Iiyi Wanu Aabe Iiyi
Iiyi Wanu Aabe Iiyi
“Pele kwaamba kwanu kuti ‘iiyi’ akube iiyi, akuti ‘peepe’ akube peepe.”—MT. 5:37.
AMUBONE NAA INGA MWAINGULA:
Ncinzi Jesu ncaakaamba kujatikizya kukonka?
Nkaambo nzi Jesu ncaakali cikozyanyo cibotu cakusyomeka kujwi lyakwe?
Muumbazu nzi zyabuumi motweelede kwaamba jwi lyakuti Iiyi kuba Iiyi?
1. Ncinzi Jesu ncaakaamba kujatikizya kukonka, alimwi nkaambo nzi?
KANJI-KANJI, Banakristo bakasimpe tabeelede kukonka pe. Ciliboobo nkaambo bamvwida Jesu iwakaamba kuti: “Pele kwaamba kwanu kuti ‘iiyi’ akube iiyi.” Jesu wakali kupandulula kuti muntu weelede kucita ncaamba. Katanaamba majwi aaya, Jesu wakaamba kuti: “Utakonki.” Wakaamba boobo ikukazya cilengwa cakukonka bantu banji ncobakali kucita cakwiinduluka-induluka mumibandi yabo yabuzuba abuzuba kabatajisi makanze aakuzicita nzyobaamba. Ncinzi cikonzya kucitika kuti muntu umwi wakonka kucita cintu cimwi, pele kunyina naacicita? Muntu uuli boobo ulakonzya kutondezya kuti tasyomeki ncobeni, aboobo weendelezyegwa ‘amubi.’—Amubale Matayo 5:33-37.
2. Amupandulule ncocitalubide lyoonse kukonka.
2 Sena majwi aa Jesu atondezya kuti kukonka koonse nkubi? Ino eeco inga cacitika buti? Mbubwenya mbotwakaiya mucibalo cainda, Jehova Leza alimwi amubelesi wakwe uululeme Abrahamu bakakonka mubukkale buyandika kapati. Kuyungizya waawo, Mulawo wa Leza wakali kukulwaizya kukonka kutegwa mazwanga amwi amanizyigwe. (Kul. 22:10, 11; My. 5:21, 22) Aboobo, inga cayandika ku Munakristo kuti akonke munkuta ciindi napa bumboni kutegwa aambe camasimpe. Zimwi ziindi, Munakristo ulakonzya kubona kuti cilayandika kukonka kutegwa asyomezye bamwi kujatikizya makanze aakwe naa kugwasya kubamba kaambo. Masimpe ngakuti, ciindi mupaizi mupati naakaambila Jesu kuti akonke, kunyina naakakaka, pele wakaamba camasimpe mu Nkuta Mpati yaba Juda. (Mt. 26:63, 64) Nokuba boobo, Jesu tanaakali kuyandika kukonka kumuntu uuliwoonse. Kutegwa akankaizye kusyomeka kwamulumbe wakwe, kanji-kanji wakali kutalika kwaambaula kwiinda mukubelesya majwi aakuti: “Ncobeni . . . ndimwaambila kuti.” (Joh. 1:51, 13:16, 20, 21, 38) Atulange-lange acimwi ncotukonzya kwiiya kucikozyanyo ca Jesu, Paulo alimwi abamwi ibakaamba jwi lyakuti Iiyi kuba Iiyi.
JESU—CIKOZYANYO CIINDA KUBOTA
3. Ino Jesu wakamusyomezya nzi Leza mumupailo, alimwi mbuti Bausyi bakujulu mbobakaingula?
3 “Bona! Ndaboola . . . kuti ndicite kuyanda kwako, O Leza.” (Heb. 10:7) Kwiinda mumajwi aaya, Jesu wakalyaaba kuli Leza kuti acite zyoonse zyakaambilwalimwi kujatikizya Lunyungu, kubikkilizya ‘akulumwa kukasindi’ a Saatani. (Matl. 3:15) Taakwe muntu uumbi wakalyaaba kale kunyamuna mukuli mulemu boobu. Kuzwa kujulu, ijwi lya Jehova lyakamvwika kutondezya mbwaakali kumusyoma Mwanaakwe cakumaninina, pele eeci tacaambi kuti Jesu wakeelede kukonka kuti ulasyomeka kujwi lya Jehova.—Lk. 3:21, 22.
