Kamuzumanana Kupona Mbuli Balelwa Ba Bwami!

“Bukkale bwanu kabweendelana amakani mabotu.”—FLP. 1:27.

INO INGA MWAINGULA BUTI?

Ino mbaani bakonzya kuba balelwa ba Bwami?

Ncinzi ncotweelede kucita kujatikizya mwaambo, makani aakaindi alimwi amilawo ya Bwami?

Ino balelwa ba Bwami batondezya buti kuti balaziyanda zyeelelo zya Leza?

1, 2. Nkaambo nzi lulayo lwa Paulo kumbungano yaku Filipi ncolujisi bupanduluzi bulibedelede?

MWAAPOSTOLO PAULO wakakulwaizya mbungano yaku Filipi kuti: “Bukkale bwanu kabweendelana amakani mabotu.” (Amubale Bafilipi 1:27.) Bbala lya Cigiliki Paulo ndyaakabelesya kwaamba mabala aakuti “bukkale bwanu” lilakonzya alimwi kwaamba ‘kuzumanana kupona mbuli balelwa.’ Mabala aayo akalijisi bupanduluzi bulibedelede kumbungano yaku Filipi. Nkaambo nzi? Nkaambo kulibonya kuti munzi wa Filipi wakali umwi waminzi yakasalidwe kwalo bantu ibakali kukkala mumo mobakali kukonzya kuba balelwa ba Roma. Balelwa bana Roma ibakali mu Filipi alimwi amu Bulelo bwa Roma boonse bakali kulisumpula akaambo kaciimo cabo alimwi bakali kukkomana kuba mulukwabililo lulibedelede lwamulawo wabana Roma.

² Basimbungano mu Filipi bakalijisi kaambo kapati kakali kubapa kukkomana. Paulo wakabakulwaizya kuti mbobakali Banakristo bananike busicisi bwabo bwakali “kujulu.” (Flp. 3:20) Bakali basicisi ba Bwami bwa Leza kutali bulelo bwabantu pe. Akaambo kaceeci bakali kukkomana kapati akaambo kazilongezyo alimwi abukwabilizi.—Ef. 2:19-22.

3. (a) Ino mbaani bajisi coolwe cakuba balelwa ba Bwami? (b) Ncinzi ncotutiilange-lange mucibalo eeci?

³ Kukulwaizya kwa Paulo kwakuti “bukkale bwanu kabweendelana amakani mabotu” bulabajatikizya aabo bayoolela a Kristo kujulu. (Flp. 3:20) Kuyungizya waawo, bulabajatikizya abaabo ibayoopona anyika kabali balelwa ba Bwami bwa Leza. Nkaambo nzi ncocili boobo? Nkaambo Banakristo boonse balyaabide babelekela Mwami omwe, Jehova, alimwi beelede kupona kweelana azyeelelo zikozyenye. (Ef. 4:4-6) Mazuba aano, bantu balabeleka canguzu kutegwa beelele kuba balelwa bacisi cisumpukide. Andiswe tweelede kubikkila maano kucoolwe cakuba balelwa ba Bwami. Kutegwa tutondezye  kulumba kwesu kucoolwe eeci, atulange-lange kukozyanya kuliko akati kazyeelelo ziyandika kutegwa muntu abe mulelwa wamfwulumende zyabantu alimwi ayooyo uuyanda kuba mulelwa wa Bwami bwa Leza. Mpoonya tulanga-langa zyintu zyotatwe nzyotweelede kucita ikuti katuyanda kuzumanana kweelela kuba balelwa ba Bwami.

