“Tamuzyi Buzuba Nociba Ciindi”
“Tamuzyi Buzuba Nociba Ciindi”
“Aboobo amulangile, nkaambo tamuzyi buzuba nociba ciindi.”—MT. 25:13.
INO INGA MWAINGULA BUTI?
Ino ninzila nzi zimwi motugwasyigwa akaambo kakutabuzyiba buzuba naa ciindi mamanino naayoosika?
Mbuti bananike mbobazumanana kulangila?
Muunzila nzi motukonzya kutondezya kuti tulilibambilide kusika kwa Kristo?
1-3. (a) Mbukkale nzi butondezya kaambo kali muzikozyanyo zya Jesu zyobilo? (b) Mibuzyo nzi njotweelede kwiingula?
AMWEEZYEEZYE kuti mupati wamulimo uujisi mpuwo kapati wamulomba kuti mumutole amootokala kumuswaangano uuyandika kapati. Kakuceede buyo maminiti masyoonto kuti muunke kuyoomubweza, mwabona kuti mungwimba uuli mumootokala musyoonto taukonzyi kuyoomusisya pe. Kumane mwazuza kuyakuula mungwimba. Kamutanapiluka mupati wamulimo wasika. Wamuyandaula pele taakwe naamujana. Takonzyi kulindila, aboobo walomba muntu uumbi kuti amutole. Kwiinde buyo ciindi cisyoonto andinywe mwapiluka, kumane mwajana kuti mupati wamulimo waunka kale. Ino inga mwalimvwa buti?
2 Alimwi amweezyeezye kuti nywebo ndendinywe mupati wamulimo alimwi mwasala baalumi botatwe kuti bamubelekele mulimo umwi uuyandika kapati. Mwabapandulwida mulimo mboubede, alimwi boonse botatwe cakuliyandila bazumina kubeleka. Pele ciindi nimwapiluka kakwiindide ciindi, mwajana kuti bobilo buyo mbababeleka mulimo ngomwabapa. Ooyo iwatabeleka mulimo ngwaapegwa watalika kupa twaambo twakulitamizya. Alimwi buya taakwe anaasolelalimwi kubeleka. Ino inga mwalimvwa buti?
3 Mucikozyanyo cakwe cabanakalindu alimwi acamatalenta, Jesu wakabelesya bukkale bukozyenye kutondezya kuti kuciindi cakumamanino, Banakristo bananike bamwi bayoosyomeka akucenjela kakuli bamwi tabakaciti oobo. * (Mt. 25:1-30) Wakakakankaizya kaambo aaka naakati: “Aboobo amulangile, nkaambo tamuzyi buzuba nociba ciindi”—nkokuti ciindi Jesu nayooleta lubeta lwa Leza anyika ya Saatani. (Mt. 25:13) Tulakonzya kulubelesya lulayo oolu mazuba aano. Mbuti mbotukonzya kugwasyigwa kwiinda mukuzumanana kulangila kweelana ambwatukulwaizya Jesu? Ino mbaani ibatondezya kuti balilibambilide kufwutuka? Ncinzi ncotweelede kucita lino kutegwa tuzumanane kulangila?
MBOTUGWASYIGWA AKAAMBO KAKUZUMANANA KULANGILA
4. Nkaambo nzi ‘kupakamana’ ncocitaambi kulanga aankoloko?
4 Zyintu zimwi mbuli kubeleka mufakitoli, kuyoobonana adokota, kutanta bbaasi naa citima, kuyandika kubamba ciindi. Nikuba boobo, zyintu zimwi mbuli kuzima mulilo naa kubeleka mulimo wakufwutula bantu nikwacitika ntenda, ikulanga aankoloko kulakonzya kutunyonganya naa kuleta ntenda. Mubukkale buli boobu iciyandika kapati nkubikkila maano kumulimo uuyandika kucitwa ikutali kuzyiba kuti nciindi nzi. Mamanino aabweende obuno naayabuswena, mulimo wesu wakukambauka ugwasya bantu kuzyiba ncaacita Jehova kutegwa afwutule bantu. Kupakamana katuli Banakristo tacaambi kulanga aankoloko. Masimpe ngakuti kuli nzila zyosanwe motugwasyigwa kwiinda mukutazyiba buzuba bwini alimwi aciindi mamanino naayoosika.
