Amubelekele Leza Walwaanguluko

“Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi.”—1 JO. 5:3.

SENA INGA MWAINGULA?

Mbuti Saatani mbwasola kupa kuti milawo ya Leza iboneke mbuli kuti ilaminya?

Nkaambo nzi ncotweelede kucenjela kapati kujatikizya bantu mbotuyanzana limwi?

Ncinzi ciyootugwasya kuzumanana kusyomeka kuli Leza walwaanguluko?

1. Ino Jehova ulubona buti lwaanguluko, alimwi ino wakatondezya buti oobo kuli ba Adamu a Eva?

JEHOVA ngo Muntu alikke uujisi lwaanguluko cakumaninina. Nikuba boobo, taakwe nalubelesya munzila mbyaabi, alimwi kunyina neendelezya babelesi bakwe nimuba mutuntu tusyoonto-syoonto. Muciindi caboobo, wabapa nguzu zyakulisalila, calo icibapa kubelesya bupampu akuzuzikizya zyintu zyoonse nzyobalombozya izibotu. Mucikozyanyo, Leza wakapa Adamu a Eva mulawo omwe buyo iwakali kubakasya—kubakasya kulya “musamu wakuziba bubotu abubi.” (Matl. 2:17) Eelo kaka bakalijisi lwaanguluko lunji lwakucita kuyanda kwa Mulengi wabo!

2. Nkaambo nzi bazyali besu bakusaanguna ncobakasweekelwa lwaanguluko lwabo ndobakapegwa a Leza?

² Nkaambo nzi Leza ncaakapa lwaanguluko lunji boobo kubazyali besu bakusaanguna? Wakabalenga mucinkozya cakwe alimwi wakabapa manjezeezya, kalangila kuti luyando ndobakajisi kulinguwe kali Mulengi wabo lulabasololela munzila iili kabotu. (Matl. 1:27; Lom. 2:15) Cuusisya ncakuti, ba Adamu a Eva bakaalilwa kutondezya kulumba kuli Sikupa Buumi alimwi alwaanguluko ndwaakabapede. Muciindi caboobo, bakasala lwaanguluko lwakapegwa a Saatani, ilwakuyanda kuteendelezyegwa. Pele muciindi cakujana lwaanguluko lunji, bazyali besu bakusaanguna bakalisambala antoomwe abana babo mubuzike bwacibi, calo cakabaletela mapenzi aataambiki.—Lom. 5:12.

3, 4. Mbuti mbwasola kutuyunga Saatani caboola kuzyeelelo zya Jehova?

³ Ikuti Saatani wakacikonzya kuyunga bantu bobilo balondokede alimwi azilenge zyamuuya zili mbozibede kukaka bweendelezi bwa Leza, andiswe ulakonzya kutucenga. Nzila nzyabelesya nzimwi buyo. Ulasola kutucenga kwiinda mukutupa kuyeeya kuti zyeelelo zya Leza zilaminya, zilatusinkilila kujana ciindi cakulikondelezya. (1 Jo. 5:3) Kuyeeya kuli boobo kulakonzya kutunyonganya ikuti twazumanana ankuko. Mucizyi umwi uujisi myaka yakuzyalwa iili 24 iwakanjila mubukkale bwakutalilemeka  wakaamba kuti: “Kuyanzana abantu batali kabotu kwakandijatikizya, ikapati akaambo kakuti ndakali kuyoowa kwaamba ciimpene abeenzuma.” Ambweni mwakayungwa kale abeenzinyoko munzila iili boobo.

⁴ Cilausisya kuti ziindi zimwi kuyungwa kulakonzya kuzwa mumwenya mumbungano ya Banakristo. Kamboni mwana-mwana umwi musankwa wakaamba kuti: “Ndakatalika kumvwana abakubusi bamwi mumbungano ibakamvwene kukwatana abantu batali Bakamboni. Nindakazumanana kumvwana ambabo, ndakatalika kuyungwa. Ndakaleka kucita kabotu kumuuya. Tiindakali kucikkomanina cakulya cakumuuya kumiswaangano, alimwi ndakaleka kuunka mumulimo wamumuunda. Eeci ncecakali citondezyo cakuti ndileke kuyanzana ambabo aboobo ndakacileka.” Sena mulizyi kuti bantu mbomuyanzana limwi balakonzya kumuyunga? Atulange-lange cikozyanyo camu Bbaibbele.—Lom. 15:4.

