Bakalyaaba Amoyo Woonse Kuyoobelekela—mu Ecuador
Bakalyaaba Amoyo Woonse Kuyoobelekela—mu Ecuador
IMUKWESU uucili mwana-mwana waku Italy wakalikopene. Mbwaakamanizyila buyo cikolo casekondali alimwi kacitide kabotu muziiyo zyakwe kucikolo, banamukwasyi abamayi bakali kumukulwaizya kuti atalike lwiiyo lwaatala. Kwakaindide buyo myaka misyoonto kuzwa Bruno naakalyaaba kuli Jehova, akusyomezya kuti uyoobikka kuyanda kwa Leza mubusena bwakusaanguna mubuumi bwakwe. Ncinzi ncaakasala kucita? Wakaamba kuti: “Ndakamwaambila Jehova mumupailo kuti ndiyoopona kweelana akulyaaba kwangu akuti uyooba mubusena bwakusaanguna mubuumi bwangu. Pele alimwi cakutainda mumbali ndakamwaambila kuti tandiyandi kupona buumi butakkomanisyi, ndiyanda buumi buzwide zyakucita mumulimo wakwe.”
Nikwakainda myaka misyoonto, Bruno wakaunka kucisi ca Ecuador, ku South America. Wakaamba kuti: “Jehova wakaingula mupailo wangu kwiinda mbondakali kuyeeyela.” Icakamugambya ncakuti ciindi naakasika ku Ecuador, wakajana bakubusi banji, abalo bakaunka okuya kutegwa bakabelekele Jehova cakumaninina.
BAKUBUSI ‘IBAMUSOLA JEHOVA’
Mbubwenya mbuli bakubusi banji munyika, Bruno awalo wakazumina kutamba kwa Jehova kwakuti: “Amundisole obo, munoobona kuti njoomujalwida zipulo zyakujulu akumutilila coolwe cakufwasuka loko.” (Malk. 3:10) Akaambo kakumuyanda Leza, bakasala ‘kumusola Jehova’ kwiinda mukwaaba ciindi cabo, nguzu alimwi azyintu nzyobakajisi kutegwa basumpule kuyanda kwa Leza mucisi mubulide kapati basikukambauka Bwami.
Babelesi aaba ibalyaaba mbobasikila buyo mucilawo cipya, ncobasaanguna kubona ncakuti “mulimo wakutebula mupati, pele basimilimo mbasyoonto.” (Mt. 9:37) Mucikozyanyo, ba Jaqueline ibakazwa kucisi ca Germany calukkomano bakalembela mutabi waku Ecuador kuti: “Ndabeleka buyo myaka yobilo mu Ecuador, pele ndajana kale ziiyo zya Bbaibbele zili 13, bone balajanika kumiswaangano lyoonse. Sena eeco tacikkomanisyi?” Ba Chantal ibakazwa kucisi ca Canada bakaamba kuti: “Mu 2008, ndakaunka kunkomwe yaku Ecuador ikwakali buyo mbungano yomwe. Lino kuli mbungano zyotatwe alimwi abapainiya bainda ku 30 mubusena oobo. Taakwe ciinda kubota kubona bapya kabayaambele!” Bakayungizya kuti: “Caino-ino ndakalongela kudolopo limbi lili atala lyazilundu zya Andes musinzo uulampa mamita aali 2,743. Mudolopo eeli kuli bantu bainda ku 75,000, pele kuli buyo mbungano yomwe. Ncilawo cibotu kubelekela! Ndilaukkomanina kapati mulimo wangu.”
BUYUMUYUMU BUJANIKA
Mubwini, kubelekela mucisi cimbi kuli buyumuyumu. Masimpe ngakuti bakubusi bamwi bakatalika kukazyigwa kabatanaunka kubusena oobo. Ba Kayla ibakazwa ku United States bakaamba kuti: “Mizeezo iilibonya mbuli kuti iili kabotu yabakwesu bamucisi nkondakazyila, yakali kutyompya. Tiibakali kukateelelesya kaambo ncondakali kuyandila kuunka kucisi cimbi kuti ndikabeleke mulimo wabupainiya. Zimwi ziindi ndakali kulibuzya kuti, ‘Sena kusala kwangu kuli kabotu?’” Nikuba boobo, ba Kayla bakasala kuunka. Bakapandulula kuti: “Kupaila kuli Jehova alimwi akubandika abakwesu alimwi abacizyi kwakandigwasya kubona kuti Jehova ulamulongezya ooyo ulyaaba amoyo woonse.”
