‘Mwana Ulayanda Kuyubununa Bausyi’
‘Mwana Ulayanda Kuyubununa Bausyi’
“Kunyina uumuzyi kabotu Taata ccita Mwana alikke, alimwi ayooyo Mwana ngwaayanda kuyubunwida.”—LK.10:22.
INO INGA MWAINGULA BUTI?
․․․․․
Nkaambo nzi Jesu alikke ncaakali muciimo cilibedelede cakukonzya kuyubununa Bausyi?
․․․․․
Ino Jesu wakabayubununa buti Bausyi kuli bamwi?
․․․․․
Muunzila nzi momukonzya kumwiiya Jesu kwiinda mukuyubununa Taata?
1, 2. Mubuzyo nzi iwabakatazya bantu banji, alimwi nkaambo nzi?
‘INO Leza nguni?’ Mubuzyo ooyu ulabakatazya bantu banji. Mucikozyanyo, nikuba kuti Banakristo banji basyoma kuti Leza Mbutatu, ibanji balazumina kuti tacikonzyeki kwiimvwisya njiisyo eeyi. Mulembi alimwi musololi wacikombelo umwi wakaamba kuti: “Eeyi ninjiisyo njobatakonzyi kumvwisya bantu, mbwaanga bupanduluzi bwanjiyo tabweendelani azyintu zizyibidwe abantu.” Kulubazu lumwi, banji ibaizumina njiisyo yakusanduka basyoma kuti Leza tako. Basyoma kuti zilenge zyoonse zyakalicitikila. Nikuba boobo, muciindi cakukazya kuti Leza nkwali, Charles Darwin wakaamba kuti: “Kulindime kulibonya kuti makani oonse aaya muntu takonzyi kwaamvwisya.”
2 Kufwumbwa naa basyoma nzi, bantu banji balailanga-langa mibuzyo iijatikizya kubako kwa Leza. Pele akaambo kakuti baalilwa kujana bwiinguzi, ibanji bacileka kumuyandaula Leza. Masimpe, Saatani ‘waofwaazya mizeezo yabantu batasyomi.’ (2 Ko. 4:4) Nkakaambo kaako bantu banji tabaazyi masimpe aajatikizya Taata, Mulengi wabubumbo boonse.—Is. 45:18.
3. (a) Nguni wakayubununa Mulengi kulindiswe? (b) Mibuzyo nzi njotutiilange-lange?
3 Cilayandika kuti bantu bazyibe kasimpe kajatikizya Leza. Nkaambo nzi? Nkaambo balikke aabo “[ba]ita zyina lya Jehova” mbabayoofwutuka. (Lom. 10:13) Kwiita azyina lya Leza cibikkilizya kumuzyiba bwini mbwabede Jehova. Jesu Kristo wakaluyubununa luzyibo oolu luyandika kuli basikwiiya bakwe. Wakabayubununa Bausyi kulimbabo. (Amubale Luka 10:22.) Nkaambo nzi Jesu ncaakali kukonzya kuyubununa Bausyi kwiinda mbobakali kukonzya kucita bamwi? Mbuti Jesu mbwaakacicita eeci? Alimwi mbuti mbotukonzya kumwiiya Jesu mukuyubununa Taata kuli bamwi? Atwiilange-lange mibuzyo eeyi.
JESU KRISTO ALIKKE NGUUYELELA
4, 5. Nkaambo nzi Jesu ncaakali muciimo cibotu cakuyubununa Bausyi?
4 Jesu wakali kweelela kuyubununa Bausyi. Nkaambo nzi? Akaambo kakuti kazitanalengwa zyintu zyoonse, cilenge eeci camuuya icakazooba muntu, Jesu, cakali kupona kale kujulu kali “Mwana wa Leza simuzyalwaalikke.” (Joh. 1:14; 3:18) Eelo kaka ulijisi coolwe cilibedelede! Zilenge zyoonse kazitanalengwa, Mwana wakali kubakkomanisya Bausyi alimwi wakaiya kujatikizya Bausyi abube mbobajisi. Usyi a Mwana kweelede kuti bakali kubandika kapati alimwi bali kuyandana kwamyaaka iitabaliki. (Joh. 5:20; 14:31) Eelo kaka Mwana ooyu wakabazyiba Bausyi!—Amubale Bakolose 1:15-17.
