Luumuno Kwamyaka Iili 1,000—Alimwi Mane Kukabe Kutamani!
Luumuno Kwamyaka Iili 1,000—Alimwi Mane Kukabe Kutamani!
“Kutegwa Leza abe mweendelezi wazyintu zyoonse.”—1 KO. 15:28.
SENA INGA MWAPANDULULA?
Ino kuzuzikizyigwa kwamagwalo aaya kuyakwaamba nzi kulindinywe?
1. Ncintu nzi cikkomanisya ncobayootambula ‘bankamu mpati’?
AMUYEEYE buyo bubotu bukonzya kuboola amfwulumende iilaanguzu alimwi amuleli ulaaluse nzyakonzya kucitila bantu mbalela mumyaka iili 1,000! Zyintu zikkomanisya kapati zilindila ‘bankamu mpati’ ibayoofwutuka “mapenzi mapati,” alo ayoopa kuti bweende oobu bwazyintu bubyaabi bumane.—Ciy. 7:9, 14.
2. Nzyintu nzi nzyobalibonena ameso bantu mumyaka iili 6,000 yainda?
2 Mumyaka iili 6,000 njobali kupona bantu, kulisalila zyakucita alimwi akulyeendelezya kwaleta macise manji alimwi akupenga kubantu. Kaindi Bbaibbele lyakaambilalimwi kuti: ‘Muntu weendelezya muntunyina kukumubisizya.’ (Muk. 8:9) Ncinzi cicitika mazuba aano munyika? Kunze aankondo amanyongwe aatwaambo twacisi, kuli mapenzi aataambiki aabucete, malwazi, kunyonyooka kwamasena, kucinca kwambokutontola akukasaala, alimwi amapenzi aambi buyo. Mfwulumende zilacenjezya kuti, ikuti katutabikkili maano kuzilenge, tulakonzya kuliletela mapenzi aataambiki.
3. Nzyintu nzi iziyooboola kwiinda mu Bulelo bwa Myaka Iili 1,000?
3 Mubweendelezi bwa Mwami wabu Mesiya Jesu Kristo alimwi aba 144,000 mbayoolelalimwi, Bwami bwa Leza buyoobweza ntaamu zyakugusya zyintu zibapenzya bantu alimwi akubambulula nyika. Cisyomezyo ca Jehova Leza icikkomanisya kapati icaamba kuti: “Ndalenga ijulu ipya anyika impya. Ezyo zyakusaanguna tazikooyooibalukwa limbi nikuba kuyeeyegwa” ciyoozuzikizyigwa ciindi ca Bulelo bwa Myaka Iili 1,000. (Is. 65:17) Nzyintu nzi zimbi zikkomanisya zitanabonwa nzyotuyootambula? Kwiinda mukugwasyigwa a Jwi lya Leza lyabusinsimi, atulange-lange zyintu zikkomanisya ‘zitanalibonya.’—2 Ko. 4:18.
‘BAYOOYAKA MAANDA AKUBYALA MYUUNDA YAMISAANSA’
4. Ndipenzi nzi lijatikizya maanda ibanji ndyobajisi mazuba aano?
4 Nguni uutayandi ŋanda iimugeme, busena mwalo mwakonzya kukkala amukwasyi wakwe cakuliiba? Mazuba aano munyika kuli penzi lipati lyakubula maanda. Bantu balisyaankene mumadolopo. Mumasena manji bantu banji bakkala mumasena muli maanda aasyankene alimwi aatayakidwe kabotu. Bantu banji kunyina nobalangila kuba aŋanda iibageme.
5, 6. (a) Ino magwalo aa Isaya 65:21 a Mika 4:4 ayoozuzikizyigwa buti? (b) Mbuti mbotukonzya kutambula cilongezyo eeco?
5 Kwiinda mumusinsimi Isaya kwakasinsimwa kuti: “Bayooyaka maanda akukala mulingao, bayoobyala myuunda yamisaansa akulya micelo yayo,” aboobo tuli masimpe kuti Bwami bwaakutalika kweendelezya, bantu boonse bayooba amaanda aakukkala. (Is. 65:21) Nikuba boobo, bantu tabayandi buyo maanda pe, kuli azimbi nzyobayanda. Nkaambo bamwi mazuba aano bakkala mumaanda aabo beni, bamwi buya bajisi maanda mapati. Pele lyoonse inga kuli kulibilika kwakuti balakonzya kusweekelwa ŋanda kuti buvwubi bwacisi bwayaansi naa kulibilika kuti balakonzya kubbidwa. Zyintu zyoonse ziyoocinca kapati Bwami bwaakutalika kulela. Musinsimi Mika wakalemba kuti: “Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.”—Mik. 4:4.
