Bakakambauka Jwi lya Leza Cabusicamba!

Busicamba ciindi nitukazyigwa. Banakristo bakasimpe balabutondezya bube oobu. Mbubwenya mbuli bakombima bamumwaanda wakusaanguna, tulapaila kuli Jehova kulomba muuya wakwe kutegwa tukambauke jwi lyakwe cabusicamba.—Mil. 4:23-31.

Mukwesu umwi wakaamba boobu kujatikizya mulimo wesu ciindi cankondo yakusaanguna: “Babelesi ba Leza bakaluujisi kwaabila mavolyumu aali ciloba aabbuku lyakuti Studies in the Scriptures, ilyakajisi mutwe wakuti The Finished Mystery. Bbuku eeli lyakamwaigwa kwiinda mabbuku manji. Kapepa ka Makani aa Bwami Na. 1 kakamwaigwa mu 1918. Icakatobela, nkapepa ka Makani aa Bwami Na. 2, ikakali kupandulula kaambo bbuku lya The Finished Mystery ncolyakali kukasyigwa amfwulumende. Kumane kwakatobela kapepa ka Makani aa Bwami Na. 3. Tupepa ootu twa Makani aa Bwami twakamwaigwa mumasena manji abaciinga cabananike basyomeka. Kwakali kuyandika lusyomo alimwi abusicamba kutegwa twaabile tupepa ootu twa Makani aa Bwami.”

Mazuba aano, basikumwaya ba Bwami balayiisyigwa mbobeelede kukambauka, pele kaindi tabusi mbocakali kucitika oobo lyoonse. Mukwesu umwi waku Poland lino uukkala ku United States wakaamba boobu kujatikizya cakamucitikila mu 1922 ciindi naakaunka mumulimo wakukambauka ciindi cakusaanguna, wakati: “Tiindakacizyi mbokwaabilwa mabbuku alimwi tiindakacizyi kabotu Cikuwa, nokuba boobo ndakakonkomona endikke amulyango waofesi yaba dokota. Nasi wakajalula mulyango. Tandikacilubi cakacitika nkaambo ndakakkomana nikuba kuti ndakaliyoowede. Nindakali kujalula cibbeeke, mabbuku oonse akawida kumaulu aa nasi. Tandiyeeyede ncindakaamba, pele ndakamwaabila bbuku lyomwe. Eeci cakandipa kuba abusicamba alimwi ndakalimvwa kuti Jehova wandilongezya. Ndakaabila tumabbuku tunji mubuzuba oobo mumugwagwa mobacitila makwebo.”

Mucizyi umwi wakaamba kuti: “Muma 1933, bakwesu banji bakali kubelesya myootokala iijisi zyakwaambawida kumwaya mulumbe wa Bwami.” Ciindi cimwi mucizyi ooyu alimwi abanabukwetene Bakamboni bakali kukambaukila mubusena bwamalundu mu California ku U.S.A. Mucizyi ooyu wakaamba kuti: “Mukwesu wakatola mootokala atala azilundu, mpoonya swebo twakacaala ansi mudolopo. Ciindi naakatalika kulizya mulumbe wakalekkoodwa, majwi akali kulimvwisya mbuli kuti akali kuzwa kujulu. Bantu bamudolopo bakasola kumulangaula mukwesu, pele kunyina nibakamujana. Mukwesu naakamanizya kulizya mulumbe, twakabatamba bantu akubakambaukila. Ndakabeleka amyootokala yobilo yakajisi zyakwaambawida, pele kwaamba masimpe bantu kunyina nibakali kuyanda kuumvwa mulumbe. Nokuba boobo, kunyina ncobakali kunga bacita kutegwa bataswiilili kumakani mbwaanga mulumbe wakali kubasikila mumaanda aabo. Twakabona kuti Jehova lyoonse ubelesya nzila mbotu aciindi ceelede. Nzila eeyi yakali kuyanda kuti tube basicamba, pele nokuba boobo lyoonse yakaazuzikizya makanze alimwi zyina lya Jehova lyakalemekwa.”