5. Mbuti kutazyiba buzuba naa ciindi mbokukonzya kugwasya kuyubununa zili mumoyo wesu?
5 Nzila yakusaanguna, kutazyiba ciindi mamanino naayoosika citugwasya kuyubununa zili mumoyo wesu. Masimpe ngakuti, Jehova ulatulemeka kwiinda mukutupa coolwe cakusala kusyomeka kulinguwe. Nikuba kuti tulangila kumbele kuyoofwutuka mamanino aabweende oobu, tubelekela Jehova akaambo kakuti tulamuyanda, ikutali buyo kuti tukajane buumi butamani. (Amubale Intembauzyo 37:4.) Tulakkomana kucita kuyanda kwakwe, alimwi tulizyi kuti Leza ulatuyiisya kutegwa tugwasyigwe. (Is. 48:17) Tatulimvwi kuti milawo yakwe ilakatazya kwiitobela.—1 Jo. 5:3.
6. Ciindi nitubelekela Leza akaambo kakuti tulamuyanda, ino inga ulimvwa buti alimwi nkaambo nzi?
6 Nzila yabili motugwasyigwa akaambo kakutazyiba buzuba naa ciindi njakuti citupa coolwe cakukkomanisya Jehova. Ciindi nitumubelekela Leza akaambo kakuti tulamuyanda ikutali akaambo kakuti mamanino alaafwaafwi naa akaambo kakuti tuyanda bulumbu, tulamugwasya Jehova kutondezya kuti sinkondonyina Saatani mubeji. (Job. 2:4, 5; amubale Tusimpi 27:11.) Kubona macise alimwi abuumba Diabolosi nzyaatuletela, tulikkomene kugwasyilizya bweendelezi bwa Jehova alimwi akukaka bweendelezi bubyaabi bwa Saatani.
7. Nkaambo nzi ncomuyeeya kuti kupona buumi bwakulyaaba kulagwasya?
7 Nzila yatatu, kubelekela Leza katutabuzyi buzuba citukulwaizya kupona buumi bwakulyaaba. Bamwi batamuzyi Leza mazuba aano abalo balasyoma kuti nyika eeyi mbyaabi iyoomana ino-ino. Akaambo kakuti bayoowa lunyonyooko luboola, baamba kuti: “Atulye akunywa, nkaambo kayi juunza tuyoofwa.” (1 Ko. 15:32) Nikuba boobo, swebo tatuyoowi. Alimwi tatuciti zyintu zigwasya buyo ndiswe tobeni. (Tus. 18:1) Muciindi caboobo, tulalyaaba akubelesya ciindi cesu, nguzu alimwi alubono kutegwa tukambaukile bamwi makani mabotu aa Bwami bwa Leza. (Amubale Matayo 16:24.) Tulikkomene kubelekela Leza, ikapati mumulimo wakugwasya bamwi kutegwa bamuzyibe.
8. Ncikozyanyo nzi camu Bbaibbele icitondezya kuti tweelede kumusyoma kapati Jehova a Jwi lyakwe?
8 Nzila yane motugwasyigwa akaambo kakutazyiba buzuba naa ciindi njakuti cilatugwasya kusyoma kapati muli Jehova alimwi akupona kweelana ancolyaamba Jwi lyakwe. Cilengwa cimwi icikatazya kapati kulindiswe tobantu ibatalondokede, ncilengwa cakulisyoma. Paulo wakacenjezya Banakristo boonse kuti: “Ooyo uuyeeya kuti wiimvwi kabotu acenjele kutegwa atawi.” Bantu bali 23,000 bakasweekelwa cilongwe cabo a Jehova kakuceede buyo asyoonto kuti Joshua asololele bantu ba Leza kunjila mu Nyika Yakasyomezyedwe. Paulo wakaamba kuti: “Zyintu eezyi . . . zyakalembelwa kutucenjezya swebo notupona kumamanino aabweende bwazyintu bwiindene-indene.”—1 Ko. 10:8, 11, 12.