6 Katujisi bulangizi oobu mumizeezo, ncinzi ncotweelede kucita? Cakutadooneka, toonse tuyandika maanda mabotu aakukkala. Nikuba boobo, muciindi cakuyandaula ŋanda mbotu lino—andiza kwiinda mukuba azikwelete zinji kutegwa tube aŋanda iili boobo—ncamaano kubikkila maano kucisyomezyo ca Jehova. Amuyeeye nzyaakaamba Jesu kujatikizya nguwe mwini naakati: “Bamwaaba balijisi malyango abayuni bamujulu balijisi ziteente, pele Mwana wamuntu tajisi akooneka mutwe.” (Lk. 9:58) Jesu wakali kukonzya alimwi wakalijisi nguzu zyakuyaka naa kulijanina ŋanda mbotu kapati kwiinda yamuntu uuliwoonse. Nkaambo nzi ncaatakacita boobo? Cilisalede kuti Jesu tanaakali kuyanda kulinyonganya azyintu zikonzya kumupa kutabikka Bwami mubusena bwakusaanguna. Atutobele cikozyano cakwe akutalekela zyintu zyakumubili kuba nzezyintu ziyandika kapati mubuumi bwesu alimwi akutupa kulibilika.—Mt. 6:33, 34.
“UMPE AKABELELE . . . ZIYOOLYA MUCILIDO COMWE”
7. Ino malailile nzi Jehova ngaakapa bantu kujatikizya banyama?
7 Ciindi naakali kulenga zyintu anyika, kumamanino Jehova wakalenga bantu. Ku Mufuzi wakwe, Mwanaakwe mutaanzi kuzyalwa, Jehova wakaamba makanze aakwe aagaminide kuti: “Atupange muntu mucinkozya cesu, abe mbubonya mbuli ndiswe. Baendelezye inswi zyamumaanzi, abayuni bakujulu, aŋombe, anyika yoonse, abauka boonse bayavula ansi.” (Matl. 1:26) Aboobo, Adamu a Eva, mukuyakwaciindi abantu boonse, nibakapegwa nguzu zyakweendelezya banyama.
8. Mbube nzi mbobatondezya banyama mazuba aano?
8 Sena cilakonzyeka kuti banyama boonse kabalibombya kubantu alimwi akukkala ambabo muluumuno? Bantu banji balamvwana kapati abanyama mbobavwuba, banyama mbuli babwa alimwi atukkiti. Mbuti kujatikizya banyama bamusyokwe? Buvwuntauzyi bumwi butondezya kuti: “Basayansi ibakakkala abanyama bamusyokwe akubaiya, bajana kuti banyama boonse balaambobalimvwa.” Cakutadooneka, mwakabona kale kuti banyama abalo balayoowa naa kunyema ikuti kuli wabayoosya, pele sena balakonzya kutondezya luzyalo? Lipooti ilazumanana kwaamba kuti: “Ciindi banyama nibakomezya bana babo, nceciindi nibatondezya bube bwabo bupati—bube bwakucikonzya kutondezya luzyalo.”
9. Nkucinca nzi nkotulangila kujatikizya banyama?
9 Ciindi Bbaibbele nilyaamba kuti kuyooba luumuno akati kabantu abanyama, taceelede kutugambya pe. (Amubale Isaya 11:6-9; 65:25.) Nkaambo nzi? Amuyeeye kuti ciindi Nowa amukwasyi wakwe nibakazwa mubwato nilyakamana Zambangulwe, Jehova wakabaambila kuti: “Banyama boonse baansi abayuni boonse bakujulu bamuyoowe akukankama kubusyu bwanu.” Eeci cakali kupa kuti banyama bakwabililwe. (Matl. 9:2, 3) Sena Jehova taakwe naakali kukonzya kugusya kuyoowa alimwi akukankama kumwi kutegwa makanze ngaakajisi kumatalikilo azuzikizigwe? (Hos. 2:18) Eelo kaka bayookkomana kapati aabo boonse bayoofwutuka akupona munyika kuciindi eeco!
“UYOOSINDULA MISOZI YOONSE”
10. Ino ncinzi cipa kuti bantu kabalila?
10 Ciindi Solomoni ‘naakabona bantu mbobakali kupenzyegwa ansi ano,’ wakaamba kuti: “Ndakabona misozi yabapengede ambubabula sikubaumbulizya.” (Muk. 4:1) Zyintu mbozibede mazuba aano andiza akwiinda waawo buya. Nguni akati kesu uutanazwa misozi akaambo kapenzi limwi? Mubwini, zimwi ziindi kulaba misozi akaambo kakukondwa. Nikuba boobo, kanji-kanji misozi itondezya kupenga mumoyo.
