Jehova Ulatukwabilila Kutegwa Tukafwutuke

‘Nywebo mulakwabililwa anguzu zya Leza kwiinda mulusyomo kutegwa mukafwutuke mulufwutuko iluyooyubununwa kuciindi cakumamanino.’—1 PE. 1:4, 5.

INO INGA MWAINGULA BUTI?

․․․․․

Ino Jehova wakatukwela buti kubukombi bwakasimpe?

․․․․․

Mbuti mbotukonzya kuzumizya Jehova kutegwa atusololele alulayo lwakwe?

․․․․․

Ino Jehova utukulwaizya buti?

1, 2. (a) Nkaambo nzi ncotusyoma kuti Leza uyootugwasya kuzumanana kusyomeka? (b) Ino Jehova utuzyi buti umwi aumwi wesu?

“OOYO uuliyumya kusikila kumamanino nguuyoofwutulwa.” (Mt. 24:13) Majwi aaya aa Jesu atondezya caantangalala kuti kutegwa tukakwabililwe ciindi Leza aakubeteka nyika ya Saatani, tweelede kuzumanana kusyomeka kusikila kumamanino. Pele eeci tacaambi kuti Jehova ulangila kuti tuliyumye munguzu zyesu. Bbaibbele litusyomezya kuti: “Leza ulasyomeka, aboobo takamulekeli kuti musunkwe kwiinda nguzu zyanu pe, pele mwanoosunkwa uyoomupa anzila yamatijilo kutegwa mukonzye kuliyumya musunko eelyo.” (1 Ko. 10:13) Ino majwi aaya apandulula nzi?

² Jehova ulabikkila maano kubona kuti tatusunkwi azyintu ziinda nguzu zyesu. Jehova ulakonzya kucita oobo akaambo kakuti ulizyi zyintu zyoonse kujatikizya ndiswe kubikkilizya amapenzi ngotujisi, bwini mbotubede, alimwi anguzu nzyotujisi kutegwa tuliyumye. Sena ncobeni Leza mbwatuzyi oobo? Inzya! Magwalo atondezya kuti Jehova ulituzyi umwi aumwi kumugama. Ulizizyi zyintu zyoonse nzyotucita abuzuba. Ulakonzya kuzyiba mizeezo yesu amakanze ngotujisi mumyoyo yesu.—Amubale Intembauzyo 139:1-6.

3, 4. (a) Ino icakamucitikila Davida citondezya buti kuti Jehova ulababikkila maano bantu umwi aumwi kumugama? (b) Ino mulimo nzi uugambya Jehova ngwacita mazuba aano?

³ Sena cilibonya mbuli kuti Leza takonzyi kubabikkila maano bantu? Sintembauzyo Davida wakazinzibala kuyeeya mubuzyo ooyu, kumane wakati kuli Jehova: “Nembona majulu aako, milimo yaminwe yako, mwezi anyenyeezi nzowakalenga! Ino muntu ncinzi nowamwiibaluka?” (Int. 8:3, 4) Andiza Davida wakabuzya mubuzyo ooyu akaambo kakuti Jehova wakali kumubikkila maano. Davida, mwana muniini wa Jese, kacili buyo mulombe iweembela mbelele, Jehova wakamubona kuti  ‘muntu weendelana amoyo wakwe’ alimwi wakamusala kuba musololi wabana Israyeli. (1 Sam. 13:14; 2 Sam. 7:8) Amuyeeye buyo mbwaakalimvwa Davida naakazyiba kuti Mulengi wabubumbo boonse wakali kukubikkila maano kuzinzibala kuyeeya kwakwe nikuba kuti wakali mulombe buyo!

⁴ Cilakkomanisya kuzyiba kuti Jehova ulatubikkila maano kapati mazuba aano. Ulimukuyobolola “zintu ziyandisi zyazisi zyoonse” kuti ziboole mubukombi bwakasimpe alimwi ulabagwasya babelesi bakwe kuzumanana kusyomeka. (Hag. 2:7) Kutegwa tuzyibe kabotu Jehova mbwatugwasya kuzumanana kusyomeka, cakusaanguna atulange-lange Jehova mbwabakwela bantu kuti baboole mubukombi bwakasimpe.