5 Bausyi bakasala Mwana kuti abe ngo Mwaambilizi wabo, “Jwi lya Leza.” (Ciy. 19:13) Aboobo, Jesu wakali muciimo cibotu cakuyubununa Bausyi kuli bamwi. Cakweelela, Johane mulembi wa Makani Mabotu kapandulula Jesu, wakaamba kuti “Ijwi” wakali “acamba ca Usyi.” (Joh. 1:1, 18) Kabelesya majwi aayo, Johane wakali kwaamba cilengwa cakaliko ciindi naakali kupona, calo cakali kucitwa aciindi cakulya. Mweenzu iwatambwa kucakulya wakali kukkala kababambene abamwi. Kubambana kukkala munzila eeyi, cakali kupa kuti cikonzyeke kubandika. Aboobo, akaambo kakuti Mwana wakali “acamba ca Usyi,” bakali kubandika mulomo mpande a Bausyi.
6, 7. Mbuti cilongwe akati ka Usyi a Mwana mbocakazumanana kukomena?
6 Cilongwe cakali akati ka Usyi a Mwana cakazumanana kukomena. Mwana wakazooba “muyandwi wakwe [Leza] mazuba oonse.” (Amubale Tusimpi 8:22, 23, 30, 31.) Aboobo, cileelela kuti cilongwe cabantu bobilo aaba cakazumanana kuyuma ciindi nibakali kubelekela antoomwe alimwi a Mwana naakali kwiiya bube bwa Bausyi. Naakalenga zilenge zyamaano, Mwana wakabona Jehova mbwaakali kuzyeendelezya, cakutadooneka kulumba kwakwe kubube bwa Leza kwakakomena.
7 Nikuba kuzangila bulelo bwa Jehova nkwaakacita Saatani, kwakapa Mwana coolwe cakwiiya Jehova mbwatondezya luyando, bululami, busongo alimwi anguzu ciindi naakali mubukkale bukatazya. Cakutadooneka, eeci cakamugwasya Jesu kuliyumya mumapenzi ngaakajana mumulimo wakwe waanyika.—Joh. 5:19.
8. Mbuti zibalo zya Makani Mabotu mbozitugwasya kwiiya zinji kujatikizya bube bwa Bausyi?
8 Akaambo kakuba acilongwe cibotu a Jehova, Mwana wakali kubapandulula kabotu Bausyi kwiinda muntu uuliwoonse. Aboobo, nzila mbotu yakuzyiba Bausyi nkwiinda mukulanga-langa zyintu nzyaakali kuyiisya alimwi akucita Mwana simuzyalwaalikke. Mucikozyanyo, amuyeeye buyo mbocali kunootukatazya kuzyiba bbala lya “luyando” ncolyaamba kwiinda mukulibala buyo mubbuku lipandulula mabala. Pele akaambo kakuzinzibala kuyeeya zibalo zyabalembi ba Makani Mabotu zijatikizya mulimo wa Jesu alimwi ambwaakali kubabikkila maano bamwi, tulakonzya kuzyiba ncaamba majwi aakuti “Leza nduyando.” (1 Jo. 4:8, 16) Eeci cilikozyenye abube bumbi bwa Leza mbwaakayubununa Jesu kuli basikwiiya bakwe naakali anyika.
JESU MBWAAKAYUBUNUNA BAUSYI
9. (a) Muunzila nzi zyobilo Jesu mwakayubununa Bausyi? (b) Amupe cikozyanyo citondezya Jesu mbwaakayubununa Bausyi kwiinda muzyintu nzyaakali kuyiisya.