ZYEELELO ZIYANDIKA KUTEGWA TUBE BALELWA

4. Ino mwaambo uusalala ninzi, alimwi mbuti mbotuwaambaula?

⁴ Amwiiye mwaambo. Mfwulumende zyabantu zimwi ziyanda kuti aabo balembela kuti babe balelwa kabaambaula mwaambo ubelesyegwa kapati mucisi eeco. Neliba leelyo nibazumizyigwa kuba balelwa, bantu balakonzya kubeleka canguzu kwamyaka kutegwa bauzyibe kabotu mwaambo mupya. Balakonzya kwiiya milawo yamwaambo cakufwambaana pele cilakonzya kubatolela ciindi kwiiya mbwaambwa mabala munzila iiluzi. Mbubwenya buyo, balelwa ba Bwami bwa Leza beelede kwiiya Bbaibbele ncoliita kuti: “Mwaambo uusalala.” (Amubale Zefaniya 3:9.) Ino mwaambo ooyo ninzi? Nkasimpe kajatikizya Leza alimwi amakanze aakwe kweelana ambokalembedwe mu Bbaibbele. Tulaambaula mwaambo uusalala ciindi nitulilemeka kweelana amilawo ya Leza alimwi anjiisyo zyakwe. Balelwa ba Bwami bwa Leza balakonzya kwiiya njiisyo zyantalisyo zyamu Bbaibbele cakufwambaana akubbapatizyigwa. Neliba leelyo nibabbapatizyigwa, beelede kuzumanana kwaambaula kabotu mwaambo uusalala. Munzila nzi? Toonse tweelede kweendelanya nzyotuzyi kujatikizya njiisyo zyamu Bbaibbele alimwi azyintu nzyotucita.

5. Nkaambo nzi ncotweelede kwiiya zyoonse nzyotukonzya kujatikizya makani aakaindi aambunga ya Jehova?

⁵ Amwiiye makani aakaindi. Muntu uulombozya kuba mulelwa wamfwulumende zyabantu ulakonzya kwiiya cintu cimwi kujatikizya makani aakaindi aamfwulumende eeyo. Mbubwenya buyo, abaabo balombozya kuba balelwa ba Bwami inga bacita kabotu kwiiya zyintu zyoonse nzyobakonzya kujatikizya Bwami bwa Leza. Amuyeeye cikozyanyo cabana basankwa ba Kora, ibakali kubelekela mu Israyeli wansiku. Bakali kukkomana kapati akaambo kamunzi wa Jerusalemu alimwi abusena bwanguwo bwakukombela akubala makani aakaindi aamunzi. Taali mabwe alimwi abulongo bwakabelesyegwa kuyaka ibwakabakkomanisya kapati pe, pele bakali kukkomanina munzi alimwi abusena oobo bwakukombela ncobwakali kwiiminina. Jerusalemu wakali ‘munzi wa Mwami mupati,’ Jehova, nkaambo ngowakali munzi wabukombi bwakasimpe. Mulawo wa Jehova nkowakali kuyiisilwa. Jehova wakali kutondezya luzyalo kubantu bakali kulelwa a Mwami wamu Jerusalemu. (Amubale Intembauzyo 48:1, 2, 9, 12, 13.) Mbubwenya mbuli  mbabo, sena mulalombozya kwiiya makani aakaindi aajatikizya mbunga yaanyika ya Jehova? Mbomuyaabuzumanana kwiiya kujatikizya mbunga ya Leza alimwi a Jehova mbwagwasya bantu bakwe, Bwami bwa Leza buyooba bwancobeni kulindinywe. Luyando lwanu lwakukambauka makani mabotu aa Bwami luyookomena.—Jer. 9:24; Lk. 4:43.

6. Nkaambo nzi ncoceelela kuti twiiye akumvwida milawo alimwi anjiisyo zya Jehova?

⁶ Amwiizyibe milawo. Mfwulumende zyabantu ziyanda kuti balelwa banzizyo kabaiya akumvwida milawo yacisi eeco. Aboobo, cileelela kuti Jehova, weelede kulangila kuti twiiye akumvwida milawo alimwi anjiisyo zisololela balelwa ba Bwami boonse. (Is. 2:3; Joh. 15:10; 1 Jo. 5:3) Kanji-kanji milawo yabantu ilijisi kampenda alimwi ziindi zimwi taijisi bululami. Mukwiimpana, “mulao wa-Jehova ulilondokede.” (Int. 19:7) Sena tulaukkomanina mulawo wa Leza alimwi akubala Jwi lyakwe abuzuba? (Int. 1:1, 2) Nzila ilikke motukonzya kuzyiba mulawo wa Leza nkuliyiisya tobeni. Taakwe uukonzya kutucitila oobo.

