“Twalomba Kuti Mutufwotole”

Nibwakamana buzuba bwabili bwamuswaangano wacooko, ba Josué, ibamukwasyi wa Bbeteli ku Mexico bakali kweendeenda kuswaya dolopo lya Querétaro. Ba Javier aba Maru banabukwetene baku Colombia ibakali kuswaya masena, bakalomba ba Josué kuti babafwotole. Akaambo kakuti ba Josué abeenzinyina Bakamboni bakasamide kabotu alimwi bakasamide mabbaaji aamuswaangano wacooko, banabukwetene bakabuzya nkobakali kuzwida, nkaambo bakali kuyeeya kuti ambweni bazwa kumuswaangano wakumanizya cikolo naa kucilengwa cimwi caalubazu. Ba Josué bakapandulula kuti bakali kuzwa kumuswaangano wacooko wa Bakamboni ba Jehova, kumane bakabatamba banabukwetene aaba kuti bakajanike kumuswaangano mu Nsondo.

Banabukwetene bakalimvwa kuti cilausya nsoni kujanika nkaambo tiibakajisi zisani zibotu zyeelela kusamwa kumuswaangano. Nikuba boobo, ba Josué bakabaambila zyina lyabo alimwi akubapa namba yaluwaile yakuofesi yamutabi nkobakali kubelekela.

Cakutayeeyela, nikwakainda myezi yone ba Josué bakabandika aba Javier. Banabukwetene aaba bakajanika kumuswaangano wacooko alimwi lino bakali kuyanda Bakamboni ba Jehova kubaswaya ku dolopo lya Mexico City nkobakali kukkala eeco ciindi. Kakutanainda ciindi ciiyo ca Bbaibbele cakatalisyigwa kuli ba Javier aba Maru, alimwi bakatalika kujanika kumiswaangano yambungano. Nikwakainda myezi iili kkumi bakaba basikumwaya batanabbapatizyigwa. Nikuba kuti banabukwetene aaba bakalongela mudolopo lya Toronto ku Canada, bakazumanana kuyaambele kumuuya kusikila bakabbapatizyigwa.

Mpoonya, ba Josué bakatambula lugwalo luzwa kuli ba Javier kupandulula icakabakulwaizya kutambula kasimpe. Bakaamba kuti: “Katutanajanika kumuswaangano wacooko, mebo abakaintu bangu twakalibandikide kuti tuyandika busolozi bwa Leza. Nitwakamubona mbomwakasamide kabotu, twakayeeya kuti mwakali kuzwa kumuswaangano umwi waalubazu. Kumuswaangano twakakkomana kubona mbobakatutondezya luyando akututondezya busena bwakukkala, kutugwasya kujana magwalo mu Bbaibbele, alimwi ambobakali kulilemeka aabo bakajanika. Tiibakali kubikkila maano kuti tatusamide kabotu.”

Eelo kaka akaba aamasimpe kuli ba Josué majwi aa Mwami musongo Solomoni! Solomoni wakalemba kuti: “Cifumofumo byala imbuto zyako, aciindi cagoko utalesyi maanza aako, nkaambo tozi na nzizili zisi kule akati kazyo, na zyoonse zyobile zilaba kabotu.” (Muk. 11:6) Sena inga mwasyanga mbuto kwiinda mukubelesya coolwe cakwaambila bamwi kujatikizya muswaangano uucili kumbele naa makani aabuleya? Jehova ulakonzya kumubelesya kukwela baabo bafwide nzala anyota yabusolozi bwakumuuya mbubwenya mbocakabede kuli ba Javier aba Maru.—Is. 55:1.

[Cifwanikiso icili apeeji 32]

Kuzwa kulumwensyi kuya kululyo: ba Alejandro Voeguelin, ba Maru Pineda, ba Alejandro Pineda, ba Javier Pineda aba Josué Ramírez kumutabi waku Mexico