9 Mbuti Jesu mbwaakayubununa Bausyi kuli basikwiiya bakwe bakusaanguna alimwi akulibaabo bakali kuyooba basikwiiya bakwe kumbele? Wakacita oobo munzila zyobilo: kwiinda muzyintu nzyaakali kuyiisya alimwi ambwaakali kulilemeka. Cakusaanguna atulange-lange zyintu nzyaakali kuyiisya Jesu. Zyintu Jesu nzyakayiisya basikutobela bakwe zyakatondezya kuti wakalibazyi kabotu Bausyi, mizeezo yabo, mbobakali kulimvwa alimwi ambobakali kucita zyintu. Mucikozyanyo, Jesu wakakozyanisya Bausyi kumweembezi uubikkila maano butanga bwakwe, walo uuyandaula mbelele yomwe yasweeka. Jesu wakaamba kuti, ikuti mukamwini waijana mbelele yakasweeka, “ulakondwa kapati akaambo kanjiyo kwiinda zyeezyo zili makumi aali fwuka afwuka zyatasweekede.” Ino citondezyo eeci cakali kupandulula nzi? Jesu wakaamba kuti: “Mbubonya oobo, Taata uuli kujulu tayandi kuti umwi wabasyoonto aaba alobe.” (Mt. 18:12-14) Ncinzi ncomukonzya kwiiya kuli Jehova kuzwa kucikozyanyo eeci? Nikuba kuti zimwi ziindi mulimvwa kuti tamukwe mulimo alimwi mulilubidwe, Taata uuli kujulu ulamuyanda alimwi ulamubikkila maano. Kuli Jehova, muli umwi “[w]abasyoonto aaba.”
10. Mbuti Jesu mbwaakayubununa Bausyi kwiinda mukulilemeka?
10 Nzila yabili Jesu mwaakayubununa Bausyi kuli basikwiiya bakwe nkwiinda mukulilemeka. Aboobo, mwaapostolo Filipo naakalomba Jesu kuti: “Kotutondezya Bauso,” cakweelela Jesu wakali kukonzya kwaamba kuti: “Ooyo wandibona wamubona awalo Taata.” (Joh. 14:8, 9) Atulange-lange zikozyanyo zimwi Jesu mwaakatondezya bube bwa Bausyi. Muntu uuciswa cinsenda naakalomba Jesu kuti amuponye, Jesu wakamujata mwaalumi ooyu “wakazwide cinsenda” akumwaambila kuti “Ndilayanda. Kosalazyigwa.” Naakapona, sicinsenda ooyu cakutadooneka wakabona ijanza lya Jehova muzyintu nzyaakali kucita Jesu. (Lk. 5:12, 13) Alimwi ciindi Lazaro naakafwa, basikwiiya kweelede kuti bakabona luzyalo lwa Taata, ciindi Jesu ‘naakanyongana kapati mumoyo alimwi akupenga’ kusikila “yakamweenda misozi.” Nikuba kuti Jesu wakalizyi kuti wakali kuyoomubusya Lazaro, wakabona kuusa nkobakajisi bamukwasyi wa Lazaro alimwi abalongwe bakwe. (Joh. 11:32-35, 40-43) Cakutadooneka, kuli zibalo zyamu Bbaibbele nzyomuyanda kapati zyalo zimupa kubona Taata siluyando kwiinda muzyintu nzyaakacita Jesu.
11. (a) Ncinzi Jesu ncaakayubununa kujatikizya Bausyi ciindi naakasalazya tempele? (b) Nkaambo nzi cibalo citondezya Jesu mbwaakasalazya tempele ncocikkazyika moyo?
11 Nikuba boobo, ncinzi ncotukonzya kwaamba kujatikizya Jesu mbwaakasalazya tempele? Amweezyeezye busena nkozyakali kucitikila: Jesu wakapanga nswepu yantambo, amane wakabatanda aabo bakali kusambala ŋombe ambelele. Wakawuumuna makkobili aabasikucinca mali akutingamuna matebulu aabo. (Joh. 2:13-17) Kubatanda nkwaakacita cakapa basikwiiya bakwe kuyeeya majwi aabusinsimi aa Mwami Davida aakuti: “Busungu bwakuŋanda yako bwandilya.” (Int. 69:9) Kwiinda mukubweza ntaamu eeyi, Jesu wakatondezya kuti wakali aluyandisisyo lwakukwabilila bukombi bwakasimpe. Sena mwabubona bube bwa Bausyi mucibalo eeci? Eeci cituyeezya kuti Leza ulijisi nguzu zyakumanizya bubi aanyika, alimwi ulayandisisya kucita boobo. Jesu ncaakacita naakabona zyintu zibi kazicitika, citondezya Bausyi mbobalimvwa nibabona bubi bwavwula kapati anyika aano mazuba. Eelo kaka cilatukkazyika moyo ciindi nitucitikilwa zyintu zitaluleme!
