Makani Aabuumi

Jehova Wakandiyiisya Kucita Kuyanda Kwakwe

Akaluulwa aba MAX LLOYD

Bumwi buzuba masiku mu 1955, kandili amisyinalima mucisi ca Paraguay ku South America nkotwakali kubelekela, bantu banyemede bakaizinguluka ŋanda motwakabede, kabaamba kuti: “Swebo leza wesu ulaanyota yabulowa alimwi uyanda bulowa bwaba gringo.” Mbuti toba gringo (bamuzwamasi) mbotwakalijana kubusena oobu?

NDAKAKOMENENA ku Australia, kwalo Jehova nkwaakatalikila kundiyiisya kucita kuyanda kwakwe. Bataata bakatambula bbuku litegwa Enemies kuzwa kuli Kamboni umwi mu 1938. Bataata abaama bakatalikide kale kulimvwa kutakkomana amusololi wacikombelo cakubusena ooku, walo iwakali kwaamba zibeela zimwi zya Bbaibbele kuti nzyaano buyo. Nikwakainda mwaka omwe, bazyali bangu bakabbapatizyigwa kutondezya kulyaaba kwabo kuli Jehova. Kuzwa ciindi eeco, kucita kuyanda kwa Jehova ncecakaba cintu ciyandika kapati mumukwasyi wesu. Bacizyi bangu ba Lesley, ibakali kundikomenena amyaka yosanwe, mbebakatobela kubbapatizyigwa, kumane mebo ndakabbapatizyigwa mu 1940 kandijisi myaka iili fwuka yakuzyalwa.

Niyakainda buyo Nkondo Yanyika Yabili, kusimba alimwi akumwaya mabbuku aa Bakamboni ba Jehova aapandulula Bbaibbele kwakalesyegwa mu Australia. Aboobo, kandicili mwana ndakaiya kupandulula nzyondisyoma kubelesya buyo Bbaibbele. Ndakajisi cilengwa cakutolelezya Bbaibbele kucikolo kuyootondezya bamwi nconditasaliyutili ndembela naa nconditagwasilizyi mububambe bwankondo zyazisi.—Kul. 20:4, 5; Mt. 4:10; Joh. 17:16; 1 Jo. 5:21.

Ibanji mbondakali kwiiya limwi tiibakali kuyanda kuyanzana andime nkaambo bakali kwaamba kuti ndakali “sikutwela muna German.” Aciindi eeco mafilimu akali kutondezyegwa muzikolo. Kabatanatalika kutondezya filimu, boonse bajanika bakeelede kunyamuka akwiimba lwiimbo lwacisi. Kuti ndacaala kandikkede, basankwa bobilo naa botatwe bakali kusola kundinyamuna kwiinda mukundikwela masusu. Kumamanino bakanditanda cikolo akaambo kakuzumanana kutobela nzyondakali kusyoma kuzwa mu Bbaibbele. Nikuba boobo, ndakazumanana kwiiya kwiinda mucikolo cakulembelana kandili kuŋanda.

MBAAKANI NJINDAKAZUZIKIZYA

Ndakajisi mbaakani yakutalika mulimo waciindi coonse yakuba mupainiya ndaakukkwanya myaka yakuzyalwa iili 14. Ndakatyompwa kapati bazyali bangu nibakandaambila kuti ndeelede kusaanguna kujana mulimo akutalika kubeleka. Bakandaambila kuti kandibbadelela ŋanda njotwakali kukkala, kumane bakandisyomezya kuti ndaakukkwanya myaka iili 18 ndiyootalika mulimo wabupainiya. Eeci cakapa kuti lyoonse katubandika kujatikizya mali ngondakali kuvwola. Ndakabaambila kuti mali aaya ndakali  kuyanda kwaayobola kutegwa ndikaabelesye mumulimo wabupainiya, pele balo bakali kwaabweza.

