Amumumvwide Leza Kutegwa Mulongezyegwe
Amumumvwide Leza Kutegwa Mulongezyegwe
“Mbwaanga [Leza] kunyina mupati uumwiinda nkwaakali kunga wakonka, wakakonka kulinguwe lwakwe.”—HEB. 6:13.
AMUBONE NAA INGA MWAINGULA:
Nkaambo nzi ncotukonzya kuba masimpe kuti makanze aa Leza ayakucitika?
Ncisyomezyo nzi Leza ncaakaamba ciindi ba Adamu a Eva nobakabisya?
Mbuti mbotugwasyigwa acikonke cacisyomezyo ca Leza ncaakaamba kuli Abrahamu?
1. Ino majwi aa Jehova aindene buti amajwi aabantu batalondokede?
JEHOVA ngu ‘Leza wakasimpe.’ (Int. 31:5) Bantu batalondokede tabakonzyi kusyomwa lyoonse, pele ‘tacikonzyeki kuli Leza kubeja.’ (Heb. 6:18; amubale Myeelwe 23:19.) Ncayanda kucitila bantu kutegwa bagwasyigwe ciba camasimpe lyoonse. Mucikozyanyo, zyoonse Leza nzyaakaamba kuti ulazicita kumatalikilo aaciindi cimwi acimwi cakulenga ‘zyakaba mbubonya oobo.’ Aboobo, kusikila kumamanino aabuzuba bwacisambomwi bwakulenga, “[Leza] wakabona kuti zyoonse zyabota loko.”—Matl. 1:6, 7, 30, 31.
2. Ino buzuba bwa Leza bwakulyookezya ninzi, alimwi nkaambo nzi ‘wakabusalazya’?
2 Naakamana kulanga-langa milimo yakwe yakulenga, Jehova Leza wakaambilizya matalikilo aabuzuba bwaciloba—kutali buzuba bujisi mawoola aali 24, pele ciindi cilamfwu mwalo mwaakali kukonzya kulyookezya kumilimo iimbi yakulenga anyika. (Matl. 2:2) Buzuba bwa Leza bwakulyookezya tabunamana pe. (Heb. 4:9, 10) Bbaibbele talyaambi ciindi cini nobwakatalika. Pele cakali ciindi mukaintu wa Adamu, Eva naakamana kulengwa, myaka iibalilwa ku 6,000 yainda. Kumbele tulangila Myaka Iili Cuulu Yabulelo bwa Jesu Kristo, yalo iiyoosinizya kuzuzikizyigwa kwamakanze aa Leza aakulenga nyika kuti ibe paradaiso iizwide bantu balondokede kukabe kutamani. (Matl. 1:27, 28; Ciy. 20:6) Sena mulakonzya kuba masimpe kuti muyakuba alukkomano luliboobo kumbele? Inzya! Nkaambo “Leza wakakondezya buzuba bwamusanu aabili akubusalazya.” Eeci cakali cisinizyo cakuti kufwumbwa naa mapenzi nzi aakonzya kuboola, makanze aa Leza ayakuzuzikizyigwa kusikila kumamanino aabuzuba bwakwe bwakulyookezya.—Matl. 2:3.
3. (a) Kuzwa nobwakatalika buzuba bwa Leza bwakulyookezya, mbuzangi nzi bwakacitika? (b) Mbuti Jehova mbwaakaamba makanze aakwe aakugwisya buzangi?
3 Kuzwa buzuba bwa Leza bwakulyookezya nobwakatalika, kwakacitika manyongwe. Saatani, mwana wa Leza umwi mungelo, wakalipa kuti abe leza sinkondonyina a Leza. Wakaamba bubeji bwakusaanguna akweena Eva kutegwa atamvwidi Jehova. (1 Ti. 2:14) Awalo Eva wakayunga mulumi wakwe kutegwa amusangane mukuzanga. (Matl. 3:1-6) Nociba ciindi eeco cisyoonto cabuumi bwabantu kasimpe ka Leza nokakadoonekwa, Jehova tanaakabona kuti uyandika kukonka kutegwa asinizye kuti makanze aakwe ayakucitika ncobeni. Muciindi caboobo, wakabelesya majwi aakali kuyakuteelelwa kabotu muciindi ceelede ca Leza, wakaamba buzangi mbobwakali kuyakugwisyigwa kuti: “Nkabela njoobusya inkondo akati kanduwe [Saatani] amwanakazi, akati kalunyungu lwako alunyungu lwakwe. Walo [lunyungu lwakasyomezyegwa] uyookuuma amutwe, ayebo uyoomuluma kukasinde.”—Matl. 3:15; Ciy. 12:9.