12, 13. Ncinzi ncomukonzya kwiiya kujatikizya Jehova kweelana a Jesu mbwaakeendelezya basikwiiya bakwe?
12 Atulange-lange cikozyanyo cimbi Jesu mbwaakeendelezya basikwiiya bakwe. Bakazumanana kukazyanya kujatikizya iwakali mupati. (Mk. 9:33-35; 10:43; Lk. 9:46) Kweelana aciindi cilamfwu ncaakakkala a Bausyi, Jesu wakalizyi mbwalimvwa Jehova kujatikizya tumpenda twakulisumpula tuli boobo. (2 Sam. 22:28; Int. 138:6) Kunze lyaboobo, Jesu wakabona tumpenda tuli boobo kuli Saatani Diabolosi. Sikuyanda kuzundana ooyo wakabikkila kapati maano kukuba ampuwo alimwi akuba mubusena busumpukide. Aboobo, Jesu weelede kuti wakausa kapati naakabona muuya uli boobu kauzumanana akati kabasikwiiya bakwe mbaakayiisya. Muuya ooyo wakaliko nikuba akati kabaabo mbaakasalide kuba baapostolo. Bakautondezya muuya ooyo mane kusikila buzuba bwamamanino aabuumi bwa Jesu aanyika. (Lk. 22:24-27) Pele Jesu wakazumanana kubasinsa caluzyalo, kazyi kuti mukuya kwaciindi balakonzya kumwiiya akuba amizeezo njaakajisi yakulicesya.—Flp. 2:5-8.
13 Sena mwalubona lugwasyo lwa Usyi kweelana a Jesu mbwaakalulamika tumpenda tubyaabi twabasikwiiya bakwe cakukkazyika moyo? Sena mwamubona Usyi mumicito ya Jesu alimwi amajwi, walo uutasiyi bantu bakwe nikuba kuti balalezya ziindi zinji? Katujisi luzyibo lwabube bwa Leza mumizeezo, sena tacitukulwaizyi kumusikila kutegwa tumwaambile kuti tweempwa ciindi nitulubizya?
MWANA WAKAYUBUNUNA BAUSYI CAKULIYANDILA
14. Ino Jesu wakatondezya buti kuti wakali kuyanda kuyubununa Bausyi?
14 Bantu banji ibali mubweendelezi balabadyaaminina bantu mbobeendelezya alimwi tabayandi kubayubunwida makani. Mukwiimpana, Jesu wakali kuyanda kwaambila bamwi makani aajatikizya Bausyi, kubayubununa kusikila mpagolela. (Amubale Matayo 11:27.) Kuyungizya waawo, Jesu wakapa basikwiiya bakwe ‘busongo kuti bamuzyibe silusinizyo,’ Jehova Leza. (1 Jo. 5:20) Ino eeco caamba nzi? Jesu wakajalula mizeezo yabasikwiiya bakwe kutegwa bamvwisye nzyaakali kuyiisya kujatikizya Bausyi. Tanaakaamba zyintu zikatazya kujatikizya Bausyi kwiinda mukuyiisya kuti bakali cibeela canjiisyo ya Butatu iikatazya kumvwa.
