Mulakonzya Kukkomana Mumukwasyi Momwiindene Bukombi

“Sena tozyi kuti ambweni inga wafwutula [yooyo ngomukwetene limwi]?”—1 KO. 7:16.

INO INGA MWAINGULA BUTI?

․․․․․

Ncinzi Bakamboni ncobakonzya kucita kutegwa kube luumuno nikuba kuti bali mumukwasyi mobaindene bukombi?

․․․․․

Mbuti Kamboni mbwakonzya kugwasya banamukwasyi kutegwa batambule kasimpe?

․․․․․

Ncinzi bamwi mumbungano ncobakonzya kucita kugwasya baabo bali mumikwasyi mobaindene bukombi?

1. Ncinzi ncobakonzya kucita banamukwasyi ikuti umwi watambula mulumbe wa Bwami?

CIINDI cimwi Jesu naakatuma baapostolo bakwe, wakabaambila kuti: “Nomuunka, kamuya bukambauka kuti: ‘Bwami bwakujulu bwaswena afwaafwi.’” (Mt. 10:1, 7) Aaya makani mabotu akali kuyooleta luumuno alukkomano kuli baabo bakali kwaatambula. Nokuba boobo, Jesu wakabacenjezya baapostolo bakwe kuti bantu banji bakali kuyooukazya mulimo wabo wakwaambilizya Bwami. (Mt. 10:16-23) Kukazyigwa kulacisa kapati kuti kwazwa kubanamukwasyi ibatayandi mulumbe wa Bwami.—Amubale Matayo 10:34-36.

2. Nkaambo nzi ncotukonzya kwaamba kuti cilakonzyeka ku Banakristo kukkomana nikuba kuti bali mumukwasyi mobaindene bukombi?

² Sena eeci caamba kuti ikuti kamuli mumukwasyi momwiindene bukombi tamukonzyi kukkomana? Peepe! Nikuba kuti kukazyigwa abanamukwasyi cimwi ciindi kulakonzya kukatazya kapati, pele talili lyoonse nicili boobo. Kufwumbwa mubukkale motubede, ciindi nitukazyigwa abanamukwasyi tulakonzya kukkomana. Kuyungizya waawo, Jehova ulabaleleka aabo basyomeka kulinguwe, kubagwasya kuba bantu bakkomene ciindi nibali mubukkale bukatazya. Kuli zyintu Banakristo nzyobakonzya kucita kutegwa kabakkomene (1) kwiinda mukukulwaizya luumuno aŋanda (2) kwiinda mukusoleka canguzu kugwasya banamukwasyi batali Bakamboni kutegwa batambule kasimpe.

AMUBE ALUUMUNO MUMUKWASYI

3. Nkaambo nzi Banakristo bali mumukwasyi boonse mobatali Bakamboni ncobeelede kuba aluumuno?

³ Kutegwa banamukwasyi batambule kasimpe, kweelede kuba luumuno aŋanda. (Amubale Jakobo 3:18) Nikuba kuti, banamukwasyi tabali Bakamboni boonse, kubeleka canguzu kulayandika kutegwa kube luumuno aŋanda. Mbuti mbotukonzya kucita oobo?

4. Mbuti Banakristo mbobakonzya kuzumanana kuba aluumuno?

 ⁴ Banakristo beelede kuba aluumuno. Kutegwa eeci cikonzyeke, mipailo iizwa ansi aamoyo ilayandika mbwaanga ilakonzya kutuletela “luumuno lwa Leza” lwiinda. (Flp. 4:6, 7) Lukkomano aluumuno lulaboola kwiinda mukuzyiba Jehova alimwi akubelesya njiisyo zyamu Magwalo mubuumi bwesu. (Is. 54:13) Kutola lubazu ciindi camiswaangano alimwi akuba basungu mumulimo wakukambauka kulayandika kapati kutegwa tujane luumuno alukkomano. Kutola lubazu mumilimo ya Bunakristo kulakonzyeka mumikwasyi minji mobaindene bukombi. Mucikozyanyo, ba Enza, * balumi babo mbaasikukazya basilunya. Balacikonzya kutola lubazu mumulimo wakugwasya bamwi kuba basikwiiya bamanizya kucita milimo yaaŋanda. Ba Enza bakaamba kuti: “Jehova wandilongezya kapati mukusoleka kwangu ikwaambila bamwi makani mabotu.” Zilongezyo zili boobu ziletela luumuno, kukkutila alimwi alukkomano.