IJWI LYACIKONKE—NZILA YAMUMULAWO IIYANDIKA
4, 5. Ninzila nzi yamumulawo Abrahamu njaakabelesya zimwi ziindi?
4 Kumatalikilo aabuponi bwabantu ciindi eeco, ciladoonekwa kuti kukonka ikutondezya mbwaakali aamasimpe makani cakali kuyandika kumajwi Leza ngaakaambila Adamu a Eva. Zilenge zilondokede izimuyanda Leza akumwiiya taziyandiki kukonka; ciindi coonse zyaamba camasimpe alimwi akusyomeka cakumaninina kuli umwi amweenzyinyina. Pele zyintu zyakacinca ciindi cibi akutalondoka kwabantu nokwakatalika. Mukuyakwaciindi, ciindi kubeja alimwi alweeno nozyakavwula akati kabantu, cakali kuyandika kulimbabo kuti kabakonka kusinizya twaambo tuyandika.
5 Kukonka yakali nzila yalo sinsiku Abrahamu njaakabelesya kabotu kwaziindi zyotatwe. (Matl. 21:22-24; 24:2-4, 9) Mucikozyanyo, eeci cakacitika ciindi naakapiluka kuzwa kukuzunda mwami wa Elamu abasikumugwasyilizya. Bami baku Salemu alimwi a Sodoma bakaboola kumutambula Abrahamu. Melkisideke, wakali mwami waku Salemu alimwi wakali “mupaizi wa Leza Mupatikampatila.” Aboobo, wakalongezya Abrahamu alimwi akutembaula Leza akaambo kakugwasya Abrahamu kuti azunde basinkondonyina. (Matl. 14:17-20) Mpoonya ciindi mwami waku Sodoma naakali kuyanda kupa Abrahamu bulumbu akaambo kakuvwuna bantu bamwami kuli basinkondo ibakali kuyanda kubalwana, Abrahamu wakakonka kuti: “Ndatambika ijanza lyangu cakukonka kuli-Jehova Leza Mupatikampatila, muvubi wajulu anyika. Ncobeni nsikooyootola nekaba katali nekaba kaanzyo kansangu neciba cintu cili buti cambono zyako, kuti utaambi kuti, Ndime ndavubya Abram.”—Matl. 14:21-23.
CIKONKE CACISYOMEZYO CA JEHOVA KULI ABRAHAMU
6. (a) Ino ncikozyanyo nzi Abrahamu ncaakatusiila? (b) Ino kumvwida kwa Abrahamu kutugwasya buti?
6 Kutegwa bantu basizibi bagwasyigwe, Jehova wabelesya alimwi zikonke kwiinda mukubelesya majwi mbuli aakuti: “Ncobeni mbundi muumi, mbwaamba Mwami Jehova.” (Ezk. 17:16.) Bbaibbele lilapandulula ziindi ziinda ku 40 ziindene-indene ciindi Jehova Leza naakakonka. Ambweni cikozyanyo cizyibidwe kapati nciceeco cijatikizya Leza mbwaakeendelezya Abrahamu. Kwamyaka minji yainda, Jehova wapanga zizuminano zyazisyomezyo zinji kuli Abrahamu cakuti ikuti naa zyabikkwa antoomwe zitondezya kuti Lunyungu ilwakasyomezyegwa lwakali kuyakuboola kuzwa kuli Abrahamu kwiinda mumwanaakwe musankwa Izaka. (Matl. 12:1-3, 7; 13:14-17; 15:5, 18; 21:12) Mpoonya Jehova wakapa Abrahamu musunko uukatazya kapati, wakamulailila kuti atuule mwanaakwe musankwa uuyandika kapati. Kakunyina akuwayawaya, Abrahamu wakamvwida alimwi wakalaafwaafwi kumutuula Izaka ciindi mungelo wa Leza naakamukasya. Kuzwa waawo Leza wakakonkezya kuti: “Ndakonkezya muzina lyangu ndemwini . . . kuti mbubonya mbowacita obo akutakasya mwanaako simuzyalwaalike, ncobeni njookupa coolwe loko, akuvuzya njoovuzya lunyungu lwako mbuli inyenyeezi zyakujulu ambuli musee wakunkomwe yalwizi, nkabela basilunyungu bako bayoovuba mulyango wabasinkondonyina. Mulunyungu lwako zisi zyoonse zyaansi moziyoojana coolwe, nkaambo kakuti waswiilila ijwi lyangu.”—Matl. 22:1-3, 9-12, 15-18.
