Makani Aabuumi

Twali Balongwe Kwamyaka Iili 60

Bumwi buzuba, kumangolezya ciindi cacilimo mu 1951, bakubusi bone basankwa ibakajisi myaka yakuzyalwa iinda buyo asyoonto ku 20, bakaima mutwaanda tujatene imutuminwa luwaile mu Ithaca, ku New York, U.S.A., alimwi kabakkomene bakali kutuma luwaile mumasena aakulamfwu ku Michigan, Iowa alimwi aku California. Kwakali makani mabotu aakubandika.

Mwezi wakaindide wa February, bapainiya bali 122 bakasika ku South Lansing, New York, kuti banjile Cikolo ca Gileadi kkilasi yanamba 17. Akati kabaabo ibakali kuyakuba bamisyinali kwakali ba Lowell Turner, ba William (Bill) Kasten, ba Richard Kelsey, alimwi aba Ramon Templeton. Ba Lowell aba Bill bakazwide ku Michigan, ba Richard bakazwide ku Iowa mpoonya ba Ramon bakazwide ku California. Muciindi cisyoonto bakaba balongwe babotu.

Nokwakainda myezi iibalilwa kuli yosanwe, boonse bakalikkomene kapati ciindi nokwakaambilizyigwa kuti Mukwesu Nathan Knorr kuzwa kumaofesi mapati ulaboola kubandika kuli basicikolo. Bakwesu aaba bone bakalitondezyede kale kuti bayanda kubelekela antoomwe mucisi comwe kuti kacikonzyeka. Sena bakeelede kuzyiba zinji kujatikizya mulimo wabo wabumisyinali kucisi cimbi? Inzya!

Bakalibilika kapati ciindi Mukwesu Knorr, naakatalika kwaambaula kuli basicikolo boonse mukkilasi alimwi akwaambilizya zisi nkobakali kuyakubelekela. Ibakasaanguna kwiitwa kucibumbili bakali bakubusi basankwa bone ibakalibilikide kapati pele ibakalimvwa kwaanguluka nobakazyiba kuti bayakukkala antoomwe. Pele ino bakali kuyakukkala kuli? Basicikolonyina bakagambwa alimwi bakakambilila ciindi nokwakaambilizyigwa kuti bayakubelekela ku Germany.

Kulikoonse nkobakabede Bakamboni ba Jehova, bakagambwa kumvwa makani aakusyomeka nkobakatondezya Bakamboni mucisi ca Germany mubweendelezi bwa Hitler kuzwa mu 1933 kuya kumbele. Basicikolo banji bakayeeya ciindi nobakali kutumina banyina baku Europe zisani alimwi azibbokesi zyakali kubambwa akabunga ka Cooperative for American Remittances kutumina bakafwutuka ku Nkondo Yanyika Yabili. Bantu ba Leza baku Germany nzikozyanyo zibotu kapati zitondezya lusyomo, kutazungaana, busicamba alimwi akusyoma Jehova. Ba Lowell balayeeya majwi aakuti: ‘Lino tuyakubazyiba kabotu bakwesu abacizyi kubagama.’ Nkakaambo kaako umwi aumwi wabo ncaakakkomene kapati alimwi ncencico ncobakali kuyandila kuzyibya banamukwasyi alimwi abalongwe kujatikizya makani aaya.

MUNZILA KABAYA KU GERMANY

Mu July 27, 1951, bwaato mbobakatantide ibutegwa SS Homeland bwakazwa kunkomwe ya New York’s East River, mpoonya balongwe bone bakali mulweendo lwamazuba aali 11 kuya ku Germany.  Mukwesu Albert Schroeder, umwi wabamayi babo ku Cikolo ca Gileadi alimwi iwakazooba umwi wamu Kabunga Keendelezya, wakali bayiisyide mbobaanzyanya mumwaambo waci German. Lino kabali abasilweendonyina bana German, ambweni bakali kukonzya kwiiya zinji. Pele basilweendo aabo bakali kwaambaula misyobo iindene indene yamwaambo waci German. Eelo kaka cakali kunyonganya!

Muli Bwabili mafwumofwumo mu August 7, nobakamana kuliyumya mubuyumuyumu bwakweenda mulwizi, bakwesu bakasika ku Hamburg mu Germany. Kufwumbwa nkobalanga bakali kubona zyintu zyakanyonyoonwa ankondo yakacitikide myaka iili cisambomwe yakaindide. Kabauside akaambo kanzyobakabona, bakatanta citima ceenda masiku kuya ku Wiesbaden, kwalo ofesi yamutabi nkoyakabede kuciindi eeco.

