Mibuzyo Yabasikubala

Sena Munakristo ulakonzya kugusyigwa mumbungano ya Banakristo akaambo kakuzumanana acilengwa cakwe cakweebelela zyintu ziletela muzeezo wakoonana?

▪ Inzya. Nkakaambo kaako ncokuyandika kapati kutantamuka zyintu zyoonse ziletela muzeezo wakoonana, izilembedwe, alimwi azifwanikiso zili mumabbuku, mumafilimu, mumavidiyo alimwi aa Intaneti.

Zyintu ziletela muzeezo wakoonana zilajanika nyika yoonse mboizulwa. Intaneti yapa kuti zyintu ziletela muzeezo wakoonana zivwule kwiinda kaindi alimwi mweelwe wabantu bajatikizyigwa apenzi eeli uyaabuvwula. Bana abapati bamwi batondezyegwa zyintu ziletela muzeezo wakoonana aa Intaneti kabatayandide. Bamwi baleebelela acaali, balimvwa kuti balikwabilidwe akaambo kakuti balakonzya kubala naa kweebelela zyintu ziletela muzeezo wakoonana cakusisikizya kabali kuŋanda naa kuofesi. Nkaambo nzi Banakristo ncobeelede kwaabikkila kapati maano makani aaya?

Kaambo kapati kalajanwa mukucenjezya nkwakaamba Jesu naakati: “Kufwumbwa muntu uulangisisya mukaintu cakuti wamunyomenena, wacita kale bumambe anguwe mumoyo wakwe.” (Mt. 5:28) Cakutadooneka, koonana kwamumulawo kuli kabotu alimwi kupa kukkomana akati kabanabukwetene. (Tus. 5:15-19; 1 Ko. 7:2-5) Pele aaya taali ngamakanze azyintu ziletela muzeezo wakoonana. Muciindi caboobo, zyintu eezyi zitondezya koonana kutali kwamumulawo kwalo kuletela mizeezo mibi njaakacenjezya  Jesu. Kubala naa kweebelela zyintu ziletela muzeezo wakoonana takweendelani amalailile aa Leza aakuti: “Amujaye zizyo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kulombozya kubyaabi, alimwi abulyato kwalo kuli nkukomba mituni.”—Kol. 3:5.

Mbuti kuti Munakristo wakeebelela zyintu ziletela muzeezo wakoonana ciindi comwe naa zyobilo? Bukkale bwakwe bulakonzya kukozyanisyigwa abukkale bubyaabi mwaakalijana sintembauzyo Asafu, wakaamba kuti: “Pele mebo, maulu aangu akaamba kulebwa, intaamu zyangu zyakali kufwaafwi kutezeleka.” Munakristo takonzyi kuba amanjezyeezya mabotu alimwi takonzyi kuba aluumuno a Leza ikuti kalangilila zifwanikiso zyamusankwa naa mukaintu uutasamide naa bantu bacita bwaamu. Asafu awalo kunyina naakali muluumuno pe, wakaamba boobu: “Buzuba boonse ndakali kupenzegwa, ndakali kutapatilwa lyoonse cifumo.”—Int. 73:2, 14.

Munakristo uujisi cilengwa eeci cibyaabi weelede kucenjela akulomba lugwasyo lwakumuuya. Lugwasyo oolu nkoluli mumbungano. Bbaibbele lyaamba kuti: “Kuti muntu umwi waleya katazyi walo, nywebo nomujisi zyeelelo zyakumuuya amusoleke kumululamika muntu ooyo amyoyo iibombede. Pele umwi aumwi wanu alibikkile maano, nkaambo ambweni andinywe inga mwasunkwa.” (Gal. 6:1) Mwaalu Munakristo omwe naa bobilo balakonzya kumupa lugwasyo ndwayandika, kubikkilizya ‘amipailo yalusyomo iiponya ooyo uucisidwe, alimwi cibi cakwe cilakonzya kulekelelwa.’ (Jak. 5:13-15) Aabo ibakayandaula lugwasyo kutegwa bacileke cilengwa cakweebelela zyintu ziletela muzeezo wakoonana babona kuti kuswenenena afwaafwi kuli Leza kulagwasya kapati mbubwenya mbwaakagwasyigwa Asafu.—Int. 73:28.