Kubantu banji, kwiiya mwaambo umbi ncintu cikatazya. Ba Siobhan ibakazwa ku Ireland bakaamba kuti: “Ndakali kupenga akaambo kakutacikonzya kwaamba mbondilimvwa. Ndakaiya kukkazyika moyo, kwiiya mwaambo cakulomya alimwi akuliseka kuti naa ndalubizya.” Ba Anna ibakazwa ku Estonia bakayungizya akwaamba kuti: “Kuzyibila kupya, kasuko alimwi akutasamba meenda aapya takweelani akwiiya mwaambo waci Spanish. Zimwi ziindi ndakali kuyanda kucileka. Ndakaiya kubikkila maano kukuyaambele kwangu kutali kukulubizya kwangu.”
Abumwi buyumuyumu butakonzyi kulubwa nkuyeeya kuŋanda. Ba Jonathan ibakazwa ku United States balazumina kuti: “Nikwakainda ciindi cisyoonto kuzwa nindakasika ndakatyompwa akaambo kakwaandaana abeenzuma alimwi abanamukwasyi. Kulimvwa boobo ndakakuzunda kwiinda mukubikkila maano kuciiyo cangu ndemwini ca Bbaibbele alimwi amulimo wakukambauka. Tiikwakainda aciindi, zyakuluula zikkomanisya nzyondakajana mumuunda alimwi abalongwe bapya mumbungano bakandigwasya kuba alukkomano alimwi.”
Buyumuyumu bumwi mbukkale bwakubusena oobo. Kanji-kanji tabulangilwi kweelana abukkale mbomuzyibide. Ba Beau ibakazwa ku Canada batwaambila kuti: “Mucisi nkomuzwa zyintu mbuli magesi alimwi amaanzi tazikatazyi pe. Pele ooku zyintu eezyi zilakonzya kuboola alimwi akuunka kufwumbwa ciindi.” Bucete, zibelesyo zyakweendela zitali kabotu, alimwi apenzi lyakutacizyiba kubala akulemba azyalo zilajanika kapati muzisi zicisumpuka. Ba Ines ibakazwa ku Austria balaliyumya mubukkale buli boobo kwiinda mukubikkila maano kubube bubotu bwabantu bali mucilawo. Bakaamba kuti: “Bantu bamucilawo eeci balasamausya kapati, mbabombe alimwi balagwasya. Bunji bwabo balayanda kapati kwiiya zinji kujatikizya Leza.”
“COOLWE CAKUFWASUKA LOKO”
Bakubusi aaba boonse ibakalyaaba ibabelekela kucisi ca Ecuador, bajana kuti Jehova ulapa “zyintu zinji kapati kwiinda aali zyeezyo” nzyobakali kulangila. (Ef. 3:20) Inzya, balimvwa kuti batambula “coolwe cakufwasuka loko.” (Malk. 3:10) Mboobu mbobalimvwa kujatikizya mulimo wabo:
Bruno: “Ndakatalika mulimo wangu mu Ecuador mucilawo cikkomanisya ca Amazon. Nikwakainda ciindi ndakagwasyilizya mumayake aakukomezya ofesi yamutabi yaku Ecuador. Lino ndibelekela ku Bbeteli. Nindakali ku Italy, ndakasala kubikka Jehova mubusena bwakusaanguna, alimwi ulandigwasya ncobeni kuzuzikizya nzyondiyanda kutegwa ndikkomane mubuumi nindibeleka mulimo wakwe.”