7, 8. (a) Nkaambo nzi Leza ncaakakonka kuli Abrahamu? (b) Mbuti “[ba]mbelele zimbi” zya Jesu mbobayakugwasyigwa acikonke cacisyomezyo ca Leza?
7 Nkaambo nzi Leza ncaakakonka kuli Abrahamu kuti zisyomezyo zyakwe ziyakuba zyamasimpe? Kutegwa cibe cisinizyo kuli baabo ibakali kuyakuba basikulelanyina a Kristo, ibaba cibeela cabili ‘calunyungu’ lwakasyomezyegwa alimwi akuyumya lusyomo lwabo. (Amubale Bahebulayo 6:13-18; Gal. 3:29) Kweelana ambwaakapandulula mwaapostolo Paulo, Jehova “wakayungizya acikonke kujwi lyakwe, kutegwa kwiinda muzyintu eezyi zyobilo zitacinci oomo mocitakonzyeki kuli Leza kubeja, swebo . . . tukonzye kuyumizyigwa kapati ikubujatisya bulangizi mbotubikkilidwe kumbele lyesu.”
8 Tabali Banakristo bananike balikke ibagwasyigwa acikonke ca Leza kuli Abrahamu. Kwiinda “mulunyungu” lwa Abrahamu, Jehova wakakonkezya kuti bantu ‘bazisi zyoonse zyaansi bakali kuyoojana coolwe.’ (Matl. 22:18) Bantu bali boobo balongezyedwe balabikkilizya abaabo bamvwida Kristo “[ba]mbelele zimbi,” balo mbapede bulangizi bwakupona kukabe kutamani anyika muparadaiso. (Joh. 10:16) Kufwumbwa naa bulangizi bwanu mbwakujulu naa anyika, ‘atubujatisye’ kwiinda mukupona buumi bwakumvwida Leza.—Amubale Bahebulayo 6:11, 12.
ZIKONKE ZYA LEZA ZIKOZYENYE
9. Ino ncikonke nzi Leza ncaakaamba ciindi baluzubo lwa Abrahamu nobakali mubuzike kubana Egepita?
9 Nokwakainda myaanda yamyaka, Jehova alimwi wakakonka kujatikizya zisyomezyo izyaambwa kale ciindi naakatuma Musa kuti aambaule abaluzubo lwa Abrahamu, balo ibakali bazike kuciindi eeco kubana Egepita. (Kul. 6:6-8) Kaamba kujatikizya ciindi eeco, Leza wakaamba kuti: “Mubuzuba obo nindakasala Israyeli, . . . ndakabakonkezya kubagwisya munyika ya-Egepita akubaleta kunyika njindakabasalilide, nyika iikunka malili abuci.”—Ezk. 20:5, 6.
10. Ino ncisyomezyo nzi Leza ncaakapa bana Israyeli naakamana kubavwuna kuzwa ku Egepita?
10 Mpoonya kuzwa bana Israyeli nobakavwunwa kuzwa mu Egepita, Jehova wakaamba acimbi cikonke cacizuminano kulimbabo naakati: “Na mwazumina kuswiilila ijwi lyangu akubamba cizuminano cangu, muyooyandika mumeso aangu kwiinda bamasi boonse; nkaambo nyika yoonse njiyangu. Muyoondibeda cisi cabapaizi, musyobo uusalalisya.” (Kul. 19:5, 6) Eelo kaka Leza wakalibapede coolwe bana Israyeli! Kuti nobakamvwida, bamwi kuzwa mucisi eeco nobakaba abulangizi bwakubelesyegwa a Leza kabali cisi cabapaizi kutegwa bantu boonse bajane zilongezyo. Mukuyakwaciindi, kapandulula ncaakacitila bana Israyeli kuciindi eeco, Jehova wakaamba kuti: “Ndakakukonkezya akutangana ayebo cizuminano.”—Ezk. 16:8.
11. Ino bana Israyeli bakaamba nzi kukutamba kwa Leza kwakuti banjile mucilongwe cacizuminano anguwe kabali bantu bakwe basalidwe?
