Mibuzyo Yabasikubala
Mibuzyo Yabasikubala
Ndilili Bulelo Bweendelezya Nyika Yoonse bwa Anglo-America nibwakaba bulelo bweendelezya nyika yoonse bwaciloba kweelana abusinsimi bwamu Bbaibbele?
▪ Cikozyanyo cipati cifulidwe ncaakabona Mwami Nebukadinezara, taciiminini mfwulumende zyoonse izyakajisi nguzu zyakweendelezya nyika yoonse pe. (Dan. 2:31-45) Ciiminina buyo mfwulumende zili musanu izyakalela kuzwa muciindi ca Daniele alimwi izyakali kubajatikizya kapati bantu ba Leza.
Bupanduluzi bwa Daniele bwacikozyanyo cifulidwe butondezya kuti Bulelo Bweendelezya Nyika Yoonse bwa Anglo-America bwakali kuyoozwa mubweendelezi bwa Roma, kutali kuti bwakali kuyoozunda Roma pe. Mucikozyanyo, Daniele wakabona butale buli kumaulu kabusika akuzituta mane kutunwe. (Kuzituta akutunwe, butale bulivwelene abulongo.) * Bupanduluzi oobu butondezya kuti Bulelo Bweendelezya Nyika Yoonse bwa Anglo-America bwakali kuyootalikila kumaulu aabutale. Makani aakaindi alabusinizya bupanduluzi oobu. Britain, cisi icakali cibeela ca Bulelo bwa Roma, cakatalika kuba anguzu kumamanino amyaka yamuma 1700. Mukuyakwaciindi, bakatalika kubelekela antoomwe acisi ca United States of America. Nikuba boobo, bulelo bweendelezya nyika yoonse bwaciloba ibulembedwe mubusinsimi bwamu Bbaibbele tiibwakaningatalika kweendelezya. Nkaambo nzi? Cisi ca Britain alimwi acisi ca United States tiizyakaningatalika kubelekela antoomwe muzyintu zipati-pati. Kubelekela antoomwe kwakatalika ciindi ca Nkondo Yanyika Yakusaanguna.
Aciindi eeco, “bana ba Bwami” bakali basungu kapati mucisi ca United States, maofesi aabo mapati kaali ku Brooklyn mu New York. (Mt. 13:36-43) Baciinga cabananike bakali kukambauka kapati muzisi izyakali kweendelezyegwa a Bulelo bwa Britain. Ciindi ca Nkondo Yanyika Yakusaanguna, bweendelezi bwa Britain alimwi a America bwakakamantana ciindi nibwakali kulwana basinkondonyina. Kuyungizya waawo, akaambo kakusulaikana ikwakatalisyigwa ankondo, bakatalika kulwana baabo ibakali cibeela calunyungu lwa Leza lwa “mukaintu,” kubaumpila mabbuku ngobakali kumwaya akubabikka muntolongo aabo ibakali kusololela mulimo wakukambauka.—Ciy. 12:17.
Kweelana abusinsimi bwamu Bbaibbele, bulelo bweendelezya nyika yoonse bwaciloba tiibwakatalika kweendelezya kumamanino aamyaka yamuma 1700, ciindi cisi ca Britain nicakatalika kuba anguzu. Pele, bwakatalika kweendelezya kumatalikilo kwabuzuba bwa Mwami. *
[Bupanduluzi buyungizidwe]
^ munc. 4 Bulongo buvwelene abutale bwiiminina zibeela izijanika mu Bulelo Bweendelezya Nyika Yoonse bwa Anglo-America izili mbuli butale. Mukuyakwaciindi, bulongo oobu bupa kuti cikatazye kubweendelezi oobo kuti bube anguzu mbuli mbobuyanda.
^ munc. 6 Oobu mbupanduluzi bupya, kwiindana abupanduluzi bujanika apeeji 57, muncali 24, mubbuku lya Businsimi bwa Daniele alimwi butondezyedwe amaccaati aali aapeeji 56 alimwi aapeeji 139.
[Cifwanikiso icili apeeji 19]
Bakwesu bali lusele ibakali kumaofesi mapati aa Watchtower bakaangwa mu June 1918