5. Mbuyumuyumu nzi Banakristo bali mumikwasyi mobaindene bukombi kanji-kanji mbobajana, alimwi ndugwasyo nzi luliko?

⁵ Tweelede kusoleka canguzu kutegwa katumvwana abanamukwasyi batali Bakamboni. Kucita boobo kulakonzya kutuletela buyumuyumu akaambo kakuti nzyobayanda kuti tucite inga tazyeendelani anjiisyo zyamu Bbaibbele. Kukakatila kunjiisyo ziluleme kulakonzya kupa kuti banamukwasyi ibatali Bakamboni banyeme, pele ntaamu iili boobu iletela luumuno mukuya kwaciindi. Tamweelede kukazyanya abanamukwasyi kuti kakunyina njiisyo zyamu Bbaibbele izyasotokwa. (Amubale Tusimpi 16:7.) Ciindi nituli mubuyumuyumu, cilayandika kapati kulangaula lulayo lwamu Magwalo lujanika mumabbuku ngotutambula kuzwa kuciinga camuzike musyomesi uucenjede alimwi akubaalu.—Tus. 11:14.

6, 7. (a) Nkaambo nzi bamwi ncobakazyigwa abanamukwasyi ikuti batalika kwiiya Bbaibbele a Bakamboni ba Jehova? (b) Ncinzi sikwiiya Bbaibbele naa Kamboni ncakonzya kucita ikuti banamukwasyi batalika kumukazya?

⁶ Kutegwa mube aluumuno mumukwasyi momwiindene bukombi mweelede kumusyoma Jehova alimwi akubikkila maano kujatikizya mbobalimvwa banamukwasyi ibatali Bakamboni. (Tus. 16:20) Nibaba basikwiiya Bbaibbele bapya balakonzya kutondezya bupampu munzila eeyi. Bamwi bamaalumi naa bamakaintu batali Bakamboni tabakonzyi kubakasya aabo mbobakwetene limwi kwiiya Bbaibbele. Zimwi ziindi balakonzya kwaamba kuti eeci ncintu cibotu kumukwasyi wesu. Nokuba boobo, bamwi balakonzya kunyema. Ba Esther lino ibakaba Bakamboni, “bakanyema kapati” ciindi balumi babo nibakatalika kwiiya Bbaibbele a Bakamboni ba Jehova. Bakaamba kuti: “Zimwi ziindi ndakali kwaasowa mabbuku naa kwaaumpa.” Ba Howard balo ibakali kukazya bakaintu babo ciindi nibakatalika kwiiya Bbaibbele, bakaamba kuti: “Bamaalumi banji balalibilika kuti andiza bamakaintu babo balacengwa kutegwa banjile mukabunga kabakombi bazangi. Musankwa inga tazyi mbwakonzya kucita kuzyintu nzyayeyeela kuti mbozibede alimwi eeci cibapa kutalika kukazya.”

⁷ Sikwiiya Bbaibbele uuli mukukazyigwa ayooyo ngobakwetene limwi weelede kugwasyigwa kubona kuti teelede kucileka kwiiya Bbaibbele. Kanji-kanji kutegwa amane twaambo weelede kuba amoyo mubombe akutondezya kuti ulamulemeka ooyo ngobakwetene limwi uutali Kamboni. (1 Pe. 3:15) Ba Howard baamba kuti: “Ndilikkomene kapati akaambo kakuti bakaintu bangu kunyina nibakali kunyema.” Bamuka Howard bakaamba kuti: “Ba Howard bakali kuyanda kuti ndicileke kwiiya Bbaibbele. Bakaamba kuti bakali kundeena. Muciindi cakubakazya, ndakabaambila kuti ndiza nzyobaamba nzyamasimpe, alimwi ndakabaambila kuti tandicimvwisyi ncobapandulula. Aboobo, ndakabalomba kuti babale bbuku ndendakali kwiiya. Bakacita oobo,  pele bakaile kwaazuminizya makani ngobakali kubala. Eeci cakabagwasya kapati.” Cili kabotu kuyeeya kuti aabo batali Bakamboni bakwetene a Bakamboni balakonzya kulendelelwa akuyeeya kuti cikwati cabo cilakonzya kumana ikuti ngobakwetene limwi wabasiya kutegwa atole lubazu mumilimo ya Bunakristo, pele kubaambila kuti mulabayanda kapati cakwiinduluka-induluka kulakonzya kugwasya kapati.