4. Ino Jesu wakasika aali mukupa kuti jwi lyakwe lyakuti Iiyi libe Iiyi?
4 Jesu wakapa kuti jwi lyakwe lyakuti Iiyi libe Iiyi kwiinda mukucita nzyaakali kukambauka lyoonse. Tanaakalekela cintu cilicoonse kuti cimunyonganye mumulimo ngwaakapegwa kuli Bausyi wakukambauka makani mabotu aa Bwami bwa Leza alimwi akugwasya bantu kuba basikwiiya balo Leza mbaakakwela kuli Jesu. (Joh. 6:44) Nolipandulula mbwaakali kusyomeka Jesu, Bbaibbele libelesya majwi aazyibidwe kabotu aakuti: “Nozivwula buti zisyomezyo zya Leza, zyaba Inzya kwiinda mulinguwe.” (2 Ko. 1:20) Masimpe, Jesu ncikozyanyo ciinda kubota camuntu wakasyomeka kumajwi ngaakasyomezya Bausyi. Lino atulange-lange muntu iwakasolekesya kwiiya Jesu.
PAULO—WAKACITA NCAAKAAMBA
5. Ino ncikozyanyo nzi mwaapostolo Paulo ncaakatusiila?
5 “Ino ncinzi ncondeelede kucita Mwami?” (Mil. 22:10) Kwiinda mumajwi aaya aatondezya kusyomeka, Paulo iwakali kwiitwa kuti Saulo, wakatobela busolozi bwa Mwami Jesu mubulemu bwakwe, walo iwakalibonya kulinguwe mucilengaano kuti amulesye kupenzya basikwiiya ba Kristo. Akaambo kaceeci, Saulo cakulibombya wakeempwa kumicito yakwe yakaindi, wakabbapatizyigwa alimwi wakatambula mulimo waalubazu wakupa bumboni kujatikizya Jesu kuli bamasi. Kuzwa ciindi eeco, Paulo wakazumanana kwaamba Jesu kuti “Mwami” wakwe, akucita kweelana abbala eelyo kusikila kumamanino abuumi bwakwe anyika. (Mil. 22:6-16; 2 Ko. 4:5; 2 Ti. 4:8) Paulo tanaakali mbuli bamwi balo Jesu mbaakaamba kuti: “Ino mundiitila nzi kuti Mwami! Mwami! pele tamuciti zyintu nzyondaamba?” (Lk. 6:46) Inzya, Jesu uyanda kuti boonse aabo bamuzumina kuti Mwami wabo kabasyomeka kujwi lyabo mbubwenya mwaapostolo Paulo mbwaakacita.
6, 7. (a) Nkaambo nzi Paulo ncaakacincila makanze aakwe aakuswaya alimwi ku Korinto, alimwi nkaambo nzi aabo bakali kumukazya ncobatakaluzi mukudooneka kusyomeka kwakwe? (b) Mbuti mbotweelede kubabona aabo basalidwe kusololela akati kesu?
6 Paulo cabusungu wakakambauka mulumbe wa Bwami mu Asia Minor alimwi amu Europe, wakatalisya mbungano zinji alimwi wakali kuziswaya. Zimwi ziindi, wakabona kuti cakali kuyandika kukonka kutegwa atondezye mbwaakali aamasimpe majwi ngaakalemba. (Gal. 1:20) Ciindi bamwi mu Korinto nobakamutamikizya kuti tasyomeki, Paulo wakaliiminina kwiinda mukulemba kuti: “Leza ulasyomeka cakuti nzyotumwaambila tazili Inzya alimwi a Peepe.” (2 Ko. 1:18) Ciindi naakalemba majwi aayo, Paulo wakazwide ku Efeso mpoonya wakali mulweendo kuya ku Korinto kwiinda mu Makedoniya. Kumatalikilo wakakanzide kuswaya alimwi mu Korinto katanaunka ku Makedoniya. (2 Ko. 1:15, 16) Pele mbubwenya mbuli balangizi beendeenda mazuba aano, zimwi ziindi lweendo lwabo lulacinca. Kucinca kuli boobo takucitwi akaambo katwaambo tutayi komoonga naa kucita zyintu zyakuliyandila pe, pele akaambo katwaambo twacibukilambuta. Kuli Paulo, kaambo kakamupa kucinca ciindi ncaakeelede kuswaya ku Korinto kakali kugwasya mbungano. Munzila nzi?