WAKABBA MYOYO YABO

5, 6. Mbuti Abisalomu mbwaakabayunga bamwi, alimwi sena makanze aakwe akazwidilila?

⁵ Ibbaibbele lilijisi zikozyanyo zinji zyabantu ibakayunga bamwi. Cikozyanyo comwe cili boobo nca Abisalomu mwana musankwa wa Mwami Davida. Abisalomu wakali mwaalumi uuboneka kabotu kapati. Nikuba boobo, mukuyakwaciindi mbuli Saatani, wakalekela bulyato kunjila mumoyo wakwe, nkaambo wakatalika kulombozya cuuno cabwami cabausyi calo catakali kumweelela. * Cabucenjezu, mukusola kubweza bwami, Abisalomu wakatondezya kuti ulababikkila maano kapati bantu kumwi cabusongo kaamba kuti nkuta yamwami tiiyakali kubabikkila maano. Inzya, mbubwenya mbwaakacita Diabolosi mumuunda wa Edeni, Abisalomu wakalibikka kuba sikugwasya, kulubazu lumwi wakali kubejelezya bausyi.—2 Sam. 15:1-5.

⁶ Sena makanze aabucenjezu aa Abisalomu akazwidilila? Kulubazu lumwi inga twaamba kuti inzya, nkaambo cibalo camu Bbaibbele caamba kuti: “Abisalomu wakabba myoyo yabantu ba-Israyeli.” (2 Sam. 15:6) Nikuba boobo, kulisumpula kwa Abisalomu kumamanino kwakapa kuti atazwidilili. Alimwi cakapa kuti afwe, walo abantu banji mbaakayunga.—2 Sam. 18:7, 14-17.

7. Nziiyo nzi nzyotukonzya kwiiya kucibalo cijatikizya Abisalomu? (Amubone cifwanikiso apeeji 14.)

⁷ Nkaambo nzi ncicakali cuubauba kubana Israyeli kucengwa? Ambweni bakali kuzilombozya zyintu Abisalomu nzyaakali kubasyomezya. Andiza bakacengwa aciwa cakwe. Kufwumbwa naa nkaambo nzi, tulakonzya kuba masimpe kuti: Tiibakali kusyomeka kuli Jehova alimwi akumwami wakwe ngwaakasalide. Mazuba aano, Saatani wazumanana kubelesya bantu bali mbuli Abisalomu mukusola kubba myoyo yababelesi ba Jehova. Balakonzya kwaamba kuti ‘zyeelelo zya Jehova tazipi lwaanguluko. Alimwi amubone bantu boonse batamubelekeli Jehova, boonse balijisi ciindi cakulikondelezya.’ Sena mulakonzya kububona bucenjezu bwakubeja buli boobo alimwi akuzumanana kusyomeka kuli Leza? Sena mulakonzya kubona kuti ulikke “mulawo uulondokede” wa Jehova, mulawo wa Kristo nguukonzya kumusololela kulwaanguluko lwini-lwini? (Jak. 1:25) Kuti kacili boobo, amutondezye kuti mulauyanda mulawo ooyo, alimwi tamweelede kusunkwa kubelesya lwaanguluko lwa Banakristo munzila iitaluzi.—Amubale 1 Petulo 2:16.

8. Nzikozyanyo nzi zitondezya kuti lukkomano talubooli akaambo kakusulaika zyeelelo zya Jehova?

⁸ Saatani uyanda kapati bacili bana-bana. Mukwesu uujisi myaka iibalilwa kuma 30 wakacaamba eeci kujatizya myaka yakwe yabukubusi kuti: “Ndakali kubona zyeelelo zya Jehova zyakulilemeka mbuli kuti zilasinkilila kutali kuti zilakwabilila.” Aboobo, wakanjila mubukkale bwakutalilemeka. Pele  eeci tiicakamuletela lukkomano pe. Wakaamba kuti: “Ndakapenga amanjezeezya alimwi akuusa kwamyaka minji.” Kujatikizya myaka yakwe yabukubusi, mucizyi umwi wakalemba kuti: “Kuti wanjila mubukkale bwakutalilemeka, inga wausa akulimvwa kubula mpindu. Neliba lino nikwainda myaka iili 19, zyintu zibyaabi zyakaindi ndilaakuziyeeya.” Aumwi mucizyi wakaamba kuti: “Kuzyiba kuti ncindakacita cakabapenzya kapati bantu mbondakali kuyandisya loko, cakapa kuti ndinyongane mumizeezo, kumuuya, alimwi ambondilimvwa. Kupona kakunyina lugwasyo lwa Jehova ncintu citakkomanisyi pe.” Saatani tayandi kuti muyeeye bubi bukonzya kuboola akaambo kacibi.