LEZA NGUUTUKWELA

5. Mbuti Jehova mbwakwela bantu ku Mwanaakwe? Amupe cikozyanyo.

⁵ Jesu wakaamba kuti: “Kunyina muntu uukonzya kuboola kulindime ccita kuti wakwelwa a Taata wakandituma.” (Joh. 6:44) Aaya majwi apandulula kuti kutegwa muntu abe sikwiiya wa Kristo, weelede kugwasyigwa a Leza. Mbuti Jehova mbwakwela bantu bali mbuli mbelele ku Mwanaakwe? Nkwiinda mukukambauka makani mabotu alimwi amumuuya wakwe uusalala. Mucikozyanyo, Paulo abamisyinalinyina nibakali ku Filipi, bakaswaanganya mukaintu wazyina lya Ludiya akutalika kumukambaukila. Magwalo aakasololelwa amuuya aamba kuti: “Jehova wakajalula moyo wakwe cakumaninina kuti abikkile maano kuzyintu nzyaakali kwaamba Paulo.” Masimpe, Leza wakabelesya muuya wakwe uusalala kumugwasya kuti auteelelesye mulumbe, icakatobela ncakuti walo abamuŋanda yakwe bakabbapatizyigwa.—Mil. 16:13-15.

6. Mbuti toonse mbwaakatukwela Leza kubukombi bwakasimpe?

⁶ Sena cikozyanyo ca Ludiya cakalilibedelede? Peepe! Ikuti kamuli Munakristo uulyaabide, andinywe ngu Leza wakamukwela kuboola mubukombi bwakasimpe. Mbubwenya Taateesu wakujulu mbwaakabona cintu ciyandisi mumoyo wa Ludiya, wakabona cintu cibotu mulindinywe. Nimwakatalika kuswiilila kumakani mabotu, Jehova wakamugwasya amuuya uusalala kutegwa mwaamvwisye makani mabotu. (1 Ko. 2:11, 12) Nimwakatalika kubelesya nzyomwakali kwiiya, wakakulongezya kusoleka kwanu kwakucita ncayanda. Nimwakalyaaba kulinguwe, wakakkomana. Masimpe, kuzwa ciindi nimwakatalika kweenda munzila iitola kubuumi, Jehova wali andinywe alimwi wazumanana kumugwasya.

7. Ino tuzyi buti kuti Leza uyootugwasya kutegwa tuzumanane kusyomeka?

⁷ Mbwaanga wakatugwasya kutegwa tweende anguwe, tuli masimpe kuti Jehova uyoozumanana kutugwasya kusyomeka. Ulizyi kuti mbotwatakaboola mukasimpe tolikke, tatukakkali mukasimpe kuti wabula kutugwasya. Kalembela Banakristo bananike, mwaapostolo Petro wakaamba kuti: “Nywebo nomukwabililwa anguzu zya Leza kwiinda mulusyomo kutegwa mukafwutuke mulufwutuko iluyooyubununwa kuciindi cakumamanino.” (1 Pe. 1:4, 5) Majwi aaya alabeleka ku Banakristo boonse alimwi tweelede kwaabikkila maano mazuba aano. Nkaambo nzi? Akaambo kakuti toonse tuyandika kugwasyigwa a Leza  kutegwa tuzumanane kusyomeka kulinguwe.

KUKWABILILWA KUTEGWA TUTALEYI

8. Nkaambo nzi ncotweelede kucenjela kutegwa tutaleyi?

⁸ Zyintu zitucitikila mubuumi akutalondoka kulakonzya kutupa kutabikkila maano kuzyintu zyakumuuya alimwi akutubikka muntenda yakuleya kakunyina kuzyiba. (Amubale Bagalatiya 6:1.) Eeci cilatondezyegwa acintu cakacitika mubuumi bwa Davida.

9, 10. Mbuti Jehova mbwaakagwasya Davida kuti ataciti cintu cibi, alimwi mbuti mbwacita oobo akulindiswe mazuba aano?