7 Ciindi cimwi kumatalikilo naakamana kubikka bubambe bwalweendo lwakwe, Paulo wakatambula makani aanyonganya aakuti kutakamantana alimwi akutalilemeka zyakali kuzumizyigwa mu Korinto. (1 Ko. 1:11; 5:1) Kutegwa abambe twaambo, wakalemba lulayo lwanguzu mulugwalo lwakwe lwakusaanguna kubana Korinto. Mpoonya muciindi cakuti aunke ciindi nceena eeco kuzwa ku Efeso kuya ku Korinto, Paulo wakasala kuti abape ciindi ibakwesu cakulubelesya lulayo lwakwe kutegwa aakuunka kwainda ciindi, kuswaya kwakwe kukabakulwaizye kapati. Kutegwa abaambile masimpe kujatikizya kaambo ncaakacincila makanze aakwe, Paulo wakabalembela mulugwalo lwakwe lwabili kuti: “Leza andijaye ikuti naa ndabeja kuti nconditanaboola ku Kolinto nkaambo kakuti tandiyandi kumumvwisya bubi.” (2 Ko. 1:23) Tatweelede kuba mbuli baabo bakali kumukazya Paulo, muciindi caboobo, atutondezye bulemu bupati kulibaabo basalidwe kusololela akati kesu. Bwini mbwakuti inga twacita kabotu kwiiya Paulo mbubwenya awalo mbwaakaiya Kristo.—1 Ko. 11:1; Heb. 13:7.
ZIKOZYANYO ZIMWI ZIBOTU
8. Ncikozyanyo nzi Rabeka ncaakatusiila?
8 “Inzya ndilayanda kuunka.” (Matl. 24:58, NW) Kwiinda mumajwi aaya, Rabeka wakaingula banyina amunyinandumi wakwe kujatikizya mbwaakalilyaabide kusiya munzi ookwabo buzuba mbubonya oobo, akweenda amuntu mweenzu kwamakkilomita aali 800 kutegwa akabe mukaintu wa Izaka mwana wa Abrahamu. (Matl. 24:50-58) Ijwi lya Rabeka lyakuti Iiyi lyakaba Iiyi, wakatondezya kuti wakali mukaintu wa Izaka uusyomeka uuyoowa Leza. Mubuumi bwakwe boonse kuzwa waawo, wakali kukkala mumatente kali muzwakule Munyika Yakasyomezyegwa. Wakalongezyegwa akaambo kakusyomeka kwakwe kwiinda mukuba umwi wabamakaapanyina ba Lunyungu lwakasyomezyedwe, Jesu Kristo.—Heb. 11:9, 13.
9. Mbuti Rute mbwaakacita ncaakaamba?
9 ‘Peepe! Katuya toonse kubantu bako.’ (Rut. 1:10) Aaya ngamajwi bamukabafwu bana Moabu ba Rute a Olipa ngobakazumanana kwaambila banyinazyala ba Naomi, bamukamufwu balo ibakali kupiluka kuzwa ku Moabu kuya ku Betelehemu. Kumamanino, akaambo kamajwi aa Naomi, Olipa wakapiluka kumunzi ookwabo. Pele jwi lya Rute lyakuti Peepe lyakaba Peepe. (Amubale Rute 1:16, 17.) Cakusyomeka wakakakatila kuli Naomi, akuusiilalimwi mukwasyi wakwe alimwi abukombi bwakubeja mu Moabu. Wakaliyumya kali mukombi uusyomeka wa Jehova alimwi wakalongezyegwa kwiinda mukuba umwi wabamakaintu bali musanu ibaambidwe mubbuku lya Matayo mumazyalani aa Kristo.—Mt. 1:1, 3, 5, 6, 16.
10. Nkaambo nzi Isaya ncaakali cikozyanyo cibotu kulindiswe?
10 “Mpendi! Unditume mebo!” (Is. 6:8) Katanaamba majwi aaya, Isaya wakabona cilengaano cabulemu bwa Jehova kakkede acuuno cakwe atala aatempele lya Israyeli. Kalangide acilengaano eeci cabulemu, Isaya wakamvwa Jehova kaamba kuti: “Ino nguni ngunti tume? Nguni uukonzya kutwiinkila?” Ooku kwakali kutamba kwakuti abe mwaambilizi wa Jehova kutola mulumbe wa Leza kubantu bakwe bakazangide. Isaya wakacita ncaakaamba—jwi lyakwe lyakuti Iiyi lyakaba Iiyi. Kwamyaka iinda ku 46, wakabeleka cakusyomeka kali musinsimi, kutola milumbe yalubeta alimwi azisyomezyo zibotu kujatikizya kubukulusyigwa kwabukombi bwakasimpe.