9. (a) Mibuzyo nzi iikonzya kutugwasya kulanga-langa mbotumubona Jehova alimwi amilawo yakwe anjiisyo? (b) Nkaambo nzi ncociyandika kapati kumuzyiba kabotu Leza?

⁹ Eelo kaka cilausisya kapati kuti bakubusi banji ibali mukasimpe—alimwi abapati bamwi—bakasaanguna kupenga kumane nkokwiiya kuti kulikondelezya kwiinda mukucita cibi cipa kusweekelwa kapati! (Gal. 6:7, 8) Aboobo, amulibuzye kuti: ‘Sena ndilaazyi makanze aatukole twa Saatani kuti ngakuyanda kweena? Sena Jehova ndimubona kuba Mulongwe wangu kapati, ooyo lyoonse iwaamba zyamasimpe alimwi uuyanda kuti ndigwasyigwe? Sena ndilasyoma cakumaninina kuti kunyina nayoondikasya cintu cimwi cibotu calo cikonzya kundipa kukkomana kapati?’ (Amubale Isaya 48:17, 18.) Kutegwa mukonzye kwaamba kuti inzya camoyo oonse, mweelede kuba aluzyibo lunji lwa Jehova. Mweelede kumuzyiba kabotu alimwi akubona milawo alimwi anjiisyo zyamu Bbaibbele kuti zitondezya luyando lwakwe kulindinywe kutali cintu cimusinkilila.—Int. 25:14.

 AMUPAILE KULOMBA MOYO WABUSONGO ALIMWI UUMVWIDA

10. Nkaambo nzi ncotweelede kusolekesya kumwiiya Mwami Solomoni naakacili mukubusi?

¹⁰ Naakacili mwana-mwana, Solomoni cakulibombya wakapaila kuti: “Ncili mwanike buyo, nsizi kuya akuboola.” Mpoonya wakapaila kulomba moyo wabusongo alimwi uumvwida. (1 Bam. 3:7-9, 12) Jehova wakaingula kulomba ooko ikuzwa ansi amoyo, alimwi uyoocita mbubwenya akulindinywe, kufwumbwa naa muli bana naa bapati. Nikuba boobo, Jehova takamupi kumvwisya alimwi abusongo munzila yamaleele. Pele uyoomupa kuti mube basongo ikuti kamwiiya Jwi lyakwe lyoonse, kupailila muuya uusalala alimwi akutola lubazu mububambe boonse bwakumuuya ibujanika mumbungano ya Banakristo. (Jak. 1:5) Masimpe, kwiinda mukubelesya nzila eezyi, Jehova ulapa kuti nibaba babelesi bakwe ibacili bana-bana babe basongo kwiinda baabo boonse ibatalubikkili maano lulayo lwakwe, nibaba baabo baitwa kuti “basongo abacenjede” munyika iino.—Lk. 10:21; amubale Intembauzyo 119:98-100.

11-13. (a) Ino nziiyo nzi ziyandika nzyotukonzya kwiiya kulugwalo lwa Intembauzyo 26:4, Tusimpi 13:20, alwa 1 Bakolinto 15:33? (b) Mbuti mbomukonzya kuzibelesya njiisyo eezyi zyamu Magwalo?

¹¹ Kutegwa tubone mpindu yakwiiya Bbaibbele alimwi akuzinzibala kuyeeya nzyotubala nituyanda kumuzyiba kabotu Jehova, atulange-lange magwalo aatobela. Lugwalo lumwi alumwi lujisi njiisyo iiyandika iijatikizya mbotusala balongwe. Lugwalo lwa Intembauzyo 26:4 lwaamba kuti: “Nsinakede abantu babuyo, nsinakweenda abasikuupaupa ameso.” Mulugwalo lwa Tusimpi 13:20 tubala kuti: “Uuenda abasongo ulasongwaala, pele muzwalani wabafubafuba ulabisizigwa.” Alimwi mulugwalo lwa 1 Bakolinto 15:33 tubala kuti: “Kuyanzana kubyaabi kunyonganya zilengwa zibotu.”