⁹ Davida nibakali kumuvwima ku Mwami Saulo, wakatondezya bube bubotu bwakulilesya kwiinda mukutajolela. (1 Sam. 24:2-7) Pele tiilyakalampa, Davida wakakakilwa kulilesya. Walo abantu bakwe bakali kuyanda zyakulya amaanzi, aboobo cabulemu wakalomba lugwasyo kumu Israyelinyina Nabala. Nabala wakamutukila Davida akukaka kubagwasya. Eeci cakapa kuti Davida anyeme kapati cakuti wakayanda kujolela Nabala abamuŋanda yakwe. Pele eeci nicakapa kuti Davida abe amulandu wakujaya bantu batajisi mulandu. Naatakali Abigayeli muka Nabala iwakanjilila, Davida naakacita cibi cipati. Davida naakabona kuti oolu ndugwasyo luzwa kuli Jehova, wakaamba kuti: “Alumbwe Jehova Leza wa-Israyeli! Nguwe wakutuma sunu kuzoondicinga. Bulumbwe busongo bwako, ayebo omwini ulumbwe, nkaambo nduwe wandikasya sunu kutila bulowa akulikoyeka ajanza lyangu ndemwini.”—1 Sam. 25:9-13, 21, 22, 32, 33.

¹⁰ Ncinzi ncotukonzya kwiiya kucibalo eeci? Jehova wakabelesya Abigayeli kutegwa agwasye Davida kuti ataciti cintu cibi. Mazuba aano ulacita mbubwenya oobo akulindiswe. Cakutadooneka, tatweelede kulangila kuti lyoonse Leza uyootuma muntu uumbi kutegwa atugwasye kuti tutaciti cintu cibi. Alimwi tatukonzyi kuzyiba ntaamu iini Leza njakonzya kubweza kutegwa atugwasye mubukkale bumwi naa zyintu nzyakonzya kulekela kuti zicitike nazuzikizya makanze aakwe. (Muk. 11:5) Nikuba boobo, tulijisi lusyomo lwakuti Jehova ulibuzyi bukkale bwesu alimwi uyootugwasya kutegwa tuzumanane kusyomeka kulinguwe. Utusyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.” (Int. 32:8) Mbuti Jehova mbwatupa lulayo? Mbuti mbotukonzya kugwasyigwa andulo? Alimwi nkaambo nzi ncotukonzya kuba masimpe kuti Jehova ulabasololela bantu bakwe mazuba aano? Amubone mibuzyo eeyi mboyiingulwa mubbuku lya Ciyubunuzyo.

KUKWABILILWA KWIINDA MUKUPEGWA LULAYO

11. Amupandulule Jehova mbwazizyi zyintu zicitika mumbungano yabantu bakwe.

¹¹ Mucilengaano cilembedwe mulugwalo lwa Ciyubunuzyo caandaano 2 a 3, Jesu Kristo iwakasumpulwa ulingula mbungano zili ciloba zyaku Asia Minor. Cilengaano citondezya kuti Kristo ulabona bukkale bujatikizya bantu boonse alimwi abukkale bugaminide. Mubukkale bumwi, ulabaamba bantu bambi, alimwi mubukkale bumwi abumwi ulapa lulayo naa majwi aakukulwaizya aayelede. Ino eeci citondezya nzi? Mukuzuzikizyigwa kwacilengaano, mbungano zili ciloba ziiminina Banakristo bananike bakaliko mwaka wa 1914 niwakainda, alimwi lulayo ilwakapegwa kumbungano zili ciloba munzila imwi luleelela akumbungano zyoonse zyabantu ba Leza mazuba aano nyika yoonse mbwiizulwa. Aboobo, tacidoonekwi buya kwaamba kuti Jehova kwiinda mu Mwanaakwe uluujisi kusololela bantu bakwe. Mbuti mbotukonzya kugwasyigwa abusolozi buli boobu?