11. (a) Nkaambo nzi kusyomeka kumajwi eesu ncokuyandika? (b) Nzikozyanyo nzi zitucenjezya zyabantu ibatakasyomeka?
11 Nkaambo nzi Jehova ncaakalekela kuti zikozyanyo izyaambwa kale kuti zilembwe mu Jwi lyakwe akaambo kandiswe? Alimwi mapati buti makani aakwaamba jwi lyesu lyakuti Iiyi kuba Iiyi? Cakusalazya Bbaibbele licenjezya kuti muntu ‘uutabambi zizuminano’ uli akati kabaabo “beelede kufwa.” (Lom. 1:31, 32) Farao waku Egepita, Mwami Zedekiya waku Juda alimwi aba Hananiya a Safira bali akati kazikozyanyo zibyaabi zyaambidwe mu Bbaibbele izyabantu bakaamba jwi lyakuti Iiyi pele tiilyakaba Iiyi. Tiibakacita kabotu alimwi nzikozyanyo zitucenjezya.—Kul. 9:27, 28, 34, 35; Ezk. 17:13-15, 19, 20; Mil. 5:1-10.
12. Ncinzi cikonzya kutugwasya kusyomeka kumajwi eesu?
12 Akaambo kakuti tupona “kumazuba aamamanino,” tulizungulukidwe abantu “batasyomeki,” bantu “bayandisya zyakulikondelezya kwiinda kuyandisya Leza, ibalibonya mbuli kuti balilyaabide mubukombi, pele nguzu zyambubo balazikazya.” (2 Ti. 3:1-5) Tweelede kusolekesya kutantamuka kuyanzana kubyaabi. Muciindi caboobo, tweelede kubungana lyoonse abaabo ibasolekesya lyoonse kwaamba jwi lyabo lyakuti Iiyi kuba Iiyi.—Heb. 10:24, 25.
IJWI LYANU LYAKUTI IIYI ILIYANDIKA KAPATI
13. Ino ndijwi nzi lyakuti Iiyi liyandika kapati ilyaambwa abasikutobela Jesu Kristo?
13 Cisyomezyo ciyandika kapati muntu ncakonzya kwaamba cijatikizya kulyaaba kwakwe kuli Leza. Ziindi zyotatwe zigaminide, aabo bayanda kuliimya kabali basikwiiya ba Jesu balijisi coolwe cakwaamba kuti Iiyi kumibuzyo njobabuzyigwa kujatikizya makanze aabo. (Mt. 16:24) Ciindi baalu bobilo nobabuzya muntu uuyanda kuba sikumwaya uutanabbapatizyigwa, balamubuzya kuti: “Sena uliyandide ncobeni kuba umwi wa Bakamboni ba Jehova?” Mukuyakwaciindi kuti muntu wayaambele kumuuya alimwi uyanda kuti bamuzumizye kuti abbapatizyigwe, baalu balaswaangana anguwe akumubuzya kuti: “Sena mwakalyaaba nobeni kuli Jehova mumupailo?” Kumamanino, mubuzuba bwalubbapatizyo, aumwi sikubbapatizyigwa ulabuzyigwa kuti: “Kwiinda mucipaizyo ca Jesu Kristo, sena mweempwa zibi zyanu akulyaaba kuli Jehova kuti mucite kuyanda kwakwe?” Aboobo, kumbele lya bakamboni, aaba bapya balaamba kuti Iiyi kujatikizya cisyomezyo cakubelekela Leza kukabe kutamani.
14. Ino nkulilingula nzi umwi aumwi wesu nkwayelede kucita ciindi aciindi?
14 Kufwumbwa naa mwakabbapatizyigwa ino-ino naa mwali kumubelekela Leza kwamyaka minji, mweelede kulilingaula ciindi aciindi akulibuzya mibuzyo mbuli bwayeeyi: ‘Mukwiiya Jesu Kristo, sena ndicizumanana kusyomeka kujwi lyangu liyandika kapati lyakuti Iiyi? Sena ndicizumanana kumvwida Jesu kwiinda mukubikka ambele mulimo wakukambauka akugwasya bantu kuba basikwiiya mubuumi bwangu?’—Amubale 2 Bakolinto 13:5.