Mafwumofwumo muli Bwatatu bakaswaangana a Kamboni wakusaanguna mucisi ca Germany—uujisi zyina lyaci German. Ba Hans bakabanyamuna mumootokala kuzwa kucitisyini cacitima kuya ku Bbeteli, akubasiya kumucizyi uucembeede iwatakali kwaambaula Cingisi. Mucizyi ooyu wakali kuyeeya kuti penzi lyakutamvwana mwaambo lilakonzya kumana kwiinda mukutola jwi mujulu akwaambaula. Pele nokuba kuti wakatola jwi mujulu, walo alimwi abakwesu bone bakatyompwa kapati. Kumamanino Mukwesu Erich Frost, mubelesi wamutabi, wakasika akubaanzya calukkomano mu Cingisi. Zyintu zyakatalika kubota.

Kumamanino aamwezi wa August, bakwesu aaba bone bakajanika kumuswaangano wacooko wamumwaambo waci German wakusaanguna, wakajisi mutwe wakuti “Clean Worship” (Bukombi Busalala) iwakacitilwa mu Frankfurt am Main. Kwakajanika bantu basika 47,432 alimwi kubbapatizyigwa kwabantu bali 2,373 kwakapa kuti bakwesu babe abusungu bwabu misyinali alimwi aluyandisisyo lwakukambauka. Pele nokwakainda mazuba masyoonto, Mukwesu Knorr wakayubununa kuti bakali kuyakukkala a Bbeteli alimwi akubelekela mpawo.

Akaambo kakuti moyo wabo wakagamikide kumulimo wabumisyinali, ba Ramon ciindi cimwi bakalikakide coolwe cakuunka ku Bbeteli mucisi ca United States. Nobaba ba Richard aba Bill kunyina nobakayeeyede kuti inga bacita mulimo waku Bbeteli. Pele lukkomano  ndobakajana mukuyakwaciindi mumulimo wabo lwakasinizya kulimbabo kuti Jehova ulizyi kabotu lyoonse. Eelo kaka ncamaano kusyoma busolozi bwa Jehova muciindi cakusyoma nzyotuyanda! Ooyo iwaiya kuciiyo eeci uyakukkomana kubelekela Jehova kufwumbwa busena alimwi kufwumbwa mulimo ngwaapegwa.

TACEELEDE!

Banji mumukwasyi wa Bbeteli waku Germany bakalikkomene kuba abana America akati kabo kutegwa lino kabaiya kwambaula Cingisi. Pele bumwi buzuba muŋanda yakulida, bulangizi oobo bwakamana cakutayeeyelwa. Mukwesu Frost, cabusungu kapati wakatalika kwaambaula muci German kujatikizya cintu cimwi pele icakali kuyandika kapati. Banji mumukwasyi bakaumuna akubikkila maano kukulya. Nokuba kuti ibapya tiibakali kukonzya kumvwa cakali kwaambwa, asyoonto-syoonto bakatalika kuzyiba kuti cijatikizya mbabo. Aboobo, mukwesu Frost naakaamba ajwi lipati kuti “TACEELEDE!” kainduluka ajwi pati cakukankaizya, bakalimvwa kutaanguluka. Ncinzi ncobakacita icakapa kuti kwaambwe majwi alaanguzu aali boobo?

Nobakamana kulya, boonse kabayoowede bakaunka kumaluumu aabo. Kuzwa waawo, mukwesu umwi wakapandulula kuti: “Kutegwa mutugwasye, mweelede kwaambaula ci German. Nkakaambo kaako Mukwesu Frost ncaamba kuti kusikila mukaiye ci German, kwaambaula Cingisi andinywe TACEELEDE.”

Mukwasyi wa Bbeteli wakafwambaana kumvwida. Eeci cakagwasya bapya kwiiya ci German alimwi cakabayiisya kuti lulayo lupegwa amukwesu uujisi luyando nokuba kuti kumatalikilo lulakatazya kutobela, kanji-kanji lulatugwasya. Lulayo lwa mukwesu Frost lwakatondezya kubikkila maano kwakwe kumbunga ya Jehova alimwi aluyando lwakwe kubanyina. * Nkakaambo kaako bakwesu bone aaba ncobakatalika kumuyanda kapati.