9. Mbuti mapenzi mbwaakonzya kutugwasya kucinca akuba acilongwe a Leza?
9 Nzila yasanu motugwasyigwa akaambo kakutazyiba ciindi mamanino naayoosika njakuti mapenzi aatusikila lino atupa kucinca bube bwesu. (Amubale Intembauzyo 119:71.) Mazuba aamamanino aabweende oobu ‘alakatazya ncobeni.’ (2 Ti. 3:1-5) Bantu banji bamunyika ya Saatani tabatuyandi, aboobo balakonzya kutupenzya akaambo kazyintu nzyotusyoma. (Joh. 15:19; 16:2) Ikuti twalicesya akulangaula busolozi bwa Leza muziindi zyamapenzi, lusyomo lwesu luyooyuma mbuli cintu cainda mumulilo. Tatutyompwi. Muciindi caboobo, tuyooba acilongwe ciyumu a Jehova kwiinda mbotwalikuyeeya.—Jak. 1:2-4; 4:8.
10. Ncinzi cipa kuti ciindi ciboneke kuti cilafwambaana kweenda?
10 Zimwi ziindi, ciindi cilakonzya kulibonya mbuli kuti cilafwambaana naa kumuka kweenda. Pele kuti katujisi bubi alimwi katutalangi ankoloko, inga ciboneka kuti cilafwambaana. Mbubwenya buyo, kuti katujisi bubi mumulimo uukkomanisya Jehova ngwaatupa kucita, buzuba oobo alimwi aciindi zilakonzya kufwambaana kuboola katutanayeeya. Mumakani aaya, bananike banji bapa cikozyanyo cibotu kapati. Mubufwaafwi atulange-lange cakacitika kuzwa ciindi Jesu naakabikkwa kuba Mwami mu 1914, akubona bamwi mbobakatondezya kulangila alimwi abaabo ibakaalilwa kulangila.
BANANIKE BALATONDEZYA KUTI BALILIBAMBILIDE
11. Niwakainda mwaka wa 1914, nkaambo nzi bananike bamwi ncobakali kuyeeya kuti Mwami wamuka?
11 Amuyeeye zikozyanyo zya Jesu zya banakalindu alimwi amatalenta. Muzikozyanyo eezyo, kuti banakalindu alimwi abazike bamucikozyanyo eeci nibakalizyi ciindi sibwiinga naa simalelo naakali kuyoosika, nibatakayandika kulangila. Pele tiibakalizyi, aboobo bakali kuyandika kulibambila lyoonse. Nikuba kuti bananike bakali kuulangila kwamyaka minji mwaka wa 1914 iwakasalidwe, tiibakali kumvwisya cakali kuyoocitika. Ciindi zyintu nozyatakacitika mbuli mbobakali kuyeeya, cakalibonya mbuli kuti Sibwiinga wamuka. Nikwakainda ciindi mukwesu umwi wakaamba kuti: “Mweelwe musyoonto akati kesu twakali kuyeeya kuti tuyakuunka kujulu munsondo yakusaanguna ya October [1914].”
12. Mbuti bananike mbobakatondezya kusyomeka alimwi akucenjela?
12 Amuyeeye buyo mbocakali kukonzya kutyompya kulangila mamanino pele mamanino kaatasiki! Kuyungizya waawo, bakwesu bakakazyigwa ciindi ca Nkondo Yanyika Yakusaanguna. Ciindi cakutasungwaala icili mbuli koona cakatalika. Pele mu 1919, kwakaba kwaambilizya kwakubuka. Jesu wakasika kutempele lyakumuuya lya Leza, alimwi ciindi cakulingula cakasika. Nikuba boobo, bamwi tiibakazwidilila mukulingulwa ooko aboobo bakasweekelwa coolwe cabo cakuzumanana kubelekela Mwami. (Mt. 25:16) Cakali mbuli kuti tiibakasungweede kuyungizya mafwuta aabo aakumuuya mbuli banakalindu bafwubafwuba. Alimwi mbubwenya mbuli bazike batolo, tiibakali kuyanda kulyaaba akaambo ka Bwami. Nikuba boobo, bananike banji bakatondezya lusyomo luyumu alimwi amakanze aakubelekela Simalelo wabo nimuba mumyaka iikatazya yankondo.