15. Muumbazu nzi zyabuumi mociyandika kuti jwi lyesu lyakuti Iiyi libe Iiyi?
15 Kutondezya kusyomeka kuzikonke zyakulyaaba kwesu caamba kuti alimwi tweelede kusyomeka kumakani aambi aayandika kapati. Mucikozyanyo: Sena mulikwete naa kukwatwa? Nkokuti amuzumanane kulemeka cikonke ciyandika ncomwakapanga cakumuyanda akumubamba ooyo ngomukwetenelimwi. Sena mwakasaina cipepa cacizuminano mumakwebo naa kulemba bwiinguzi afoomu lyakulembela milimo imwi mumbunga ya Leza? Nkokuti, amusyomeke kukulyaaba kwanu alimwi akucisyomezyo ncomwakapa. Sena mwakazumina kujanika kukutambwa kucakulya kumuntu mucete? Nkokuti, tamweelede kuleka kuunka kuti naa kwaba uumutamba uumbi uuboneka kuti muvwubi. Sena kuli muntu ngomwakasyomezya nomwakali mumulimo wakuŋanda aŋanda kuti muyakumuswaya alimwi kutegwa mukamupe lugwasyo lumbi lwakumuuya? Nkokuti kusikila mpomugolela jwi lyanu lyakuti Iiyi alibe Iiyi, aboobo Jehova uyakuulongezya mulimo wanu.—Amubale Luka 16:10.
KUGWASYIGWA KUMUPAIZI WESU MUPATI ALIMWI MWAMI
16. Kuti twaalilwa kucita ncotwaamba, ncinzi ncotweelede kucita?
16 Bbaibbele lyaamba kuti mbotuli bantu batalondokede, “tulalubizya ziindi zinji,” ikapati mbotuubelesya mulaka wesu. (Jak. 3:2) Ncinzi ncotweelede kucita twazyiba kuti twaalilwa kucita ncotwaamba? Mumulawo wa Leza kubana Israyeli, kwakali bubambe bwaluse kuti umwi waba amulandu akaambo ‘kakukonka cakufwanzya amilomo yakwe.’ (Lev. 5:4-7, 11) Kuli bubambe bwaluyando alimwi ku Banakristo ibacita cibi camusyobo ooyo. Kuti twalyaambilila cibi ciliboobo kuli Jehova, muluse uyakutulekelela kwiinda mu Mupaizi wesu Mupati Jesu Kristo. (1 Jo. 2:1, 2) Nokuba boobo, kutegwa tuzumanane kuba balongwe ba Leza, tweelede kutondezya micelo yakweempwa kwiinda mukutaba acilengwa cakucita zibi eezyo alimwi akusolekesya kubambulula bubi bwakacitwa akaambo kakubinda kwaamba. (Tus. 6:2, 3) Nokuba boobo, cilainda kubota kuyeeyesya katutanasyomezya zyintu nzyotutakonzyi kuzuzikizya.—Amubale Mukambausi 5:2.
17, 18. Mbulangizi nzi bubotu buliko kumbele kuli baabo boonse ibazumanana kusolekesya kwaamba jwi lyabo lyakuti Iiyi kuba Iiyi?
17 Eelo kaka kuli bulangizi bubotu kumbele kubakombi ba Jehova boonse ibazumanana kusolekesya kwaamba jwi lyabo lyakuti Iiyi kuba Iiyi! Kubananike bali 144,000 caamba buumi butafwi kujulu, kwalo nkobayakubeleka a Jesu mu Bwami bwakwe, “bayooba bami balela antoomwe anguwe kwamyaka iili 1,000.” (Ciy. 20:6) Kubantu bambi batabaliki, ciyakwaamba zilongezyo kuzwa kubulelo bwa Kristo bwa Bwami muparadaiso anyika. Bayakugwasyigwa kulondoka kumubili alimwi amumizeezo.—Ciy 21:3-5.
18 Kwiinda mukusyomeka kumusunko wamamanino kumamanino aa Bulelo bwa Jesu bwa Myaka Iili 1,000, alimwi kunyina notuyakudooneka jwi lyamuntu uuliwoonse. (Ciy. 20:7-10) Kufwumbwa jwi lyakuti Iiyi linooamba Iiyi, alimwi kufwumbwa jwi lyakuti Peepe linooli Peepe. Nkaambo muntu woonse uupona unooiya Taateesu siluyando Jehova cakulondoka, ‘Leza wakasimpe.’—Int. 31:5.
[Mibuzyo yaciiyo]
[Cifwanikiso icili apeeji 28]
Kuzwa naakabbapatizyigwa kusikila kulufwu, Jesu wakasyomeka kucisyomezyo ncaakapa kuli Bausyi
[Cifwanikiso icili apeeji 30]
Sena mulasyomeka kujwi lyanu liyandika kapati lyakuti “Iiyi”?