AMUBAGWASYE KUTAMBULA KASIMPE

8. Ndulayo nzi mwaapostolo Paulo ndwaakapa Banakristo ibakwetene abantu batali Bakamboni?

⁸ Mwaapostolo Paulo ukulwaizya Banakristo kuti tabeelede kusiya muntu ngobakwetene limwi akaambo kakuti tali Kamboni. * (Amubale 1 Bakolinto 7:12-16.) Kuyeeya kuti ooyo uutali Kamboni ulakonzya kuba Munakristo cilakonzya kumugwasya Kamboni kuzumanana kukkomana nikuba kuti uli mumukwasyi mobaindene bukombi. Nokuba boobo, mukusola kupandulula mulumbe wakasimpe kumuntu uutali Kamboni, kuyandika kubikkila maano kukucenjezya kumwi mbubwenya mbuli mbozitondezya zyakuluula zitobela.

9. Ciindi nitutalika kwaamba kasimpe kamu Bbaibbele kubanamukwasyi batali Bakamboni, nkucenjezya nzi kuyandika kubikkila maano?

⁹ Kabayeeya mbobakali kucita nibakali kwiiya kasimpe, ba Jason baamba kuti, “Ndakali kuyanda kukambaukila kufwumbwa muntu.” Kuti sikwiiya Bbaibbele wabona mbwaali aamasimpe makani ngaiya mu Magwalo ulakonzya kukkomana kapati cakuti ulaabandika-bandika ziindi zinji makani aayo. Ulakonzya kulangila kuti banamukwasyi ibatali Bakamboni balakonzya kuutambula mulumbe wa Bwami mpoona-mpoona, pele ambweni makani mabotu taakonzyi kutambulwa kabotu. Ino busungu bwaba Jason bwakabajatikizya buti bakaintu babo? Bakaintu babo baamba kuti: “Bakatyompwa kapati.” Mukaintu umwi iwakatambula kasimpe myaka iili 18 kuzwa mulumi wakwe naakakatambula waamba kuti, “Mebo ndakali kuyandika kwiiya asyoonto-asyoonto.” Ikuti naa mulasololela ciiyo ca Bbaibbele kuli sikwiiya uukwetene amuntu uutayandi kutola lubazu mubukombi bwakasimpe, mweelede kwiiya lyoonse kutegwa mumugwasye sikwiiya kulanga twaambo cabupampu. Musa wakaamba kuti: “Lwiisyo lwangu luloke mbuli imvula, majwi aangu aseluke mbuli mume, mbuli lusuunsu amweemvwe.” (Dt. 32:2) Kuti twaambo twakasimpe tusyoonto twaambwa kabotu, tulakonzya kugwasya kapati kwiinda twaambo tunji twaambwa aciindi comwe.

10-12. (a) Ndulayo nzi mwaapostolo Petro ndwaakapa Banakristo bakwetene abantu batali Bakamboni? (b) Mbuti sikwiiya Bbaibbele umwi mbwaakaiya kubelesya lulayo lulembedwe mulugwalo lwa 1 Petulo 3:1, 2?

¹⁰ Mwaapostolo Petro wakapa lulayo lwakasololelwa amuuya kubamakaintu Banakristo bakwetwe mumikwasyi mobaindene bukombi.  Wakalemba kuti: “Amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo, akaambo kakulibonena bukkale bwanu busalala antoomwe akuba abulemu kapati.” (1 Pe. 3:1, 2) Mukaintu ulakonzya kumukwelelezya mulumi wakwe kubukombi bwakasimpe kwiinda mukulibombya akutondezya bulemu kapati kulinguwe nikuba kuti mulumi tamulanganyi kabotu. Mbubwenya buyo, kuti mulumi kali Kamboni weelede kulilemeka munzila njayanda Leza akuba mutwe wamukwasyi uujisi luyando nikuba kuti ulakonzya kukazyigwa amukaintu wakwe uutali Kamboni.—1 Pe. 3:7-9.