12. Mbuti mbotukonzya kuzumizya Jehova kuti atusololele?

¹² Nzila imwi motukonzya kutobela lulayo ndwapa Jehova nkwiinda muciiyo  cesu tobeni. Kwiinda mumabbuku aamwaigwa amuzike musyomesi uucenjede, Jehova ulatupa lulayo lunji lwamu Magwalo. (Mt. 24:45) Nikuba boobo, kutegwa tugwasyigwe alulayo oolu, tweelede kujana ciindi cakwiiya akuzibelesya nzyotwiiya. Ciiyo cesu tobeni ninzila imwi Jehova njabelesya ‘kutukwabilila kutegwa tutalebwi.’ (Jud. 24) Sena kuli cintu ncomwakaiya mumabbuku eesu icakamupa kulimvwa mbuli kuti cakalembelwa ndinywe? Amulutambule lulayo oolu akulubona kuti luzwa kuli Jehova. Mbubwenya mbuli mulongwe mbwakonzya kumujata agwezo nayanda kumwaambila makani amwi, Jehova inga wabelesya muuya wakwe kutegwa mubikkile maano kubube bumwi bwalo nywebo alimwi abamwi mbomweelede kubelekela kutegwa kamucita kabotu. Kwiinda mukubikkila maano kubusolozi bwamuuya, tuzumizya Jehova kuti atusololele. (Amubale Intembauzyo 139:23, 24.) Lino atulange-lange mbotukonzya kubelesya ciindi cesu nitwiiya.

13. Nkaambo nzi ncocili cabusongo kulingula mbotucibelesya ciindi ncotweelede kubelesya kwiiya?

¹³ Ikuti katubelesya ciindi cinji muzyintu zyakulikondelezya, tatukonzyi kujana ciindi cakucita ciiyo cesu tobeni. Mukwesu umwi wakaamba kuti: “Mbwaanga mazuba aano zyakulikondelezya zyaindila kuvwula alimwi taziduli, ncuubauba kusumpya ciiyo cesu tobeni. Zyakulikondelezya zilajanika acipekupeku, akkompyuta alimwi aafooni. Alimwi zyakulikondelezya zilituzungulukide.” Ikuti katutabikkili maano, ciindi ncotweelede kubelesya kuti tucite ciiyo cesu tobeni cilakonzya kumana. (Ef. 5:15-17) Umwi aumwi wesu weelede kulibuzya kuti: ‘Sena bunji bwaziindi ndilajana ciindi cakwiiya makani malamfwu aajanika mu Jwi lya Leza? Sena ndicita buyo oobo ikuti kandijisi makani naa cibeela cimwi camiswaangano ncindeelede kulibambila?’ Ikuti kacili boobo, inga cainda kugwasya ikuti twabelesya ciindi ncotubikkide ambali kuti katukomba mumukwasyi naa kucita ciiyo cesu tobeni kutegwa tulangaule busongo bwa Jehova, mbubwenya mbotukonzya kulangaula lubono lusisidwe. Busongo buli boobu bulakonzya kutukwabilila kutegwa tukafwutuke.—Tus. 2:1-5.

KUKULWAIZYIGWA KULATUGWASYA KULIYUMYA

14. Mbuti Magwalo mbwaatondezya kuti Jehova ulabikkila maano mbotulimvwa?

¹⁴ Davida wakajana mapenzi manji mubuumi bwakwe. (1 Sam. 30:3-6) Majwi aakwe aakasololelwa amuuya atondezya kuti Jehova wakalizyi mbwaakali kulimvwa. (Amubale Intembauzyo 34:18; 56:8.) Leza ulizyi mbotulimvwa andiswe. ‘Nituwizukide’ naa ‘kuzingwa mumoyo’ ulaswena afwaafwi kulindiswe. Eeci cilakonzya kutuumbulizya mbubwenya mbuli Davida iwakaimba kuti: “Ndabotelwa akukondwa muluse lwako, nkaambo ulibwene mapenzi aangu, ulizi kupenga kwamoyo wangu.” (Int. 31:7) Pele nzinji Jehova nzyacita kwiinda buyo kuzyiba mapenzi eesu. Ulatuyumya-yumya kwiinda mukutukulwaizya akutuumbulizya. Nzila imwi njabelesya nkwiinda mumiswaangano ya Bunakristo.