13. Ino baciinga camuzike bakali kulimvwa buti kuzwa mu 1914, alimwi ino balimvwa buti mazuba aano?
13 Mwaka wa 1914 niwakainda, Ngazi Yamulindizi yakapa kucenjezya ooku kuyandika kapati, kwakuti: “Bakwesu, swebo notuzilanga kabotu zyintu nzyacita Leza, tatutyompwi akaambo kabubambe bwakwe. Tiitwakayanda kuti nzyotuyanda zicitike; aboobo nitwakazyiba kuti zyintu nzyotwakali kulangila mu October, 1914, tazili nzyenzizyo, twakakkomana kuzyiba kuti Mwami kunyina naakacinca bubambe bwakwe kutegwa bweendelane akuyanda kwesu. Alimwi kunyina nitwakali kuyanda kuti acite oobo. Ncotuyanda buyo nkumvwisya bubambe bwakwe amakanze.” Bube oobu bwakulicesya akulyaaba, mbobube bulibonya akuli baabo ibakananikwa a Mwami mazuba aano. Tabaambi kuti nzyobaamba zyakasololelwa amuuya, pele balikanzide kubeleka mulimo wa Mwami anyika. Mpoonya lino “nkamu mpati” “[ya]mbelele zimbi,” Banakristo ibajisi bulangizi bwakupona anyika, baiya kulinda kwabananike alimwi abusungu bwabo.—Ciy. 7:9; Joh. 10:16.
KUTONDEZYA KUTI TULILIBAMBILIDE
14. Ino kuzumanana kusyomeka kububambe bwa Leza mbwabelesya kupa cakulya cakumuuya kutukwabilila buti?
14 Mbubwenya mbuli Banakristo bananike mbobacita, ibankamu mpati ibapakamene balaitobela kapati nzila ya Leza njaakasala kupeda cakulya cakumuuya. Akaambo kaceeci, cili mbuli kuti abalo balajana mafwuta aabo aakumuuya kuzwa Mujwi lya Leza amuuya wakwe. (Amubale Intembauzyo 119:130; Johane 16:13.) Aboobo, kabayumizyidwe, abalo balatondezya kuti balilibambilide kupiluka kwa Kristo, akusungwaala neliba leelyo nobajana masunko mapati. Mubusena bumwi bwantolongo yaba Nazi, bakwesu ibakali bakusaanguna kwaangwa muntolongo eeyi bakajisi buyo Bbaibbele lyomwe. Aboobo, bakapaila kulomba cakulya cimbi cakumuuya. Nikwakainda buyo ciindi cisyoonto kuzwa leelyo, bakazoozyiba kuti, mukwesu iwakaangwa caino-ino wakacikonzya kusisa mamagazini mapya aa Ngazi Yamulindizi mukuulu kwakwe kwacisamu akwaasisya muntolongo. Akati kabaabo bakafwutuka kwakali mukwesu munanike ulaazyina lya Ernst Wauer, iwakazyi kwaamba kuti: “Jehova wakatugwasya munzila iikkomanisya kapati, twakali kucikonzya kuyeeya twaambo tukkomanisya itwakali muzibalo.” Mpoonya wakayungizya akwaamba kuti: “Mazuba aano, ncuubauba kujana cakulya cakumuuya, pele sena tulatondezya kulumba? Ndilaalusyomo lwakuti Jehova ujisi zilongezyo zinji nzyabambilide baabo ibamusyoma, ibasyomeka, alimwi ibalida atafule lyakwe.”
15, 16. Mbuti busungu bwabanabukwetene bamwi mumulimo wa Bunakristo mbobwakalongezyegwa, alimwi ncinzi ncotukonzya kwiiya kuzyakuluula zili boobu?