11. Ncibalo nzi camu Bbaibbele icimunjila kapati mumoyo?
11 Amuyeeye zibalo zinji zyamu Bbaibbele nzyotubala zyabantu ibakalila. Ciindi Sara naakafwa kajisi myaka yakuzyalwa iili 127, “Abrahamu wakanjila kukulila Sara akoomoka.” (Matl. 23:1, 2) Ciindi Naomi naakali kulayana abamuka bana bakwe bobilo ibakafwidwa balumi, “bakatalika kulila,” kumane “bakalilisya alimwi.” (Rut. 1:9, 14) Ciindi Mwami Hezekiya naakaciswa kapati alimwi kacilibonya mbuli kuti ulafwa, wakapaila kuli Leza alimwi “wakalila akulila kupati,” kulibonya kuti cakamunjila kapati mumoyo Jehova. (2 Bam. 20:1-5) Alimwi toonse cilatujatikizya kapati icakacitika ciindi mwaapostolo Petro naakakaka Jesu. Ciindi naakamvwa mukombwe kalila, Petro “wakaya anze akulila kapati.”—Mt. 26:75.
12. Ino Bulelo bwa Myaka Iili 1,000 buyoobalemununa buti bantu?
12 Akaambo kamapenzi—masyoonto naa mapati—aatucitikila, tobantu tuyandika kuumbulizyigwa akulemununwa. Mu Bulelo bwa Myaka Iili 1,000, Leza “uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi.” (Ciy. 21:4) Cilakkomanisya kumvwa kuti koomoka, kulila, alimwi akucisa takukooyoobako, kuyungizya waawo cisyomezyo ca Leza cilabikkilizya akugusyigwa kwasinkondo wabantu mupati—lufwu. Ino eeci ciyookonzyeka buti?
‘AABO BOONSE IBALI MUZYUUMBWE BAYOOZWA MULINZIZYO’
13. Ino lufwu lwabajatikizya buti bantu kuzwa ciindi Adamu naakabisya?
13 Kuzwa ciindi Adamu naakabisya, lufwu lwali kweendelezya bantu mbuli mwami. Lwali mbuli sinkondo uutazundwi, bantu ngobatakonzyi kutija alimwi wapa bantu kuusa kapati alimwi abuumba. (Lom. 5:12, 14) Masimpe ngakuti, “akaambo kakuyoowa lufwu,” bantu banji ‘bali mubuzike mubuumi bwabo boonse.’—Heb. 2:15.
14. Ncinzi ciyoocitika lufwu lwaakugusyigwa?
14 Ibbaibbele lilaamba kujatikizya ciindi ‘sinkondo wamamanino, ilufwu, nayoonyonyoonwa.’ (1 Ko. 15:26) Kuli mbunga zyobilo ziyoogwasyigwa aceeci. Yakusaanguna, ‘ibankamu mpati’ ibapona lino bayoofwutuka akunjila munyika mpya akupona kukabe kutamani. Yabili, mabbiliyoni aabantu bakafwa kale, bayoobusyigwa. Sena mulakonzya kweezyeezya mbobayookkomana alimwi akusekelela “[ba]mbelele zimbi” ciindi nibayootambula baabo bayoobusyigwa? Ikulanga-langa zibalo zimwi zyamu Bbaibbele kulatugwasya kumvwisya mbokuyooba bantu baakubusyigwa.—Amubale Maako 5:38-42; Luka 7:11-17.
15. Ncinzi ncomuyoocita mwaakubona bayandwa banu ibakafwide kabali baumi alimwi?
15 Amwaayeeye majwi aakuti “bakakkomana kapati” alimwi aakuti “bakatalika kulemeka Leza.” Ikuti nimwakaliko ciindi nizyakali kucitika zyintu eezyi, andiza nimwakalimvwa boobu andinywe. Masimpe, kubona bayandwa besu bakafwide kabali baumi alimwi kwiinda mububuke ciyootupa kukkomana akusekelela kapati. Jesu wakaamba kuti: “Ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo.” (Joh. 5:28, 29) Taakwe wakabona kale cintu cili boobu kacicitika, cakutadooneka ciyooba akati “[ka]zyintu zitalibonyi” ziyandika kapati nzyomuyoobona.
LEZA UYOOBA “MWEENDELEZI WAZYINTU ZYOONSE”
16. (a) Nkaambo nzi ncotweelede kwaamba cabusungu kujatikizya zilongezyo ziboola kumbele izitanalibonya? (b) Ncinzi Paulo ncaakaamba kuyumyayumya Banakristo baku Korinto?