BALELWA BA BWAMI BALAZIYANDA ZYEELELO ZYA LEZA

7. Nzyeelelo nzi zisumpukide nzyobatobela balelwa ba Bwami?

⁷ Kutegwa tuzumanane kuba balelwa ba Bwami, tweelede kuzizyiba zyeelelo zya Leza alimwi akuziyanda. Balelwa banji mumfwulumende zyabantu baamba kuti balaizumina milawo alimwi azyeelelo zyamucisi mobakkala. Nikuba boobo, ciindi nibajana kuti ceelelo cimwi cilabakatazya alimwi akulimvwa kuti taakwe uubabwene, balausotoka mulawo. Kanji-kanji bantu bali boobu ‘mbaasikukkomanisya buyo bantu.’ (Kol. 3:22) Balelwa ba Bwami balapona kweelana azyeelelo zisumpukide. Calukkomano tulamvwida milawo ya Leza, neliba leelyo nikutakwe muntu uutulangilila. Nkaambo nzi? Nkaambo tulamuyanda Sikubamba Mulawo.—Is. 33:22; amubale Luka 10:27.

8, 9. Mbuti mbomukonzya kuzyiba naa milawo ya Leza mulaiyanda ncobeni?

⁸ Mbuti mbomukonzya kuzyiba naa mulaiyanda ncobeni milawo ya Leza? Amulange-lange mbomucita ciindi nimupegwa lulayo lujatikizya zyintu nzyomusala—mucikozyanyo, mumakani ajatikizya kusama alimwi akulibamba. Kamutanaba balelwa ba Bwami, mulakonzya kuti mwakali kulombozya kusama zisani zitali kabotu naa ziletela muzeezo wakoonana. Akaambo kakuti luyando lwanu kuli Leza lwakakomena, mwakaiya kusama munzila iilemeka Leza. (1 Ti. 2:9, 10; 1 Pe. 3:3, 4) Mulakonzya kulimvwa kuti lino musama cabulemu. Pele mbuti kuti mwaalu wamwaambila kuti zisani nzyomusama zipa kuti basikumwaya bamwi mumbungano bafwumpulwe? Ino inga mwacita buti? Sena inga mwajana cilitamizyo, kunyema naa kukaka kucinca? Mulawo wantalisyo mu Bwami bwa Leza ngwakuti boonse balelwa kabaiya Kristo. (1 Pe. 2:21) Kujatikizya cikozyanyo ca Jesu, mwaapostolo Paulo wakalemba kuti: “Umwi aumwi wesu aakkomanisye simukobonyina muzyintu zibotu alimwi izimupa kuyakwa. Nkaambo naba Kilisito tanaakalikkomanisya mwini pe.” (Lom. 15:2, 3) Kutegwa kube luumuno mumbungano, Munakristo uusimide ulilyaabide kulibombya kutegwa atanyonganyi manjezyeezya aabamwi.—Lom. 14:19-21.

⁹ Amulange-lange twaambo tobilo alimwi ituyandika kubikkila maano: mbotukubona koonana alimwi ambotucibona cikwati. Aabo batanaba balelwa ba Bwami bwa Leza balazumizya koonana kwabantu bajisi zizo zikozyenye, babona kuti kweebelela zyintu ziletela muzeezo wakoonana taakwe mbocibede alimwi bayeeya kuti bumambe alimwi akulekana makani aakulisalila. Balelwa ba Bwami bakacileka kuzilanga munzila iili boobu zyintu. Bantu banji kabatanaiya kasimpe, tiibakali kulilemeka, pele lino babona kuti koonana alimwi acikwati nzipego kuzwa kuli Leza. Balazilemeka zyeelelo zya Jehova zisumpukide alimwi camoyo woonse balazumina kuti aabo ibazumanana kutalilemeka tabeeleli kuba balelwa ba Bwami.  (1 Ko. 6:9-11) Pele alimwi balizyi kuti moyo uleena. (Jer. 17:9) Aboobo, balalumba kutambula kucenjezya kugaminide kwalo kubagwasya kuzumanana kutobela zyeelelo zyakulilemeka zisumpukide.

BALELWA BA BWAMI BALAKUBIKKILA MAANO KUCENJEZYEGWA NKOBAPEGWA

10, 11. Nkucenjezya nzi nkotupegwa a Bwami bwa Leza aciindi ceelede, alimwi ino mulimvwa buti kujatikizya kucenjezya kuli boobu?