¹¹ Zikozyanyo zinji zyamazuba aano zilatondezya mbociyandika kubelesya lulayo lwa Petro. Amubone cakacitika kuli ba Selma. Nibakatalika kwiiya Bbaibbele a Bakamboni ba Jehova, balumi babo ba Steve tiibakakkomana pe. Ba Steve bakaamba kuti, “Ndakali kunyema, ndakaba abbivwe alimwi ndakali kulibilika.” Ba Selma baamba kuti: “Niliba leelyo kanditanaiya kasimpe, kukkala antoomwe aba Steve tiicakali cuubauba. Bakali kufwambaana kunyema. Nindakatalika kwiiya Bbaibbele, bukkale oobu bwakaindilila.” Ncinzi cakacitika?

¹² Ba Selma balayeeya ciiyo ncobakaiya kuli Kamboni iwakali kwiiya ambabo. Ba Selma baamba kuti: “Bumwi buzuba tiindakali kuyanda kwiiya Bbaibbele. Busiku bwakaindide ba Steve bakanduuma ciindi nindakali kusola kusinizya kaambo kamwi, alimwi ndakaluuside. Nindakamana kwaambila mucizyi cakacitikide alimwi ambondakali kulimvwa, wakandaambila kuti ndibale 1 Bakolinto 13:4-7. Nindakacita oobo, ndakatalika kuyeeya kuti, ‘ba Steve taakwe nibandicitila zyintu eezyi zyaluyando.’ Pele mucizyi wakandigwasya kuzilanga munzila iili kabotu zyintu kwiinda mukundibuzya kuti, ‘Ino ili yongaye micito eeyi njotondezya kubalumi bako?’ Ndakaingula kuti, ‘taakwe, nkaambo balakatazya kukkala limwi.’ Ajwi libombe mucizyi wakaamba kuti, ‘Selma ino nguni uusola kuba Munakristo aawa? Nduwe naa mba Steve?’ Nindakabona kuti ndeelede kucinca mbondiyeeya, ndakapaila kuli Jehova kuti andigwasye kuti nditalike kubayanda kapati ba Steve. Asyoonto-syoonto zyintu zyakatalika kucinca.” Nikwakainda myaka iili 17 ba Steve bakakatambula kasimpe.

BAMWI MBOBAKONZYA KUGWASYA

13, 14. Mbuti ibamwi mumbungano mbobakonzya kugwasya baabo bali mumikwasyi mobaindene bukombi?

¹³ Mbuli malosi aamvwula mbwaapa kuti nyika itete akugwasya kuti zisyango zikomene, umwi aumwi wesu mumbungano ulakonzya kubagwasya aabo ibali mumikwasyi mobaindene bukombi kuti kabakkomana. Ba Elvina baku Brazil bakaamba kuti: “Akaambo kakuti bakali kundiyanda bakwesu abacizyi, ndakacikonzya kuzumanana mukasimpe.”

¹⁴ Luzyalo alimwi akubabikkila maano bamwi mumbungano kulakonzya kumujatikizya kapati ooyo uutali Kamboni  mumukwasyi. Mukwesu umwi waku Nigeria iwakatambula kasimpe nikwakainda myaka iili 13 kuzwa bakaintu bakwe nibakacita oobo, wakaamba kuti: “Nindakali mulweendo a Kamboni, mootokala wakwe wakafwa. Wakayandaula Bakamboninyina mumunzi iwakali munsi-munsi, alimwi bakatupa busena bwakoona masiku aayo. Bakatutambula kabotu mbuli kuti bakalituzyi kuzwa kubwana. Aciindi ncicona eeco, ndakazyiba kuti oolu ndolwakali luyando lwa Bunakristo bakaintu bangu ndobakali kwaamba.” Ku England mukaintu iwakaiya kasimpe myaka iili 18 kuzwa ciindi balumi bakwe nibakacita oobo, wakaamba kuti: “Bakamboni bakali kututamba toonse tobilo kucakulya. Lyoonse ndakali kulimvwa kutambulwa.” * Mwaalumi umwi nkukonya ku England iwakaba Kamboni wakaamba kuti: “Bakwesu abacizyi bakali kutuswaya alimwi akututamba kumaanda aabo, ndakabona kuti bakali kubikkila maano. Eeci cakalibonya kapati nindakali mucibbadela, banji bakaboola kuzoondibona.” Sena mulakonzya kujana nzila zyakutondezya kuti mulababikkila maano aabo batali Bakamboni mumikwasyi mobaindene bukombi?