 Mumyaka yamuma 1930 alimwi akumatalikilo aamyaka yamuma 1940, malekkoodi alimwi amakani aamu Bbaibbele aakalekkoodwa akali kubelesyegwa mumulimo wesu. Mukaintu umwi Munakristo waamba kuti: “Mucizyi umwi mukubusi wakali kubeleka mumulimo wakuŋanda aŋanda kabelesya malekkoodi. Naakatalika kulizya malekkoodi aŋanda imwi, mwaalumi uulaaŋanda wakanyema kapati cakuti wakaubbakela muncini uubelesya malekkoodi kuzwa mukkoce lyaŋanda. Nokuba boobo kunyina malekkoodi aakapwayika. Baalumi botatwe ibakali kususula mumootokala wabo mupati bakabona cakacitika, bakamutamba mucizyi kuti abalizyile malekkoodi, alimwi bakabweza mabbuku kulinguwe. Eeco cakamuumbulizya akaambo kalunya lwakacitwa kulinguwe.” Kwakali kuyandika busicamba kuliyumya mumapenzi aali boobo.

Mucizyi ooyo wakayungizya kuti: “Ndilayeeya mulimo wakwaabila mamagazini mumugwagwa mbowakabede mu 1940. Kumatalikilo twakali kweenda mumulongo kumwaya makani. Bakwesu abacizyi bakali kweenda mumulongo omwe munzila kabanyamwide zikwankwani zilembedwe kuti ‘Religion Is a Snare and a Racket’ (‘Cikombelo Nkakole alimwi Cilanyonganya’) alimwi azikwankwani zyakalembedwe kuti ‘Serve God and Christ the King.’ (‘Amubelekele Leza a Kristo Mwami.’) Kunze lyaboobo, matulakiti akali kupegwa kubantu kakunyina kubabbadelesya. Kwakali kuyandika busicamba kutola lubazu mumbazu zyamulimo ooyu, pele zyakagwasya kuzyibya zyina lya Jehova abantu bakwe kubanamaleya.”

Mucizyi aumbi wakaamba kuti: “Cakali kukatazya kapati kucita mulimo wakwaabila mamagazini mumadolopo masyoonto. Eeci cakali kucitika ciindi Bakamboni nibakali kukazyigwa kapati. . . . Kwakali kuyandika busicamba kwiima amamagazini mumaanza akwaamba majwi aakali kuyandika kubelesya mumulimo ooyu. Nokuba boobo, kanji-kanji mu Mujibelo twakali kubeleka. Zimwi ziindi bantu bakali balongwe. Ziindi zimwi, kwakali kuba nkamu zyalunya alimwi kanji-kanji twakali kuloboka kutegwa tutajatikizyigwi ankamu zyalunya.”

Nikuba kuti bakali kupenzyegwa ciindi ca Nkondo Yanyika Yabili, Bakamboni ba Jehova bakaucita mulimo wabo cabusicamba. Mumulimo wakutamba iwakatola mazuba aali 43 kuzwa mu December 1, 1940, kusika mu January 12, 1941, basikumwaya babalilwa ku 50,000 mu United States bakamwaya tubbuku tutandila ku 8,000,000.

Bakwesu banji bakaindi mumbunga ya Leza balabuyeeya kabotu buyumuyumu bwakaliko kaindi mwalo mobakali kuyandika kuba basicamba. Bamwi balayeeya kuti kwamyaka minji busicamba bwabo bwakali kutondezyegwa mumajwi ngobakali kubelesya kanji-kanji aakuti, atuzumanane kukambauka kusikila kumamanino. Nzila ziyoobelesyegwa mumulumbe ngwatupede Leza mamanino aabweende bwazyintu oobu kaatanasika zilizyibidwe. Nokuba boobo, kwiinda mukugwasyigwa a Leza, tuyoozumanana kwaambilizya jwi lya Jehova calusyomo alimwi cabusicamba.

[Majwi aakwelelezya sikubala aali apeeji 9]

Lyoonse busicamba bwali kuyandika nitucita mulimo wakukambauka Bwami