¹⁰ Mfwulumende zyabantu zilakonzya kubacenjezya bantu kujatikizya malwazi naa kujatikizya zyakulya amisamu iitali kabotu. Cakutadooneka, tazyili zyakulya amisamu yoonse iitali kabotu. Pele ikuti cakulya naa musamu umwi kaukonzya kuleta ntenda kubantu, mfwulumende ilakonzya kubacenjezya balelwa banjiyo kutegwa bakwabililwe. Ikuti mfwulumende tiiyacita oobo, nkokuti ilakonzya kuba amulandu wakutabikkila maano. Mbubwenya buyo, Bwami bwa Leza bulapa kucenjezya aciindi ceelede kujatikizya zyintu zikonzya kunyonganya bukkale bwakumubili alimwi akuleta ntenda zyakumuuya. Mucikozyanyo, Intaneti yaba njenzila iigwasya yakubandisyanya, yakujanina lwiiyo, alimwi ayakujanina zyakulikondelezya. Mbunga ya Leza ilabelesya Intaneti alimwi kuli bubotu bunji mboijana kwiinda mukwiibelesya. Nikuba boobo, zibeela zinji zya Intaneti tazili kabotu, kumubili alimwi akumuuya. Ma Web site aasumpula zyintu ziletela muzeezo wakoonana aletela ntenda zyakumuuya kubalelwa ba Bwami. Kwamyaka iili mbwiibede, baciinga camuzike musyomesi balikucenjezya kujatikizya zibeela zili boobu zya Intaneti. Eelo kaka tweelede kulumba kukucenjezyegwa ooku kwakumuuya nkotupegwa!

¹¹ Mumyaka misyoonto yainda, cibeela cimwi ca Intaneti cazyibwa kapati, cibeela eeci cilakonzya kugwasya ikuti cabelesyegwa kabotu. Nikuba boobo, ma Web site aatubunga tujanika aa Intaneti alakonzya kutuletela ntenda. Tubunga ootu tulakonzya kupa kuti muntu atalike kuyanzana abantu batali kabotu. (1 Ko. 15:33) Nkakaambo kaako tacigambyi kubona kuti mbunga ya Leza ilatucenjezya kujatikizya zibeela eezyi zya Intaneti. Sena mwakazibala zibalo zyoonse zijatikizya tubunga tujanika aa Intaneti izyakalembwa ino-ino amuzike musyomesi? Tacili camaano kubelesya zibeela zili boobu kamutanabala zibalo eezyo. * Kucita boobo cili mbuli muntu uubelesya musamu uulaanguzu kapati katanabala malailile aajatikizya mboubelesyegwa musamu ooyo.

12. Nkaambo nzi ncobuli bufwubafwuba kuunduluzya kucenjezya nkotupegwa?

¹² Aabo baunduluzya kucenjezya kwamuzike musyomesi bayoolinjizya muntenda antoomwe abayandwa babo. Bamwi baba aciyanza cakweebelela zyintu ziletela muzeezo wakoonana, mpoonya bamwi bakacita bwaamu akulicenga kuyeeya kuti Jehova takonzyi kubona nzyobacita. Mbufwubafwuba kuyeeya kuti tulakonzya kwiisisa micito yesu kuli Jehova. (Tus. 15:3; amubale Bahebulayo 4:13.) Leza uyanda kuti abagwasye bantu bayeeya boobu, alimwi ubelesya baiminizi bakwe baanyika kutegwa acite oobo. (Gal. 6:1) Nikuba boobo, mbubwenya mbuli mfwulumende zyabantu mbozitanda bantu ibacita micito iitali kabotu, Jehova uyoobatanda balelwa aabo ibazumanana kusotoka zyeelelo zyakwe. * (1 Ko. 5:11-13) Nikuba boobo, Leza ulaaluse. Aabo bantu ibeempwa alimwi akucinca bukkale bwabo balakonzya kuba balongwe ba Jehova alimwi akuzumanana kuba balelwa ba Bwami.  (2 Ko. 2:5-8) Eelo kaka tulijisi coolwe cipati cakubelekela Mwami ulaaluyando!