¹² Ncinzi ncotukonzya kwiiya kumagwalo aaya? (1) Jehova uyanda kuti katusala kabotu bantu mbotuyanzana limwi. Uyanda kutukwabilila kumubili alimwi akumuuya. (2) Bantu mbotusala kuyanzana limwi balakonzya kutupa kucita zyintu zibotu naa zibi. Aako kaambo nkamasimpe mubuumi. Kweelana amabala mbwaalembedwe, citondezya kuti Jehova uli mukwaambila moyo wesu. Munzila nzi? Amubone kuti taakwe kapango kalembedwe mbuli kuti mulawo amajwi aakuti “tamweelede . . . ” Muciindi caboobo, tulembedwe mbuli twaambo buyo twamasimpe. Aboobo, Jehova utwaambila kuti: ‘Ntootu twaambo twamasimpe. Ino muyoocita buti? Ncinzi cili mumoyo wanu?’

¹³ Camamanino, akaambo kakuti tupango ootu totatwe tulembedwe mbuli njiisyo zyantalisyo zyakasimpe, tulabeleka ciindi coonse alimwi tulakonzya kubelesyegwa munzila ziindene-indene. Mucikozyanyo amulibuzye mibuzyo eeyi: Mbuti mbondikonzya kutantamuka kuyanzana abantu ‘baupaupa ameso’? Muubukkale buli buti mondikonzya kuswaangana abantu bali boobo? (Tus. 3:32; 6:12) Ino “basongo” mbaani balo Jehova mbayanda kuti kandiyanzana limwi? Ino “bafubafuba” mbayanda kuti ndibatantamuke mbaani? (Int. 111:10; 112:1; Tus. 1:7) Ino ‘nzilengwa nzi zibotu’ nzyondikonzya kunyonganya kwiinda mukusala kuyanzana abantu babi? Sena bantu babi mbondikonzya kuyanzana ambabo bajanika buyo munyika? (2 Pe. 2:1-3) Ino inga mwayiingula buti mibuzyo eeyi?

14. Ncinzi ncomukonzya kucita kutegwa kukomba kwanu kwamumukwasyi kakugwasya?

¹⁴ Mbwaanga twamanizya kulanga-langa Magwalo, lino mweelede kulanga-langa magwalo aambi aamu Bbaibbele aayubununa mizeezo ya Leza mumakani aamujatikizya nywebo alimwi amukwasyi wanu. * Nobazyali, amukasole kubandika twaambo ootu ciindi ca Kukomba Mumukwasyi. Nimucita Kukomba Mumukwasyi, kamuyeeya kuti muyanda kugwasya umwi aumwi  mumukwasyi kumvwisya kuti milawo anjiisyo zya Leza zitondezya mbwatuyanda. (Int. 119:72) Inzya, ciiyo cili boobu ceelede kubagwasya boonse mumukwasyi kuswenenena kuli Jehova alimwi akuli umwi amweenzinyina.

15. Ino inga mwazyiba buti kuti muyaabuba amoyo wabusongo alimwi uumvwida?

¹⁵ Mbuti mbomukonzya kuzyiba kuti mwatalika kuba amoyo wabusongo alimwi uumvwida? Nzila imwi mbomukonzya kucita oobo nkwiinda mukweezyanisya kuyeeya kwanu akwabaabo bakali kusyomeka ibakaindi, mbuli Mwami Davida, iwakalemba kuti: “Ndakondwa kucita luyando lwako, O Leza wangu; Mulao wako uli mumoyo wangu.” (Int. 40:8) Mbubwenya buyo, awalo mulembi wa Intembauzyo 119, wakaamba kuti: “Nduuyandisya loko mulao wako! Nduuyeeya buzuba boonse!” (Int. 119:97) Luyando luli boobo kuti kaluli lwaatala-tala buyo, talukonzyi kukomena. Muciindi caboobo, lulaboola akaambo kakwiiya Bbaibbele cakusitikila, kupaila alimwi akuzinzibala kuyeeya, alimwi lulaboola kwiinda mukubona zilongezyo nzyotwajana akaambo kakukakatila kuzyeelelo zya Leza.—Int. 34:8.