16 Masimpe, aabo basyomeka kuli Jehova mumazuba aano aakatazya bayoojana zilongezyo kumbele. Nikuba kuti zilongezyo tazinalibonya, kuziyeeya kuyootugwasya kubikkila maano kuzyintu ziyandika ncobeni akutantamuka zyintu zikondelezya buyo kwakaindi kasyoonto mubweende bwazyintu obuno. (Lk. 21:34; 1 Ti. 6:17-19) Ciindi cakwiiya mumukwasyi alimwi akukomba, mumibandi abasyomima, mumibandi abasikwiiya Bbaibbele alimwi abaabo batondezya luyandisisyo, tweelede kwaamba cabusungu kujatikizya bulangizi bwesu alimwi azilongezyo. Kucita boobo kuyootugwasya kuziyeeya. Mwaapostolo Paulo wakacita oobo naakali kuyumyayumya Banakristonyina. Cili mbuli kuti wakabasololela kusika kumamanino aa Bulelo bwa Kristo bwa Myaka Iili 1,000. Amweezyeezye cini ncaapandulula majwi aa Paulo aajanwa mulugwalo lwa 1 Bakolinto 15:24, 25, 28.—Amubale.
17, 18. (a) Muunzila nzi Jehova mwaakali “mweendelezi wazyintu zyoonse” kumatalikilo aabuumi bwabantu? (b) Ino Jesu uyoocita nzi kutegwa apilusye lukamantano alimwi alumvwano?
17 Taakwe bupanduluzi bumbi bubotu bwaamba mamanino bwiinda majwi aakuti “Leza abe mweendelezi wazyintu zyoonse.” Pele ino eeco caamba nzi? Amuyeeye mbocakabede mu Edeni ciindi bantu balondokede, ba Adamu a Eva nibakali cibeela camukwasyi wabubumbo boonse waluumuno alimwi uukamantene wa Jehova. Jehova, Mwami Wabubumbo Boonse, wakali kweendelezya zilenge zyakwe zyoonse cacigaminina, bangelo alimwi abantu. Bakali kukonzya kubandika anguwe kumugama, kumukomba alimwi akulongezyegwa anguwe. Wakali “mweendelezi wazyintu zyoonse.”
18 Cilongwe eeco calukamantano cakanyonganizyigwa ciindi bantu nibakayungwa a Saatani kuzangila bweendelezi bwa Jehova. Nikuba boobo, kuzwa mu 1914, Bwami bwabu Mesiya bwali kubweza ntaamu ziyandika kutegwa bupilusye lukamantano oolo alimwi alumvwano. (Ef. 1:9, 10) Mumyaka ya Bulelo Iili 1,000 zyintu ‘zitanalibonya’ lino, ziyoolibonya ncobeni. Mpoonya “mamanino” ayoosika nkokuti mamanino aa Bulelo bwa Kristo bwa Myaka Iili 1,000. Ncinzi ciyoocitika kuzwa waawo? Nikuba kuti wakapegwa “nguzu zyoonse kujulu alimwi aanyika,” Jesu tayandi kulipangila zyina pe. Tajisi makanze aakubweza cuuno ca Jehova. Cakulibombya “uyoopa Bwami kuli Leza wakwe alimwi Usyi.” Uyoobelesya cuuno cakwe cilibedelede alimwi anguzu “kutegwa Leza . . . alemekwe.”—Mt. 28:18; Flp. 2:9-11.
19, 20. (a) Mbuti balelwa ba Bwami mbobayootondezya kuti balabuzumina bweendelezi bwa Jehova? (b) Nzilongezyo nzi nzyotulangila?
19 Kuciindi eeco balelwa baanyika ba Bwami banoolondokede. Bayootobela cikozyanyo ca Jesu, alimwi cakulibombya acakuliyandila bayoobuzumina bweendelezi bwa Jehova. Bayooba acoolwe cakutondezya luyandisisyo lwabo kwiinda mukuzwidilila mumusunko wamamanino. (Ciy. 20:7-10) Kuzwa waawo, bazangi boonse—bantu alimwi azilenge zyamuuya—bayoonyonyoonwa kukabe kutamani. Eelo kaka cinooli ciindi calukkomano eeco! Mukwasyi woonse mububumbo boonse uyookkomana kutembaula Jehova walo uuyooba “mweendelezi wazyintu zyoonse.”—Amubale Intembauzyo 99:1-3.
20 Sena zilongezyo zilangilwa mu Bwami ino-ino zilamukulwaizya kubikkila maano akubeleka canguzu kutegwa mucite kuyanda kwa Leza? Sena mulakonzya kutantamuka bulangizi bwakubeja alimwi azyintu zibotu zijanwa munyika ya Saatani? Sena mulayumya makanze aanu aakusumpula bweendelezi bwa Jehova? Zyintu nzyomucita zyeelede kutondezya kuti mulayanda kucita oobo kukabe kutamani. Mpoonya muyooba acoolwe cakukkomana aluumuno alimwi azilongezyo kwamyaka iili 1,000—alimwi mane kukabe kutamani.
[Mibuzyo yaciiyo]
[[Cifwanikiso icili apeeji 11]
Aakumanizya mulimo wakwe kali Mwami, Jesu cakulibombya uyoopilusya Bwami kuli Bausyi
