Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Sena masusu aa Samsoni ngaakali kumupa nguzu?

Masusu eeni kwaagama kunyina naakali kumupa nguzu Samsoni pe. Masusu aakwe akali kwiiminina cilongwe cilibedelede ncaakajisi Samsoni a Jehova kali mu Naziri. Cilongwe eeco cakanyongana ciindi Delila naakaita muntu kuzoogela masusu aa Samsoni.—4/15, peeji 9.

Mbubwenya mbuli moyo wini, ino nzyintu nzi zyotatwe zikonzya kutugwasya kuzumanana kuba amoyo wacikozyanyo uuli kabotu?

(1) Busani. Mbubwenya mbuli moyo wini mbouyandika zyakulya zyeelede izijisi busani, tweelede kulya zyakulya zijisi busani zyakumuuya. (2) Kunyanyaasya mubili. Kutola lubazu cabusungu mumulimo wakukambauka kulakonzya kupa kuti moyo wesu wacikozyanyo kauli kabotu. (3) Busena. Tulakonzya kulwana kutyompwa kwiinda mukuyanzana abasyomima balo batubikkila maano.—4/15, peeji 16.

Mbuti muntu mbwakonzya kutantamuka kuyungwa amadaimona?

Amuzitantamuke zyintu zyoonse zijatikizyidwe amizimo. (Mil. 19:19, 20) Amusolekesye ‘kuswena kuli Leza,’ akusyoma kuti ulakonzya alimwi uyoomugwasya kutegwa mwaanguluke kukuyungwa amadaimona. (Jak. 4:7, 8)—7/1, peeji 12.

Nkaambo nzi mwaambi wamakani aamalila ncateelede kubelesya lugwalo lwa Intembauzyo 116:15 kwaamba muntu wakafwa?

Lugwalo lwaamba kuti: “Mumeso aa Jehova lufwu lwabantu bakwe basyomeka makani mapati.” Eeci caamba kuti Leza takonzyi kulekela nkamu yoonse yabantu basyomeka kuti bafwe nkaambo balayandika kapati mumeso aakwe. Takalekeli babelesi bakwe basyomeka kabali nkamu kuti bamaninine kugwisyigwa aanyika.—5/15, peeji 22.

Ino ba colporteur bakali bani?

Mwaka wa 1931 kautanasika, bbala lyakuti “colporteur” lyakali kubelesyegwa kwaamba bapainiya.—5/15, peeji 31.

Nkaambo nzi nzila njaakafwa Jesu ncoyakapa kuti ba Juda bamwi cibayumine kuba Banakristo?

Kweelana a sikukanana zya Bbaibbele umwi, ba Juda bamumwaanda wakusaanguna bakabona lufwu lwa Jesu kuti ndwamasampu. Bakali kusyoma kuti lufwu ndwafwa muntu lutondezya mbwaakabede. Akaambo kaceeci, Jesu wakali kubonwa kuti wakali mumpelenge wakabukila mfwulumende.—7/1, peeji 13.

Ino “mami aya oonse” aambidwe mulugwalo lwa Daniele 2:44 mbaani?

Mbami naa mfwulumende iziimininwa azibeela zisiyene-siyene zyacikozyanyo calubulo ncaakapandulula Daniele.—6/15, peeji 17.

Ndilili Bulelo Bweendelezya Nyika Yoonse bwa Anglo-America nibwakaba bulelo bweendelezya nyika yoonse bwaciloba kweelana abusinsimi bwamu Bbaibbele?

Bulelo oobu bweendelezya nyika yoonse bwakatalika ciindi cisi ca Britain alimwi aca United States nizyakatalika kubelekela antoomwe muzyintu zipati-pati ciindi ca Nkondo Yanyika Yakusaanguna.—6/15, peeji 19..

Ino ninjiisyo nzi zimwi zikonzya kugwasya muntu kusala kuyooba abuumi buli kabotu kumbele?

Amweezyeezye zyintu zikonzya kuboola akaambo kakusala kwanu. (Tus. 22:3) Amulisalile nobeni. Amulange-lange nzyomusala lino mboziyoomujatikizya kumbele. (Tus. 21:5). Amubeleke kutegwa muzuzikizye mbaakani zyanu. (Joh. 17:3)—7/1, mapeeji 18-19.

Ino ninjiisyo nzi zyamu Bbaibbele zimwi zikonzya kugwasya muntu kuliyumya ciindi najisi penzi lyamali?

Amubone mali aayandika. (Lk. 14:28) Amucince bukkale bwanu. (Tus. 22:3) Amulibambile kubeleka mulimo uuliwoonse. (Tus. 29:25) Amukkutile. (Flp. 4:11, 12)—7/1, mapeeji 20-21.