15. Nkaambo nzi Jesu ncaatakayubununa makani amwi kujatikizya Bausyi?
15 Sena Jesu wakayubununa zyoonse nzyaakazyi kujatikizya Bausyi? Peepe. Cabusongo tanaakaamba zyintu zinji nzyaakazyi. (Amubale Johane 16:12.) Nkaambo nzi? Nkaambo kuciindi eeco, basikwiiya bakwe tiibakali ‘kukonzya kumvwisya’ luzyibo luli boobo. Aboobo, kweelana a Jesu mbwaakapandulula, luzyibo lunji lwakali kuyooyubununwa “[i]mugwasyi” asika, nkokuti imuuya uusalala walo iwakali kuyoobagwasya kumvwisya “kasimpe koonse.” (Joh. 16:7, 13) Mbubwenya mbuli bazyali basongo mbobatakonzyi kwaamba makani amwi kubana babo kusikila bana basika aciimo ncobakonzya kumvwisya, awalo Jesu wakalindila kusikila basikwiiya bakwe basima alimwi akukonzya kumvwa twaambo tumwi kujatikizya Bausyi. Jesu tanaakabikkila maano kukulezya kwabo.
AMUMWIIYE JESU KWIINDA MUKUGWASYA BAMWI KUZYIBA JEHOVA
16, 17. Nkaambo nzi ncomuli muciimo cibotu cakuyubununa Taata kuli bamwi?
16 Kuti naa muntu umwi mwamuzyiba kabotu alimwi bube bwakwe bwamukkomanisya, sena tamukonzyi kwaambila bamwi kujatikizya nguwe? Naakali anyika, Jesu wakali kwaambila bamwi kujatikizya Bausyi. (Joh. 17:25, 26) Sena cilakonzyeka kulindiswe kumwiiya kwiinda mukuyubununa Jehova kuli bamwi?
17 Mbubwenya mbotwalanga-langa, Jesu wakalijisi luzyibo lunji kujatikizya Bausyi kwiinda muntu uuliwoonse. Nikuba boobo, wakali kuyanda kwaambila bamwi zyintu zimwi nzyaakazyi, nikuba kugwasya basikumutobela kuba abusongo bwakumvwisya mbazu zimwi ziyumu zyabube bwa Leza. Kwiinda mukugwasyigwa a Jesu, twacikonzya kumumvwisya kabotu Taateesu kwiinda bantu banji mazuba aano. Eelo kaka tulalumba kapati kuti Jesu kwiinda mukuyiisya kwakwe alimwi amukulilemeka, wakayubununa Bausyi kulindiswe cakuliyandila! Mubwini tulakonzya kulilumbaizya akaambo kakumuzyiba Taata. (Jer. 9:24; 1 Ko. 1:31) Mbubwenya mbotwasolekesya kuswena kuli Jehova, awalo waswena kulindiswe. (Jak. 4:8) Aboobo, tulakonzya kwaambila bamwi luzyibo ndotujisi. Ino inga twacita buti oobo?
18, 19. Muunzila nzi momukonzya kuyubununa Taata kuli bamwi? Amupandulule.
18 Tweelede kumwiiya Jesu kwiinda mukuyubununa Taata mumajwi eesu alimwi amumicito. Amuyeeye lyoonse kuti bantu banji mbotujana mumulimo wamumuunda tabamuzyi kuti naa Leza nguni. Njiisyo zyakubeja zyezinyonganya mbobamubona Leza. Tulakonzya kwaambila bamwi nzyotuzyi kujatikizya zyina lya Leza, makanze aakwe aajatikizya bantu alimwi abube bwakwe kweelana ambobuyubunwidwe mu Bbaibbele. Kuyungizya waawo, tulakonzya kubandika abasyomima zibalo zimwi zyamu Bbaibbele iziyubununa bube bwa Leza munzila njotwatakali kumvwisya kaindi. Munzila eeyo abalo balakonzya kugwasyigwa.
19 Mbuti mbomukonzya kuyubununa Taata kwiinda mumicito nimusolekesya kwiiya Jesu? Ciindi bantu nibabona luyando lwa Kristo mumicito yesu, balaswena kuli Taata alimwi a Jesu. (Ef. 5:1, 2) Mwaapostolo Paulo wakatukulwaizya ‘kumwiiya mbubonya awalo mbwaakaiya Kilisito.’ (1 Ko. 11:1) Eelo kaka tulijisi coolwe cakugwasya bantu kuzyiba Jehova kwiinda mukulilemeka kwesu! Inzya, toonse atuzumanane kwiiya Jesu kwiinda mukuyubununa Taata kuli bamwi.
[Mibuzyo yaciiyo]