AMULWANINE LWAANGULUKO LWANU LWA BUNAKRISTO

16. Ncinzi ncotweelede kuzyiba kuti katuyanda kuzunda nitulwanina lwaanguluko lwini-lwini?

¹⁶ Kuzwa kaindi, zisi zyali kutalika nkondo amakanze aakuleta lwaanguluko. Kuti zisi kazijisi makanze aali boobo, sena nywebo tamweelede kulwanina lwaanguluko lwanu lwa Bunakristo munzila yakumuuya? Mweelede kuyeeya kuti basinkondonyoko tali Saatani alikke amuuya wanyika uujaya, pele mweelede kulwana alimwi atumpenda twanu kubikkilizya amoyo weena. (Jer. 17:9; Ef. 2:3) Aboobo, kwiinda mukugwasyigwa a Jehova, mulakonzya kuzunda munkondo. Mukuzunda kumwi akumwi—kupati naa kusyoonto—kuyoomugwasya mumbazu zitaleli aali zyobilo. Cakusaanguna, muyookkomanisya moyo wa Jehova. (Tus. 27:11) Cabili, mwabona nguzu zya Leza “[zya]mulawo uulondokede uuleta lwaanguluko” mbozileta lwaanguluko, muyooba amakanze aakuzumanana kweenda ‘munzila iisyanikide’ iitola kubuumi butamani. Alimwi kumbele muyookkomana alwaanguluko lunji lwalo luyooboola kubantu ba Jehova basyomeka.—Jak. 1:25; Mt. 7:13, 14.

17. Nkaambo nzi ncotuteelede kutyompwa kapati kujatikizya tumpenda twesu, alimwi ndugwasyo nzi Jehova ndwapa?

¹⁷ Masimpe, ziindi zimwi toonse tulalubizya. (Muk. 7:20) Kuti eeco cacitika, tamweelede kulimvwa kubula mpindu naa kutyompwa kapati. Kuti naa mwalubizya, mweelede kubuka akuzumanana—nikuba kuti kucita boobo kuyandika kubona baalu kutegwa bamugwasye. Jakobo wakalemba kuti: ‘Mupailo wabo walusyomo ulamuponya ooyo uucisidwe, alimwi Jehova ulamubusya. Kunze lyaboobo, ikuti naa wakacita zibi, ulalekelelwa.’ (Jak. 5:15) Inzya, tamweelede kuluba kuti Leza ulaaluse ncobeni alimwi akuti nguwakamukwela mumbungano nkaambo wakabona kuti mulakonzya kucita kabotu. (Amubale Intembauzyo 103:8, 9.) Aboobo, kufwumbwa kuti mwazumanana kumubelekela Jehova camoyo woonse, takaleki kumugwasya pe.—1 Mak. 28:9.

18. Mbuti mbotukonzya kucita kweelana amupailo wa Jesu uulembedwe mulugwalo lwa Johane 17:15?

¹⁸ Naakali kupaila mubusiku bwamamanino abaapostolo bakwe bali 11 basyomeka, Jesu wakaamba majwi aaya aatalubiki kujatikizya mbabo kuti: “Ubakwabilile akaambo kamubi.” (Joh. 17:15) Jesu tanaakabikkilide buyo maano kuli baapostolo bakwe balikke pe, pele akuli basikumutobela boonse. Aboobo, tulakonzya kuba masimpe kuti Jehova uyoowiingula mupailo wa Jesu kwiinda mukutukwabilila mumazuba aano aakumamanino. ‘Jehova nintobo yabaabo beenda cakoololoka . . . Ulalulamika migwagwa yabaabo basyomeka.’ (Tus. 2:7, 8) Masimpe, kusyomeka tacili cuubauba, pele nenzila ilikke iitola kubuumi butamani alimwi akulwaanguluko lwini-lwini. (Lom. 8:21) Tamweelede kulekela muntu umwi kumugwisya mulinjiyo.

[Bupanduluzi Buyungizidwe]

[Mibuzyo Yaciiyo]

[Zifwanikiso izili apeeji 14]

Mbuti mbotukonzya kubazyiba bantu bali mbuli Abisalomu, alimwi mbuti mbotukonzya kulikwabilila kubantu bali boobu?