KWIIYA KUZWA KUBEENZUMA

Kuzwa kubalongwe bayoowa Leza, tulakonzya kwiiya zyintu zibotu zyalo zitugwasya kuba balongwe babotu ba Jehova. Kuzwa kubakwesu abacizyi basyomeka baku Germany—batakonzyi kwaambwa boonse mazyina—bakwesu aaba bone bakaiya zinji, pele alimwi bakaiya kuli umwi amweenzyinyina. Ba Richard bakapandulula kuti: “Ba Lowell bakalijisi luzyibo lwamwaambo waci German alimwi bakali kucita kabotu mumwaambo ooyo, pele swebo toonse twakalijisi buyumuyumu. Mbwaanga mbebakali bapati akati kesu, mbembabo mbotwakali kutolela makani kujatikizya mwaambo alimwi akutusololela.” Ba Ramon  bakaamba kuti: “Eelo kaka ndakakkomana ciindi mukwesu waku Switzerland naakatupa ŋanda yakwe ku Switzerland notwakaunka kuyakulyookezya ciindi cakusaanguna nokwakainda mwaka omwe katuli mu Germany. Twakalijisi nsondo zyobilo zyakulyookezya kakunyina kupenga amwaambo waci German. Pele tiindakali kuyeeyela ba Lowell ncobakali kukonzya kucita. Bakazumanana kuti katubala akubandika lugwalo lwabuzuba mafwumofwumo lyoonse—mumwaambo waci German. Icakandigambya ncakuti taakwe nobakacinca muzeezo ooyu. Pele twakaiya cintu cimwi cibotu. Cilayandika kutobela baabo basololela ibamubikkila maano, neliba leelyo nomutazuminani zimwi ziindi. Muuya ooyu watugwasya kwamyaka alimwi watugwasya kulibombya kubusolozi bwa Leza.”

Balongwe bone alimwi bakaiya akulumba kaambo kamwi kayandika kapati mbubwenya mbokulembedwe kulugwalo lwa Bafilipi 2:3 kuti: “Amucite zyoonse cakulicesya akubona bamwi kuti balamwiinda.” Bamwi bakali kubalemeka ba Bill kwiinda mukubasala kucita zyintu eezyo aabo botatwe nzyobakali kuzuminana kuti balakonzya kuzicita kabotu kwiinda mbabo. Ba Lowell balayeeya kuti: “Ciindi nokwakali kuyandika kucita cintu cimwi cikatazya kutegwa tumane penzi limwi, twakali kwaambila ba Bill. Bakali cibwene kulwana penzi likatazya munzila toonse njotwakali kuzumina, pele twakanyina busicamba naa luzyibo lwakucita boobo mbuli mbabo.”

ZIKWATI ZIKKOMANISYA

Umwi aumwi wabakwesu aba bone wakayeeya kukwata. Cilongwe cabo cakayeeme aluyando kuli Jehova alimwi amulimo waciindi coonse, aboobo bakakanzide kujana bantu bakukwatanalimwi ibabikka Jehova mubusena bwakusaanguna. Mulimo waciindi coonse wakabagwasya kubona kuti kupa kulaletela coolwe kwiinda kutambula alimwi akuti zyintu zya Bwami zyeelede kuba mubusena bwakusaanguna kwiinda zyintu nzyalombozya muntu. Aboobo, bakasala bacizyi ibakali kucita kale mulimo waciindi coonse akaambo kakuliyandila. Kwakaba mikwasyi yone miyumu alimwi iikkomene.

Kutegwa cilongwe naa cikwati cizumanane, Jehova weelede kuba mucilongwe eeco. (Muk. 4:12) Nokuba kuti ba Bill aba Ramon bakafwidwa bamakaintu babo, boonse bakajana lukkomano alimwi alugwasyo luzwa kumukaintu uusyomeka. Ba Lowell aba Richard bacizumanana kukkomana alugwasyo oolu alimwi ba Bill ibakakwata alimwi, bakasala kabotu calo capa kuti bazumanane kucita mulimo waciindi coonse.

Mumyaka yakatobela, milimo yabo yakapa kuti babelekele mumasena aaindene indene—ikapati mu Germany, Austria, Luxembourg, Canada, alimwi amu United States. Akaambo kaceeci, balongwe bone tiibakaba aciindi cinji antoomwe mbuli mbubakali kuyanda. Pele nokuba kuti bakkala mumasena aasiyene, lyoonse balabandika, balakkomana muzilongezyo zyabo alimwi akulila antoomwe mumapenzi aabo. (Lom. 12:15) Balongwe bali boobo balayandika kapati alimwi tweelede kulumba kuba abalongwe bali boobo. Nzipego zibotu kuzwa kuli Jehova. (Tus. 17:17) Eelo kaka tacili cuubauba kujana balongwe beni-beni munyika mazuba aano! Pele Munakristo wakasimpe ulakonzya kubajana banji. Mbotuli Bakamboni ba Jehova, tulakkomana kuba balongwe abasyomima nyika yoonse  alimwi, ciinda waawo, ncilongwe a Jehova Leza alimwi a Jesu Kristo.

Mbubwenya mbocibede kulindiswe toonse, abalo balongwe bone aaba bali kujana mapenzi mubuumi bwabo—kufwumbwa naa nkusweekelwa muntu ngomwakakwetenelimwi, kuliyumya mukuciswa kapati, kulibilika kulanganya bazyali bacembeede, kukomezya bana kumwi kamuli mumulimo waciindi coonse, kulibilika ciindi notupegwa mulimo wa Leza mupya alimwi akuvwula kwamapenzi aakucembaala. Pele alimwi kweelana azyakabacitikila balizyi kuti balongwe—balongwe ibali afwaafwi alimwi abali kulamfwu—balabagwasya aabo bamuyanda Jehova kuti baliyumye mubuyumuyumu bumwi abumwi.