BALELWA BA BWAMI BALALUBIKKILA MAANO LWIIYO

13. Ino balelwa ba Bwami batondezya buti kuti balabikkila maano kulwiiyo?

¹³ Mfwulumende zyabantu zinji zilabikkila maano kuyiisya bantu mbozilela. Zilayaka zikolo bantu nkobakonzya kwiiya kubala akulemba alimwi akwiiya kucita milimo imwi. Balelwa ba Bwami balalumba alimwi balabikkila maano kuzikolo eezyi zyakunyika nkobakonzya kwiiya kubala akulemba alimwi akwiiya milimo iikonzya kubagwasya baakutalika kubeleka. Kuyungizya waawo, balabikkila maano kapati kulwiiyo Jehova ndwapa kwiinda mumbunga yakwe. Mucikozyanyo, mbunga ya Jehova itukulwaizya kubala. Ikulwaizya bazyali kubalila bana babo. Mwezi amwezi muzike musyomesi ulamwaya mapeeji aali mbwaabede aamba zyamakani aamu Bbaibbele mumagazini ya Ngazi Yamulindizi alimwi a Sinsimuka! mu Chitonga. Ikuti kamubala mapeeji aali mbwaabede abuzuba, mulakonzya kuzumanana kugwasyigwa alwiiyo Jehova ndwapa.

14. (a) Ino ndwiiyo nzi ndotutambula? (b) Ino ninzila nzi zijatikizya Kukomba Mumukwasyi izyakamukkomanisya kubelesya?

¹⁴ Nsondo ansondo balelwa ba Bwami balatambula lwiiyo kumiswaangano yabo yambungano. Mucikozyanyo, kwamyaka iinda ku 60 Cikolo Camulimo Weendelezyegwa a Leza cali kugwasya bana bacikolo kuba baiyi babotu ba Jwi lya Leza. Sena mwakalilembya kale mucikolo eeci? Mumyaka misyoonto yainda muzike musyomesi wakulwaizya Kukomba Mumukwasyi kwansondo-ansondo. Bubambe oobu bulaiyumya-yumya mikwasyi. Sena mwacikonzya kubelesya mizeezo iijanika mumabbuku eesu? *

15. Ino ncoolwe nzi cimwi cipati ncotujisi?

¹⁵ Balelwa bamfwulumende zyabantu caantangalala balagwasilizya tubunga twatwaambo twacisi, bamwi balacita oobo kuŋanda aŋanda. Balelwa ba Bwami nyika yoonse mbwiizulwa balatondezya kuti bagwasilizya Bwami bwa Leza kwiinda mukukambauka mumigwagwa alimwi akuŋanda aŋanda. Mubwini, kweelana ambokwakaambwa mucibalo cainda, Ngazi Yamulindizi yalo yaambilizya Bwami bwa Jehova, lino njemagazini iimwaigwa kapati munyika yoonse. Coolwe cimwi cipati ncotujisi ncakwaambila bamwi kujatikizya Bwami bwa Leza. Sena mulatola lubazu cabusungu mumulimo ooyu wakukambauka?—Mt. 28:19, 20.

16. Ino inga mwatondezya buti kuti muli balelwa babotu ba Bwami bwa Leza?

¹⁶ Lino-lino Bwami bwa Leza buyooba nemfwulumende ilikke yeendelezya nyika yoonse. Milawo ya Bwami njiiyooba milawo ilikke yeendelezya bantu. Sena muyooba balelwa ba Bwami babotu caakusika ciindi eeco? Eecino nceciindi cakutondezya kuti muyooba balelwa babotu. Mukusala kulikoonse nkomucita abuzuba, amucite zyintu zyoonse kutegwa Jehova alemekwe alimwi amutondezye kuti mulazumanana kupona mbuli mulelwa wa Bwami bwa Leza.—1 Ko. 10:31.

[Bupanduluzi buyungizidwe]

[Mibuzyo yaciiyo]

[Majwi aakwelelezya sikubala aali apeeji 14]

Sena mulakutobela kucenjezya kuyeeme aa Bbaibbele kujatikizya Intaneti?

[Cifwanikiso icili apeeji 12]

Mbubwenya mbuli bana basankwa ba Kora, sena mulakkomana abukombi busalala alimwi amakani aambubo aakaindi?

[Cifwanikiso icili apeeji 15]

Kukomba Mumukwasyi kulakonzya kumugwasya nywebo abayandwa banu kuba balelwa ba Bwami babotu