Luzyalo Lulagwasya Kulesya Kunyema

MUKAINTU umwi uucembeede kunyina naakakkomana ciindi ba George aba Manon, Bakamboni bobilo baku Netherlands nibakali kuyanda kumukambaukila makani mabotu aa Bwami. Bakazoozyiba kuti wakafwidwa balumi ziindi zyobilo amwana musankwa omwe alimwi wakali kuciswa bulwazi bulya zifwuwa. Nikuba kuti mukuyakwaciindi wakaleka kunyema nibakali kubandika, kunyina naakakkomana pe.

Ba George bakapa muzeezo kuli ba Manon wakuti baakupiluka bakatolelezye amaluba aakuyoopa mukaintu ooyu nkaambo wakali kulibonya kulendelelwa alimwi wakalinyemede. Ciindi nibakapiluka, mukamwini ŋanda ba Rie, bakagambwa kapati. Nikuba boobo, tiicakali ciindi cibotu kulimbabo, aboobo bakapangana kuti bakabaswaye buzuba bumbi. Ciindi ba George aba Manon nibakapiluka buzuba mbobakapangana, tiibakajana muntu aŋanda. Nikuba kuti bakasoleka aziindi zisiyene-siyene, kunyina nibakabajana aŋanda pe. Alimwi bakatalika kuyeeya kuti ulabatija.

Bumwi buzuba, ba George bakabajana ba Rie aŋanda. Bakalilekelela akaambo kakutajanika aciindi ncobakapangana alimwi bakapandulula kuti bakali mucibbadela. Bakaamba kuti: “Pele tamukonzyi kuzyiba ncindakacita nywebo mobilo nimwakazwa. Ndakatalika kubala Bbaibbele.” Kuzwa waawo, bakazumanana amubandi uukkomanisya alimwi ciiyo ca Bbaibbele cakatalisyigwa.

Ba Rie nibakazumanana kwiiya Bbaibbele, bakacinca, bakaleka kunyema akuba mukaintu uukkomene alimwi waluzyalo. Nikuba kuti tabazwi muŋanda, ndilyona eelyo bakatalika kwaambila bali boonse babaswaya kujatikizya nzyobakatalika kusyoma. Akaambo kakuciswa-ciswa kunyina nibakali kujanika lyoonse kumiswaangano yambungano, nikuba boobo, bakali kukkomana bakwesu abacizyi nibakali kubaswaya. Buzuba nibakakkwanya myaka iili 82 yakuzyalwa, bakajanika kumuswaangano wabbazu alimwi bakatondezya kulyaaba kwabo kuli Leza kwiinda mukubbapatizyigwa.

Kakwiindide buyo myezi misyoonto kuzwa ciindi nibakafwa, pepa ilyakalembedwe kweema kwabo lyakajanika. Mukweema ooku, bakapandulula mapenzi aakulendelelwa kubucembele alimwi bakakankaizya mboluyandika luzyalo. Ba Manon baamba kuti: “Kubala kweema ooku kwakandijatikizya kapati alimwi ndilikkomene kuti Jehova wakatugwasya kubatondezya luzyalo.”

Masimpe, cikozyanyo ca Jehova citupa kutondezya luyando alimwi aluzyalo luli boobo. (Ef. 5:1, 2) Tunoozyala micelo mumulimo wesu kuti ‘katutondezya kuti tuli babelesi ba Leza . . . kwiinda mukuba aluzyalo.’—2 Ko. 6:4, 6.