11 Kuciindi eeco Jehova tanaakabasinikizya bana Israyeli kuti bakonke kuti bayakumumvwida; alimwi Leza kunyina naakabasungilizya bana Israyeli kuti banjile mucilongwe eeci caalubazu. Muciindi caboobo, cakuliyandila bakaamba kuti: “Coonse buyo Jehova ncaamba tulacicita.” (Kul. 19:8) Nokwakainda mazuba otatwe, Jehova Leza wakazyibya bana Israyeli icakali kuyandika kucisi cakwe cisalidwe. Cakusaanguna, bakamvwa Milawo Iili Kkumi, mpoonya alimwi Musa wakabaambila milawo iimbi iilembedwe kuzwa mubbuku lya Kulonga 20:22 kusikila ku Kulonga 23:33. Ncinzi bana Israyeli ncobakaamba? “Nkabela bantu boonse bakavuwa ajwi lyomwe, bati, makani oonse Jehova ngaamba tulaacita.” (Kul. 24:3) Mpoonya Musa wakailemba milawo “[mu]bbuku lyacizuminano” akubabalila cakupozya kutegwa cisi coonse cimvwe alimwi. Kuzwa waawo, ciindi catatu bantu bakakonkezya kuti: “Coonse Jehova ncaamba, tulacicita, tulaswiilila.”—Kul. 24:4, 7, 8.
12. Ino majwi nzi Jehova abantu bakwe basalidwe ngobakali kwaamba kujatikizya cizuminano cakali akati kanguwe ambabo?
12 Mpoonya-mpoonya Jehova wakatalika kuzuzikizya cibeela cakwe cacizuminano ca Mulawo kwiinda mukubikka bubambe bwatente lyakukombela alimwi abapaizi ibakali kupa kuti cikonzyeke kubantu basizibi kuti basike kulinguwe. Kulubazu lumbi, bana Israyeli bakafwambaana kuluba kulyaaba kwabo kuli Leza alimwi “akukalazya Uusalala wa-Israyeli.” (Int. 78:41) Mucikozyanyo, ciindi Musa naakali kutambula malailile aamwi a Cilundu ca Sinai, bana Israyeli bakaalilwa kulindila akutalika kubula lusyomo muli Leza, kabayeeya kuti Musa waleka kubabikkila maano. Aboobo, bakapanga cikozyanyo camoombe wangolida akwaambila bantu kuti: ‘Ngooyu Leza wako, O Israyeli, iwakakupozya mucisi ca-Egepita.’ (Kul. 32:1, 4) Mpoonya bakacita pobwe ndyobakaita kuti “ipobwe lya-Jehova,” bakakotama akutuula kucikozyanyo cabo cakapangwa abantu. Naakabona boobo Jehova, wakaambila Musa kuti: “Bafwambaana kusia inzila njindakabalailila.” (Kul. 32:5, 6, 8) Cuusisya ncakuti, kuzwa waawo bana Israyeli bakaba ampuwo yakukonka kuli Leza pele mukuyakwaciindi bakali kwaalilwa kuzuzikizya cikonke cabo.—My. 30:2.
AZIMWI ZIKONKE ZYOBILO
13. Ino ncikonke nzi cacisyomezyo Leza ncaakaamba ku Mwami Davida, alimwi ino cikozyenye buti acisyomezyo ca Lunyungu?
13 Ciindi cabulelo bwa Mwami Davida, Jehova wakaamba alimwi zikonke zyazisyomezyo zyobilo kutegwa boonse ibamumvwida bagwasyigwe. Cakusaanguna, wakakonka kuli Davida kuti cuuno cakwe cabwami cinooliko kukabe kutamani. (Int. 89:35, 36; 132:11, 12) Eeci cakali kupandulula kuti Lunyungu lwakasyomezyegwa lunooitwa kuti “Mwana wa Davida.” (Mt. 1:1; 21:9) Cakulibombya, Davida wakaamba luzubo oolu lwakumbele kuti “Mwami” wangu nkaambo Kristo wakali kuyakuba acuuno cisumpukide.—Mt. 22:42-44.
14. Ino ncikonke nzi cacisyomezyo Jehova ncaakaamba kujatikizya Lunyungu lwakasyomezyegwa, alimwi mbuti mbotugwasyigwa ancico?
