“Icakapa Kuti Bandizyibe”
Makani Eesu Aakaindi
“Icakapa Kuti Bandizyibe”
Mukambausi waciindi coonse Charlotte White naakasika ku Louisville, Kentucky, mu U.S.A., kakwela kabbokesi kampasya ikajisi mavwili, bantu banji bakamubona.
Mwakali mumwaka wa 1908, alimwi cakutadooneka mucizyi White wakapa kuti bantu banji mudolopo bamubikkile maano akaambo kacintu cipya eeci ncaakajisi citegwa Dawn-Mobile. Wakaamba kuti: “Bantu bakali kwaamba-amba kujatikizya bbokesi eeli calo icakapa kuti bandizyibe.”
Bakamboni ba Jehova, ibakali kwiitwa kuti Basikwiiya Bbaibbele eeco ciindi, bakabona kuti cakali kuyandika kwaambila bamwi kasimpe kataliboteli aaka nkobakaiya kuzwa mu Magwalo. Banji bakajana luzyibo lwamu Bbaibbele kwiinda mumabbuku aategwa Millennial Dawn (alimwi akazootalika kwiitwa kuti Studies in the Scriptures). Aabo Banakristo bakali kuyanda alimwi ibakali kucikonzya bakali kweenda misinzo milamfwu mumadolopo amuminzi kutegwa baabile mabbuku aaya basikubala bamwi ngobakali kwiita kuti “Helping Hands for Bible Students” (Lugwasyo Kuli Basikwiiya Bbaibbele).
Mu 1908, mucizyi White alimwi abakambausi ba Bwami ibamwi basungu bakali kwaabila mavolyumu aali cisambomwe aabbuku eeli lyakajisi civwumbyo cacisani aamali aasika ku K7,920.00. Muciindi cakubapeda limwi bamukamwini ŋanda mabbuku aategwa Dawn, bakali kubweza buyo maoda abaabo ibaayanda akujokela aciindi cimwi ikanji-kanji mubuzuba bantu nibavwola kutegwa batole mabbuku aaya alimwi akubweza mali, alo aakali kukkwana buyo mali aakusimbila mabbuku aaya. Umwi sikukazya wakatongooka kujatikizya kuceya kwamali bantu ngobakali kusanga babweza mabbuku aaya.
Ba Malinda Keefer bakaamba kuti zimwi ziindi bakali kubweza maoda aamabbuku aasika ku 200 naa 300 mumvwiki. Pele luyandisisyo lupati ndobakajisi bantu mumabbuku aa Dawn kwakaleta penzi. Munzila nzi? Ivolyumu lyomwe buyo lyacisambomwe lyakajisi mapeeji aali 740. Iba Watch Tower bakaamba kuti, “Mabbuku aali 50 alema 18 kg,” aboobo kwaatola kubusena bweelede “kuyandika nguzu” kwaambisya kubacizyi.
Aboobo, kumana penzi eeli lyakutola mabbuku kumasena aayelede, mukwesu James Cole wakapanga kakunyamwida ikakonzya kupetwa ikajisi mavwili obilo nkobakali kukonzya kwaangilila bbokesi lyampasya. Mukwesu iwakapanga kakunyamwida aaka wakaamba kuti: “Tandikonzyi kutyola makuko angu.” Kuzwa lino taakwe kunyamuna mabbuku aalema. Wakacitondezya cibelesyo cipya eeci ciindi cakusaanguna kubaswiilizi bakakkomene amuswaangano wabasikwiiya Bbaibbele wamu 1908 ku Cincinnati, Ohio. Kumamanino aatubulo tujata bbokesi kwakalembedwe kuti Dawn Mobile, akaambo kakuti kanji-kanji kakali kubelesyegwa kunyamuna mavolyumu aamabbuku aategwa Millennial Dawn. Kakunyina kutola ciindi cilamfwu cakwiiya mbokabeleka, kunyamuna bbokesi lizwide mabbuku cakaba cintu cuubauba cicitwa kwiinda mukubelesya buyo janza lyomwe. Bulamfwu bwakanyamwido aaka bwakali kukonzya kucincwa, alimwi mavwili ankako akali kukonzya kwiinda mwiinda mavwili aacikkocci. Bamana kubeleka mumulimo wamumuunda, mavwili bakali kwaapeta kutegwa bakanyamune kabotu kabbokesi katajisi mabbuku kuya kuŋanda, nibeenda amaulu naa amootokala.