Ba Beau: “Cilongwe cangu a Jehova cakomena kapati nkaambo mu Ecuador ndilakonzya kubelesya ciindi cangu coonse kuzyintu zyakumuuya. Kulubazu lumwi, ndaba acoolwe cakuunka kumasena aakkomanisya—cintu ncindakali kuyanda kucita.”
Ba Anna: “Mbondili mucizyi uutakwetwe, tiindakali kuyeeya kuti inga cakonzyeka kulindime kukkomana mubuumi mbuli misyinali. Pele lino ndilizyi kuti cilakonzyeka. Ndilalumba akaambo kazilongezyo zya Jehova, ndilikkomene kapati kupanga basikwiiya, kuyaka Maanda aa Bwami alimwi akuba abalongwe bapya.”
Ba Elke: “Kucisi nkondizwa ku Austria, ziindi zinji ndakali kulomba Jehova kuti andipe ciiyo ca Bbaibbele comwe buyo. Okuno ndijisi ziiyo zya Bbaibbele zili 15. Kubona basikwiiya bakkomene ibayaambele kulandipa kukkutila kapati.”
Ba Joel: “Ncintu cikkomanisya kapati kusika kucisi cimbi kubelekela Jehova. Inga waiya kumusyoma cakumaninina alimwi cilakkomanisya kubona zilongezyo zyakwe kukusoleka kwako. Mwaka wakusaanguna ookuno nindakazwa ku United States, kabunga nkondibelekela kakomena kuzwa aali basikumwaya bali 6 kusika ku 21. Ku Ciibalusyo twakali 110.”
MBUTI KUJATIKIZYA NDINYWE?
Nobakubusi, bakwesu abacizyi sena bukkale bwanu bulamuzumizya kubelekela mucilawo mubulide kapati basikukambauka Bwami? Masimpe kuti kusala kupati kuli boobo kuyandika kuyeeya kabotu. Kaambo kapati ikeelede kutupa kucita boobo nduyando kuli Jehova alimwi abasimukoboma. Ikuti kamujisi luyando luli boobo alimwi kamweelela, amupaile amoyo woonse kuli Jehova kujatikizya makani aaya aakubelekela kucisi cimbi. Kuyungizya waawo, mweelede kubandika abazyali banu Banakristo alimwi abaalu mumbungano kujatikizya makanze aanu. Andinywe mulakonzya kusala kutola lubazu mumulimo ooyu uusalala alimwi uupa kukkutila.
[Majwi aakwelelezya sikubala aali apeeji 3]
“Kupaila kuli Jehova alimwi akubandika abakwesu alimwi abacizyi basimide kwakandigwasya kubona Jehova mbwalongezya muntu uulyaaba amoyo woonse.”—Ba Kayla ibakazwa ku United States
[Kabbokesi/Cifwanikiso icili apeeji 6]
Mbomukonzya kulibambila kuyoobelekela kucisi cimbi
• Amube acilengwa cisitikide cakwiiya
• Amwiinduluke Mulimo Wesu wa Bwami wamu August 2011 mapeeji 4-6
• Amubandike abantu ibakabelekela kale kucisi cimbi
• Amuvwuntauzye zilengwa amakani aajatikizya cisi eeco
• Amwiiye mwaambo
[Kabbokesi/Cifwanikiso icili apeeji 6]
Bamwi ibabelekela kucisi cimbi balalijanina mali aakubelesya kwiinda . . .
• mukubeleka kwamyezi misyoonto amwaka mucisi mobazwa
• mukucitisya ŋanda yabo leenti naa kusiila umwi makwebo aabo
• mukuzumanana kubeleka kababelesya Intaneti
[Zifwanikiso izili mapeeji 4, 5]
1 Ba Jaqueline ibakazwa ku Germany
2 Bruno iwakazwa ku Italy
3 Ba Beau ibakazwa ku Canada
4 Ba Siobhan ibakazwa ku Ireland
5 Ba Joel ibakazwa ku United States
6 Ba Jonathan ibakazwa ku United States
7 Ba Anna ibakazwa ku Estonia
8 Ba Elke ibakazwa ku Austria
9 Ba Chantal ibakazwa ku Canada
10 Ba Ines ibakazwa ku Austria