14 Cabili, Jehova wakasololela Davida kusinsima kuti ooyu Mwami uulibedelede wakali kuyakubeleka alimwi kali Mupaizi Mupati wabantu. Mu Israyeli, kuba mwami alimwi akuba mupaizi zyakaliindene kapati. Bapaizi bakali kuzwa mumusyobo waba Levi mpoonya bami bakali kuzwa mumusyobo waba Juda. Pele kujatikizya sikukona bwami wakumbele, Davida wakaambilalimwi kuti: “Mbuboobu Jehova mbwaambila mwami wangu: Kala kujanza lyangu lyalulyo, mbike basinkondonyoko babe citandabalilo camaulu aako. Jehova wakonkezya, takooleka. Wati, nduwe mupaizi walyoonse, uli mbubonya mbuli Melkisideke.” (Int. 110:1, 4) Mukuzuzikizyigwa kwabusinsimi oobo, Jesu Kristo, Lunyungu lwakasyomezyegwa, lino ulalela kululyo lwa Leza kujulu. Kunze lyaboobo, ulabeleka kali Mupaizi Mupati wabantu kwiinda mukugwasya bantu beempwa kuboola mucilongwe cibotu a Leza.—Amubale Bahebulayo 7:21, 25, 26.
ISRAYELI WA LEZA MUPYA
15, 16. (a) Ino nzibeela nzi zyobilo zyabana Israyeli zyaambidwe mu Bbaibbele, alimwi ncibeela nzi cijisi cilongezyo ca Leza mazuba aano? (b) Mulawo nzi Jesu ngwaakapa basikumutobela kujatikizya kukonka?
15 Akaambo kakumukaka Jesu Kristo, cisi ca Israyeli kumamanino cakasweekelwa coolwe cakuyandwa a Leza alimwi acoolwe cakuba “cisi cabapaizi.” Mbubwenya Jesu mbwaakaambila basololi iba Juda kuti: “Bwami bwa Leza buyoonyangwa kulindinywe akupegwa kumusyobo uuzyala micelo.” (Mt. 21:43) Cisi eeco cipya cakazyalwa lya Pentekoste 33 C.E. ciindi muuya wa Leza nowakatilwa aali basikwiiya ba Jesu babalilwa ku 120 ibakabungene mu Jerusalemu. Aaba bakazootalika kwiitwa kuti “ba Isilayeli ba Leza” mpoonya muciindi cisyoonto bakavwula kusika kuzyuulu zili mbozibede zyabantu bazwa mumisyobo yoonse yanyika eeco ciindi.—Gal. 6:16.
16 Mukwiimpana abana Israyeli bakumubili, cisi ca Leza cakumuuya cipya cazumanana kuzyala micelo mibotu kwiinda mukuzumanana kumvwida Leza. Malailile amwi bacibeela eeci ngobamvwida ajatikizya kukonka. Ciindi Jesu naakali anyika, bantu tiibakali kukulemeka kukonka, bakali kukonka cakubeja naa kukonka mutuntu tusyoonto kapati. (Mt. 23:16-22) Jesu wakayiisya basikumutobela kuti: “Mutakonkezyi naaceya . . . Pele kwaamba kwanu kuti ‘iiyi’ akube iiyi, akuti ‘peepe’ akube peepe, nkaambo aayindilila aali yaaya azwa kumubi.”—Mt. 5:34, 37.
17. Mibuzyo nzi iiyakubandikwa mucibalo cakwiiya citobela?
17 Sena eeci caamba kuti taciluzi lyoonse kukonka? Kuyungizya waawo, ncinzi cijatikizyidwe mujwi lyesu lyakuti Iiyi kuba Iiyi? Mibuzyo eeyi iyakubandikwa mucibalo cakwiiya citobela. Mbotuyaabuzumanana kuzinzibala kuyeeya Jwi lya Leza, tweelede kukulwaizyigwa kuzumanana kumvwida Jehova. Mpoonya awalo uyakukkomana kutulongezya kukabe kutamani kweelana azikonke zyakwe zibotu zyacisyomezyo.
[Mibuzyo yaciiyo]
[Majwi aakwelelezya sikubala aali apeeji 26]
Lyoonse zisyomezyo zya Jehova zicitika ncobeni
[Cifwanikiso icili apeeji 24]
Ino-ino Abrahamu uyakuzibona zisyomezyo zya Jehova kazicitika ncobeni