Ciindi cakutalika mulimo wabupainiya nicakasika, bazyali bangu bakandaambila kuti mali ngondakali kubapa bakali kwaabikka kubbanki. Kumane bakandijolela woonse kutegwa nduule zisani azyintu zimbi ziyandika mumulimo wabupainiya. Bakali kundiyiisya kulijanina zyintu nzyondiyanda kutali kulangila bamwi kundicitila oobo. Ndayeeya cakacitika, ndibona kuti lwiiyo oolu lwakandigwasya kapati.

Mebo aba Lesley nitwakali kukomena, bapainiya bakali kukkala muŋanda yesu ziindi zinji alimwi twakali kukkomana kubeleka ambabo mumulimo wakukambauka. Kumamanino aansondo twakali kubikkila kapati maano kukambauka kuŋanda aŋanda, mumugwagwa, alimwi akusololela ziiyo zya Bbaibbele. Myaka eeyo basikumwaya mumbungano bakali kulangilwa kubeleka mawoola aali 60 amwezi. Baama ziindi zinji bakali kukkwanya mawoola aayandika, eeci cakali citondezyo cibotu kulindime aba Lesley.

MULIMO WABUPAINIYA KU TASMANIA

Busena bwakusaanguna nkondakatumwa kuyoobelekela kandili mupainiya nkuunsumbu ya Tasmania mu Australia, nkondakasangana bacizyi bangu abalumi babo. Nikuba boobo, tiikwakainda ciindi cilamfwu bakandisiya akuunka kuyoojanika ku Cikolo ca Gileadi mukkilasi yanamba 15. Ndakajisi nsoni kapati alimwi cakali ciindi cakusaanguna kuzwa aaŋanda akukkala kubusena bumbi. Bamwi bakali kuyeeya kuti ndakali kuyookkala buyo myezi yotatwe ku Tasmania. Mwaka ngweenya ooyo mu 1950, ndakapegwa mukuli mumbungano uukozyenye awasicuuno wakabunga kabaalu. Nikwakainda ciindi, ndakaba mupainiya waalubazu alimwi mukwesu uumbi mwana-mwana wakaba mweenzuma ngotwakali kubeleka limwi mumulimo wabupainiya.

Cilawo cesu cakubelekela cakali mudolopo lyamugoti wamukuba kwalo kwakanyina Bakamboni. Cimwi ciindi twakasika kumazuba kwini abbaasi. Busiku bwakutalika twakakkala muhotela lyakaindi. Buzuba bwakatobela, nitwakali kukambauka kuŋanda aŋanda, twakali kubuzya bamukamwini ŋanda kuti naa kuli nkobakazyi ikwakali ŋanda yaleenti. Buzuba mbubwenya oobu kumazuba, muntu umwi wakatwaambila kuti ŋanda yamusololi wacikombelo umwi afwaafwi acikombelo ca Presbyterian yakanyina muntu alimwi wakaamba kuti tweelede kubandika adikoni. Wakali mubombe alimwi wakatuzumizya kukkala muŋanda eeyo. Cakali kugambya kuzwa aŋanda yamusololi wacikombelo abuzuba kuunka kuyookambauka.

Mulimo wakali kweenda kabotu mucilawo eeci. Twakali kuba amibandi mibotu alimwi twakatalisya ziiyo zya Bbaibbele zinji. Ciindi beendelezi bacikombelo mudolopo lipati nibakamvwa kujatikizya makani aaya aakuti Bakamboni ba Jehova bakkala muŋanda yamusololi wacikombelo, bakaambila dikoni kuti atugwisye cakufwambaana. Eeci cakapa kuti tubule ŋanda yakukkala.

Nitwakakambauka ciindi cisyoonto kumazuba buzuba bwakatobela, twakayandaula busena bwakoona masiku. Busena bwakajanika kubbuwa lyakusobanina omuya mukkalila basikweebelela cisobano. Twakasisa zyintu zyesu ookuya akuzumanana kukambauka. Nikwakatalika kusiya, twakayeeya kuswaya maanda  aambi masyoonto kutegwa tucimanizyilelimwi cilawo eeco. Aŋanda imwi, mwaalumi wakatupa ŋanda nsyoonto iijisi maluumu obilo acilawo cakwe.