Nikuba boobo, mwaapostolo Paulo wakabona kuti bamwi kunyina nibakeempwa pe “kubusofwaazi, bwaamu alimwi abukkale bwabo busesemya.” * (2 Ko. 12:21) Kujatikizya bbala lya Chigiliki lyakasandululwa kuti “busofwaazi,” Bahaazibwene ba Marvin R. Vincent bakalemba kuti: “Lijisi muzeezo wakusofwaala mumakani aakulilemeka.” Cilausisya kapati kuti zyintu zimwi iziletela muzeezo wakoonana tazigoleli buyo aakutondezya bantu batasamide naa bantu bacita bwaamu, pele zilainda aawo kubija. Kuli zyintu zisesemya, zyintu ziletela muzeezo wakoonana izibi izitondezya koonana kwabaalumi naa bamakaintu balikke-likke, koonana mutubunga, koona banyama, zifwanikiso zyazisapi zitondezya bana batasamide, koona bamakaintu calunya, koona muntu waangilidwe. Bantu bamwi bamuciindi ca Paulo bakali “mumudima mumizeezo” alimwi “ba[ka]cinyina nsoni naaba aniini mubukkale bwabo alimwi ba[ka]lyaaba kubukkale busesemya kuti bacite busofwaazi bwamusyobo uuli woonse cabulyato.”—Ef. 4:18, 19.

Mulugwalo lwa Bagalatiya 5:19, Paulo alimwi wakaamba kujatikizya “busofwaazi.” Mulembi waku Britain wakaamba kuti “[eeli bbala] aawa lilakonzya kwaamba kulombozya kubyaabi.” Sena kuli Munakristo uukonzya kukazya kuti zyintu zyaambwa atala aawa zisesemya, zyintu ziletela muzeezo wakoonana “[n]kulombozya kubyaabi” alimwi kuti nzibi? Mulugwalo lwa Bagalatiya 5:19-21, Paulo wakamanizya amajwi aakuti: “Bantu bacita zyintu” zisofweede zili boobu “tabakabukoni Bwami bwa Leza pe.” Aboobo, ikuti umwi waba acilengwa cakweebelela zyintu zisesemya, zyintu ziletela muzeezo wakoonana andiza ulacita oobo ziindi zinji, alimwi tayandi kweempwa akusanduka, takonzyi kuzumanana kuba mumbungano ya Banakristo pe. Weelede kugusyigwa kutegwa muuya mubotu wambungano ukwabililwe alimwi akuti kaisalala.—1 Ko. 5:5, 11.

Eelo kaka cilakkomanisya kumvwa kuti bamwi ibakawide mukakole aaka kakweebelela zyintu ziletela muzeezo wakoonana zisesemya bakaunka kubaalu alimwi batambula lugwasyo lwakumuuya lweelede kutegwa bacince! Jesu wakabakombelezya Banakristo ibakali ku Sardis yansiku kuti: “Yumya-yumya zyintu zisyeede izyali afwaafwi kufwa, . . . kozumanana kuyeeya ncowakatambula ancowakamvwa, eelyo kozumanana kucibamba alimwi empwa. Masimpe ccita kuti usinsimuke, . . . tokoozyiba abuniini ciindi nconditiisike kulinduwe.” (Ciy. 3:2, 3) Cilakonzyeka kweempwa alimwi akukwempwa kuzwa mumulilo wacikozyanyo.—Jud 22, 23.

Eelo kaka cilayandika kapati kuti umwi aumwi wesu waba amakanze akutantamuka zyintu eezyi zibyaabi! Inzya, tweelede kuba amakanze aakutantamuka zyintu zyoonse ziletela muzeezo wakoonana!

[Bupanduluzi buyungizidwe]

[Majwi aakwelelezya sikubala aali apeeji 30]

Munakristo uujisi cilengwa eeci cibyaabi weelede kucenjela akulomba lugwasyo lwakumuuya