Bacizyi ibakali mumulimo waciindi coonse bakali kupegwa Dawn Mobile kakunyina kubbadela, pele mubwini kakali kuulwa mali aasika ku K12,000.00. Mucizyi Keefer, uutondezyedwe acifwanikiso aawa wakalicizyi kapati mbokabelesyegwa ka Dawn Mobile cakuti wakali kukonzya kukakuba ajanza lyomwe kakazwide mabbuku mpoonya akunyamuna mabbuku aambi mucibbeeke kujanza limbi. Mudolopo limwi ku Pennsylvania mu U.S.A., wakali kujana bantu banji bayanda mabbuku, aboobo wakali kuzabuka mulonga wa Allegheny abbiliki ziindi zyotatwe naa zyone buzuba bwakutola mabbuku.
Mu 1987, mwaalumi umwi wakali kweenzya ndeke ngowakali wakusaanguna kupanga cakunyamwida mpasya calo cibelesyegwa kapati mumabbuwa aandeke alimwi amumigwagwa iibelesyegwa kapati mumadolopo. Pele myaka iili 100 yainda, Basikwiiya Bbaibbele basungu bakali kukkomana bantu nibakali kubabikkila maano akaambo katunyamwido twa Dawn Mobile ntobakali kubelesya mukumwaya kasimpe kamu Bbaibbele.
[Majwi aakwelelezya sikubala aali apeeji 32]
Mucizyi Keefer wakali kuzabuka mulonga wa Allegheny abbiliki ziindi zyotatwe naa zyone buzuba bwakutola mabbuku
[Majwi aakwelelezya sikubala aali apeeji 32]
Kakatugwasya kumana penzi lyakunyamuna mabbuku aa Dawn nitwakali kutolela bantu baayanda mumuunda
Andiza Inga Mwaakkomanina Ayaaya
NGAZI YAMULINDIZI—YAKWIIYA
Mbozyakasyangwa Mbuto zya Bwami Zyakusaanguna ku Portugal
Mbuyumuyumu nzi mbobakajisi basikumwaya ba Bwami bakaindi ku Portugal?
NGAZI YAMULINDIZI—YAKWIIYA
Makani Aabuleya Akamwaya Makani Mabotu mu Ireland
Ino ncinzi cakapa C. T. Russell kuti asyome kuti masena aayo wakali muunda “iwakayumide kale kuti utebulwe?”
NGAZI YAMULINDIZI—YAKWIIYA
“Ino Ndilili Notuyooba Amuswaangano Uumbi Alimwi?”
Ncinzi cakapa kuti muswaangano wacooko iwakacitilwa mudolopo lya Mexico, mu 1932, ube muswaangano uulibedelede kapati?
NGAZI YAMULINDIZI—YAKWIIYA
‘Twakaba Basungu Alimwi Twakazula Luyando Mumyoyo Yesu Kwiinda Kaindi’
Nowakamana muswaangano wabo mu 1922, mbuti Basikwiiya Bbaibbele mbobakalutobela lulayo ‘lwakwaambilizya Mwami a Bwami bwakwe’?
NGAZI YAMULINDIZI—YAKWIIYA
“Kunyina Nzila Mbi Alimwi Kunyina Nzila Ndamfwu”
Kumamanino amyaka yakuma 1920 alimwi akumatalikilo kwamyaka yakuma 1930, bapainiya basungu bakatondezya luyandisisyo lwabo lwakutola makani mabotu aa Bwami kuminzi yaku Australia iili kulamfwu kapati.
NGAZI YAMULINDIZI—YAKWIIYA
“Nobasikumwaya ba Bwami mu Britain—Amusinsimuke!!”
Kwakanyina kuyaambele kujatikizya mweelwe wabasikumwaya ba Bwami mu Britain kwamyaka iili 10! Ino ncinzi cakapa kuti kube kuyaambele?