MULIMO WAMUBBAZU ALIMWI ACIKOLO CA GILEADI

Nitwakabeleka kwamyezi iili lusele mucilawo eeci, ndakatambula lugwalo kuzwa kuofesi yamutabi yaku Australia ilundizyibya kuti ndasalwa kuba mulangizi wabbazu. Eeci cakandigambya, kayi ndakajisi buyo myaka yakuzyalwa iili 20. Nindakayiisyigwa kwansondo zili mbozibede, ndakatalika kuswaya mbungano ciindi aciindi akuzikulwaizya. Bunji bwabantu bakali kundikomenena, pele bakali kundilemeka nikuba kuti ndakali mukubusi.

Kwakali nzila ziindene-indene zyakweendela kuzwa kumbungano imwi kuya kumbungano imbi. Nsondo imwi ndakeenda aabbaasi, nsondo iimbi ndakeenda akatima kamagesi, mpoonya ndakeenda amootoka alimwi ahonda kumwi kandijisi cibbeeke cazisani alimwi acibbeeke camabbuku mumaanza. Kukkala a Bakambonima cakali kukkomanisya kapati. Umwi mukwesu iwakali kubeleka mbuli sicuuno wakabunga kabaalu wakaliyandide kuti ndikkale anguwe nikuba kuti ŋanda yakwe tiiyakaningamana kuyakwa. Nsondo eeyo ndakali koona mucisambilo camuŋanda, pele yakali nsondo iikkomanisya kumuuya kukkala anguwe.

Acimwi cintu icakandigambya cakacitika mu 1953 ciindi nindakatambula pepa lyakulembela Cikolo ca Gileadi canamba 22. Ndakakkomana pele alimwi ndakalibilika akaambo kakuti bacizyi bangu abalumi babo nibakamanizya Cikolo ca Gileadi mu July 30, 1950, bakatumwa kuyoobelekela ku Pakistan. Kakutanainda amwaka ba Lesley bakaciswa akufwa nkweena okuya. Ndakayeeya kuti ino bazyali bangu balalimvwa buti kuti ndaunka kucisi cimbi kakutanainda ciindi kuzwa nikwakacitika penzi eeli? Nikuba boobo, bakaamba kuti: “Koya ukabeleke kufwumbwa nkwayookutuma Jehova.” Kuzwa leelyo taakwe nindakababona alimwi bataata. Bakafwa mumwaka wa 1957.

Tiikwakainda ciindi, ndakatanta bwaato abakwesu abacizyi bamwi bali musanu baku Australia mulweendo lwansondo zili cisambomwe kuya ku New York City. Munzila twakali kubala Bbaibbele, kwiiya alimwi akukambaukila basilweendoma. Katutanaunka kubusena bwacikolo ku South Lansing, New York, twakaunka kumuswaangano wamasi ku Yankee Stadium mu July 1953. Kwakajanika bantu bali 165,829.

Tobasicikolo ca Gileadi mukkilasi yesu twakali 120, twakali kuzwa muzisi zisiyene-siyene. Buzuba mbotwakamanizya cikolo ndendilyo nibakatwaambila kuzisi nkotwakali kuyoobelekela. Cakufwambaana twakaunka kulaibbulali ya Cikolo ca Gileadi kuyoobala makani aajatikizya zisi nkotwakali kuyoobelekela. Ndakajana kuti Paraguay, cisi nkondakali kuyoobelekela cakajisi mpuwo yambunga zyakali kuyanda kucinca twaambo twacisi. Nikwakainda buyo ciindi cisyoonto kuzwa nitwakasika, ndakabuzya bamisyinali bamwi mafwumofwumo kujatikizya “kusekelela” kwakaliko masiku. Bakamweta-mweta akwaamba kuti: “Ncowamvwa nkucinca kwatwaambo twacisi kwakusaanguna. Kosondela kumulyango ubone.” Kwakali basikalumamba banji.

