“Nzindakali Kuyanda Zyacitika Ncobeni”

Myaka iili 15 yainda, ba Emilia bakali kubeleka kabali bapainiya baciindi coonse. Nikuba boobo, bakacileka mulimo ooyu waciindi coonse. Mumyaka yainda caino-ino, balikuyeeya mbobakali kukkomana ciindi nibakali kucita mulimo ooyu, alimwi bali kuyanda kuyungizya ciindi ncobabeleka mumulimo wabo wakukambauka.

Nikuba boobo, mulimo wakumubili ngobakali kubeleka ba Emilia wakali kuyanda ciindi cinji, penzi eeli lyali kupa kuti kabatakkomani. Ciindi cimwi, nibakali ababelesinyina, caansi-ansi bakaamba kuti: “Ndilombozya kuti kandibeleka mawoola masyoonto!” Mupati wamulimo wakaamvwa makani aaya akubabuzya naa akali aamasimpe makani aayo. Ba Emilia bakazumina kuti makani aayo akali aamasimpe. Nikuba boobo, kutegwa eeci cicitike, kwakali kuyandika kuti weendelezya kkampani azumizye mbwaanga mulawo wakkampani wakali kutondezya kuti babelesi boonse beelede kuba bantu balyaabide kumulimo. Mucizyi ooyu wakalibambila kutegwa acite muswaangano amweendelezi wakkampani alimwi wakapaila kutegwa abe sicamba alimwi kuti kube luumuno.

Ciindi camuswaangano, ba Emilia cabupampu pele cabusicamba bakalomba kuti kababeleka mawoola masyoonto. Ba Emilia bakapandulula kuti ciindi cakulyookezya bacibelesya kugwasya bamwi, bakayungizya akwaamba kuti: “Ndili Kamboni wa Jehova, ndigwasya bantu kumuuya. Mazuba aano, bantu banji tabalilemeki pe. Bayandika kugwasya kutegwa kabatobela zyeelelo zigwasya, alimwi busongo bwamu Bbaibbele mbondibaambila bulabagwasya kapati. Tandiyandi kuti milimo njendicita ndakotoka inyonganye mulimo ngondibeleka okuno, pele ndiyanda kujana ciindi cinji kutegwa kandigwasya bantu. Nkakaambo kaako ndiyanda kuti kandibeleka mawoola masyoonto.”

Mweendelezi wakkampani wakaswiililisya akwaamba kuti andime ciindi cimwi ndakali kuyanda kucita mulimo wakugwasya bantu. Mpoonya wakaamba kuti: “Akaambo katwaambo ntooamba, ndilimvwa kuti ndeelede kucita kweelana ambooamba. Pele sena ulizyi kuti eeci ciyoopa kuti kovwola mali masyoonto?” Ba Emilia bakaamba kuti inzya ndilizyi oobo, alimwi kuti kakuyandika ndilaubya-ubya buumi bwangu. Ba Emilia alimwi bakaamba kuti: “Makanze aangu ngakugwasya bantu kutegwa bajane cintu cikonzya kubapa kuti kabakkomana.” Mweendelezi wakkampani wakaamba kuti: “Ndilabanyomenena bantu ibalyaaba kutegwa bagwasye bamwi.”

Kunyina mubelesi wakkampani eeyi iwakajisi zyoolwe mbuli zyeezyi. Ba Emilia balazumizyigwa kubeleka mazuba one amvwiki. Icakabagambya ba Emilia ncakuti, nikuba kuti mazuba aakubeleka akaceya, bakazumanana kuvwola mali ngamunya aalya. Ba Emilia bakaamba kuti: “Nzindakali kuyanda zyacitika ncobeni, lino ndilakonzya kucita bupainya bwaciindi coonse alimwi!”

Sena kuli nimwakayeeya kucinca bukkale bwanu kutegwa mutalike bupainiya? Ikuti naa mwakali bapainiya, sena inga mwacinca bukkale bwanu kutegwa mutalike mulimo wabupainiya alimwi?

[Majwi aakwelelezya sikubala aali apeeji 32]

Mweendelezi wakkampani wakaamba kuti: “Ndilabanyomenena bantu ibalyaaba kutegwa bagwasye bamwi”