CILONGWE CIJISI MAKANZE AAKUZUMANANA KUKABE KUTAMANI

Eelo kaka cilakkomanisya kuti ba Lowell kabajisi myaka yakuzyalwa iili 18, ba Ramon iili 12, ba Bill iili 11 alimwi aba Richard iili 10, bakalyaaba kuli Jehova alimwi akuti kabajisi myaka yakuzyalwa iili akati ka 17 alimwi a 21 bakatalika mulimo waciindi coonse. Bakakulwaizyigwa kucita kweelana alugwalo lwa Mukambausi 12:1 kuti: “Koyeeya Mulengi wako mumazuba aabulombe bwako.”

Kuti muli Banakristo basankwa bakubusi, kuti kacikonzyeka amukutambule kutamba kwa Jehova kwakuti munjile mulimo waciindi coonse. Mpoonya kwiinda muluzyalo lwakwe mulakonzya kujana lukkomano—mbubwenya mbuli balongwe aaba bone—lwakubelekela mubbazu, mucooko naa mumulimo wakuswaya mitabi; kubelekela ku Bbeteli, kubikkilizya akuba mu Kkomiti ya Mutabi; kuba mwiiyi kuzikolo zya Mulimo wa Bwami azikolo zya Mulimo Wabupainiya; alimwi akuba mwaambi kumiswaangano yacooko mipati amisyoonto. Eelo kaka aaba bakwesu bone bakakkomana kuzyiba kuti bantu banji bakagwasyigwa amilimo yabo! Zyoonse eezyi zyakacitika akaambo kakuti kabacili bakubusi, bakakutambula kutamba kwaluyando kwa Jehova kwakuti bamubelekele camoyo woonse.—Kol. 3:23.

Mazuba aano, ba Lowell, ba Richard alimwi aba Ramon babelekela antoomwe alimwi kuofesi yamutabi mu Selters, ku Germany. Cilausisya kuti ba Bill bakafwa mu 2010 kabali bapainiya baalubazu ku United States. Cilongwe caalubazu camyaka iitandila ku 60 akati kabakwesu bone cakanyonganizyigwa alufwu. Pele Leza wesu, Jehova talubi balongwe bakwe. Tulakonzya kuba masimpe kuti mubulelo bwa Bwami bwakwe, cilongwe ca Banakristo icakanyonganizyigwa alufwu kwaciindi cisyoonto, ciyakubukulusyigwa.

Kakuceede ciindi cisyoonto kuti bafwe, Ba Bill bakalemba kuti: “Mucilongwe cesu camyaka iili 60, tandikonzyi kuyeeya notwakajisi manyongwe. Cilongwe cesu cali cintu caalubazu kapati kulindime lyoonse.” Kumajwi aaya balongwe babo botatwe kabajisi makanze aakuzumanana mucilongwe cabo munyika mpya, bakayungizya kuti: “Lino notwatalika.”

[Bupanduluzi buyungizidwe]

[Majwi aakwelelezya sikubala aali apeeji 18]

Lukkomano ndobakajana mumulimo wabo lwakasinizya kulimbabo kuti Jehova ulizyi kabotu lyoonse

[Majwi aakwelelezya sikubala aali apeeji 21]

“Mucilongwe cesu camyaka iili 60, tandikonzyi kuyeeya notwakajisi manyongwe”

[Cifwanikiso icili apeeji 17]

Kuzwa kulumwensyi kuya kululyo: ba Richard, ba Lowell, ba Ramon, aba Bill bakaba balongwe ku Cikolo ca Gileadi

[Zifwanikiso izili apeeji 18]

Atala: Ba Ramon kabali mukkilasi kusololela Cikolo Camulimo wa Bwami; kululyo: Ba Richard kababeleka amuncini wiitwa kuti Addressograph ku Bbeteli mu Wiesbaden

[Zifwanikiso izili apeeji 19]

Atala: Mukwesu Frost (kululyo) alimwi abamwi ciindi naakaswaide Mukwesu Knorr (kulumwensyi); kululyo: Kabali mukulyookezya ku Switzerland mu 1952

[Cifwanikiso icili apeeji 20]

Kuzwa kulumwensyi kuya kululyo: Ba Richard, ba Bill, ba Lowell alimwi aba Ramon baswaangana ku Selters ciindi mayake mapya aamutabi naakali kwaabwa mu 1984

[Cifwanikiso icili apeeji 21]

Kuzwa kululyo kuya kulumwensyi: Ba Ramon, ba Richard alimwi aba Lowell