15, 16. Ncinzi cikonzya kugwasya Kamboni kuzumanana kukkomana nikuba kuti bamwi mumukwasyi tabali Bakamboni?

¹⁵ Masimpe, nikuba kuti tucita zyintu zili kabotu akubakambaukila caluyando kwamyaaka minji, tabali boonse mumikwasyi yesu ibayookatambula kasimpe. Ibamwi bayoozumanana kutatondezya luyandisisyo naa kukazya. (Mt. 10:35-37) Nokuba boobo, ikuti Banakristo bazumanana kutondezya bube bwa Bunakristo, eeci cilakonzya kubagwasya aabo batali Bakamboni. Mulumi umwi iwakazooba Kamboni wakaamba kuti: “Tokonzyi kuzyiba bube bubotu bwa Bunakristo mbobujatikizya mizeezo amoyo wamuntu ngomukwetene limwi uutali Kamboni. Aboobo, tamweelede kuleka kumucitila zyintu zibotu ngomukwetene limwi uutali Kamboni.”

¹⁶ Nikuba kuti umwi mumukwasyi wazumanana kutasyoma, cilakonzyeka kuli yooyo uusyoma kukkomana. Mucizyi umwi iwakasoleka kugwasya balumi bakwe kwamyaaka iili 21, pele kunyina nibakakatambula kasimpe, wakaamba kuti: “Ndazumanana kujana lukkomano kwiinda mukusoleka kukkomanisya Jehova, kuzumanana kumumvwida alimwi akuyumya cilongwe cangu anguwe. Kujata bubi muzyintu zyakumuuya mbuli ciiyo cangu ndemwini, kujanika kumiswaangano, kutola lubazu mumulimo wamumuunda alimwi akugwasya bamwi mumbungano, candigwasya kuswena kuli Jehova akuzumanana kusyomeka kulinguwe.”—Tus. 4:23.

MUTALENGAANI PE

17, 18. Mbuti Munakristo mbwakonzya kuzumanana kuba abulangizi bwakuti zyintu zilakonzya kucinca nikuba kuti uli mumukwasyi mobaindene bukombi?

¹⁷ Kuti kamuli Munakristo uusyomeka uuli mumukwasyi momwiindene bukombi, mutalengaani pe. Kamuyeeya kuti “Jehova takonzyi kuleka bantu bakwe, nkaambo kazina lyakwe ipati.” (1 Sam. 12:22) Jehova unooli andinywe kufwumbwa buyo kuti mwakakatila kulinguwe. (Amubale 2 Makani 15:2.) Aboobo, ‘Kamulibotezya muli Jehova.’ Inzya, ‘amubikke inzila zyanu mumaanza aa Jehova; amumusyome.’ (Int. 37:4, 5) “Amujatisye kupaila,” alimwi amusyome kuti Taateesu wakujulu siluyando ulakonzya kumugwasya kuliyumya mumapenzi aali woonse ngomukonzya kujana.—Lom. 12:12.

¹⁸ Amumulombe Jehova kuti amupe muuya wakwe uusalala kutegwa umugwasye kuba aluumuno mumukwasyi. (Heb. 12:14) Inzya, cilakonzyeka kupona muluumuno calo cikonzya kugwasya banamukwasyi batali Bakamboni. Muyooba alukkomano alimwi aluumuno lwamumoyo amumizeezo ‘nimucita zyintu zyoonse kutegwa Leza alemekwe.’ (1 Ko. 10:31) Eelo kaka cilakkomanisya kuzyiba kuti bakwesu abacizyi mumbungano nimucita oobo banoomugwasya!

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 28]

Amusale ciindi ceelede kutegwa mupandulule nzyomusyoma

[Cifwanikiso icili apeeji 29]

Amubabikkile maano mbomukwetene limwi ibatali Bakamboni