakwe uusalala kutegwa tucikonzye ‘kuyuma akuba basicamba.’
[Mibuzyo yaciiyo]
[Cifwanikiso icili apeeji 11]
Enoki wakakambauka cabusicamba munyika mbyaabi
[Cifwanikiso icili apeeji 12]
Jaeli wakali sicamba alimwi muyumu