15 Bambelele zimbi alimwi bajisi bubi mumulimo wa Simalelo kugwasyilizya banabokwabo Kristo. (Mt. 25:40) Mukwiimpana amuzike mubi alimwi mutolo wamucikozyanyo ca Jesu, balalyaaba alimwi akusolekesya kutegwa babikke zyintu zya Bwami mubusena bwakusaanguna. Mucikozyanyo ba Jon aba Masako nibakatambwa kuti bakagwasyilizye mucilawo cibelesya mwaambo waci Chainizi ku Kenya, bakawayawaya kuunka. Pele nibakaapailila makani aaya akulanga-langa bukkale bwabo, bakasala kuunka.
16 Bakalongezyegwa akaambo kakusolekesya kwabo. Bakaamba kuti: “Mulimo wakukambauka ookuya wakali kukkomanisya.” Bakatalisya ziiyo zya Bbaibbele zili ciloba. Bakajana zyakuluula zikkomanisya zinji. Kumamanino bakaamba kuti: “Tulamulumba Jehova lyoonse akaambo kakutuzumizya kuboola kubusena obuno.” Mubwini kuli bakwesu abacizyi bambi banji ibatondezya mukusala kwabo kuti balikanzide kujata bubi mumulimo wa Leza kufwumbwa naa mamanino ayoosika lili. Amuyeeye buyo zyuulu-zyuulu zyabaabo bakamanizya Cikolo ca Gileadi alimwi akubweza mulimo wabumisyinali naa aabo ibalyaaba amoyo woonse kuyoobelekela kumasi aambi. Amuzyibe mbocibede kuyoobelekela kubusena kubulide kwiinda mukubala cibalo cakuti “Bakalyaaba Amoyo Woonse—Kuyoobelekela mu Ecuador,” icili mu Ngazi Yamulindizi ya July 15, 2012. Ciindi nimubala nzyobaamba bakwesu abacizyi ibabelekela kumasi aambi, amuyeeye nzila mbomukonzya kuyungizya mulimo wanu kuli Leza alimwi amulimo ooyu mbouyoomupa kukkomana.
ANDINYWE AMUZUMANANE KULANGILA
17. Ino kutazyiba buzuba naa ciindi, caba buti cilongezyo?
17 Cilasalala kuti kutazyiba buzuba bwini naa ciindi bweende bwazyintu oobu nobuyoomana, ncilongezyo kulindiswe. Muciindi cakutyompwa, tulaswena kapati kuli Jehova, Taateesu siluyando, ciindi notujata bubi mukucita kuyanda kwakwe. Kuzumanana kujata jamba kwamaambilambali kwatugwasya kubikkila maano alimwi akujana lukkomano mumulimo wa Simaleleesu.—Lk. 9:62.
18. Nkaambo nzi ncotutayandi kululeka lusyomo lwesu?
18 Tuyaabuswena kubuzuba bwa Leza bwalubeta cakufwambaana. Akati kesu taakwe uuyanda kutyompya Jehova naa Jesu. Batupa coolwe cibotu camulimo mumazuba aano aamamanino. Eelo kaka tulalumba kuti balatusyoma!—Amubale 1 Timoteyo 1:12.
19. Mbuti mbotukonzya kutondezya kuti tulilibambilide?
19 Kufwumbwa naa bulangizi bwesu mbwakukkomana abuumi kujulu naa mu Paradaiso aanyika, atuzumanane kusyomeka kumulimo wesu Leza ngwaakatupa wakukambauka akupanga basikwiiya. Tatunazyiba buzuba bwini naa ciindi buzuba bwa Jehova nobuyoosika, alimwi sena ncobeni tuyandika kubuzyiba? Tweelede kubulangila akuzumanana kulibambila. (Mt. 24:36, 44) Tulaalusyomo lwakuti naa twazumanana kusyoma Jehova cakumaninina alimwi akubikka Bwami bwakwe mubusena bwakusaanguna, tatukatyompwi pe.—Lom. 10:11.
[Bupanduluzi buyungizidwe]
[Mibuzyo yaciiyo]
[Cifwanikiso icili apeeji 26]
Nimuba mubukkale bukatazya, amuyandaule cakulya cakumuuya
[Cifwanikiso icili apeeji 27]
Ciindi cilafwambaana kweenda kuti katubikkilide maano kumilimo ya Bunakristo