 CAKANDICITIKILA NCINDITAKALUBI

Ciindi cimwi, ndakasindikila mulangizi wabbazu kuswaya mbungano iyakali kulamfwu, alimwi akutondezya filimu iitegwa The New World Society in Action. Twakasaanguna kweenda acitima kwamawoola aali lusele naa fwuka, mpoonya twakeenda aŋola iikweelwa abbiza mpoonya kumamanino twakeenda acikkocci. Twakatolelezya jeneleta alimwi apulojekita. Nitwakasika nkotwakali kuunka, buzuba bwakatobela twakaswaya bantu bamumafaamu akubatamba boonse kuti baboole kuzikweebelela filimu masiku buzuba oobo. Bantu bali 15 bakajanika.

Nitwakatondezya filimu kwamaminiti aali 20, twakaambilwa kuti tunjile muŋanda cakufwambaana. Twakabweza pulojekita akutobela ncotwakaambilwa. Mpoonya baalumi bakatalika kuyobeka, kulizya ntobolo alimwi akuzumanana kwaamba kuti: “Swebo leza wesu nguleza uujisi nyota yabulowa, alimwi uyanda bulowa bwaba gringo.” Abusena oobu twakali buyo tobilo toba gringo. Aabo bakajanika filimu niyakali kutondezyegwa bakasinkila nkamu yabantu aabo kuti batanjili muŋanda. Pele basikukazya bakapiluka alimwi kuma 3 koloko mafwumofwumo, kabalizya ntobolo zyabo akutwaambila kuti tupiluke kudolopo nkotwakazyila buzuba mbweena oobo.

Bakwesu bakaambila mupati wabapulisa, walo iwakasika kumazuba amabbiza obilo kutegwa atutole kudolopo. Nitwakali kupiluka munzila, kuti twasika afwaafwi acigonde naa zisamu zinji, wakali kubweza ntobolo yakwe akweendela ambele lyesu kutegwa abone naa kuli kabotu. Ndakabona kuti ibbiza munyama uuyandika kubelesya mulweendo, aboobo nikwakainda ciindi ndakavwuba lyomwe.

KUSIKA KWABAMISYINALI BAMBI

Mulimo wakukambauka wakazumanana kuyaambele nikuba kuti basololi bazikombelo bakazumanana kukazya. Mu 1955 bamisyinali bapya bali musanu bakasika, kubikkilizya amucizyi mwana-mwana waku Canada wazyina lyakuti Elsie Swanson, walo iwakamanizya Cikolo ca Gileadi mukkilasi yanamba 25. Twakali antoomwe kuofesi yamutabi kabatanamutuma kuyoobelekela kudolopo limbi. Wakasala kubelekela Jehova nikuba kuti bazyali bakwe bakamugwasya buyo asyoonto alimwi balo tiibakakatambula kasimpe. Mu December 31, 1957, mebo aba Elsie twakakwatana, alimwi twakali kukkala tolikke muŋanda yabamisyinali mucisi ca Paraguay nkocili kumusanza.

Ŋanda yesu tiiyakajisi maanzi mukati; pele twakalijisi mukalo kunze aaŋanda. Aboobo, tiitwakajisi cisambilo camuŋanda, cimbuzi camuŋanda, muncini uuwasya, alimwi twakanyina filiji. Zyakulya twakali kuula buya abuzuba. Pele kupona buumi buubauba alimwi acilongwe citaliboteli abakwesu abacizyi bamumbungano  cakapa kuti eeci cibe ciindi cikkomanisya kapati mubuumi bwesu bwamucikwati.