15. Ncinzi ncotukonzya kwiiya kuliceeco cakacitikila Asafu?

¹⁵ Bubotu bumwi mbotujana kwiinda mukujanika kumiswaangano bulatondezyegwa  kuli ceeco cakacitikila sintembauzyo Asafu. Kubikkila kapati maano kuzyintu zitaluleme kwakapa Asafu kuti adooneke mpindu iiliko mukubelekela Leza. Asafu wakatyompwa. Mboobu mbwaakapandulula mbwaakali kulimvwa: “Moyo wangu nowakalula, nindakayaswa mukati kangu.” Akaambo kaceeci wakali kuyanda kucileka kubelekela Jehova. Ncinzi cakamugwasya Asafu kuti atalike kuzilanga kabotu zyintu? Wakaamba kuti: “Ndakanjila mucikombelo ca-Leza.” Kali kokuya akati kabakombinyina, wakatalika alimwi kuzilanga kabotu zyintu. Wakabona kuti kuzwidilila kwabasizibi kwakali kwakaindi buyo kasyoonto, alimwi akuti Jehova wakali kuyootubamba twaambo. (Int. 73:2, 13-22) Mbocibede akulindiswe. Mapenzi akulwana kutalulama ikuli munyika ya Saatani zilakonzya kutumana nguzu. Kuswaangana abakwesu kulatukatalusya alimwi kulatugwasya kuzumanana kubelekela Jehova calukkomano.

16. Ino inga twagwasyigwa buti acikozyanyo ca Hana?

¹⁶ Mbuti kuti bukkale mumbungano bupa kuti cimuyumine kujanika kumiswaangano? Ambweni kuli coolwe cimwi camulimo ncomwakalesyegwa kucita aboobo lino mumvwa nsoni, alimwi ambweni kuli kwiimpana kwamizeezo amukwesu naa mucizyi umwi. Kuti kacili boobo, cikozyanyo ca Hana cilakonzya kumugwasya. (Amubale 1 Samueli 1:4-8.) Amuyeeye kuti Hana wakalipengede kapati akaambo kabukkale bwamumukwasyi kujatikizya mukwatwanyina Penina. Bukkale oobu bwakali kwiindila kukatazya amwaka kwaambisya mukwasyi niwakali kuunka kuyoopa zituuzyo kuli Jehova ku Silo. Wakali kupenga kapati Hana cakuti “wakali kulila akutalya.” Pele eeci tiicakamulesya kujanika kuziindi zyakukomba Jehova. Jehova wakakubona kusyomeka kwakwe alimwi wakamulongezya.—1 Sam. 1:11, 20.

17, 18. (a) Muunzila nzi motukulwaizyigwa kumiswaangano yambungano? (b) Ino mulimvwa buti kubikkila maano kwa Jehova ikutugwasya kuti tukafwutuke?

¹⁷ Banakristo mazuba aano balijisi twaambo tubotu ncobeelede kwiiya cikozyanyo ca Hana. Cakusyomeka, tweelede kujanika kumiswaangano. Kweelana ambotuzyi toonse, miswaangano ilatukulwaizya. (Heb. 10:24, 25) Kuyanzana kwa Bunakristo kukkomanisya kulatuumbulizya. Majwi maubauba aambwa mumakani naa aapegwa mubwiinguzi alakonzya kutunjila mumoyo. Nitubandika miswaangano kaitanatalika naa niyamana, musyomima ulakonzya kuswiilila naa kwaamba majwi aaumbulizya. (Tus. 15:23; 17:17) Nitwiimbila Jehova nyimbo, tulakulwaizyigwa kapati. Kwaambisya kuti twatyompwa “[a]miyeeyo minji iikataazya,” tuyandika kukulwaizyigwa kwalo ikujanika kumiswaangano, Jehova nkwatugwasya kwiinda ‘muluumbulizyo lwakwe’ alimwi ulatugwasya mumakanze eesu ngotujisi aakuzumanana kusyomeka.—Int. 94:18, 19.

¹⁸ Katuliibide mumaanza aa Leza wesu, tulimvwa mbwaakalimvwa sintembauzyo Asafu walo iwakaimbila Jehova kuti: “Ulindijisi kujanza lyangu lyalulyo. Unoondeenzya alulayo lwako.” (Int. 73:23, 24) Eelo kaka tulalumba kuti Jehova ulatukwabilila kutegwa tukafwutuke!

[Mibuzyo yaciiyo]

[Cifwanikiso icili apeeji 28]

Andinywe mwakakwelwa aa Jehova

[Cifwanikiso icili apeeji 30]

Tulakwabililwa kwiinda mukutobela lulayo lwa Leza

[Cifwanikiso icili apeeji 31]

Kukulwaizyigwa nkotupegwa kulatugwasya kuliyumya