Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Muunzila nzi motukonzya kwaamba kuti Solomoni wakatupa cikozyanyo citucenjezya?

Leza wakamulongezya alimwi akumubelesya Mwami Solomoni. Nikuba boobo, kacili mwami, Solomoni wakacileka kutobela malailile aa Leza. Wakakwata mwana aa Farao abamakaintu bambi banji, alimwi asyoonto-syoonto wakazumizya bamakaintu aaba kumoongelezya kutalika bukombi bwakubeja. Mbubwenya buyo, andiswe tweelede kucenjela kutegwa tutabi azilengwa zibyaabi zyalo zikonzya kutalika asyoonto-syoonto. (Dt. 7:1-4; 17:17; 1 Bam. 11:4-8)——12/15, peeji 10-12.

Nkaambo nzi ncotweelede kupona kweelana azyeelelo zyamu Bbaibbele?

Aabo batobela zyeelelo zyamu Bbaibbele balijisi manjezyeezya aasalala alimwi balamvwana mumukwasyi. (Int. 19:8, 11) Aabo batayandi kutobela zyeelelo zyamu Bbaibbele kanji-kanji balapenga mumizeezo.—1/1, peeji 8 a 9.

Nkaambo nzi Banakristo ncobabbapatizyigwa, alimwi mbuti umwi mbwakonzya kweelela kutegwa abbapatizyigwe?

Kuti Munakristo wabbapatizyigwa nkokuti ulomba kuba acilongwe cibotu a Leza. (1 Pe. 3:21) Kwiinda mumupailo, tulalyaaba kuli Jehova, akukonka kuti tuyanda kucita kuyanda kwakwe mubuumi bwesu boonse. Twamana kupa mupailo wakulyaaba, tulakutondezya kulyaaba kwesu kubuleya kwiinda mukubbapatizyigwa.—4/1, peeji 16 a 17.

Ntwaambo nzi tutondezya kuti lyoonse kwali Banakristo bakasimpe bananike anyika kuzwa mumwaanda wamyaka wakusaanguna?

Mucikozyanyo ca Jesu “[ca]maila” “[a]nsaku,” “imbuto mbotu” iiminina “bana ba Bwami.” (Mt. 13:24-30, 38) Nsaku zyakali kuyookomenena antoomwe amaila kusikila ciindi cakutebula. Aboobo, nikuba kuti tatukonzyi kuzyiba baimininwa amaila, kweelede kuti bananike bakasimpe baliko lyoonse kusikila mazuba aano.—1/15, peeji 7.

Ino nguni wakatuma “nyenyeezi” kuti isololele basikupandulula bweende bwanyenyeezi?

Nguyooyo wakali kuyandisya kapati kuti Jesu muvwanda ajaigwe—Saatani Diabolosi. Saatani usumpula kubeja, nkondo alimwi abujayi. Nkakaambo kaako Jesu wakamwaamba kuti “mubeji alimwi ngousyi wabubeji,” ooyo “wakali mujayi kumatalikilo aabuzangi bwakwe.” (Joh. 8:44)—4/1 peeji 29.

Mbuti mbotukonzya kulwana kampenda kakuba amunyono?

Nzeezi nzila zikonzya kutugwasya: Amube aluyando lwabunyina, amuyanzane abantu balyaabide kuli Leza, amusole kucita zibotu, “amukondwe abaabo bakondwa.” (Lom. 12:15)—2/15, peeji 16-17.

Ino Anasi waambidwe mucibalo ca Makani Mabotu cijatikizya kubetekwa kwa Jesu nguni?

Ciindi Jesu naakali kubetekwa, Anasi wakaambwa kuti “Mupaizi Mupati.” (Lk. 3:2) Wakabeleka kali mupaizi mupati kuzwa mu 6 naa 7 C.E. kusikila kuma 15 C.E., naakagusyigwa amulimo wabupaizi, pele wakazumanana kweendelezya zyintu zimwi mu Israyeli.—4/1 peeji 9.

Ciindi nitupa bamwi lulayo, ninjiisyo nzi nzyotweelede kuyeeya?

Amuzyibe cini cijatikizyidwe mubukkale oobo. Tamweelede kufwambaana kwiingula. Cakulibombya amubelesye Jwi lya Leza. Kuti kacikonzyeka amubelesye laibbulali yanu yamabbuku aamba zyamu Bbaibbele. Tamweelede kubasalila cakucita bamwi.—3/15, peeji 7-9.

Ino Jesu wakali kupandulula nzi naakakulwaizya baswiilizi bakwe kweenda kkilomita lyabili? Mt. 5:41.

Ciindi eeco mu Israyeli, bana Roma ibakali kweendelezya bakali kukonzya kusinikizya muntu kucita mulimo umwi. Aboobo, naakakulwaizya baswiilizi bakwe kweenda kkilomita lyabili, Jesu wakali kupandulula kuti kakunyina kunyema bakeelede kubeleka mulimo ngobapegwa amuntu uuli mubweendelezi uubasinikizya.—4/1, peeji 9..