Mu 1963, nikwakainda ciindi cisyoonto kuzwa nitwakapilukila ku Australia kuzikuswaya baama, bakaciswa moyo, kulibonya kuti penzi eeli lyakatalika akaambo kakukkomana kapati kubona mwanaabo kakwiindide myaka iili kkumi. Nikwakaceede mazuba masyoonto kutegwa tupiluke kubusena nkotwakali kubelekela ku Paraguay, twakajisi penzi lyakali kujatikizya ncotwakeelede kusala. Mubuzyo wakali wakuti, sena tubasiye baama mucibbadela, akulangila kuti umwi muntu uyoobalanganya, mpoonya swebo tupiluke kumulimo wesu ngotuyanda kapati ku Paraguay? Kwiinda mukwaapailila makani aaya, mebo aba Elsie twakasala kuti tulanganye baama. Twakacikonzya kuzumanana mumulimo waciindi coonse kumwi katulanganya baama kusikila nibakafwa mu 1966.

Cakali coolwe cipati kubelesyegwa mumulimo wamubbazu awacooko mu Australia kwamyaka iili mbwiibede alimwi akuyiisya Cikolo Camulimo wa Bwami cabaalu. Mpoonya kwakali kuyandika kucinca kumbi mubuumi bwesu. Ndakasalwa kuba umwi wabaabo ibakali bakusaanguna kuba mu Kkomiti ya Mutabi mu Australia. Ciindi nikwakaba bubambe bwakuyaka ofesi yamutabi mpya, ndakasalwa kuba sicuuno wakkomiti yamayake. Kwiinda mukugwasyigwa ababelesi bacibwene alimwi bakamantene, twakacikonzya kuyaka mutabi weebeka.

Kuzwa waawo ndakasalwa kuyoobelekela mu Dipatimenti Iilanganya Mulimo, dipatimenti iilanganya mulimo wabukambausi. Alimwi ndakajisi coolwe cakuswaya mitabi iimbi muzisi zisiyene-siyene kandili mulangizi uuswaya mitabi kutegwa ndigwasye akukulwaizya bakwesu. Cakali kundikulwaizya kuswaya zisi imwakali bakwesu ibakaangidwe kwamyaka iili mbwiibede akaambo kakusyomeka kuli Jehova.

MULIMO NGOTUBELEKA LINO

Mu 2001, nitwakapiluka kuzwa kumulimo wakuswaya mitabi, ndakajana lugwalo lwakali kunditamba kuunka ku Brooklyn, mu New York, kuyoobelekela nkuko kandili umwi wabamu Kkomiti ya Mutabi mpya yakapangwa ku United States. Mebo aba Elsie twakaapailila makani aaya, mpoonya twakauzumina mulimo ooyu. Lino kwainda myaka iili 11 alimwi tucili ku Brooklyn.

Ndilikkomene kapati kuti ndakajana mukaintu uuyanda kubelekela Jehova kufwumbwa mulimo ngwaatupa. Mebo aba Elsie tujisi myaka yakuzyalwa iili kuma 80 alimwi tujisi buumi buli kabotu. Lino tucilangila kumbele kukuyiisyigwa a Jehova kukabe kutamani alimwi akutambula zilongezyo zyoonse ziyooboola kuli baabo bazumanana kucita kuyanda kwakwe.

[Majwi aakwelelezya sikubala aali apeeji 19]

Nsondo imwi ndakeenda aabbaasi, nsondo imbi ndakeenda akatima kamagesi, mpoonya ndakeenda amootoka alimwi ahonda kumwi kandijisi cibbeeke cazisani alimwi acibbeeke camabbuku mumaanza

[Majwi aakwelelezya sikubala aali apeeji 21]

Tucilangila kumbele kukuyiisyigwa a Jehova kukabe kutamani

[Zifwanikiso izili apeeji 18]

Kulumwensi: Kandili mumulimo wabbazu ku Australia

Kululyo: Kandili abazyali bangu

[Cifwanikiso icili apeeji 20]

Buzuba mbotwakakwatana, December 31, 1957